FUNDO 10
Misangano ye Apupuri a Djehovha Ingamubetserai Kudini?
Makambopikwa ku misangano ye Apupuri a Djehovha here? Kana musati makambopinda mungambothya padoko. Mungakwanisa kudzibvunzisa kuti: ‘Pa misangano ii panoizwei? Ngei misangano iyona yecikosha?’ Mu fundo ino, mucafunda kuti kuungana ne amweni kungakwanisa kumubetsera kuti mukhwedere dhuze na Mwari uye kucabetsera imwimwi wene.
1. Ngei Apupuri a Djehovha eciungana pa misangano?
Onai cikonzero cakarekethwa ne mutari umweni we Bhaibheri cinoita kuti tiungane ne amweni: “Ndicakudza Djehovha diri pakati pe ungano huru.” (Pisarema 26:12) Ndiyo ndaa, Apupuri a Djehovha anopfara maningi nge kuungana. Mu nyika yese, awona anoungana masumana ari ese kuti aembe, anamate uye akudze Mwari. Mu mazuwa amweni pa gore awona anoungana pa misangano mikuru.
2. Mucafundei pa misangano yedu?
Pa misangano, cinangwa cedu ngecekufunda Bhaibheri. Isusu tinoerenga Soko ra Mwari, ‘teciripanganidza zvakadjeka uye kududza zvarinoreya.’ (Erengai Nemiya 8:8.) Nge kupinda misangano imwimwi munofunda Nge zva Djehovha uye unhu wake unoshamisa. Pamunorumbwa meciziya zvakawanda nge zve rudo rake kamuri, imwimwi mucakhwedera dhuze kaari. Imwimwi mucaonawo kuti mungaona kudini upenyu unopfadza.—Isaya 48:17, 18.
3. Mungabetsereka kudini ne kupinda misangano yedu?
Djehovha anotibvunza kuti tinodikana “kurangarirana kuti tipangidzirane rudo no kuita mabasa akanaka, tisikarekeri kuungana kedu.” (Ahebheru 10:24, 25) Pa misangano yedu, mucasongana ne anhu ane rudo re zvirokwazvo, uye awona anopfarira kufunda nemwi zvakawanda nge zva Mwari. Ikona imwimwi mucazwa anhu ecireketa nge zve zviro zvakanaka zve Bhaibheri. (Erengai Aroma 1:11, 12.) Mucasongana no anhu akawaka, akawakwa no asikazi, awona acareketa nge zve kupfara kaari kuita kunyazi no matambudziko aari kusongana nawo. Izvi ndezvimwe zvezvikonzero zvinoita kuti Djehovha ade kuti tiungane nguwa dzese!
FUNDAI ZVAKAWANDA
Fundai kuti zvinyi zvinoizwa pa misangano ye Apupuri a Djehovha uye ngei iyona yecitibetsera.
4. Misangano ye Apupuri a Djehovha
Akristu e pakutanga, aiungana nguwa dzese kuti anamate Djehovha. (Aroma 16:3-5) Erengai Akorosi 3:16, pedzepo cedzai nge zve mubvunzo unoteera:
AKristu e pakutanga ainamata kudini Djehovha?
Nyamasi, Apupuri a Djehovha anounganawo nguwa dzese mu nyumba dzawo dze kunamatira. Kuti muone kuti misangano yawo inoizwa kudini, ridzai VHIDHIYO. Pedzepo, onai foto ye musangano we ungano uye cedzai nge zve mibvunzo dzinoteera.
Zviro zvipi zvakatodzana zvamaona zvinoizwa mu Nyumba yo Umambo ne zvamaerenga pana Akorosi 3:16?
Mu vhidhiyo kana pa foto, ciripozve camaona here cakaringana ne misangano camapfarira?
Erengai 2 Akorinti 9:7, pedzepo cedzai nge zve mubvunzo unoteera:
Ngei misangano ye Apupuri a Djehovha yecipindwa nyore?
Pamwepo ne mufundisi wenyu, onai zviro zvicafundwa pa sumana iyona.
I dii ripi re musangano ramunonyanya kuda?
Maizviziya here?
Mu jw.org, munogumira mbuto uye nguwa inoizwa misangano mu nyika yese.
Misangano yedu inobatanidza mharidzo, makani e kuezanisira uye mavhidhiyo. Misangano inotanga uye inopedzesera ne ngoma uye munamato
Pa misangano anhu anonga aripo anopikwa kuti adairewo
Munhu wese unotambirhwa zvakanaka—anarume, anakadzi, cembere uye ana
Misangano yedu nge ye nyore. Apupuri a Djehovha aaripisi mare kana kuhambisa paratu
5. Zvinoda kupeta masimba kuti mupinde misangano
Cimboonai muezaniso we mhuri ya Djesu. Kuti apinde musangano we pa gore, awona aidikana kuhamba 100 km, kana kuti mazuwa matatu mu mbuto yakaita matunhu kubva ku Nazareta dakara ku Djerusarema. Erengai Ruka 2:39-42, pedzepo cedzai nge zve mibvunzo dzinoteera:
Munorangarira kuti rhwendo iri rekuenda ku Djerusarema raida kupeta masimba here?
Ngei mungadikana kupeta masimba kuti mupinde misangano?
Munorangarira kuti kupinda misangano kunobetsera here? Ngei?
Bhaibheri rinobhuya kuti zvinokosha kupinda misangano no amweni kuti tinamate Djehovha. Erengai Ahebheru 10:24, 25, uye cedzai nge zve mubvunzo unoteera:
Ngei tecidikana kupinda misangano nguwa dzese?
ANHU AMWENI ANOTI: “Kuungana ne amweni azvina basa. Zvinokwana kufunda Bhaibheri muri kumba.”
I tsamba ipi kana kuti muezaniso upi we Bhaibheri unopangidza zvinodiwa na Djehovha?
MUCIGWAGWA
Kupinda misangano kucamubetsera kuti mufunde zvakawanda nge zva Djehovha uye kucabambisa ushamwari wenyu naye. Kupinda izvona, misangano icamupasa mikana yekunamata Djehovha muri pamwepo no anhu amweni.
Mibvunzo yekuhwirinzira
Ngei Djehovha ecitikohomedzesa kuti tipinde misangano?
Mucafundei pa misangano ye Apupuri a Djehovha?
Mushobo upizve wamungarangarira kuti zvicamubetsera kana mukapinda misangano?
ZIYAI ZVAKAWANDA
Zvakadini kana mecithya kuenda ku misangano? Onai mwanarume umweni waizwawo kudaro asi wakapedzesera aakuda maningi kupinda misangano.
Onai kuti ngei mudjaha umweni wakapfarira misangano uye zvaakaita kuti arumbwe ecipinda misangano.
Onai kuti amweni anorangarirei nge zve kuenda kumisangano.
“Zvakanakirei Kupinda Misangano mu Nyumba ye Umambo?” (Fundo ye mu saite)
Onai kuti upenyu we mwanarume umweni waiita zve cisimba uye wainga ari mucikwata cemabhinya wakacinja kudini mu masure me kupinda umwe we misangano we Apupuri a Djehovha.
“Akuna Kandaienda Ndisina Pfuti Yangu” (Murindiri wa 1 ya Julho wa 2014)