Mareferensiya e Urongwa we Musangano Basa Redu uye Kurarama
MARSO 7-13
UPFUMI UNOBVA MU SOKO RA MWARI | 1 SAMUERI 12-13
“Kudzikudza Kunokuwadza”
w00 8/1 paji. 13 ndi. 17
Kudzikudza Kunokuwadza
17 Zvakaizwa ndi Sauro pakutanga zvinoita hinga zvakanaka. Asi, anhu a Mwari ainga “aapangozi,” “ecibambidzirhwa,” uye ainga aakuthya nge ndaa yo kugumirhwa kawo. (1 Samueri 13:6, 7) Zve zvirokwazvo, azvizi hazvo kushata kutanga kuita ciro apo zviro zvecida kuti mudaro. Kunyazi zvakadaro, edzurirai kuti Djehovha anokwanisa kuziya zviri mu mwoyo uye anoziya zvatinorangarira nge ce mukati-kati. (1 Samueri 16:7) Hino, pamweni pane zvaakaona kuna Sauro zvisikazi kutarhwa mu ngano ye Bhaibheri. Hingana muezaniso, Djehovha pamweni akaona kuti kusama kuetsera ka Sauro kainga kakabatana no kudzikudza. Pamweni Sauro wakanyangadzwa maningi kuti iyena—mambo we Israeri yese—waidikana kuetsera munhu waaiona hinga muphorofita wacembera, anonoka! Kunyazi no zvakaitika, Sauro wakarangarira kuti kunonoka ka Samueri kakamupasa citenderhwa cekuita zviro iyena pacake uye kuti asapurutane nhungamiriro yaainga apaswa. Zvinyi zvakazoitika? Samueri aazi kurumbidza zvakaizwa ndi Sauro. Pane kudaro, wakasumurura Sauro eciti: “Umambo wako augari nguwa yakareba . . . ngekuti auzi kucengeta zvawabvunzwa ndi Djehovha.” (1 Samueri 13:13, 14) Hino, kudzikudza kakazomukuwadzisa.
w07 6/15 paji. 27 ndi. 8
Djehovha Anoda kuti Timupurutane
8 Ngano iri mu Bhaibheri ya Mambo Sauro inopangidza kuti kupurutana kakanaka maningi. Paakatanga kutonga, Sauro waidzidodosa uye waiziya pekugumira, ‘waidziti mudoko.’ Asi, no kuhamba ke nguwa wanga waakudzikudza uye kurangarira zvakashata. (1 Samueri 10:21, 22; 15:17) Pa nguwa imweni, Sauro waidikana kurhwisana no Afiristiya. Samueri wakamubvunza kuti amuetsere kuti azopase zvibairo kuna Djehovha uye kumubvunza zvekuita. Asi, Samueri aazi kuguma pa nguwa yaainga apangana, uye anhu akatanga kubararika. Paakaona kuti wanonoka, Sauro “wakapasa cibairo cinopiswa.” Izvi azvizi kupfadza Djehovha. Samueri paakazoguma, mambo wakaedza kupanganidza kusapurutana kake, eciti kunonoka kaita Samueri, ‘kamubambidzira’ kupasa cibairo cinopiswa kuti azwirhwe nyasha ndi Djehovha. Mambo Sauro wairangarira kuti kupasa cibairo kaikosha maningi kudarika kupurutana zvaainga abvunzwa zvekuti aetsere Samueri kuti azopase cibairo. Samueri wakamubvunza kuti: “Waita zve upenzi. Auzi kucengeta mutemo wa Djehovha Mwari wako waakakubvunza.” Kusapurutana Djehovha kakaita kuti Sauro abviswe pa umambo.—1 Samueri 10:8; 13:5-13.
Upfumi Watinogumira mu Bhaibheri
w11 7/15 paji. 13 ndi. 15
Mucateedzera Nhungamiriro ye Rudo ya Djehovha?
15 Anhu aya airangarira kuti mambo we munhu ndiyena wakagondeka uye waaidikana kugonda kudarika Djehovha? Kudai zviri izvona zvaairangarira, aidzinyepera! Uye ainga ari mu ngozi yekuzoteera zviro zvisiripi zve cokwadi zvinoseenzeswa ndi Sathani. Madzimambo e anhu aizoanamatisa mifanikiso. Anhu anonamata zvimufanikiso anorangarira kuti anamwari aanoona akaita—hinga anamwari aanogadzira nge miti kana kuti nge mapuwe—ndiwona basi aanodikana kugonda, kudarika Mwari waasikaoni, Djehovha, musiki we zviro zvese. Asi hingana zvakarekethwa ndi muphostori Pauro, zvimufanikiso “azviropi.” (1Ako. 8:4) Azvikwanisi kuona, kuzwa, kureketa kana kuita ciro. Mungakwanisa kuzviona uye kuzvibata, asi kana mukazvinamata, munonga meciteera zviro zvisiripi zve cokwadi—zvingakwanisa basi kumupinza mu ngozi.—Pis. 115:4-8.
MARSO 14-20
UPFUMI UNOBVA MU SOKO RA MWARI | 1 SAMUERI 14-15
“Kupurutana Kunokunda Cibairo”
w07 6/15 paji. 26 ndi. 4
Djehovha Anoda kuti Timupurutane
4 Zvaari iyena Musiki, Djehovha ndiyena muridzi we zviro zvese zvatinazvo. Kana zviri izvona, pane zviro zvatingakwanisawo kumupasa here? Honde, tingakwanisa kumuitira ciro cimweni cinokosha. Cinyi icona? Mhinduro tinoiwona mu zano rinoteera, rekuti: “Mwana wangu, gara munhu akangwara upfadze mwoyo wangu, kuti ndikwanise kudaira uwo unondishora.” (Zvierengo 27:11) Hino, catinokwanisa kuita kupurutana Mwari. Kunyazi tino mararamiro akasiyana-siyana uye takakurira kakasiyana-siyana, kana tikapurutana, umwe na umwe wedu unokwanisa kupangidza kuti Sathani wakanyepa paakati anhu aakwanisi kurumbwa akagondeka kuna Mwari paanosongana no miedzo. Aya makakomborero makuru!
it-2 paji. 500 ndi. 2
Kupurutana
Akuna cinotsiya kupurutana uye aazviti kuzwirhwa nyasha ndi Mwari pasina ikona. Hingana Samueri zvaakabvunza Mambo Sauro: “Djehovha anopfariradi zvipisiro zvinopiswa uye zvibairo, hinga zvaanopfarira anopurutana [hingana sha·maʽʹ] izwi ra Djehovha? Onai! Kupurutana [kureya: kuzwa] kuri nane kudarika cibairo, kunyasa kupurutana kuri nane kudarika mafuta e mabira.” (1Sa 15:22) Kusapurutana kuramba soko ra Djehovha, kupangidza kuti munhu aatendi, aagondi, aatendi mu soko iri uye Karinobva. Hino, wese wiya asikapurutani aazi kusiyana no munhu unoita zvekufembera kana kuti unoseenzesa zvimufanikiso. (1Sa 15:23; ezanisai na Aro 6:16.) Kureketa masoko anopindirana azvirei ciro kana zvikasama kupindirana no zvinodiwa; kusapurutana kunopangidza kuti aatendi kana kuti aareremedzi kunobva nhungamiriro. (Mt 21:28-32) Anhu anogutsikana nge kuzwa uye kundotendera mu ndangariro cokwadi ca Mwari, asi asikazviseenzesi, ari kudzinyepera no marangariro akashata uye aatambiri makomborero. (Tg 1:22-25) Mwana wa Mwari wakadjekesa kuti kunyazi eciita zvakatodzana no aya akagadzwa, asi, ecizviita nge mushobo wakashata kana kuti nge mushobo usiriwopi, awona aazopindi mu Umambo, asi acarambwa zvacose.—Mt 7:15-23.
Upfumi Watinogumira mu Bhaibheri
it-1 paji. 519
Usisi
Kutenda kubambidzirhwa kuti mugare no usisi zvisikaenderani no zvinodiwa na Mwari zvino mubairo wazvo. Izvi zvinooneka pa zviya zvakaitika na Mambo Sauro. Payakaguma nguwa yekutongwa kucena ke Aamareki, anhu akatanga kurhwisa Aisraeri paakabuda mu Idjipitu. Ecitenda kubambidzirhwa no amweni ake, Sauro aazi kuteedzera nhungamiriro ya Djehovha. Ndiyo ndaa, Djehovha akamuramba kuti agare mambo. (1Sa 15:2-24) Munhu wese unotenda kuita zvinodiwa na Djehovha uye orumbwa akagondeka kaari kudarika zviro zvimweni zvese, zviri panhene kuti aaiti hingana zvakaizwa ndi Sauro, uye woruza kutenderhwa ndi Mwari.
MARSO 21-27
UPFUMI UNOBVA MU SOKO RA MWARI | 1 SAMUERI 16-17
“Kurhwa nge ka Djehovha”
wp16.5 paji. 11 mandi. 2-3
“Kurhwa nge ka Djehovha”
Dhavhidhi wakabvunza Sauro nge zve kuuraya kaakaita mhondoro no uruso. Zvinoreya kuti iyena waida kudzikudza? Haiwa. Dhavhidhi waiziya kuti wainga asikazi kuuraya zvinyama izvi nge simba rake. Iyena wakati: “Djehovha akandinunura pa tsoka dze mhondoro uye dze uruso, uye acandinunura mu nyara dze mu Firistiya uu.” Sauro wakatenderana nazvo. Iyena wakati: “Enda, uye Djehovha ngaawe newe.”—1 Samueri 17:37.
Munoda kugara nekutenda hinga ka Dhavhidhi? Zvaaiziya nge zva Mwari uye zvakaitika mu upenyu wake ndizvona zvakamubetsera kuti agare nekutenda muna Mwari. Waiziya kuti Djehovha anodziirira anhu ake uye anodzadzisa zvaanopikira. Kana tecida kugara nekutenda kakadaro, tinodikana kurumbwa tecifunda nge zva Djehovha. Patinoseenzesa zvatinofunda, toona zviro zvakanaka zvinonga zveciitika katiri, kutenda kedu kucanyasa kubamba.—Ahebheru 11:1.
wp16.5 mapaji. 11-12
“Kurhwa nge ka Djehovha”
Dakara na nyamasi uno, patinozwa zvakarekethwa ndi Dhavhidhi, tinoona kuti wainga ano kutenda. Rangaridzai ecidainzira kuna Goriyati eciti: “Iwewe uri kuuya kandiri no supada uye no mipasha, asi inini ndiri kuuya kauri no zina ra Djehovha we anyahondo, Mwari we anyahondo e Aisraeri, wawakashora.” Dhavhidhi waizviziya kuti zvese zvainga zvina Goriyati zvainga zvisikakoshi. Goriyati wainga akashora Djehovha, hino Djehovha ndiyena waizomurhwisa. Dhavhidhi wakazvibudisa pamhene paakati: “Kurhwa nge ka Djehovha.”—1 Samueri 17:45-47.
Zviri pamhene kuti Dhavhidhi waiwona kukura kakaita Goriyati uye no zviro zvese zvaainga anazvo zvekudzidziirira nazvo. Asi izvi azvizi kuita kuti athye. Aazi kuita zvakaizwa ndi Sauro ne masurudado ake. Aazi kudziezanisa na Goriyati. Asi wakaezanisa Goriyati na Djehovha. Goriyati wainga akareba 2,9 metru, uye ndiyena wainga akareba pa anhu ese ainga aripo, asi apana zviripo kana tikamuezanisa na Cangamire we zvisikwa zvese. Djehovha aiwona Goriyati hingana usunzi—hino, ainga akagadzirira kumuparadza!
wp16.5 paji. 12 ndi. 4
“Kurhwa nge ka Djehovha”
Mazuwa ano, aseenzi a Djehovha aacarhwi mu hondo. Kurhwa uku kainga ke mu nguwa dzekare. (Mateu 26:52) Kunyazi zvakadaro, tinodikana kuteedzera kutenda ka Dhavhidhi. Tinodikana kutenda kuti Djehovha ariyo uye kuti ndiyena ega basi Mwari watinodikana kunamata. Tinoona hingana kuti matambudziko edu akanyanya kukura, asi apana zviripo kana tikaaezanisa no simba guru rina Djehovha. Kana tikasanangura kuseenzera Djehovha kuti agare Mwari wedu uye togonda naye hingana zvakaizwa ndi Dhavhidhi, apana matambudziko, kana muedzo zvatinodikana kuthya. Simba ra Djehovha i guru kupinda ciro cipi haco catingasongana naco!
Upfumi Watinogumira mu Bhaibheri
it-2 paji. 974
Sauro
Mainga muri mumasure mazvo uye mu masure mekudzodzwa ka Dhavhidhi hinga mambo waizotonga Israeri mu nguwa ye mberi apo mwiya mucena wa Djehovha wakabuda pana Sauro. Kubvira ipona “mwiya wakashata wakabva kuna Djehovha.” Ngekubudisa kaakaita mwiya mucena wake kuna Sauro, Djehovha akasiya kuti mwiya wakashata ugare maari, zveciita kuti Sauro asagare no runyararo mu ndangariro make uye kurangarira zviro nge mushobo wakashata. Kusapurutana kaakaita Djehovha, zvaipangidza marangariro uye mwoyo wakashata, izvi zvakaita kuti mwiya wa Mwari usamudziirire. Djehovha akatendera kuti “mwiya wakashata” utsiye mwiya wake uye athyisidzire Sauro, izvona zvaitokwanisa kudainzwa kuti “mwiya wakashata unobva kuna Djehovha,” zvekutoti aseenzi a Sauro akati “mwiya wakashata unobva kuna Mwari.” Pa masoko aakambozwa nge umwe we aseenzi ake, Sauro wakakumbira kuti Dhavhidhi agare muembi wake kuti amunyaradze paaishuphwa nge “mwiya wakashata.”—1Sa 16:14-23; 17:15.
MARSO 28–ABRIRI 3
UPFUMI UNOBVA MU SOKO RA MWARI | 1 SAMUERI 18-19
“Rumbwai Mecidzidodosa Kunyazi Pamunokomborerhwa na Djehovha”
w04 4/1 paji. 15 ndi. 4
Gondai no Mwiya wa Mwari Mukucinja Kunoitika mu Upenyu
4 Mu nguwa doko mudjaha uu muushi waizoita mbiri uye woziikanwa mu Israeri yese. Wakadainzwa kuti aseenzere mambo uye kuti amuridzire ngoma. Wakauraya Goriyati, munhu waithyisa, zvekuti masurudado e Israeri aithya kurhwisana naye. Dhavhidhi wakasanangurhwa kuti atungamirire anarume kuti aende koorhwa no Afiristiya uye wakaanyisa. Anhu aimuda. Akaemba ngoma ecimurumbidza. Zvisati zvaitika, mupi we zano wa Mambo Sauro wakabhuya nge zve djaha iri haiwa basi ngekuti “wainyasa kuridza” rudimbwa, asi ngekuti wainga ari “mwanarume unosimba, waikwanisa kurhwa, wainga anoruziyo pakureketa uye munhu wakanaka.”—1 Samueri 16:18; 17:23, 24, 45-51; 18:5-7.
w18.01 paji. 28 mandi. 6-7
Onai Kusiyana Kakaita Anhu
6 Anhu amweni anodzikudza nge ndaa ye kurungama kawo, mbiri yawo, kukwanisa kawo kuemba kana kuti kuridza ngoma, simba raanaro, kana kusirirhwa kaanoizwa. Dhavhidhi wainga anazvo zvese izvi asi kunyazi zvakadaro wakarumbwa ecidzidodosa ke upenyu wake wese. Mu masure mekuuraya Goriyati uye apaswa mwana wa Mambo Sauro kuti agare mukadzi wake, Dhavhidhi akati: “Ndini ani uye hama dzangu ne mhuri ya baba angu ngaanani pakati pa Israeri, kuti ndigare mukwambo wa Mambo?” (1 Sa. 18:18) Cinyi cakabetsera Dhavhidhi kuti arumbwe ecidzidodosa? Waiziya kuti Djehovha ‘akadziteredza,’ kana kuti akadzidodosa kuti arangarire nge zvake, ndiyo ndaa wainga ano unhu, zvipo uye no makomborero aainga anawo. (Pis. 113:5-8) Dhavhidhi waiziya kuti kunyazi ciro cipi caainga anaco wakacipaswa na Djehovha.—Ezanisai na 1 Akorinti 4:7.
7 Hingana Dhavhidhi, anhu a Djehovha mazuwa anoedzawo kudzidodosa. Cinyi cinotibetsera kuti tidaro? Muezaniso wa Djehovha. Tinoshamisika maningi nge kuziya kuti Djehovha we Kumusoro-soro anodzidodosa. (Pis. 18:35) Tinoedza kuseenzesa zano rokuti: “Pfekai rudo rikuru rekuzwira amweni usisi, unaki, kudzidodosa, upfawi, mwoyo unononoka kutsamwa.” (Ako. 3:12) Tinoziyawo kuti rudo “aridzikudzi, aridzitutumadzi.” (1Ako. 13:4) Patinodzidodosa, tinobetserawo amweni kuti agare shamwari dza Djehovha. Hinga zvinoita mwamuna ungakwanisa kufunda cokwadi nge kuongorora muezaniso wakanaka we mukadzi wake, anhu akawanda angakwanisawo kufunda nge zva Djehovha paanoona kudzidodosa kedu.—1 Ped. 3:1.
Upfumi Watinogumira mu Bhaibheri
it-2 paji. 727
Aphorofita
Kunyazi akagadzwa no mwiya wa Djehovha, aphorofiti ainga asikarumbwi ecireketa zvakafemerhwa. Asi, mwiya wa Mwari ‘waiuya kaari’ mu nguwa dzimweni, kuti unyase kudjekesa masoko anonga ecida kuziiswa. (Eze 11:4, 5; Mik 3:8) Izvi zvakagara no simba rakakura reciaita kuti arekete. (1Sa 10:10; Dje 20:9; Amo 3:8) Awona aazi kuita basi zviro zvisikazi kudjairika, asi mareketero awo ne mabatiro aipangidza simba uye no mazwiro awo. Izvi pamweni zvaida kupanganidza kuti anhu amweni “aiita hingana aphorofiti.”(1Sa 10:6-11; 19:20-24; Dje 29:24-32; ezanisai na Zvi 2:4, 12-17; 6:15; 7:55.) Kunyasa kugadzikana kawo mundangariro uye kushinga kawo kaikwanisa kuita hingana kuti maitiro awo aazi kudjairika, kana kuti asina musoro ku amweni, hingana maonerhwe akaithwa muphorofiti umweni nge akuru e anyahondo pakadzodzwa Djehu. Paakazwa kuti mwanarume uu wainga ari muphorofiti, akuru aya akatenda masoko ake uye akanyasa kumupurutana. (2Mad 9:1-13; ezanisai na Zvi 26:24, 25.) Sauro paaiteera Dhavhidhi, wakabvunzwa kuti “aite hingana muphorofiti,” wakabvisa macira ake owata asikazi kupfeka “zuwa rese no usiku wese,” pa nguwa yese ii Dhavhidhi wakaona mukana wekutiza. (1Sa 19:18–20:1) Izvi azvirei kuti aphorofiti aihambadi asikazi kupfeka. Mu ngano dzimweni mbiri dzakatarhwa, muphorofiti wakagara asikazi kupfeka no cinangwa, izvi zvaiimira dii re uphorofiti wake. (Isa 20:2-4; Mik 1:8-11) Cinangwa cakaita kuti Sauro agare asikazi kupfeka—zvingadai kuti adzipangidze hingana munhuwo hake, wakabvisa macira ake e umambo, asikakwanisi kurhwisa utongi uye simba ra Djehovha, zvingadai nge zve cinangwa cimweni—azvipanganidzwi.
ABRIRI 4-10
UPFUMI UNOBVA MU SOKO RA MWARI | 1 SAMUERI 20-22
“Zvamungaita kuti Mugare Shamwari Yakanaka”
w19.11 paji. 7 ndi. 18
Bambisai Ushamwari Wenyu Mugumo Usati Wauya
18 Mazuwa ano, hama dzatinonamata nadzo dzinosongana no matambudziko akasiyana-siyana. Amweni anobatana no tsawona dzinoitika dzega, dzakaita hinga zvigidhigidhi uye kunaisa ke mvura. Amweni anonetseka nge matambudziko anokonzerhwa nge anhu, akaita hinga hondo uye ubhinya. Izvi pazvinoitika, amweni edu angakwanisa kutambira hama idzi mu mizi dzawo. Amweni anobetsera no mare. Asi tese hedu tingakwanisa kukumbira Djehovha kuti abetsere hama dzedu. Kana tikazwa kuti pane hama kana kuti hanzvadzi yakaora mwoyo pamweni tingakonerhwa kuziya zvekureketa kana kuita. Asi tese tino zvatingaita kuti tiabetsere. Hinga muezaniso, tingapsvaka nguwa ye kugara no shamwari dzedu. Tinokwanisa kunyasa kupurutana zvaanonga ecireketa. Uye kuierengera tsamba ye Bhaibheri inonyaradza yatinopfarira. (Isa. 50:4) Cinonyanya kukokosha nge ce kugara ku dii re shamwari dzedu padzinonga dzecitida.—Erengai Zvierengo 17:17.
w08 2/15 paji. 8 ndi. 7
Ngatihambe Mumakwanza a Djehovha
7 Mwari anoda kuti tigare shamwari dzakagondeka. (Zvie. 17:17) Djonatani, mwana wa Mambo Sauro, wakagara shamwari ya Dhavhidhi. Djonatani paakaziya kuti Dhavhidhi wainga auraya Goriyati, “mwiya wa Djonatani wakabatana no mwiya wa Dhavhidhi, uye Djonatani wakatanga kumuda hingana kuda kaaiita mwiya wake.” (1 Sa. 18:1, 3) Djonatani wakatongwadza Dhavhidhi paaida kuuraiwa ndi Sauro. Mu masure mekuti Dhavhidhi atiza, Djonatani wakasongana naye uye ari airi akaita citenderano. Kureketa kakaita Djonatani kuna Sauro ngezva Dhavhidhi kakakanda upenyu wake pa ngozi, asi ari airi akazosonganazve uye akabambisa ushamwari wawo. (1 Sa. 20:24-41) Paakaonana pekupedzesera, Djonatani wakabambisa Dhavhidhi “mu simba ra Mwari.”—1 Sa. 23:16-18.
w09 10/15 paji. 19 ndi. 11
Kurumbwa Tiri Shamwari mu Nyika Isina Rudo
11 Garai akagondeka. Soromoni wakatara kuti, “Shamwari ye zvirokwazvo ino rudo nguwa dzese, uye i hama yakabarirhwa kubetsera pakunonga kuno kutambudzika.” (Zvie. 17:17) Soromoni paaitara masoko aya, pamweni wairangarira nge zve ushamwari wa baba ake Dhavhidhi na Djonatani. (1 Sa. 18:1) Mambo Sauro aida kuti mwana wake Djonatani agare nhaka umambo we Israeri. Asi Djonatani waiziya kuti Djehovha ainga asanangura Dhavhidhi kuti agare mambo. Kusiyana na Sauro, Djonatani aazi kuitira shanje Dhavhidhi. Aazi kutsamwa pakarumbidzwa Dhavhidhi, uye aazi kukasika kutendera paakazwa zvakashata zvairekethwa ndi Sauro ngezva Dhavhidhi. (1 Sa. 20:24-34) Takaitawo hinga Djonatani here? Shamwari dzedu padzinotambira ropapfadzo, tinopfara nazvo here? Padzinosongana no matambudziko, tinodzinyaradza no kudzibetsera here? Kana tikazwa zvakashata ngezve shamwari yedu, tinokasika kuzvitendera here? Kana kuti tinoita hingana Djonatani, totsigira shamwari yedu takagondeka?
Upfumi Watinogumira mu Bhaibheri
w05 3/15 paji. 24 ndi. 4
Mafundo Makuru Anobva mu Bhuku ra Samueri we Kutanga
21:12, 13. Djehovha anoetsera kuti tiseenzese masimba edu e kurangarira uye zvatinokwanisa patinonga tiri mu maimiro e zviro anoshupha. Akatipasa Soko rake rakafemerhwa, rinotipasa ungwaru, ruziyo uye rinoita kuti tinyase kurangarira. (Zvierengo 1:4) Tino rubetso ratinopaswa nge akuru e ciKristu akagadzwa.
ABRIRI 18-24
UPFUMI UNOBVA MU SOKO RA MWARI | 1 SAMUERI 23-24
“Etserai Djehovha no Mwoyo Unononoka Kutsamwa”
w04-CA 4/1 paji. 16 ndi. 8
Gondai no Mwiya wa Mwari Pamunonga Meciita Cinjo mu Upenyu
8 Dhavhidhi wakaramba kukuwadza Sauro. Ecipangidza kutenda uye mwoyo unononoka kutsamwa, waigutsikana kusiira zvese mu nyara dza Djehovha. Mu masure mekuti mambo abuda mubako, Dhavhidhi wakadainzira eciti: “Djehovha ngaatonge pakati pangu nemwi; uye Djehovha ngaanditsiye kamuri, asi nyara dzangu adzingarhwi nemwi.” (1 Samueri 24:12) Kunyazi hazvo waiziya kuti Sauro ndiyena wainga ashaisha, Dhavhidhi aazi kuda kumurhwisa, aazi kureketa zvakashata nge zvake uye aazi kumutuka. Dhavhidhi wakaramba kutonga nge nyara dzake. Pane kudaro, wakaetsera kuti Djehovha azvigadzirise.—1 Samueri 25:32-34; 26:10, 11.
Upfumi Watinogumira mu Bhaibheri
w17.11 paji. 27 ndi. 11
Musasiye Ciro Cipi Haco Cimuruzise Kutambira Mubairo
11 Kuti tisagare anhu ano shanje uye anozondana, tinodikana kuseenza no simba kuti tigare no rudo uye akanaka. Soko ra Mwari rinoti: “Rudo rino mwoyo unononoka kutsamwa. Rudo arina shanje.” (1Ako. 13:4) Mushobo watingaita kuti tisagare no shanje nge we kugara no maonero a Djehovha. Kaari, ese ari mu ungano akaita hingana nhengo ye muiri umwe. Izvi zvicatibetsera kuti tiite zvinoenderana no zano riri mu Bhaibheri rinoti: “Kana nhengo ye muiri wedu ikakudzwa, nhengo dzimweni dzese dzinopfara pamwepo nayo.” (1Ako. 12:16-18, 26) Hino pane kuti tiitire amweni shanje, tinopfara maningi paanoona makomborero. Rangarirai nge zve muezaniso wa Djonatani, mwana wa Mambo Sauro. Dhavhidhi paakasanangurhwa kuti agare mambo, iyena aazi kumuitira shanje. Pane kudaro wakamubetsera uye wakamubambisa. (1 Sa. 23:16-18) Isusu tingakwanisawo kugara anhu ano rudo uye akanaka hingana zvakaita Djonatani?
ABRIRI 25–MAYO 1
UPFUMI UNOBVA MU SOKO RA MWARI | 1 SAMUERI 25-26
“Munosoita Zviro zve Musoro Menyu Here?”
ia paji. 78 mandi. 10-12
Wakapangidza Ungwaru
10 Masurudado aya aiseenza no simba aibata kudini aushi? Zvingadai zvakaaitira nyore kuti abate mabira pese paainga ecida, asi awona aazi kumbodaro. Pane kudaro, aitodziirira mabira a Nabhari. (Erengai 1 Samueri 25:15, 16.) Mabira no aushi aisongana no ngozi dzakawanda. Zvinyama zvainga zvakawanda, uye mugano we Israeri we kucamhembe wainga uri padhuze zvekuti anhu e nyika dzimweni uye mbavha aigara eciarhwisa.
18 Rainga riri basa kuti anarume ese ainga ari mushango arumbwe eciona zvekurhya. Hino zuwa rimweni Dhavhidhi wakatuma anarume gumi kuti aende kuna Nabhari kookumbira rubetso. Dhavhidhi wakasanangura nguwa kwayo. Yainga iri nguwa ye kucinga mabira, pa nguwa ii anhu aigara no rupo uye eciita mabiko. Dhavhidhi wakasanangura masoko ake no ruziyo, eciseenzesa masoko anopangidza rureremedzo. Iyena wakatodziti “mwana wenyu Dhavhidhi,” iyena wakamureredza ngekuti wainga mukuru kaari. Nabhari wakadaira kudini?—1 Sa. 25:5-8.
12 Iyena wakanyangadzwa! Djaha ramborekethwa patangira nyaya ino rakapanganidzira Abhigairi kuti Nabhari “wainga aatuka.” Nabhari uwo wainga akaomera no zviro zvake wakatanga kugurunguta nge ndaa ye pau yake, mvura, no nyama yake, izvi zvaikosha kaari. Wakapsvinyira Dhavhidhi hingana munhu asikakoshi uye wakamuezanisa no museenzi wainga atiza. Maonero aiita Dhavhidhi ndiwona amwewo no aiita Sauro, uwo waizonda Dhavhidhi. Anhu aya ainga ano maonero akasiyana no a Djehovha. Mwari aida Dhavhidhi uye aimuona hingana mambo we Israeri we mu nguwa ye mberi, haiwa hingana museenzi wakapanduka.—1 Sa. 25:10, 11, 14.
ia paji. 80 ndi. 16
Wakapangidza Ungwaru
18 Wakadzipasa ndaa uye wakakumbira Dhavhidhi kuti amuregerere. Abhigairi wakatendera kuti mwamuna wake wainga ari benzi hinga zvinorehwa no zina rake, pamweni ecirangarira kuti zvainga zvisikaiti kushupha mwanarume uu wainga ari pasi pa Dhavhidhi. Wakapangidza kutenda kuti Dhavhidhi wainga ari muimiriri wa Djehovha, waiziya kuti Dhavhidhi wainga ari kurhwa “hondo dza Djehovha.” Waiziya nge zve gondeso ya Djehovha nge zva Dhavhidhi no umambo, wakati: “Djehovha . . . acamugadzai kuti mugare mutungamiriri we Israeri.” Uyezve, wakakumbira Dhavhidhi kuti asaite ciro caizomuunzira ndaa yo ngazi kana kuti “caizomupengesa”—zviri pamhene kuti waireya kugara no hana inonetseka. (Erengai 1 Samueri 25:24-31.) Aya ainga ari masoko e ungwaru!
Upfumi Watinogumira mu Bhaibheri
ia paji. 80 ndi. 18
Wakapangidza Ungwaru
16 Zvinoreya kuti Abhigairi wakapandukira Nabhari citenderhwa ce mwamuna wake hinga musoro? Haiwa, edzurirai kuti Nabhari wainga aitira zvakashata museenzi wakadzodzwa wa Djehovha, izvi zvaikwanisa kupedzesera no kufa ke anhu akawanda ainga asina ndaa e mu nyumba ya Nabhari. Kudai Abhigairi asikazi kuita ciro, waizogarawo no ndaa pano zvainga zvaizwa no mwamuna wake? Pa ndaa ii, waidikana kudzikanda pasi pa Mwari wake kudarika kudzikanda pasi pe mwamuna wake.