Mareferensiya e Urongwa we Musangano Basa Redu uye Kurarama
MAIYO 2-8
UPFUMI UNOBVA MU SOKO RA MWARI | 1 SAMUERI 27-29
“Dhavhidhi Wairhwa no Uzii”
it-1 paji. 164
Akishi
Dhavhidhi paaitiza Sauro, wakafindara kairi kese kumutanha wa Mambo Akishi. Pakutanga, ecifungidzirhwa hinga muzondi, Dhavhidhi wakanyepedzera kuita hinga anopenga, uye Akishi wakamusiya ecienda hinga benzi risikakuwadzi. (1Sa 21:10-15; Pis 34:Kab; 56:Kab) Paakaenda kecipiri, Dhavhidhi wakaenda no masurudado ake anokwana 600 no mhuri dzawo, uye Akishi wakaabvunza kuti agare ku Zikragi. Ke gore no mwedzi mirongomuna ariyo, Akishi wairangarira kuti masurudado a Dhavhidhi airhwisa maguta e Djudhiya, nepoo Dhavhidhi waiparadza Ageshuri, Agirizi no Aamareki. (1Sa 27:1-12) Utsotsi uu wakabudirira, zvekuti Akishi wakaita kuti Dhavhidhi agare murindi wake apo Afiristiya paaironga kuenda koorhwisana na Mambo Sauro, uye paainga ooenda wakabambidzirhwa no “madzitenzi akabatana” amweni e Afiristiya, kuti Dhavhidhi no anarume ake ahwirinzwe ku Zikragi. (1Sa 28:2; 29:1-11) Dhavhidhi paakagara mambo uye paakanyisa Agati, zvinoita hingana kuti Akishi aazi kuuraiwa. Iyena wakararama dakara mu nguwa yaitonga Soromoni.—1Md 2:39-41; onai GATI.
Madjaha—Mungagondwa Kudini no Anhu Amweni?
Onai cinetso cimweni cakasongana na Dhavhidhi. Mu masure mekusanangurhwa kuti azogare mambo we Djudha, Dhavhidhi waidikana kuetsera ke makore akawanda kuti azotange kutonga. (1 Sam. 16:13; 2 Sam. 2:3, 4) Pa nguwa ii yaaietsera, cinyi cakamubetsera kuti agare no mwoyo unononoka kutsamwa? Pano kuti adzirhye mwoyo, Dhavhidhi wakaita zviro zvaaikwanisa kuita. Ngo muezaniso, paairumbwa ecitiza mu nyika yo Firistiya, Dhavhidhi wakakhorovhera mukana uu kuti arhwisane no azondi a Israeri. Nge kuita izvi, iyena wakakwanisa kudziirira migano ye nyika ye Adjudha.—1 Sam. 27:1-12.
it-2 paji. 354 ndi. 6
Manyepo
Kunyazi hazvo kunyepa kecirambidzwa no Bhaibheri, izvi azvirei kuti tinodikana kupasa masoko akadzara ku aya asina citenderhwa. Djesu Kristu wakapasa zano rokuti: “Musapase imbwa zviro zvicena, kana kukandira nguruwe maparera enyu, kuti dzisame kutsika-tsika nge tsoka dzadzo, pedzepo dzokhona kuzomurumai.” (Mt 7:6) Ndiyo ndaa, Djesu aazi kupasa masoko kana kuti mhinduro dze mibvunzo dzimweni, ngekuti zvaizokwanisa kuunza zviro zvakashata. (Mt 15:1-6; 21:23-27; Ju 7:3-10) Zviri pamhene kuti zvakaizwa ndi Abrahamu, Isaka, Rakabhi uye Erisha, nge kusama kubhuya kana kupasa masoko akadzara aya ainga asiripi anamati a Djehovha, zvinodikanwa kuonekwa nge mushobo umwewo.—Ge 12:10-19; kap 20; 26:1-10; Djs 2:1-6; Tg 2:25; 2Md 6:11-23.
Upfumi Watinogumira mu Bhaibheri
w10 1/1 paji. 20 mandi. 5-6
Anhu Akafa Angakwanisa Kubetsera Apenyu Here?
Cimborangarirai izvi. Bhaibheri rinoti pa rufu munhu “unohwirira ku bukuta rake” uye “ndangariro dzake dzinopera.” (Pisarema 146:4) Sauro na Samueri aiziya kuti Mwari airambidza anhu kuti arekete no aya anobvunzisa akafa. Kareko, Sauro ndiye waimbotungamirira kuti asaite zvo mudzimu mu nyika yake!—Revhitiko 19:31.
Cimborangariraizve izvi. Kudai muphorofita wakagondeka Samueri wainga aciri kurarama hinga mudzimu, iyena waidadi kusiya mutemo wa Mwari uye wobatana no aya anobvunzisa akafa kuti aonane na Sauro here? Djehovha ainga aramba kureketa na Sauro. Anobvunzisa akafa aizobambidzira Mwari we Masimba Ese kuti arekete na Sauro eciseenzesa Samueri akafa here? Haiwa. Zviri pamhene kuti “Samueri” wainga ari muphorofita wa Mwari wakagondeka. Hino uu wainga uri mudzimu, dhimoni rakashata rakanyepedzera kuita hinga Samueri wakafa.
MAIYO 9-15
UPFUMI UNOBVA MU SOKO RA MWARI | 1 SAMUERI 30-31
“Dzibambisei Muna Djehovha Mwari Wenyu”
w06 8/1 paji. 28 ndi. 12
Ithyai Djehovha—Mupfare!
Dhavhidhi kuthya kaaiita Djehovha akuzi kumudziirira pakuita zvakashata basi. Kakamubambisa kuti aite zviro no ungwaru mu maimiro e zviro anoshupha. Ke gore no mwedzi mirongomuna, Dhavhidhi no anarume ake akatiza Sauro akaenda koogara ku Zikragi kumutanha we Afiristiya. (1 Samueri 27:5-7) Mu nguwa imweni anarume aya paainga abuda, Aamareki akapisa guta irona uye akatora akadzi awo ese, ana awo no zvipfuyo zvawo. Paakahwirira oona zvainga zvaitika, Dhavhidhi no anarume ake akacema. Kusuwa kawo kakacinja ogara no shungu, uye anarume a Dhavhidhi akati aizomufura nge mapuwe. Kunyazi hazvo wainga akasuwa, Dhavhidhi aazi kuora mwoyo. (Zvierengo 24:10) Kuthya kaaiita Mwari kakaita kuti anamate kuna Djehovha, uye “wakatanga kudzibambisa muna Djehovha.” Ecibetserhwa ndi Mwari, Dhavhidhi no anarume ake akateera Aamareki uye akatora zviro zvawo zvese.—1 Samueri 30:1-20.
w12 4/15 paji. 30 ndi. 14
Djehovha Anoticengetedza Kuti Tiponeswe
Dhavhidhi wakasongana no matambudziko akawanda mu upenyu. (1 Sam. 30:3-6) Masoko ake akafemerhwa anopangidza kuti Djehovha aiziya mazwiro aaiita. (Erengai Pisarema 34:18; 56:8.) Mwari anoziyawo mazwiro atinoita. Patinonga “takaora mwoyo” kana kuti tecizwa “takadzvinyirirhwa,” anokhwedera padhuze na isusu. Izvona zvinokwanisa kutinyaradza, hinga zvakaitika na Dhavhidhi, uwo wakaemba kuti: “Ndicapfarira maningi unaki wenyu we rudo, ngekuti makaona kushuphika kangu; makaziya nge zve kushuphika ke mwiya wangu.” (Pis. 31:7) Asi Djehovha aaoni basi kushuphika kedu. Iyena anotinyaradza uye anotibambisa. Misangano dze ciKristu ndi umwe we mishobo yaanotibambisa nayo.
Upfumi Watinogumira mu Bhaibheri
w05 3/15 paji. 24 ndi. 8
Mafundo Makuro Anobva mu Bhuku ra Samueri Wekutanga
30:23, 24. Cisananguro ici, cinobva pana Numero 31:27, cinopangidza kuti Djehovha anokoshesa aya anoita mabasa e kubetsera mu ungano. Hino zvese zvatinoita, ngatizviite “no mwiya wese hinga kuna Djehovha, haiwa ku anhu.”—Akorosi 3:23.
MAIYO 16-22
UPFUMI UNOBVA MU SOKO RA MWARI | 2 SAMUERI 1-3
“Tinofundei no Ngoma Yakazwi ‘Uta’?”
w00 6/15 paji. 13 ndi. 9
Kudzai Akapaswa Masimba Kamuri
Dhavhidhi wakarhwadziwa paainga ecibathwa zvisikazi kunaka here? “Ngekuti . . . azondi ari kupsvaka mwiya wangu,” Dhavhidhi wakacema ecidaro kuna Djehovha. (Pisarema 54:3) Dhavhidhi wakafunungura mwoyo wake kuna Djehovha: “Ndidziirirei paazondi angu, Mwari wangu . . . Ano simba akaungana kuti andirhwise kunyazi ndisikazi kuita cakashata, haiwa Djehovha. Anogogoma no kudzigadzirira, kunyazi ndisina ndaa. Mukai muone, mundibetsere.” (Pisarema 59:1-4) Makambozwawo hinga izvi here—kuti munhu uno masimba orumbwa ecimuitirai zvakashata kunyazi musikazi kumushaishira? Dhavhidhi aazi kusiya kureremedza Sauro. Pakafa Sauro, pane kuti Dhavhidhi apfare, wakatara ngoma yo mariro yokuti: “Sauro na Djonatani ainga ecidikanwa, akanaka ke upenyu wawo wese . . . Aigogoma maningi kudarika makodzi, ainga ano simba kudarika mhondoro. Imwimwi asikana e Israeri, cemai Sauro.” (2 Samueri 1:23, 24) Muezaniso wakanaka maningi we kureremedza mudzodziwa wa Djehovha, kunyazi hazvo Sauro wakamubata zvisikazi kunaka!
w12 4/15 paji. 10 ndi. 8
Kusagondeka—Cimwe ce Zviro Zvinopangidza Mazuwa e Kupedzesera
Bhaibheri rinobhuya nge zve anhu akawanda ainga akagondeka. Ngatione miezaniso dze anhu airi toona zvatinga kufunda kaari, ngatitange nge mwanarume wainga akagondeka kuna Dhavhidhi. Djonatani, dangwe ra Mambo Sauro, pamweni ndiye aizogara pa cigaro ce umambo ca Israeri. Asi Djehovha akasanangura Dhavhidhi kuti agare mambo we Israeri. Djonatani wakareremedza zvainga zvasanangurhwa ndi Mwari. Aazi kuitira Dhavhidhi shanje uye aazi kumuona hinga nyamarhwa. Asi “mwiya wa Djonatani wakabatana no wa Dhavhidhi” uye wakamugondesa kuti waizorumbwa akagondeka kaari. Djonatani wakatopasa Dhavhidhi macira ake, supada, uta no bhande, ecipangidza kuti waizogara mambo. (1 Sam. 18:1-4) Djonatani wakaita zvese zvaaikwanisa kuti ‘abambise nyara ya Dhavhidhi,’ zvekuti wakakanda upenyu wake pangozi kuti adziirire Dhavhidhi kuna Sauro. Djonatani wakabvunza Dhavhidhi nge zve kugondeka kake eciti: “Iwewe ucagara mambo wa Israeri, inini ndicagara wecipiri kauri.” (1 Sam. 20:30-34; 23:16, 17) Hino azvishamisi kuti Djonatani paakafa, Dhavhidhi wakapangidza kusuwa uye kumuda kaaiita paaiemba ngoma yo mariro.—2 Sam. 1:17, 26.
Upfumi Watinogumira mu Bhaibheri
it-1 paji. 1248 ndi. 1
Hama
Soko rokuti “hama” rinoseenzeswawo ku aya akabatana mu zviro zvese, ano cinangwa cimweco. Hinga muezaniso, Mambo Hiramu we Tire, wakadainza Mambo Sauro kuti hama, haiwa basi ngekuti ainga ano mabasa amwewo asi ngekuti ainga ano zvido zvimwezvo zve kugadzira matabwa no midziyo dzimweni kuti agadzire tempro. (1Md 9:13; 5:1-12) “Zvakanaka maningi uye zvinopfadza kuona hama dzecigara dzese dzakabatana!,” Dhavhidhi wakatara kudaro, ecida kureya kuti aihamapi basi dzekubarhwa nadzo dzinoita kuti pagare no runyararo uye kubatana. (Pis 133:1) Zve zvirokwazvo, kudanana no kupfarirana, haiwa nge ukama we kubarhwa, zvakaita kuti Dhavhidhi adainze Djonatani kuti hama. (2Sa 1:26) Shamwari dzino maitiro no marangariro amwewo, kunyazi kana akashata, anodainzwa kuti hama.—Zvie 18:9.
MAIYO 23-29
UPFUMI UNOBVA MU SOKO RA MWARI | 2 SAMUERI 4-6
“Rumbwai Mecithya Kuita Zviro Zvisikapfadzi Djehovha”
w05 5/15 paji. 17 ndi. 8
Mafundo Makuro Anobva mu Bhuku ra Samueri Wecipiri
6:1-7. Kunyazi hazvo Dhavhidhi wainga ano zvinangwa zvakanaka, kuedza kaakaita kuthwarisa Areka mu ngoro kainga kuri kuposha mutemo wa Mwari uye kakabara matambudziko. (Ekisodho 25:13, 14; Numero 4:15, 19; 7:7-9) Kubata kakaita Uza Areka kunopangidza kuti kuita zvakanaka akucinji zvinodiwa na Mwari.
w05 2/1 paji. 27 ndi. 20
Djehovha Anoita Zvino Unatsi Nguwa Dzese
Edzurirai kuti Uza waiziya zvakawanda. Areka ii yaiimirira Djehovha. Mutemo waipangidza kuti yainga isikadikanwi kubathwa nge anhu ainga asina citenderhwa ce kuibata, waipangidza pamhene kuti anhu aiibata asina citenderhwa aizophanicwa nge rufu. (Numero 4:18-20; 7:89) Hino kuthuthiswa ke Areka cena ii rainga riri basa rainga risikadinwi kuoneka hinga risikakoshi. Zviri pamhene kuti Uza wainga ari Murevhi (kunyazi hazvo wainga asiripi mupristi), hino iyena waiziya zvaibhuiwa ngo Mutemo. Uyezve, makore akawanda ainga adarika izvi zvisati zvaitika, Areka ii yainga yaendeswa ku nyumba ka baba ake kuti icengethwe. (1 Samueri 6:20–7:1) Yainga yagara ikona ke makore 70, dakara Dhavhidhi azosanangura kuibvisa. Hino kubvira aciri mwana mudoko, Uza wainyasa kuziya mitemo ino cokuita no Areka ii.
w05 2/1 paji. 27 ndi. 21
Djehovha Anoita Zvino Unatsi Nguwa Dzese
Hinga zvamborekethwa, Djehovha anoona zviri mu mwoyo. Sezvo Soko rake reciti zvakaizwa ndi Uza kainga “kushaisha kake,” Djehovha akaona zvakashata zvisikanyasi kupanganidzwa. Zvinoreya kuti Uza wainga ari mwanarume waidzikudza, waida kudarika paaidikana kugumira here? (Zvierengo 11:2) Kutungamirira kaakaita Areka parujinji yaicengethwa nge mhuri yake ndikona kakaita kuti adzione hinga anokosha here? (Zvierengo 8:13) Uza wainga asina kutenda zvekuti arangarire kuti muoko wa Djehovha wakacotika kuti adziirire Areka yake cena yaiimirira Iyena here? Kunyazi zvainga zviri izvona, tinokwanisa kugara no cokwadi cekuti Djehovha akaita no unatsi. Pamweni pano ciro cimweni caakaona mu mwoyo ma Uza cakaita kuti amuuraire ipona.—Zvierengo 21:2.
Upfumi Watinogumira mu Bhaibheri
w96 4/1 paji. 29 ndi. 1
Khandirai Mutoro Wenyu Kuna Djehovha Nguwa Dzese
Dhavhidhi hinga mambo waidikana kugara no ndaa ye rufu iri. Kuita kake kunopangidza kuti kunyazi aya ano ukama wakanaka na Djehovha pamweni paya anokwanisa kuita zvakashata mu maimiro e zviro anonetsa. Pakutanga Dhavhidhi wakanyangadzwa. Pedzepo wakathya. (2 Samueri 6:8, 9) Ukama wake we kugonda na Djehovha wakaedzwa zvakakura. Apa pamweni ndipona paasikazi kukhandira mutoro wake kuna Djehovha, iyena paasikazi kuteedzera mutemo wake. Izvi zvingakwanisa kuitikawo na isusu here? Tinopasa Djehovha ndaa patinobatana no zvinetso nge ndaa yekusateedzera nhungamiriro dzake here?—Zvierengo 19:3.
MAIYO 30–JUNHO 5
UPFUMI UNOBVA MU SOKO RA MWARI | 2 SAMUERI 7-8
“Djehovha Akaita Citenderano na Dhavhidhi”
w10 4/1 paji. 20 ndi. 3
“Umambo Wako Ucabamba”
Djehovha akapfadzwa maningi nge cido ca Dhavhidhi ce mwoyo wese. Paakaona kudzipira ka Dhavhidhi uye maererano no uphorofiti waainga akareketa, Mwari akaita citenderano naye cekuti acaita kuti pagare no munhu umweni mu dzinza ra Dhavhidhi acazotonga nokusikaperi. Natani wakabvunza Dhavhidhi gondeso ya Mwari kaari yokuti: “Nyumba yako no umambo wako zvicagara zvakabamba nokusikaperi pamberi pako; cigaro cako ce umambo cicagara cakabamba nokusikaperi.” (Vhersikuro 16) Ndiyani mugari we nhaka ye citenderano ici acatonga nokusikaperi?—Pisarema 89:20, 29, 34-36.
w10 4/1 paji. 20 ndi. 4
“Umambo Wako Ucabamba”
Djesu we ku Nazareta wainga ari we dzinza ra Dhavhidhi. Ngirozi payaiziisa nge zve kubarhwa ka Djesu yakati: “Djehovha Mwari acamupasa cigaro ce umambo ca baba ake Dhavhidhi, iyena acagara mambo pa nyumba ya Djakobo nokusikaperi, uye umambo wake auzogumi.” (Ruka 1:32, 33) Hino citenderano cakaizwa na Dhavhidhi cakadzadziswa na Djesu Kristu. Iyena anotonga haiwa ngekuti akasanangurhwa nge anhu, asi gondeso yakaizwa ndi Mwari ndiyo inomupasa citenderhwa ce kutonga nokusikaperi. Ngatiedzurire kuti zvinogondeswa ndi Mwari nguwa dzese zvinoitika.—Isaya 55:10, 11.
w14 10/15 paji. 10 ndi. 14
Garai Nekutenda Kakabamba mu Umambo
Rangarirai zvakagondeswa Mambo Dhavhidhi we Israeri yo kare ndi Djehovha, mu citenderano ca Dhavhidhi. (Erengai 2 Samueri 7:12, 16.) Djehovha akaita citenderano ici na Dhavhidhi paainga aciri kutonga mu Djerusarema, ecimugondesa kuti Mesiya waizobva mu dzinza rake. (Ruka 1:30-33) Hino Djehovha akanyasa kudjekesa kuti mwana uu waizouya no dzinza ripi, uye akapangidza kuti munhu aizogara nhaka ya Dhavhidhi waizogara no “citenderhwa ce pamutemo” ce kugara mambo mu Umambo wa Mesiya. (Eze. 21:25-27) Djesu acaita kuti umambo wa Dhavhidhi ugare “wakabamba nokusikaperi.” Zve zvirokwazvo mwana wa Dhavhidhi “acagara nokusikaperi, uye cigaro cake ce umambo cicaita hingana zuwa” iro rinorumbwa ririyo. (Pis. 89:34-37) Utongi wa Mesiya auzodyekerhwi, uye zvaucaita zvicagara nokusikaperi!
Upfumi Watinogumira mu Bhaibheri
it-2 paji. 1165 ndi. 1
Mazuwa e Kupedzesera
Uphorofiti wa Bharami. Aisraeri paainga asati apinda mu Nyika Yakapikirhwa, muphorofita Bharami akati kuna Bharaki Mambo we Moabhi: “Uya, ndikubvunze zvicaizwa nge anhu aya [Israeri] ku anhu ako mu masure me mazuwa e kupedzesera. . . . Nyeredzi icabuda kuna Djakobo, ndonga ye umambo aizobviswi kuna Israeri. Uye iyena acaphwanya huma dze Amoabhi, uye misoro dze anyahondo ese anosimba.” (Nu 24:14-17) Pakatanga kudzadzika uphorofiti uu, pakaoneka kuti “nyeredzi” wainga ari Mambo Dhavhidhi, iyena wakanyisa Amoabhi. (2Sa 8:2) Zviri pamhene kuti, kudzadzika ke uphorofiti uu kunopangidza kuti “mazuwa e kupedzesera” akatanga Dhavhidhi paakagara mambo. Sezvo Dhavhidhi waiimirira Djesu hinga Mambo Mesiya, uphorofiti uu waizoseenzawo pa nguwa yokuti Djesu acatonga azondi ake.—Isa 9:7; Pis 2:8, 9.
JUNHO 6-12
UPFUMI UNOBVA MU SOKO RA MWARI | 2 SAMUERI 9-10
“Dhavhidhi Wakapangidza Rudo re Zvirokwazvo”
w06 6/15 paji. 14 ndi. 6
Zvezvirokwazvo Munokwanisa Kuona Mupfaro
Dhavhidhi akatara kuti: “Anopfara munhu anorangarira nge zve munhu akaterera.” Akatiwo: “Djehovha acamuponesa pa zuwa re dambudziko. Djehovha acamurinda uye acaita kuti arumbwe ari mupenyu. Iyena acazwi anopfara mu nyika.” (Pisarema 41:1, 2) Unaki ne rudo ra Dhavhidhi raakapangidzira Mefibhozeti, mwana wakaremara wa Djonatani, shamwari inodiwa ya Dhavhidhi, muezaniso we kuona zvakanaka aya akaterera.—2 Samueri 9:1-13.
w05 5/15 paji. 17 ndi. 12
Mafundo Makuro Anobva mu Bhuku ra Samueri Wecipiri
9:1, 6, 7. Dhavhidhi wakaita zvaainga apikira. Isusuwo tinodikana kupeta masimba ari ese kuti tiite zvatinonga tapikira.
w02 2/15 paji. 14 ndi. 10
Akashingirira Minzwa mu Nyama Yawo
Makore akati wandei adarika, Mambo Dhavhidhi akaitira Mefibhozeti usisi, nge ndaa ye kuda kaaiita Djonatani. Dhavhidhi akamupasa zviro zvese zva Sauro uye akagadza Zibha, muonereri wa Sauro, kuti aonerere nyika ii. Dhavhidhi akabvunza Mefibhozeti kuti: ‘Ucagara wecirhya zvekurhya pa meza yangu.’ (2 Samueri 9:6-10) Apana mubvunzo kuti usisi wa Dhavhidhi wakanyaradza Mefibhozeti uye kuti wakabetsera pa kunyaradza kurhwadza ke urema wake. Ii i fundo yakanaka! Isusuwo tinodikana kupangidza unaki kuno aya ano munzwa mu nyama.
Upfumi Watinogumira mu Bhaibheri
it-1 paji. 291
Ndebvu
Pakati pe anhu e kare e Kumabvazuva, kutobatanidzawo no Aisraeri, ndebvu dzaikosheswa uye dzaiita kuti mwanarume areremedzwe. Mutemo wa Mwari wakapaswa Aisraeri wairambidza kucinga “tsisi rokumuceto,” tsisi riri pakati pe nzee no dziso, uye kunogumira ndebvu. (Re 19:27; 21:5) Izvi zvaiizwa ngekuti pakati pawo painga pano mahedheni uye ii yainga iri tsika yawo ye kunamata.
JUNHO 13-19
UPFUMI UNOBVA MU SOKO RA MWARI | 2 SAMUERI 11-12
“Musasiye Kuti Zvido Zvakashata Zvimunyisei”
Mungakwanisa Kupukunyuka pa Mirau ya Sathani!
Nge ndaa ye makharo, Mambo Dhavhidhi wakakanganwa zvese zvaainga apaswa ndi Djehovha, zvakaita hinga upfumi, mbiri uye kunyisa mu hondo dzakawanda. Dhavhidhi waiziya kuti makomborero a Mwari ainga “asikaerengeki” uye waitenda ndizvona. (Pis. 40:5) Asi pa nguwa dzimweni, Dhavhidhi wakakanganwa zvaainga apaswa ndi Djehovha. Iyena wainga asikacapfari ndizvo, uye waida zvakawanda kudarika apona. Kunyazi wainga no akadzi akawanda, Dhavhidhi wakatanga kugara no cido cakashata mu mwoyo make cekuda mukadzi we munhu. Mwanakadziwo waizwi Bhati-sebha uye mwamuna wake wainga ari Uriya Muhiti. Ecindundwa nge kunyanya kudzida, Dhavhidhi wakaita uhure na Bhati-sebha uye iyena wakabata pa muiri. Pakutunhudzira pa citema icona cekuita uhure, Dhavhidhi wakapsvaka mazano e kuuraya Uriya! (2 Sam. 11:2-15) Dhavhidhi wairangarirei? Iyena wairangarira kuti Djehovha ainga asikazvioni here? Museenzi uya wakagondeka wa Djehovha, wakawira mu makharo no kudzida uye zvakamunetsera maningi. Asi zvinopfadza kuti Dhavhidhi wakapupura citema caakaita uye wakacinyuka. Iyena wakatenda maningi nge kurekererhwa kaakaizwa na Djehovha!—2 Sam. 12:7-13.
w19.09 paji. 17 ndi. 15
Ngei Tecidzikanda Pasi pa Djehovha—Uye Tinozviita Kudini?
Djehovha akagadza Dhavhidhi kuti agare musoro we mhuri yake uye we dzinza rese ra Israeri. Hinga mambo, Dhavhidhi wainga ano simba rakakura. Pamweni paya waiseenzesa simba rake zvisikazi kunaka uye waitoshaishawo. (2 Sam. 11:14, 15) Asi Dhavhidhi wakapangidza kuti waidzikanda pasi pa Djehovha nge kutenda kusumururhwa. Iyena waireketa zvese zvainga zviri mwoyo make kuna Djehovha uye waiita zvese zvaanokwanisa kuti apurutane mazano a Djehovha. (Pis. 51:1-4) Pane izvi, Dhavhidhi wainga ari munhu waidzidodosa zvekuti waitambira mazano akanaka haiwa basi aaipaswa nge anarume, asiwo no anakadzi. (1 Sam. 19:11, 12; 25:32, 33) Dhavhidhi wakafunda nge zvishaishi zvake uye wainyanya kukoshesa kuseenzera Djehovha mu upenyu wake.
w18.06 paji. 17 ndi. 7
Fundisai Hana Yenyu Mitemo ya Mwari no Cokwadi Cisikacinji
Atidikani hedu kutanga tashuphika no marhwadzo anobarhwa nge kusama kupurutana mitemo ya Mwari kuti tione fundo inokosha. Tingakwanisa kufunda pa zvishaishi zvakaizwa nge amweni zvakatarhwa mu Soko ra Mwari. Zvierengo 1:5 inoti: “Munhu akangwara anopurutana uye oona zvaanofunda.” Tinokwanisa kuona nhungamiriro dzakanaka kudarika dzimweni dzese kubva kuna Mwari patinoerenga no kunyasa kurangarira zviro zvakaitika zviri mu Bhaibheri. Hinga muezaniso, rangarirai nge zve kurhwadziwa kakaita Mambo Dhavhidhi paasikazi kupurutana mutemo wa Djehovha oita useki na Bhati-sebha. (2 Sam. 12:7-14) Patinonga tecierenga no kunyasa kurangarira ngano ii, tingadzibvunzisa kuti: ‘Dhavhidhi waida kuitei kuti anzvenge muedzo uu? Kudai ndikasongana no muedzo wakadaro, ndicagara no simba rekuutiza here? Ndicatiza hinga zvakaita Zuzee here, kana kuti ndicaita uhure hinga zvakaizwa ndi Dhavhidhi?’ (Gen. 39:11-15) Tikanyasa kurangarira izvi, tinokwanisa kubambisa “mwoyo wedu kuti uzonde zvakashata.”
Upfumi Watinogumira mu Bhaibheri
it-1 paji. 653 ndi. 2
Dhavhidhi
Zviri pamhene kuti Djehovha waizviona, uye akaita kuti cishaishi ici ciziikanwe. Kudai Djehovha akatendera kuti ndaa ii ya Dhavhidhi na Bhati-sebha itongwe nge atongi e anhu, maererano no Mutemo wa Mozesi, ese ari airi aida kuuraiwa, uye mwana uu wakaizwa nge useki waida kufa pamwepo na mai ake asatoti abarhwa. (Dhe 5:18; 22:22) Hino, Djehovha ndiye akatonga ndaa ii uye akazwira Dhavhidhi usisi, nge ndaa ye citenderano co Umambo (2Sa 7:11-16), nge kuti Dhavhidhi waipangidzawo usisi (1Sa 24:4-7; ezanisai na Tg 2:13) uye nge ndaa yekuti Mwari akaona kucinyuka ke ashaishi. (Pis 51:1-4) Asi awona aazi kusudzunurhwa zvacose pa kuphanicwa kaakaizwa. Djehovha akaseenzesa muphorofiti Natani kuti abvunze Dhavhidhi kuti: “Ndicakuunzira dambudziko recibva nge mumba mako.”—2Sa 12:1-12.
JUNHO 20-26
UPFUMI UNOBVA MU SOKO RA MWARI | 2 SAMUERI 13-14
“Mbau dza Amnoni Dzakabara Matambudziko”
it-1 paji. 31
Absaromi
Kuuraiwa ka Amnoni. Kurungama ka Tamari, hama ya Absaromi, kakaita kuti Amnoni, mukoma ake amusirire. Ecinyepedzera hinga ari kurhwara, Amnoni wakadainzisa Tamari ku nyumba kake, kuti amubikire, uye wakazomudzipa. Rudo rainga rina Amnoni rakazocinja kakugara kuzonda, uye wakaita kuti Tamari aendeswe koogara mugwanza. Ecimwesa-mwesa macira ake ainga ano mutaro-taro aipangidza kuti mwana wa mambo wainga aciri mhandwe, uye ano marota musoro, Tamari wakasongana na Absaromi. Paakazvizwa, wakaongorora nge zvazvo uye wakafungidzira kuti wainga ari Amnoni, ecipangidza kuti kareko waiziya nge zve kusirira kaaiita hama yake. Iyena wakabvunza Tamari kuti asabvunze munhu nge zve ciitiko ici uye wakamutora kuti agare naye ku nyumba kake.—2Sa 13:1-20.
w17.09 paji. 5 ndi. 11
Garai Munhu Anodzibata
Bhaibheri rinobhuya nge zve anhu asikazi kudzibata pano cokuita no useki. Rinopangidzawo zviro zvinosiririsa zvinokwanisa kuitika kana munhu akasama kudzibata pano cokuita no useki. Kudai imwimwi muri kusongana no muedzo wakaita hinga wa Kim, cinyi cingamubetserai? Psvakai nguwa ye kurangarira zvakaitika no djaha rinorekethwa mu kapituro 7 ya Zvierengo. Rangariraiwo zvakaizwa na Amnoni uye nge zve mubairo wakhona wakashata. (2 Sam. 13:1, 2, 10-15, 28-32) Abereki angakwanisa kubetsera ana awo kuti adzibate uye kuti agare no ungwaru pano cokuita no kudanana, paya paanonga eciita kunamata ke mhuri meciseenzesa ngano dziri mu Bhaibheri.
it-1 paji. 31 ndi. 10
Absaromi
Pakadarika makore mairi. Yakaguma nguwa ye kucinga mabira, nguwa ye mabiko, Absaromi wakagadzirira mabiko ku Bhaari-hazori, pakareba 22 km kuenda ku NNE ye ku Djerusarema, wakapika ana a mambo kutobatanidzawo Dhavhidhi. Baba ake paakaramba kwendeyo, Absaromi wakaabambidzira kuti atume Amnoni, dangwe ra Dhavhidhi, pa mbuto yake. (Zvie 10:18) Paainga aa ku mabiko, Amnoni wainga aa “kuraradza nge ndaa ye vhinyu,” Absaromi wakabvunza aseenzi ake kuti amuuraye. Ana amweni akahwirira ku Djerusarema, uye Absaromi wakaenda mu usungwa na tsekuru ake e Siriya, mu umambo wa Geshuri, ku Bahari re Garireya. (2Sa 13:23-38) “Supada” yakaphorofithwa ndi Natani yainga yapinda mu “nyumba” ma Dhavhidhi, uye izvi zvaizoitika ke upenyu wake wese.—2Sa 12:10.
Upfumi Watinogumira mu Bhaibheri
g04 12/22 mapaji. 8-9
Mushobo we Kurungama Unonyanya Kukosha
Kusiyana na izvi, cimborangarirai nge zva Absaromi, umwe we ana a Dhavhidhi. Wakapangidza kuti wainga ari mwanarume asikadiwi, kunyazi wainga ari munhu wakarungama. Bhaibheri rinoti nge zvake: “Mu Israeri yese mainga musina mwanarume wairumbidzwa nge ndaa ye kurungama kake hinga zvaiizwa Absaromi. Kutangira pasi pe tsoka dakara panoperera tsisi re mumusoro make, apana ciro cainga cakashata.” (2 Samueri 14:25) Hino musakazwa wa Absaromi wakaita kuti apandukire baba ake uye ade kuatorera umambo. Iyena wakatotora akadzi amweni a baba ake. Mubairo wazvo, Mwari akamutsamwira uye iyena wakafa zvinorhwadza.—2 Samueri 15:10-14; 16:13-22; 17:14; 18:9, 15.
Munosirirawo Absaromi here? Zviri pamhene kuti haiwa. Iyena wainga ari munhu waiita zvakashata. Kurungama kake akuzi kutsiya kudzikudza uye kusagondeka kake, uye akuzi kumudziirira paakafa. Nge dii rimweni, mu Bhaibheri muno miezaniso dze anhu ainga ano ruziyo uye ainga akarungama asikarekethwi nge zve kurungama kawo. Zviri pamhene kuti cinonyanya kukosha kurungama kawo nge ce mukati.
JUNHO 27–JULHO 3
UPFUMI UNOBVA MU SOKO RA MWARI | 2 SAMUERI 15-17
“Absaromi Wakapanduka nge Ndaa ye Kudzikudza”
it-2 paji. 692
Aitanga Kupinda Mugwanza
Yainga iri tsika yaiizwa Kumabvazuwa kuti agogomi aende mberi ke ngoro ye umambo koogadzirira nokuziisa kuuya ka mambo uye kumubetsera pa zvese zvaanonga ecida. (1Sa 8:11) Absaromi na Adhonia, eciteedzera kukudzwa kakadai, ecida kutunhudzira mbiri uye kupanduka kawo, akakanda agogomi 50 mberi ke ngoro dzawo.—2Sa 15:1; 1Md 1:5; Onai AGOGOMI.
w12 7/15 paji. 13 ndi. 5
Seenzerai Djehovha Makasudzunuka
Mu Bhaibheri muno miezaniso dzakawanda dze anhu aireketa zvakashata nge zve amweni. Umwe wakhona ndi Absaromi, mwana wa Mambo Dhavhidhi. Absaromi wainga akarungama. Asi nokuhamba ke nguwa, hinga zvakaizwa ndi Sathani, mwoyo wake wakatanga kuda kukudzwa, ecisirira cigaro ca baba ake, caainga asina citenderhwa. Paaiedza kutora cigaro, Absaromi wakacengedza Aisraeri kuti arangarire kuti waiada, eciabvunza kuti dare ra mambo rainga risina basa nawo. Hinga zvakaizwa ndi Dhiyabhorosi mu munda we Edheni, Absaromi wakaita hinga munhu waida kubetsera, asi ecireketa manyepo nge zva baba ake.—2 Sam. 15:1-5.
it-1 paji. 1138
Hebroni
Makore manganani akazoteera, Absaromi mwana wa Dhavhidhi, wakahwirira ku Hebroni uye ndipona paakatanga kuda kutorera baba ake cigaro ce umambo. (2Sa 15:7-10) Iyena wakaendeyo pamweni nge ndaa yekukosha ke ngano dze ku Hebroni guta re kare re Djudha, uye nge kuti rainga riri guta raakabarirhwa, kuti Absaromi asanangure guta iri kuti igare mbuto yokutangira kupsvaka kake cigaro. Makore akazoteera, muzukuru wa Dhavhidhi, Mambo Rehobhoamu, wakazoakazve Hebroni. (2Mk 11:5-10) Mumasure mekuparadzwa ke Djudha nge a Bhabhironi uye kuhwirirazve kubva kuutaphwa, Adjudha amweni akahwirira koogara ku Hebroni (Kiriyati-Abha).—Ne 11:25.
Upfumi Watinogumira mu Bhaibheri
w18.08 paji. 6 ndi. 11
Muno Cokwadi Nazvo Here?
Pamweni tinorhwadziwa nge kuti anhu amweni anonga asikazi kunyasa kureketa zvakanaka nge zvedu. Rangarirai zvakaitika kuna Mambo Dhavhidhi na Mefibhozeti. Dhavhidhi wakapangidza unaki kuna Mefibhozeti nge kumuhwirinzira munda wa tsekuru ake Sauro. (2 Sam. 9:6, 7) Asi Dhavhidhi wakabvunzwa masoko e manyepo nge zva Mefibhozeti. Iyena aazi kumbokwarakwatisa nge zvazvo, uye wakatorera Mefibhozeti zvese zvaainga anazvo. (2 Sam. 16:1-4) Dhavhidhi paakazoreketa na Mefibhozeti, wakaona kuti wainga ashaisha uye wakaita kuti Mefibhozeti ahwirinzirhwe dii rimweni re munda. (2 Sam. 19:24-29) Dhavhidhi wainga asikadi kubata zvakashata Mefibhozeti kudai akapsvakisisa cokwadi pano kuti akasike kuita cisananguro asati apsvakisisa nge zvazvo.