Mareferensiya e Urongwa we Musangano Basa Redu uye Kurarama
JANERO 3-9
UPFUMI UNOBVA MU SOKO RA MWARI | ATONGI 15-16
“Kusagondeka—Ciro Cinoshoreka Maningi!”
w12 4/15 paji. 8 ndi. 4
Kusagondeka—Cimwe ce Zviro Zvinopangidza Mazuwa E Kupedzesera!
4 Kutanga, ngatirekete nge zva Dherira wainga ari mucengedzi, uya wainga atora mwoyo wa Samusoni. Samusoni waida kutungamirira anhu a Mwari pakurhwisana no Afiristiya. Pamweni madzitenzi mashanu e Afiristiya aiziya kuti Dherira wainga asina rudo rakagondeka kuna Samusoni, hino akamudyekera kuti apsvake kuziya kuti simba rake guru raibva papi kuti amuuraye. Nge makharo ake Dherira wakatendera zvaakapaswa, asi wakakonerhwa kuziya kuti simba rake raibva papi uye wakaedza kupsvaka kuda kuziya kanokwana kuita katatu. Asi iyena wakandorumbwa ecimubambidzira uye ‘ecimushupha nge masoko ake nguwa dzese’. Pakupedzesera, “mwiya wake wakaremba dakara pa kuda kufa”. Hino iyena wakamubvunza kuti tsisi rake rainga risati rambocingwa uye kuti kana rikacingwa, waizopera simba. Paakazviziya, Dherira wakaita kuti Samusoni acingwe paainga akawata pa mirenje dzake, uye wakamukanda mu nyara dze azondi ake kuti aite zvaaida naye. (Ato. 16:4, 5, 15-21) Zviro zvakashata maningi! Nge ndaa ye makharo, Dherira wakatengesa munhu waimuda.
w05 1/15 paji. 27 ndi. 5
Mafundo Makuru Anobva mu Bhuku ra Atongi
14:16, 17; 16:16. Kubambidzira ciro nge kuita zve kucema uye kugurunguta kungakwanisa kukanganisa mucato.—Zvierengo 19:13; 21:19.
w12 4/15 mapaji. 11-12 mandi. 15-16
Kusagondeka—Cimwe ce Zviro Zvinopangidza Mazuwa E Kupedzesera!
15 Aya akawakana angarumbwa kudini akagondeka kune umweni wawo? Soko ra Mwari rinoti: “Pfara no mukadzi [kana mwamuna] we udjaha wako” uye “Pfadzwa ne upenyu no mukadzi [kana kuti no mwamuna] waunoda.” (Zvie. 5:18; Mup. 9:9) Mwamuna ne mukadzi paanonga ecicembera, anodikana kuita “zvese zvaanokwanisa” kuti abambise rudo rawo pa zvese zvinodiwa zve muiri uye ne zve mundangariro. Izvi zvinoreya kuti anodikana kugara padhuze pa umwe na umwe, kupedza nguwa yakareba ari ese, uye kuita zviro ari ese pamwepo. Anodikana kukanda ndangariro dzawo pa mucato wawo uye ukama wawo na Djehovha. Kuti azviite, anodikana kufunda Bhaibheri ari pamwepo, kuseenza ari pamwepo mu basa re kuparidzira uye kunamata ari pamwepo kuti Djehovha aakomborere.
RUMBWAI MAKAGONDEKA KUNA DJEHOVHA
16 Muungano mune anhu akaita zvitema zvakakura uye akapaswa mupango “dzinorhwadza maningi, kuti agare ano kutenda kakacena.” (Tito 1:13) Amweni, nge ndaa ye muitiro wawo asikacunyuki akaguma pakudzingwa. Kune “aya akambopangwa”, zvakaabetsera kuti abambe pakunamata. (Ahe. 12:11) Zvakadini kana tino hama kana kuti shamwari yakadzingwa? Kana zvakadaro, tinokwanisa kugara pa muedzo we kusaziya kuti tingagondeka kunani, ku munhu iyena here kana kuti kuna Mwari. Djehovha anonga eciona kuti ticazoita zvinoenderana no mutemo wake we kusama kushamwaridzana ne munhu upi hake wakadzingwa. —Erengai 1 Akorinti 5:11-13.
Upfumi Watinogumira mu Bhaibheri
w05 3/15 paji. 27 ndi. 6
Samusoni Anokunda no Simba Rinobva Kuna Djehovha
Samusoni waindorangarira nge zve kuita cinangwa cake ce kurhwisa Afiristiya. Kugara kaakaita mu nyumba me hure ku Gaza kainga kune cinangwa ce kurhwisa azondi a Mwari. Samusoni wainga asina cinangwa cokuita upombwe, asi waida pokuwata mu thaundi iri re azondi. Wakabuda pa nyumba pe hure iri pakati pe usiku, wakabata musuwo no madziro mairi anoutsigira, wozvithwara oenda nazvo pa musoro pe dunhu rainga riri padhuze no Hebroni, painga pakareba makirometro 60 kubva ipona. Mwari wakatendera ciitiko ici uye wakamupasa simba rokuti aciite.—Atongi 16:1-3.
JANERO 10-16
UPFUMI UNOBVA MU SOKO RA MWARI | ATONGI 17-19
“Kusazwira Mutemo wa Mwari Kunounza Matambudziko”
it-2 paji. 369
Mika
1. Mwanarume we ku Efraimu. Wakaputsa mutemo we cisere we Mitemo Gumi (Eki 20:15), Mika wakaba mare ye parata ya mai ake inokwana kuita 1 100. Iyena paakapupura uye woihwirinza, awona akati: “Ndicapasa Djehovha parata yakhona icibuda mu nyara mangu kuti mwana wangu aiseenzese pakugadzira mufanikiso wakatsetswa uye mufanikiso we simbi. Zvino ndaakuihwirinzira kauri.” Mu masure mekuti iyena wahwirinza parata kuna mai ake, mai ake akatora maparata 200 akaapasa mupfuri we parata, uyo “wakagadzira mufanikiso wakatsetswa no mufanikiso we simbi” izvo zvakazoendeswa mu nyumba ma Mika. Mika, wainga ano “nyumba yainga ino madzimwari,” wakagadzira efodhi no mifanikiso uye wakagadza umwe we ana ake kuti aseenze hinga mupristi wake. Kunyazi hazvo gadziriro ii yaiizwa kuti akudze Djehovha, asi yainga isikazi kunaka, ngekuti waiputsa mutemo wairambidza kunamata mifanikiso (Eki 20:4-6) uye wairerutsa tabhernakuro ya Djehovha uye upristi wake. (Ato 17:1-6; Dhe 12:1-14) Mu masure mazvo, Mika wakatambira Djonatani we dzinza ra Geshoni mwana wa Mozesi mu nyumba make, wakatora mudjaha uu Murevhi kuti agare mupristi wake. (Ato 18:4, 30) Ecikangaidzika iyena wakagutsikana ndizvo, Mika wakati: “Zvino ndaakuziya kuti Djehovha acandiitira zvakanaka.” (Ato 17:7-13) Asi Djonatani wainga asiripi we dzinza ra Aroni, nge kudaro wainga asikasisiri kuita basa re upristi, izvi zvaitunhudzira cishaishi ca Mika.—Nu 3:10.
it-2 paji. 369 ndi. 3
Mika
Nguwa doko yakazoteera, Mika no cikwata ce anarume amweni akateera Adhani. Paakaabata akamubvunzisa kuti zvinyi zvainga zveciitika, Mika wakati: “Matora anamwari angu andakagadzira, matorazve mupristi. Cinyi candasara naco?” Na izvi ana Adhani akaziisa kuti kudai Mika waizorumbwa eciateera aizomurhwisa. Paakaona kuti Adhani ainga anosimba kupinda anhu ake, Mika wakahwirira kumba. (Ato 18:22-26) Adhani akarhwisa uye akapisa thaundi re Raishi, pedzepo ogadzira thaundi re Dhani pa mbuto yaro. Djonatani no ana ake akagara apristi Adhani, awo “akacengeta mifanikiso dzakatsetswa dza Mika, dzaainga agadzira, aidziimisa mazuwa ese apo nyumba ya Mwari we zvirokwazvo [tabhernakuro] yakarumbwa iri ku Siro.”—Ato 18:27-31.
Upfumi Watinogumira mu Bhaibheri
w15 12/15 paji. 10 ndi. 6
Kuturikirhwa ke Bhaibheri Kunopangidza kuti Soko ra Mwari Ripenyu
6 Upupuri unopangidza kuti zina ra Mwari rinodikana kurumbwa riri mu Bhaibheri uri kurumbwa we citunhudzirika. Shanduro yeNyika Itsva ya 2013 yakagadziriswa yaa no zina ra Mwari pa mavhersikuro 6 ainga asina zina iri mu shanduro ya 1984, zveciita kuti rioneke imona kanokwa 7 216. Mavhersikuro amweni mashanu ndi 1 Samueri 2:25; 6:3; 10:26; 23:14, 16. Zina ra Mwari rakahwirinzwa mu mbuto idzi ngekuti rinooneka mu Mipumburu dze Bahari Rakafa, awo akatarhwa makore anodarika 1 000 matarhwa e masarote e ciHebheru asati atarhwa, aona ainga ano zina iri mu mavhersikuro aya. Zina iri rakahwirinzwawo pana Atongi 19:18 ngekuti kukwarakwatiswa ke Matarhwa e kare aipangidza kuti rainga riripo pa vhersikuro ii.
JANERO 17-23
UPFUMI UNOBVA MU SOKO RA MWARI | ATONGI 20-21
“Rumbwai Mecibvunzisa Djehovha”
w11 9/15 paji. 32 ndi. 2
Munokwanisa Kuita Hinga Finiyasi Here Zviro Pazvinonga Zvecishupha?
Mukadzi we cipiri we Murevhi umweni wakadziphwa dakara pa kufa no anarume e ku Gibhiya, e dzinza ra Bhenjami, zvikazoguma pakuti madzinza amweni aronge kuenda koorhwisa Abhenjamini. (Ato. 20:1-11) Akanamata ecikumbira rubetso ra Djehovha paainga asati aenda kooarhwisa, asi akanyiswa kairi kese uye akawanda akafa. (Ato. 20:14-25) Awona aizorangarira kuti minamato yawo aizi kudairhwa here? Djehovha aidadi zve zvirokwazvo kuaona ecihwirinzira cakashata no cakashata here?
w11 9/15 paji. 32 ndi. 4
Munokwanisa Kuita Hinga Finiyasi Here Zviro Pazvinonga Zvecishupha?
Izvi zvinotifundisei? Matambudziko amweni angamuka muungano anorumbwa aripo kunyazi ne minamato uye kuseenza no simba kunoita akuru kuti aagadzirise. Kudai izvi zvikaitika akuru anodikana kuedzurira masoko a Djesu e kuti: “Rumbwai mecikumbira [kana kuti mecinamata], uye mucapaswa; rumbwai mecipsvaka, uye mucaona; rumbwai mecigogodza, uye mucafunungurirhwa.” (Ruka 11:9) Kunyazi munamato ukaita hinga wanonoka kudairhwa, aimiriri angakwanisa kugara no rugondo rekuti Djehovha acadaira panguwa kwayo.
Upfumi Watinogumira mu Bhaibheri
w14 5/1 paji. 11 mandi. 4-6
Maizviziya Here?
Zvekukhandira nazvo mapuwe zvaiseenzeswa kudini mu hondo dze kare?
Cekukhandira naco mapuwe ndico cakaseenzeswa ndi Dhavhidhi kuti auraye Goriyati. Dhavhidhi wakafundira kuciseenzesa paainga aciri muushi.—1 Samueri 17:40-50.
Zvekukhandira nazvo mapuwe zvinooneka pa mifanikiso ye Aidjipitu no ye Asiriya e mu nguwa inorekethwa mu Bhaibheri. Cekukhandira naco mapuwe ici cainga cino borosa re doo kana kuti re djira raisungwa ne mapote mairi. Munhu waicikhandira waikandemo buwe rakazverera uye rakaita cibhora rakakura hingana raranji, recirema makiru anokwana 250 garama. Waizocitenderedza pedzepo orekeredza bote rimwe basi, zvoita kuti buwe rinonga ririmo riende no simba guru kune ciro caaida kufura.
Pano mapuwe akawanda akaonekwa paicerhwa pasi ku Oriente Medio aiseenzeswa pakufurana nawo mu hondo dze mu nguwa ye kare. Arhwi ainga agara no basa aikwanisa kukhandira mapuwe aigogoma makirometro anokwana kuita 160 dakara 240 pa nguwa imwe basi. Akwarakwatisi aazi kuguma pakuziya kuti cekukandira naco mapuwe cinokwanisa kuuraya hinga zvinoita uta, asi icona caitokwanisa kuuraya.—Atongi 20:16.
JANERO 24-30
UPFUMI UNOBVA MU SOKO RA MWARI | RUTE 1-2
“Pangidzai Rudo Rakagondeka Nguwa Dzese”
w16.02 paji. 14 ndi. 5
Teedzerai Shamwari dze Padhuze dza Djehovha
5 Rute waikwanisa kurangarira kuti zviri nane hake kuhwirira ku Moabhi—ngekuti ndikona kainga kuna mai ake ne hama dzake, zvekuti aikwanisa kumutora ogara naye. Ku Moabhi ndikona kaainga akakurira uye ndikona kainga kuri kumba kake. Hino wainyasa kuziya tsika dzeyo, mureketero uye anhu eyo. Naomi aazi kugondesa Rute kuti waizoona zvakawanda ku Bhetrehema. Iyena waitothyira kuti wainga asikazokwanisi kupsvakira Rute mwamuna kana kuti pokugara. Ndiyo ndaa, wakabvunza Rute kuti ahwirire ku Moabhi. Rute wakazoitei? Onai musiyano uri pakati pa Rute na Orpa, uwo wakahwirira “ku anhu ake uye kuna anamwari ake.” (Rute 1:9-15) Rute waidawo kuhwirira kuna anamwari ake e manyepo ainamathwa nge anhu e ku Moabhi here? Haiwa, wainga asikadi.
w16.02 paji. 14 ndi. 6
Teedzerai Shamwari dze Padhuze dza Djehovha
6 Zvinoita hingana kuti Rute wakafunda nge zva Djehovha Mwari kubva ku mwamuna wainga afa kana kuti kuna Naomi. Djehovha wainga akasiyana no anamwari ainamathwa ku Moabhi. Rute waiziya kuti waidikana kuda Djehovha uye kumunamata. Asi kuziya izvi kainga kusikazi kukwana. Rute waidikana kusanangura kuti oseenzera Djehovha here kana kuti anamwari e ku Moabhi. Rute wakaita cisananguro cakanaka. Iyena wakabvunza Naomi kuti: “Anhu enyu acagarawo anhu angu, uye Mwari wenyu acagarawo Mwari wangu.” (Rute 1:16) Kurangarira nge zve rudo rainga rina Rute kuna Naomi zvinotibaya mwoyo, asi cinonyanya kukosha kuda kaaiita Djehovha. Bhoazi wakazosimba Rute nge ndaa ye kuti wakasanangura kutizira mumabaphiro a Djehovha. (Erengai Rute 2:12.) Zvakarekethwa ndi Bhoazi zvinotiedzurira cishiri cinoenda mumabaphiro e abereki aco kuti cidziirirhwe. (Pis. 36:7; 91:1-4) Djehovha akadziirira Rute nge mushobo umwewo. Rute wakakomborerhwa nge kutenda kake, uye iyena aazi kumbotsumba nge zve cisananguro caakaita.
Upfumi Watinogumira mu Bhaibheri
w05 3/1 paji. 27 ndi. 1
Mafundo Makuru Anobva mu Bhuku ra Rute
1:13, 21—Djehovha ndiye akaita kuti Naomi ashuphirhwe nge upenyu uye kuti abatane no matambudziko here? Haiwa, uye Naomi aazi kumbopumha Mwari nge ciro cakashata kana cimwe haco. Asi, nge ndaa ye zvese zvainga zveciitika kaari, iyena wakarangarira kuti Djehovha ainga ecimurhwisa. Wakazwa shungu uye wakaora mwoyo. Kusiya izvi, mu mazuwa iwona kubara mwana cainga ciri cikomborero cinobva kuna Mwari, uye kusama kubara kaizwi kutukwa. Kusama kugara no azukuru uye ana airi akafa, Naomi pamweni wakarangarira kuti Djehovha ainga amupsverudza.
JANERO 31–FEVRERO 6
UPFUMI UNOBVA MU SOKO RA MWARI | RUTE 3-4
“Munoda Kuziikanwa Kudini?”
w12 10/1 paji. 22 ndi. 5
“Mwanakadzi Wakanaka”
Bhoazi wakareketa no izwi re upfawi uye izvi zvakanyaradza Rute. Iyena wakati: “Djehovha ngaakukomborere, mwana wangu. Wapangidza unaki wako we rudo zviri nane pakupedzesera kudarika pakutanga, nge kusama kuteera madjaha angadai asina caanaco kana kuti akapfuma.” (Rute 3:10) Pari kuzwi “pakutanga” pari kureya kugondeka kakaita Rute paakauya na Naomi ku Israeri uye kumucengeta kaakaita. Paakati “Pakupedzesera” waida kureya pa nguwa ii. Bhoazi wakaona musikana uu ungadai wakapsvakawo mwamuna uciri djaha, ungadai akapfuma kana kuti murombo. Asi iyena waida kuitira zvakanaka haiwa Naomi basi, asi kutobatanidzawo mwamuna wa Naomi wainga afa, kuitira kuti zina romufi uu rirumbwe riripo. Ndiyo ndaa Bhoazi wakabaiwa mwoyo nge kurangarira amweni kakaizwa nge mwanakadzi uu we cidjaha.
w12 10/1 paji. 23 ndi. 1
“Mwanakadzi Wakanaka”
Rute wakapfara maningi kuzwa Bhoazi ecibhuya kuti iyena waiziikanwa no anhu ese hinga “mwanakadzi wakanaka”! Apana mubvunzo kuti cido cake caainga anaco cekuziya Djehovha uye cekumuseenzera ndicona cakaita kuti agare no mbiri ii. Iyena wakaitirawo Naomi no anhu ake unaki wakakura uye waimuzwira unyasha, eicinja kuita zviro uye tsika zvaainga asikazi kudjaira. Kudai tikateedzera kutenda kainga kuna Rute, ticapeta masimba kuti tireremedze amweni uye tsika dzawo. Kana tikadaro, isusuwo ticazwi tiri anhu akanaka.
w12 10/1 paji. 24 ndi. 3
“Mwanakadzi Wakanaka”
Bhoazi akazowaka Rute. Hino, ngano yakhona inoti: “Djehovha akaita kuti abate pa muwiri uye wakabara mwana we mwanarume.” Anakadzi e ku Bhetrehema akatanga kusimba Naomi uye kureketa zvakanaka nge zva Rute ngekuti wainga apangidza kuti uri nane kuna Naomi kudarika ana anomwe. Ngano ii inopangidza kuti mwana wa Rute wakazogara tsekuru a Mambo Dhavhidhi. (Rute 4:11-22) Dhavhidhi akazogarawo tsekuru a Djesu Kristu.—Mateu 1:1.
Upfumi Watinogumira mu Bhaibheri
w05 3/1 paji. 29 ndi. 3
Mafundo Makuru Anobva mu Bhuku ra Rute
4:6—Musudzunuri waikwanisa “kuparadza” nhaka yake nge gwanza ripi re kusudzunura? Kutanga, kudai munhu aizogara murombo akatengesa munda wake we nhaka, musudzunuri waizotenga munda wakhona no mutengo we numero ye makore ainga asara dakara pa Djubheri raiteera. (Revhitiko 25:25-27) Kuita izvona kaizothurudza mutengo we munda wake. Uyezve, kudai Rute waizobara mwana we rume, mwanewo ndiyena waizogara nhaka munda wainga watengwa, pa mbuto pe hama ipi hayo ye padhuze ye musudzunuru.
FEVRERO 7-13
UPFUMI UNOBVA MU SOKO RA MWARI | 1 SAMUERI 1-2
“Dururai Mwoyo Wenyu Kuna Djehovha mu Munamato”
ia paji. 55 ndi. 12
Wakadurura Mwoyo Wake Kuna Mwari Mumunamato
12 Ngekudaro, Ana wakasiira aseenzi ese a Mwari muezaniso wakanaka we kuita munamato. Djehovha anopika anhu ake ne ushamwari kuti arekete naye zvese zvinoashupha akasudzunuka, ecibhuya zvese zvinoarhya mwoyo hinga zvinoita mwana anogonda baba ake ane rudo. (Erengai Pisarema 62:8; 1 Atesaronika 5:17.) Muphostori Pedru wakafemerhwa kuti atare masoko aya anonyaradza nge zve kuita munamato kuna Djehovha: “Mecikhandira zvese zvinomurhyai mwoyo kaari, ngokuti ayena anomucengetai.”—1Pe. 5:7.
w07 3/15 paji. 16 ndi. 4
Maonero Akaita Ana Runyararo
Zvinyi zvatingafunda pa zvese izvi? Patinoita munamato kuna Djehovha nge zve zviro zvinotinesa, tingakwanisa kumubvunza nge zve mazwiro atinoita tecikumbira no mwoyo wese. Kana pasina zviro zvimweni zvatingakwanisa kuita kuti tigadzirise dambudziko rakhona, tinodikana kusiya nyaya yakhona mu nyara dzake. Apana mushobo umweni uri nane watingaita kudarika uu.—Zvierengo 3:5, 6.
Upfumi Watinogumira mu Bhaibheri
w05 3/15 paji. 21 ndi. 5
Mafundo Makuru Anobva mu Bhuku ra Samueri we Kutanga
2:10—Ngei Ana wakanamata kuti Djehovha apase “mambo wake simba” nepoo kainga kusina munhu wainga ari mambo mu Israeri? Nyaya yekuti Aisraeri aizogara na mambo yainga yakarekethwa mu Mutemo wa Mozesi. (Dheuteronomiyo 17:14-18) Mu uphorofiti wake waakareketa paainga aakuda kufa, Djakobo wakati: “Ndonga [cipangidzo ce simba re umambo] aizobudi kuna Djudha.” (Genesi 49:10) Uyezve, maererano na Sara—mbiya we Aisraeri—Djehovha akati: Madzimambo e anhu acabva kaari.” (Genesi 17:16) Hino, Ana wainga ecinamata nge zva mambo we munguwa ye mberi.
FEVRERO 14-20
UPFUMI UNOBVA MU SOKO RA MWARI | 1 SAMUERI 3-5
“Djehovha Anorangarira Aseenzi Ake”
w18.09 paji. 24 ndi. 3
Mwari Ndiye we Masimba ese Asi Anorangarira Zvakanakira Amweni
3 Samueri wakatanga “kuseenzera Djehovha” pa tabhernakuro aciri mwana mudoko. (1Sa. 3:1) Zuwa rimweni Samueri paainga akawata pakaitika ciro cimweni cisikanyanyi kuitika. (Erengai 1 Samueri 3:2-10.) Wakazwa izwi recimudainza. Ecirangarira kuti rainga riri izwi re Mupristi Mukuru Eri, Samueri wakagogoma ecienda kaainga ari akati “Ndiri pano, ngekuti mandidainza.” Eri wakaramba kuti wainga asikazi kumudainza. Pazvakaitikazve kecipiri, Eri wakaziya kuti ndi Mwari ainga ecidainza Samueri. Hino Eri wakamubvunza kuti waidikana kudaira kudini, uye Samueri wakaita izvona kamare. Ngei Djehovha asikazi kuita kuti Samueri amuziye pakutanga? Bhaibheri aribhuyi cikonzero cakhona asi zvakaitika izvi zvinopangidza kuti airangarira nge zva Samueri uyo wainga aciri mwana mudoko. Tinozviziya kudini?
w18.09 paji. 24 ndi. 4
Mwari Ndiye we Masimba ese Asi Anorangarira Zvakanakira Amweni
4 Erengai 1 Samueri 3:11-18. Mutemo wa Djehovha waipangira ana adoko kuti areremedze anhu akuru, maka-maka aya ainga ari akuru akuru (Eki. 22:28; Re. 19:32) Munorangarira kuti zvainga zviri nyore here Samueri ecifumirisa kuenda kuna Eri koomubvunza masoko a Mwari e kutonga? Zviri pamhene kuti haiwa! Nyaya yakhona inobhuya kuti Samueri “waithya koobvunza Eri zvaainga aona.” Asi Mwari akaita kuti Eri aziye kuti ndiyena ainga ecidainza Samueri. Hino Eri wakabvunza Samueri kuti: “[Usandifisire kana] ciro cipi haco pa zvese zvaakubvunza.” Samueri wakapurutana Eri uye “wakazomubvunza zvese.”
Upfumi Watinogumira mu Bhaibheri
w05 3/15 paji. 21 ndi. 6
Mafundo Makuru Anobva mu Bhuku ra Samueri we Kutanga
3:3—Samueri wakawata mu Mbuto Yakacenesesa kamare here? Haiwa, aazi. Samueri wainga ari Murevhi we dzinza re Akoati rainga risiripi re apristi. (1 Makoronika 6:33-38) Hino, wainga asikatenderhwi “kupinda koona zviro zvicena.” (Numero 4:17-20) Samueri waitenderhwa kuguma pa ruwanze re tabhernakuro basi. Zvingaita kuti iyena ndipona paaiwata. Zviri pamhene kuti Eri waiwatawo mu ruwanze irona. Masoko e kuti “painga pane areka ya Mwari” anoda kureya nge zve mbuto yaigara tabhernakuro.
FEVRERO 21-27
UPFUMI UNOBVA MU SOKO RA MWARI | 1 SAMUERI 6-8
“Ndiani Mambo Wamucasanagura?”
it-2 paji. 813 ndi. 1
Umambo wa Mwari
Mambo we Munhu Wakasanangurhwa. Makore anoda kuguma 400 kubva pa nguwa ya Ekisodho uye makore anodarika 800 kubva pakaithwa citenderano ca Djehovha na Mozesi, Aisraeri akakumbira mambo we munhu kuti aatungamirire, hinga zvaiizwa ne madzinza amweni ainga ano madzimambo e anhu. Cikumbiro cawo caipangidza kuti airamba kuti Djehovha aatungamirire. (1Sa 8:4-8) Zvirokwazvo kuti anhu aietsera kuti umambo ugadzwe ndi Mwari maererano no gondeso yaakaita kuna Abrahamu na Djakobo, yamborekethwa nge zvayo. Aona ainga atori ne kariro ye uphorofiti wa Djakobo ari pa mubhedha paainga aakuda kufa uwo waakabvunza Djuda (Ge 49:8-10), mu masoko a Djehovha ku Aisraeri mu masure me kubuda (Ex 19:3-6), maererano ne citenderano ce mutemo (Dhe 17:14, 15), uye Mwari akaita kuti muphorofiti Bharami atare padoko pazvo (Nu 24:2-7, 17). Mai a Samueri Ana awo ainga akagondeka akabhuyawo ngezve kariro ii mumunamato. (1Sa 2:7-10) Zvadaro, Djehovha aazi kunyasa kuziisa “zvakaigika zvicena” nge zve Umambo uye aazi kupangidza kuti ndi riini pawaizogadzwa, kunyazi ngezve kurongwa ke utongi uu—uye kuti waizonga uri we pa nyika here kana kuti kudenga. Hino kainga kuri kuzvikudza kukumbira mambo we munhu.
w11 1/1 paji. 27 ndi. 1
Wakashingirira Kunyazi ne Zviro Zvaimuodza Mwoyo
Onai kuti Djehovha akadaira kudini Samueri paakaita munamato ecibhuya ngezve nyaya yakhona: “Purutana izwi re anhu pa zvese zvaanokubvunza; ngekuti aazi kuramba iwewe, asi aramba inini kuti ndigare mambo wawo.” Masoko aya akanyaradza Samueri asi zvakakumbirhwa no anhu aya zvaisvipisa Mwari Wemasimba ese. Djehovha akabvunza muphorofiti wake kuti aziise Aisraeri matambudziko aaizosongana nawo kudai akatongwa no munhu. Samueri paakaabvunza masoko aya, anhu akandorumbwa eciti: “Haiwa, asi isusu tinoda mambo anotitonga.” Samueri wakapurutana Mwari wake hinga zvaaindoita, wakaenda koodzodza mambo wainga asanangurhwa na Djehovha.—1 Samueri 8:7-19.
w10 1/15 paji. 30 ndi. 9
Kutonga ka Djehovha Kakapangidza Kuti Kainga Kuri ke Unatsi
9 Zviro zvakazoitika zvakapangidza kuti zvainga zvakarekethwa na Djhehovha zvainga zvirokwazvo. Kutongwa na mambo waaiona kaizounzira Aisraeri matambudziko akawanda, maka-maka kana mambo wakhona ari munhu asina kutenda. Tecirangarira nge zvakaitika no Aisraeri, azvishamisi kuti ke makore ese aya atungamiriri e anhu asikazii Djehovha ari kukonerhwa kuita zviro zvinobetsera anhu. Zvirokwazvo kuti amweni e zve matongerhwe e nyika anonamata kuna Mwari kuti akomborere zvaanonga eciedza kuita kuti pagare ne runyararo uye kuti anhu agare zvakanaka, asi Mwari angakomborera kudini anhu asikadzikandi pasi pe utongi wake?—Pis. 2:10-12.
Upfumi Watinogumira mu Bhaibheri
w02 4/1 paji. 12 ndi. 13
Ngei Tecidikana Kubhabhatidzwa?
13 Tinodikana kutanga tatendeuka tisati tabhabhatidzwa hingana umwe we Apupuri a Djehovha. Kutendeuka ciro ce kudzipira cinoizwa no munhu unonga asanangura no mwoyo wese kuteera Djesu Kristu pasina anomubambidzira. Anhu akadaro anoramba upenyu wawo we kare usikazi kucena oshinga kuita zviro zvakanaka mu madziso a Mwari. Mu Matarhwa, masoko e ciito e ciHebheru uye e ciGerego e kuti kutendeuka anoreya kukhona moningira kamapasa gotsi, kutenderera. Ciitiko ici cinoreya kutendeukira kuna Mwari kubva mu gwanza rakashata. (1 Madzimambo 8:33, 34) Kutendeuka kunoda “mabasa anopangidza kucinyuka”. (Zviito 26:20) Kunoda kuti tisiye kunamata ke manyepo, toita maererano no mitemo ya Mwari, uye todzipira kunamata Djehovha basi. (Dheuteronomiyo 30:2, 8-10; 1 Samueri 7:3) Kutendeuka kunoita kuti ticinje marangariro edu, zvinangwa zvedu, uye unhu wedu. (Ezekiyeri 18:31) Isusu “tinotendeuka” kana tikasiya miitiro isikadiwi na Djehovha topfeka unhu upsva.—Zviito 3:19; Aefeso 4:20-24; Akorosi 3:5-14.
FEVRERO 28–MARSO 6
UPFUMI UNOBVA MU SOKO RA MWARI | 1 SAMUERI 9-11
“Pakutanga, Sauro Waidzidodosa uye ari Pakati no Pakati”
w20.08 paji. 10 ndi. 11
Garai Munhu Anodzidodosa Uye Ari pakati no pakati Pakuhamba na Mwari
11 Rangarirai zvakaitika kuna Mambo Sauro. Paainga aciri mudoko iyena waidzidodosa. Waiziya zvaainga asikwanisi kuita uye waitoramba kugara mambo. (1Sa. 9:21; 10:20-22) Asi nokuhamba ke nguwa Sauro wakatanga kudzikudza, uye wakatanga kuita zviro zvaainga asikadikani kuita. Wakatanga kuita izvi mu masure mekugadzwa hinga mambo. Pa nguwa imweni, Sauro wakakasika kutsamwa paaimira muphorofiti Samueri. Pane kuti agonde kuti Djehovha aizorhwira anhu ake, Sauro wakapasa cibairo kunyazi hazvo wainga asikatenderhwi kuita kudaro. Izvi zvakaita kuti Sauro aruze ushamwari wake na Djehovha, uye wakazoruza umambo. (1Sa. 13:8-14) Zve zvirokwazvo, tinodikana kufunda nge muezaniso uu uye tosama kuita zvatisikazi kutenderhwa.
w14 3/15 paji. 9 ndi. 8
Zvatingaita Kuti Tirumbwe Tecidzipira
8 Zvakaitika kuna Mambo Sauro we Israeri zvinotifundisa kuti kudzipira kedu kungakwanisa kupedzesera kakanganiswa nge kurangarira zvakatinakira uye kudzigonda. Sauro waidzidodosa maningi paakatanga kutonga. (1Sa. 9:21) Wakaramba kuphanica Aisraeri ainga areketa kuti wainga asikazi kusisira kugara mambo, kunyazi hazvo ungadai akarangarira kuti wainga ano citenterhwa ce kudziirira basa rake raakapswa na Mwari. (1Sa. 10:27) Mambo Sauro wakatenda kutungamirirhwa no mwiya wa Mwari paakaenda no Aisraeri koorhwisa Aamoni akaanyisa. Mu masure mazvo, wakadzidodosa akaita kuti Djehovha akudzwe nge kuwina kaainga aita.—1Sa. 11:6, 11-13.
w95 12/15 paji. 10 ndi. 1
Aamoni Anhu Akahwirinzira Unaki wa Djehovha no Utsinye
Aamoni akahwirinzira unaki wa Djehovha no utsinye. Djehovha aazi kuramba kuthyithyidzira uku kakashata. “Mwiya wa Mwari wakaseenza no simba muna Sauro paakazwa masoko aya [a Nahashi], wakanyangadzwa maningi.” Ecitungamirirhwa no mwiya wa Mwari, Sauro wakaunganidza masurudado 330 000 akanyisa Aamoni zvekuti apana “kana airi akasara ari pamwepo.”—1 Samueri 11:6, 11.
Upfumi Watinogumira mu Bhaibheri
w05 3/15 paji. 22 ndi. 8
Mafundo Makuru Anobva mu Bhuku ra Samueri we Kutanga
9:9—Cinyi cakakosha pa masoko e kuti “unozwi Muphorofiti wa nyamasi waizwi Muoni kare”? Masoko aya anopangidza kuti ngekuti aphorofita akanyanya kuziikanwa mu mazuwa a Samueri uye pa nguwa ye madzimambo mu Israeri, soko rekuti “muoni” rakatsiiwa no re kuti “muphorofiti.” Samueri unozwi ndiyena muphorofiti we kutanga.—Zviito 3:24.