Mareferensiya e Urongwa we Musangano Basa Redu uye Kurarama
MAVHUVHU 6-12
UPFUMI UNOBVA MU SOKO RA MWARI | DHEUTERONOMIYO 33-34
“Psvakai Rudziiriro mu Muoko dza Djehovha ‘Dzisina Mugumo’”
it-2 paji. 77
Djeshuruni
Zina re rukudzo re Israeri. Pa Septuaginta ye Grego, soko rokuti “Djeshuruni” rinoturikirhwa kuti “mudiwa.” Irona raiedzurira Aisraeri kuti ainga ari anhu akapinda pacitenderano na Djehovha, uye raiaedzurirawo kuti aidikana kugara anhu akagondeka kaari. (Dhe 33:5, 26; Isa 44:2) Pana Dheuteronomiyo 32:15, zina rokuti Djeshuruni rinoseenzeswa pakushora. Pane kurarama maererano no zina rakanakisisa rokuti Djeshuruni, dzinza re Israeri rakagara rakaoma musoro, rakashoropodza Uya wainga ari Musiki no Mupukunyusi wawo.
rr paji. 120, bhokisi
Rubetso kuti Timuke
Zvakanaka kuedzurira zvakabhuiwa na Mozesi mu mazana e makore asati aguma mazuwa a Ezekieri. Iyena akabhuya kuti Djehovha aana basi simba rokubetsera aseenzi ake akagondeka, asiwo ano cido cokuzviita. Mozesi akatara kuti: “Mwari I mbuto ye kutizira kubvira kare kare, muoko dzake dzisina mugumo dziri pasi pako.” (Dhe. 33:27) Tingagonda hedu kuti, kana tikapsvaka rubetso ra Djehovha pa nguwa dzinoshupha, iyena acakanda ‘muoko dzake pasi pedu’ no rudo uye acatibetsera kuti tikwanise kuima.—Eze. 37:10.
w11 9/15 paji. 19 ndi. 16
Gogomai Mecishingirira
Kuita hingana Abrahamu, Mozesi aazi kuona kudzadzika ko zvipikirhwa zva Mwari pa nguwa yaairarama. Aisraeri paainga aapadhuze kuti apinde mu Nyika Yakapikirhwa, Mozesi akabvunzwa kuti: “Ucaona nyika yakhona no kure, asi aupindi mu nyika yandicapasa ana e Israeri.” Izvi zvakaitika ngokuti pa nguwa shomanani yadarika, Mozesi na Aroni anga akanyangadzirhwa Aisraeri nge ndaa yomusikazwa wawo, izvi zvakaita kuti awona aite ‘zviro zvisikazi kunaka kuna Mwari pakati pe Aisraeri pa mvura ye Meribha.’ (Dhe. 32:51, 52) Mozesi wakanyangadzwa nazvo here kana kugara no bundu? Haiwa. Pane kudaro akakomborera Aisraeri uye akapedzesa eciti: “Unopfara iwewe Israeri! Ndiyani akaita hingana iwewe, dzinza riri kupfadzwa no kuponeswa na Djehovha, Uya anokudziirira hinga nhoo uye hinga supada yako inokudzwa?”—Dhe. 33:29.
Upfumi uri mu Soko ra Mwari
it-2 paji. 405 ndi. 3
Mozesi
Mozesi paakafa ainga ano makore 120. Recida kubhuya ngezve kubamba kaainga acakaita, Bhaibheri rinoti: “Madziso ake ainga aciri kuona uye ainga acakabamba.” Iyena akaigwa na Djehovha pa mbuto isikaziikanwi dakara na nyamasi uno. (Dhe 34:5-7) Djehovha pamweni wakaita izvi kuti Aisraeri asabathwe no murau we kunamata ke manyepo we kuita kuti guwa ra Mozesi rigare mbuto ye kunamatira.
MAVHUVHU 13-19
UPFUMI UNOBVA MU SOKO RA MWARI | DJOSHUWA 1-2
“Zvamungaita Kuti Zviro Zvimuhambirei Zvakanaka”
w13 1/15 paji. 8 ndi. 7
Shingai—Djehovha Anemwi!
Kuti tigare no ushingi wokuita kuda ka Mwari, tinodikana kufunda Soko rake uye kuzviseenzesa mu upenyu wedu. Djoshuwa wakakohomedzeswa kuti aite izvona paakagadzwa kuti atungamirire Aisraeri. Djehovha akamubvunza kuti: “Shinga basi, ubambe, unyase kucengeta mutemo wese wawakapaswa no museenzi wangu Mozesi. . . . Bhuku iri ro Mutemo aridikani kubuda pa muromo pako, unodikana kurierenga no izwi riri pasi usiku no masikati, kuti unyase kucengeta zvese zvakatarhwa mariri, ngokuti kana ukadaro zviro zvicakuhambira zvakanaka uye ucaita zviro no ungwaru.” (Djos. 1:7, 8) Djoshuwa wakanyasa kutondoedza mupango uu uye ‘zviro zvakamuhambira zvakanaka.’ Kana isusu tikaitawo zvimwezvo, ticabambirira kugara no ushingi uye ticabudirira mu basa ra Mwari.
w13 1/15 paji. 8 ndi. 7
Shingai—Djehovha Anemwi!
Pa nguwa inonetsa yatiri kurarama ino, zvinoti shuphei kurarama maererano no zvinodiwa na Mwari. Asi atiripi tega. Mwari anesu. No Mwana wake, Musoro we Ungano anesuwo. Uyezve tino hama dzinodarika 7 mirionji dziri mu nyika yese. Pamwepo nawo, tinorumbwa tecipangidza kutenda no kuziisa masoko akanaka, tecirangarira tsamba ye gore ra 2013: “Shinga, ubambe. . . . Djehovha Mwari wako anewe.”—Djoshuwa 1:9.
Upfumi uri mu Soko ra Mwari
w04 12/1 paji. 9 ndi. 1
Mafundo Makuru Anobva mu Bhuku ra Djoshuwa
2:4, 5—Ngei Rakabhi aazi kubhuya masoko e zvirokwazvo ku anarume ainga ecipsvaka avhevhi? Rakabhi wakadziirira avhevhi, ecikanda upenyu wake pangozi ngekuti wainga anokutenda muna Djehovha. Ndiyo ndaa iyena wainga asikabambidzirhwi kupasa masoko ari pamenhe nge zve avhevhi ku anarume aida kuitira anhu a Mwari zviro zvakashata. (Mateu 7:6; 21:23-27; Juau 7:3-10) Zve zvirokwazvo, Rakabhi wakazwi “munatsi nge ndaa ye mabasa”, kubatanidza zvaakaita pakutsotsa atumwa a mambo.—Tiyago 2:24-26
MAVHUVHU 20-26
UPFUMI UNOBVA MU SOKO RA MWARI | DJOSHUWA 3-5
“Djehovha Anokomborera Zviito Zvedu zve Kutenda”
it-2 paji. 139
Djordhani
Kajinji, dii re Djordhani pasi pe bahari re Garireya rakadzika mametro anokwana 1 dakara 3 uye rakapamhama ma metro anokwana 27 kuguma ku 30. Asi mu nguwa ye marimo, murambo we Djordhani unodzara nokumuceto kawo uye unonyanya kupamhama no kudzika. (Djos 3:15) Mu nguwa ye kudzara ke mvura, zvaishupha kuti Aisraeri, anarume, anakadzi no ana adarike murambo we Djordhani nyanye-nyanye kusiripi dhuze ne Djeriko. Mvura ipona inogogoma maningi zvekuti mazuwa e kupedzesera ano, anhu aisambirira akakukurhwa no mvura. Ngo kudaro, Djehovha akaita cishamiso cokugura murambo we Djordhani zveciita kuti Aisraeri akwanise kubira no pakaoma. (Djos 3:14-17) Mazana e makore aa adarika, cishamiso cakaezana cakaitika kuna Eriya, paainga ari na Erizeu uye kamwe na Erizeu ari ega.—2Mad 2:7, 8, 13, 14.
w13 9/15 paji. 16 ndi. 17
Pfarirai Zviedzuriro zva Djehovha
Zviito zve kutenda zvinotibetsera kudini kuti titutsire kugonda kedu na Djehovha? Rangarirai nge zve nyaya iri mu Bhaibheri ye kupinda ke Aisraeri mu Nyika Yakapikirhwa. Djehovha ainga akapasa nhungamiriro apristi aithwara areka ye citenderano kuti ahambe ecipinda mu Murambo we Djordhani. Asi, paainga aakuda kuguma, Aisraeri akaona murambo wakhona wainga wakadzara nokumuceto kawo nge ndaa ye mvura yainga yanaya. Ngazvipi zvaakaita? Akagara kumuceto ke murambo oimira ke masumana kana mwedzi kuti mvura iphwe here? Haiwa, akanyasa kugonda na Djehovha uye akatondoedza nhungamiriro dzake. Cinyi cakazoitika? Nyaya yakhona inoti: “Mirenje dze apristi pedzakandotsika mu mvura, murambo wakaima kuerera, . . . uye apristi akaima pakati pe murambo wainga usina mvura padhuze ne Djeriko amweni ese ecibira.” (Djos. 3:12-17, Contemporary English Version) Cimborangarirai kupfara kaakaita kuona mvura yese yainga inosimba isikacaereri! Zve zvirokwazvo, kutenda ke Aisraeri muna Djehovha kakabambiswa ngekuti akagonda nhungamiriro dzake.
w13 9/15 paji. 16 ndi. 18
Pfarirai Zviedzuriro zva Djehovha
Zvirokwazvo kuti Djehovha aaiti cishamiso hingana ici ku aseenzi ake mazuwa ano, kunyazi zvakadaro iyena unoakomborera nge miitiro yawo yekutenda. Mwiya mucena wa Mwari unotibetsera kuti tiite basa redu re kuparidzira masoko akanaka e Umambo mu nyika yese. Uye Mupupuri mukuru wa Djehovha, Djesu Kristu, wakathembesa afundi ake kuti waizoabetsera pa basa iri rinodikanwa maningi: “Hino endai kune anhu e madzinza ese, afundisei kuti agare afundi angu . . . Uye edzurirai kuti ndinonga ndinemwi mazuwa ese dakara pakuguma ke nyika.” (Mt 28:19, 20) Apupuri a Djehovha akawanda pamweni akanyararisa asi anoparidzira anhu aasikazii ngekuti mwiya mucena wa Mwari unoapasa ushingi.—Erengai Pisarema 119:46; 2 Akorinti 4:7.
Upfumi uri mu Soko ra Mwari
w04 12/1 paji. 9 ndi. 2
Mafundo Makuru Anobva mu Bhuku ra Djoshuwa
5:14, 15—Ndiani wainga ari “mukuru we anyahondo a Djehovha”? Mukuru we anyahondo wakaenda koobambisa Djoshuwa pakatanga kutorhwa Nyika Yakapikirhwa pamweni wainga ari “Soko”—Djesu Kristu paainga asati auya pasi pano. (Juau 1:1; Dhanyeri 10:13) Zvinobambisa maningi kuziya kuti Djesu Kristu ari pamwepo no anhu a Mwari nyamasi uno, uye kuti ari kurhwa no simba hondo yo mwiya.
MAVHUVHU 27–CIKUNYANA 3
UPFUMI UNOBVA MU SOKO RA MWARI | DJOSHUWA 6-7
“Siyanai no Zviro Zvisina Basa”
w10 4/15 paji. 20 ndi. 5
Siyai Kuringira Zviro Zvisina Basa!
Mazana e makore aa adarika, madziso e Muisraeri umweni waizwi Akani akamuitisa kuti abe zviro zve muthaundi re Djeriko rainga rakundhwa. Djehovha ainga aabvunza kuti zviro zvese zvemo zvaidikana kuparadzwa, kunza ke zviro zvimweni zvaidikana kuendeswa ku upfumi wa Djehovha. Aisraeri akangwadzwa kuti: “Tambirai kure no zviro zvinodikana kuparadzwa, kuti musagare no cido nazvo” uye mopedzesera ngo kuzviba. Hino, ngo musakazwa wa Akani, Aisraeri ese akakundhwa mu thaundi re Ai, uye ajinji awo akapera kufa. Akani wakazotendera kuba kaakaita mu masure mekubathwa. Iyena wakati, “Pendakaona zviro izvi, ndakazvida uye ndozvitora.” Cido ce madziso ake cakaita kuti iyena aparadzwe, “pamwepo no zviro zvake zvese.” (Djos. 6:18, 19; 7:1-26) Akani wakagara no cido mu mwoyo make cekuda zviro zvakarambidzwa.
w97 8/15 paji. 28 ndi. 2
Ngei Tecidikana Kududza Zviro Zvakashata Zvinonga Zvaizwa?
Cikonzero cimweni cinoita kuti tirekete pamhene zviro zvakashata zvinonga zvaizwa nge cekuti zvinoita kuti ungano irumbwe yakaceta. Djehovha ndi Mwari wakacena uye mucena. Anoda kuti ese anomunamata agare akacena pakunamata no mu maitiro. Soko rake rakafemerhwa rinokohomedzesa kuti: “Hinga ana anopurutana, siyai kutongwa no zvido zvamainga munazvo musati maane uzii, asi garai makacena pa zviro zvese zvamunoita hinga Kucena ka Uya wakamudainzai, ngekuti zvakatarhwa kuti: ‘Munodikana kugara acena, ngekuti inini ndiri mucena.’” (1 Pedru 1:14-16) Anhu anoita zviro zvisikazi kucena kana kuti zvakashata, anokwanisa kusvipisa ungano yese uye zvoita kuti Djehovha asaipfarire, dakara zvagadziriswa kana kuti kubvisa mushaishi wakhona mu ungano.—Ezanisirai na Djoshuwa kapituro 7.
w10 4/15 paji. 21 ndi. 8
Siyai Kuringira Zviro Zvisina Basa!
Akristu e zvirokwazvo anoshaishawo nge ndaa ye zvido zve madziso uye zve nyama, hingana zvinoita anhu amweni ese. Ngo kudaro, Soko ra Mwari rinotikohomedzesa kuti tidzibate pa zviro zvatinoona uye zvatinoda. (1Ako. 9:25, 27; erengai 1 Juau 2:15-17.) Mwanarume munatsi Djobho, waiziya kubatana kakaita kuona ciro no kucida. Iyena wakati: “Ndakaita citenderano no madziso angu. Hino ngei ndingarumbwa ndakaringira mhandwe?” (Djo 31:1) Pane kuramba basi kubata mwanakadzi ngo mushobo usikazi kucena, Djobho wakatoti wainga asikazotenderi kuti ndangariro dzake dzirumbwe dziri pa zviro zvakadaro. Djesu akati ndangariro dzinodikana kurumbwa dzakacena pakusarangarira zviro zvisikazi kucena paakati: “Wese uya anorumbwa akaringira mwanakadzi zvekuti anomusirira atoita useki naye mu mwoyo make.”—Mt. 5:28.
Upfumi uri mu Soko ra Mwari
w15 11/15 paji. 13 mandi. 2-3
Mibvunzo Inobva ku Aerengi
Mu nguwa dze kare, kutenderedza rainga riri zano rakadjairika pakukunda thaundi rino muru. Pasinei nokuti thaundi rakhona rakatenderedzwa ke nguwa yakareba kudini, arhwisi aitora upfumi we thaundi rakhona, kubatanidza zvekurhya zvinonga zvasara. Asi, aceri e mapuwe akaona zvekurhya zvakawanda kumathuku e ku Djeriko. Nge zve nyaya ii, revhista yakazwi Biblical Archaeology Review inoti: “Kutunhudzira pa midziyo ye dongo, pakaonekawo zvekurhya zvakawanda mu mbuto yainga ino thandi re Djeriko. . . . Aceri e mapuwe mu palestina akatara kuti izvi azvisonyanyi kuitika. Pamweni kudai akaona jaro imwe kana kuti mairi e zvekurhya, asi kuona zvekurhya zvakawandisa azvisoitiki manga-manga.”
Maererano no nyaya ye Bhaibheri, Aisraeri ainga ano zvikonzero zvakanaka zvekuti asatore zvekurhya zve Djeriko. Awona ainga atambira nhungamiriro kubva kuna Djehovha ye kuti asadaro. (Djos. 6:17, 18) Aisraeri akarhwisa thaundi re Djeriko mu nguwa ye marimo, pasure pekuti abva kukorora, zvekurhya pe zvainga zvakawanda. (Djos. 3:15-17; 5:10) Kuonekwa kakaita zvekurhya zvakawanda ku Djeriko kunopangidza kuti Aisraeri akatenderedza thaundi rakhona ke nguwa doko hingana zvinorekethwa nge Bhaibheri.
CIKUNYANA 4-10
UPFUMI UNOBVA MU SOKO RA MWARI | DJOSHUWA 8-9
“Zvatinofunda Kubva ku Adjibhiyoni”
it-1 paji. 1057
Djibhiyoni
Zvitenderano na Djoshuwa. Mu nguwa ya Djoshuwa, Djibhiyoni yaigarhwa no Ahivhi, rimwe re madzinza masere e AKanani aida kuparadzwa. (Dhe 7:1, 2; Djos 9:3-7) Adjibhiyoni aidaidzwa kuti Aamori, ngekuti zina iri rinosenzeswa kureya AKanani ese. (2Sa 21:2; ezanisirai Ge 10:15-18; 15:16.) Kusiyana no AKanani amweni, Adjibhiyoni akaona kuti kunyazi no masurudado awo no kukura ke thaundi rawo, awona aisakwanisapi kurhwisa Aisraeri ngekuti Djehovha aiarhwira. Ngo kudaro, pasure pe kuparadzwa ke thaundi re Djeriko no Ai, anarume e Djibhiyoni, pamweni eciimiririra mathaundi matatu amweni e Ahivhi e ku Kefira, Bheeroti, ne Kiriyati-jearimu (Djos 9:17), akatumidza anarume kuna Djoshuwa ku Girigari ecikumbira runyararo. Aimiriri e Adjibhiyoni—akapfeka macira akatsakara no bhutsu dzakatsakara uye ainga ano zvigubhu zve matehwe zve kukandira vhinyu zvakamweka, masakhu akatsakara no pau dzakaoma dzakaita matsekedeswa—akadzipangidza hinga aibva ku nyika iri kure, ngo kudaro ainga asiripi mu gwanza re kurhwisa ke Aisraeri. Awona akaona muoko wa Djehovha pa zviya zvakaitika ku Edjipitu no madzimambo e Aamori, Sihoni uye Ogi. Asi no ungwaru aazi kubhuya zvaizoitika ku Djeriko no Ai, ngekuti masoko akaringana no zvaizoitika ainga asati aguma ku “nyika iri kure” Aisraeri asati atanga kurhwisa. Aimiriri e Aisreri akaongorora uye akatendera zvioneso zvakhona, uye akaita citenderano nawo kuti aasiye ari apenyu.—Djos 9:3-15.
w11 11/15 8 ndi. 14
“Musagonde no Kuzwisisa Kenyu”
Ngekuti tese atizi kukwana—kubatanidza akuru ane eshiperiyensiya—tinodikana kungwarira kuti tisakanganwe kukumbira kutungamirirhwa na Djehovha patinoita zvisananguro. Onai zvakaizwa na Djoshuwa no anarume akuru e Aisraeri paakagumirhwa no Adjibhiyoni aiita hinga abva ku nyika iri kure. Djoshuwa no amweni ake akaita citenderano ce runyararo no Adjibhiyoni asikazi kumbobvunzisa Djehovha. Kunyazi hazvo Djehovha akazotendera citenderano cakhona, akagara no zvirokwazvo zvekuti kutama kukumbira kaakaita kutungamirirhwa naye kutarhwe mu Matarhwa kuti tibetserhwe nako.—Djos. 9:3-6, 14, 15.
w04 10/15 paji. 18 ndi. 14
“Hambai ne Nyika”
Aimiriri aya akati: “Aranda enyu abva ku nyika iri kure kure, nge mu zina ra Djehovha Mwari wenyu.” (Djoshuwa 9:3-9) Macira awo no zvekurhya zvawo zvaiita hinga kuti atobvadi kure, asi zve zvirokwazvo Djibhiyoni yainga iri makirometro anokwana 30 kubva ku Girigari. Aa agara no zvirokwazvo, Djoshuwa no macinda ake akaita citenderano ce ushamwari no Adjibhiyoni no mathaundi ainga ari padhuze nawo airhya ese no Djibhiyoni. Kucengedzera kakaita Adjibhiyoni rainga riri gwanza rekuti asauraiwe basi here? Kusiyana no izvi, zvaipangidza kuti aida kuzirhwa usisi na Mwari we Aisraeri. Djehovha akatendera kuti Adjibhiyoni agare “atemi e huni no aceri e mvura ye ungano no ye artari ya Djehovha,” eciendesa huni dze artari ye zvibayiro. (Djoshuwa 9:11-27) Adjibhiyoni akarumbwa ecipangidza kuti aida kurumbwa eciita mabasa akaterera pakuseenzera Djehovha. Zvingaita hinga kuti amweni awo ainga ari Anetimini akahwirira ku Bhabhironi akaseenza pa tabhernakuro yanga yawakwazve. (Esd 2:1, 2, 43-54; 8:20) Tinokwanisa kuteedzera marangariro awo ngo kuedza kurumbwa tiino runyararo na Mwari uye kuda kuita kunyazi mabasa akaterere pakumuseenzera.
Upfumi uri mu Soko ra Mwari
it-3 mapaji. 221-222
Kuturika
Pa mutemo wakapaswa Aisraeri na Djehovha, ashaishi amweni aiturikwa pa mutanda pasure pekuti auraiwa hinga “akatukwa na Mwari,” okandwa pamberi pe anhu hinga muezaniso we ngwadzo. Mufi wakaturikwa waidikana kubviswa pa mutanda okotswa zuwa risati rabira; kumusiya pamutanda usiku wese kaizosvipisa mavhu akapaswa Aisraeri na Djehovha. (Dhe 21:22, 23) Israeri yaitondoedza mutemo uu kunyazi wauraiwa wakhona asiripi Muisraeri.—Djos 8:29; 10:26, 27.
CIKUNYANA 11-17
UPFUMI UNOBVA MU SOKO RA MWARI | DJOSHUWA 10-11
“Djehovha Anodziirira Anhu Ake”
it-1 paji. 54
Adhoni-zedheki
Mambo we ku Djerusarema mu nguwa ye kukunda ke Aisraeri Nyika Yakapikirhwa. Adhoni-zedheki wakabatana no madzimambo amweni madoko e kumabirira ke Djordhani kuti arhwise Djoshuwa. (Djos 9:1-3) Kunyazi zvakadaro, Ahivhi anogara ku Djibhiyoni akaita citenderano ce runyararo na Djoshuwa. Pakuda kuphanica Djibhiyoni nge izvi zvaakaita, Adhoni-zedheki wakabatanidza masurudado ake no e madzimambo amweni arongomuna e Aamori uye akatenderedza Djibhiyoni otanga kuirhwisa. Kuponeswa kunoshamisa ke Adjibhiyoni na Djoshuwa uye kukundwa kakaizwa masurudado aya ainga akabatana, kakaita kuti madzimambo mashanu atizire ku Makedha kaakazobatirhwa mu bako. Djoshuwa pacake akauraya Adhoni-zedheki no madzimambo amweni arongomuna pamberi pe masurudado ake, oaturika pamatanda. Mitumbi yawo yakazokhandirhwa mu bako makazogara guwa rawo.—Djos 10:1-27.
it-3 paji. 538
Masanza
Akaseenzeswa na Djehovha. Nguwa dzimweni Djehovha akaseenzesa Masanza pakudzadzisa zvaakabhuya uye pakupangidza simba rake rakakura. (Pis 148:1, 8; Isa 30:30) Masanza akatanga kutarhwa nge zvawo pa dambudziko re cinomwe ku Edjipitu ye kare, apo Djehovha paakaparadza zvinomera, miti, anhu, zvinyama no minda, kusiya basi Aisraeri mu nyika ye Gosheni. (Eki 9:18-26; Pis 78:47, 48; 105:32, 33) Padarika cinguwa, mu Nyika Yakapikirhwa Aisraeri ecitungamirirhwa na Djoshuwa, akabetsera Adjibhiyoni ainga akatendererhwa no mubatanidzwa we madzimambo mashanu e Aamori. Djehovha akaseenzesa masanza akakura pakurhwisa Aamori. Pa nguwa iyona akawanda akafa nge ndaa ye masanza kupinda akafa pa hondo no Aisraeri.—Djos 10:3-7, 11.
w04 12/1 paji. 11 ndi. 1
Mafundo Makuru Anobva mu Bhuku ra Djoshuwa
10:13—Cishamiso cakadaro cinokwanisika kudini? “Pane ciro cingashuphira Djehovha,” Musiki we denga ne nyika? (Genesi 18:14) Kana ecida, Djehovha anokwanisa kuonerera kutenderera ke nyika zvekuti zuwa no mwedzi zvinoita hinga kuti zviri pa mbuto imweyo kana zvecionekwa no munhu uri pasi pano. Kana kuti anokwanisa kukhonesa kudjeka ke zuwa ne mwedzi kuti zvirumbwe zvecidjekesa ku mbuto yaidikana kugara usiku. Cero mushobo we zvakaitika, “akusati kakamboonekazve zuwa rakadaro” kubvira pakasikwa anhu dakara zvino.—Djoshuwa 10:14.
Upfumi uri mu Soko ra Mwari
w09 3/15 paji. 32 ndi. 5
Mibvunzo Inobva ku Aerengi
Pane mabhuku amweni anodudzwa mu Bhaibheri uye akaseenzeswa pakunyasa kupupurira pamhene zviitiko zve Bhaibheri, asi kunyazi zvakadaro atidikani kuguma pakurangarira kuti awona akafemerhwa na Mwari. Djehovha Mwari akacengetedza mabhuku ese ane “soko ra Mwari wedu,” uye aya ‘acagara nokusikaperi’. (Isa. 40:8) Zvakasanangura Djehovha kuti zvikandwe mu mabhuku 66 e Bhaibheri ratinaro ndizvo kamare zvatinoda kuti ‘tikwanise kubata basa, tigare no zvese zvatinoda pakuita mabasa ese akanaka.”—2Ti. 3:16, 17.
CIKUNYANA 18-24
UPFUMI UNOBVA MU SOKO RA MWARI | DJOSHUWA 12-14
“Teererai Djehovha no Mwoyo Wese”
w04 12/1 paji. 12 ndi. 2
Mafundo Makuru Anobva mu Bhuku ra Djoshuwa
14:10-13. Kunyazi hazvo no makore 85, Karebhi akakumbira basa rinoshupha re kudzingira anhu aigara ku Hebroni. Mbuto yakhona yaigarhwa no Aanaki—anarume akakura maningi. No rubetso ra Djehovha, murhwi uyu wakagara ne basa wakabudirira, uye Hebroni rakagara thaundi re kutizira. (Djoshuwa 15:13-19; 21:11-13) Muezaniso wa Karebhi unotibambisa kusaramba mabasa anoshupha anecokuita no kunamata.
w06 10/1 paji. 18 ndi. 11
Shingiswai no Kutenda uye no Kutya Mwari
Kutenda kakadaro kunorumbwa kecikura. Kunokura patinoseenzesa cokwadi mu upenyu wedu, “patinoraira” kubetserhwa katinoizwa, ‘patinoona’ mhinduro dze minamato yedu uye no makwanza amweni, patinoona kutungamirira kunoita Djehovha upenyu wedu. (Pisarema 34:8; 1 Juau 5:14, 15) Tingakwanisa kugara no zvirokwazvo zvekuti kutenda ka Djoshuwa na Karebhi kakabamba paakaraira kunaka ka Mwari. (Djoshuwa 23:14) Onai izvi: Akapona pa rhwendo re makore 40 ari mu renje, hinga zvainga zvakagondeswa na Mwari. (Numero 14:27-30; 32:11, 12) Akaseenza no simba pakukunda Kanani ke makore matanhatu. Pakupedzesera, akararama ke nguwa yakareba aine uthongo wakanaka uye umwe na umwe wakapaswa nhaka yake. Zve zvirokwazvo Djehovha anopa mubayiro aya anomuseenzera akagondeka uye no ushingi!—Djoshuwa 14:6, 9-14; 19:49, 50; 24:29.
Upfumi uri mu Soko ra Mwari
it-1 paji. 1031
Gebhari
Djehovha akabatanidza “nyika ye Agebhari” ku mbuto dzainga dzecida kukundwa no Aisraeri mu mazuwa a Djoshuwa. (Djos 13:1-5) Asi, nge ndaa ye kusapurutana, Israeri aizi kuzokunda Gebhari.—Ezanisirai na Djos 23:12, 13.
CIKUNYANA 25-31
UPFUMI UNOBVA MU SOKO RA MWARI | DJOSHUWA 15-17
“Dziirirai Nhaka Yenyu Inokosha”
it-1 paji. 1137 ndi. 6
Hebroni
Sezvo gwitikwiti re Aisraeri raienderera mberi ku kakutsi ke Kanani, agari e Hebroni, kubatanidza mambo wawo (zviri pamhene kuti mutsii wa Hohamu), akaparadzwa. (Djos 10:36, 37) Ngo kudaro, kunyazi Aisraeri ecitungamirirhwa na Djoshuwa akaputsa simba re Akanani, zvese zviri kupangidza kuti awona aazi kusiya masurudado kuti aonerere mbuto iya yaainga akunda. Zviri pamhene kuti Israeri paiikunda ku matii amweni, Aanaki akawhirirazve kugara ku Hebroni, zvoita kuti Karebhi (kana kuti ana a Djudha ecitungamirirhwa na Karebhi) aatorerezve thaundi iri paa padarika cinguwa. (Djos 11:21-23; 14:12-15; 15:13, 14; Ato 1:10) Pekutanga Hebroni yakapaswa Karebhi we dzinza ra Djudha, yozozwi i thaundi re kutizira. Yaiseenzawo hinga thaundi re apristi. Ngo kudaro, “munda we thaundi re [Hebroni]” no agari emo ainga ari nhaka ya Karebhi.—Djos 14:13, 14; 20:7; 21:9-13.
it-2 paji. 1146
Basa re Kubambidzirhwa
Mu nguwa dze Bhaibheri, zvainga zvakadjairika kuseenzeswa ke “basa re kubambidzirhwa” (Heb., mas), uye kajinji aya aikundwa ndiwo aiseenzeswa hinga aranda. (Dhe 20:11; Djos 16:10; 17:13; Es 10:1; Isa 31:8; Mari 1:1) Aisraeri hinga aranda, ainga ari pa basa re kubambidzirhwa ecitungamirirhwa no mashefi Aedjipitu aiadzvinyirira, akawaka zviwako zve Pitomu ne Ramusesi zve kucengetera zvekurhya. (Eki 1:11-14) Zvino, paakapinda mu Nyika Yakapikirhwa, pane kuita zvaakabvunzwa na Djehovha zve kudzingira agari ese e Akanani e mu nyika iyi no kuwaparadza, Aisraeri akaabambidzira kuita mabasa e uranda. Zvakaguma no migumisiro yakashata ye kuita kuti Aisreri anamate anamwari e kunyepa. (Djos 16:10; Ato 1:28; 2:3, 11, 12) Mambo Soromoni akarumbwa ecitora ana e Akanani, kureya Aamori, Ahiti, Aperezi, Ahivhi no Ajebhusi kuti aite basa re kubambidzirhwa re uranda.—1Mad 9:20, 21.
it-1 paji. 416 ndi. 3
Kanani
Kunyazi Akanani akawanda aazi kuparadzwa pakakundwa nyika yo Kanani, zvinoita kubhuya kuti ‘Djehovha akapasa Aisraeri nyika yese yaainga akapikira kuapasa’ uye ‘akaapasa runyararo,’ uyezve ‘apana no soko rimwe haro risikasi kudzadzika pane zvese zvakapikirhwa na Djehovha kune Aisraeri, zvese zvakadzadzika.’ (Djos 21:43-45)
Upfumi uri mu Soko ra Mwari
w15 7/15 paji. 32
Maizviya Here?
Ku Israeri yo kare kainga kune miti dzakawanda hingana zvinobhuya Bhaibheri??
HINGANA zvinobhuiwa no Bhaibheri, mu Nyika Yakapikirhwa mainga mune “miti dzakawanda.” (1Mad 10:27; Djos. 17:15, 18) Asi, ngokuti mazuwa ano ikona akucina miti yakawanda, amweni anodzibvunzisa kuti izvi I zvirokwazvo here.
Bhuku rakazwi A Vida em Israel nos Tempos Bíblicos rinoti “mbuto dzainga dzino miti ku Israeri yo kare dzainga dzakakura maningi kupinda mazuwa ano.”
Maererano no bhuku rakazwi Plantas da Bíblia, nyamasi uno ku mbuto dzimweni dze Israeri akucina miti. Zvinyi zvakaitika? Bhuku rabhuiwa nge zvaro rinoenderera mberi reciti: “Munhu ndiye unosogura miti kuti aone kurima no kupfuya zvipfuyo, uye aone zvokugadzira nazvo nyumba uye kuita huni dzokubikisa nadzo.”