Mareferensiya e Urongwa we Musangano Basa Redu uye Kurarama
JULHO 4-10
UPFUMI UNOBVA MU SOKO RA MWARI | 2 SAMUERI 18-19
“Garai no Maonero ari Pakati no Pakati Hingana Bhazirai”
w07 7/15 paji. 14 ndi. 5
Bhazirai—Mwanarume Waiziya Paaidikana Kugumira
Apana mubvunzo kuti Dhavhidhi waitenda maningi rubetso raainga apaswa na Bhazirai. Asi izvi azvibhuyi hazvo kuti mambo ainga ecimupasa mubairo ngekuti ainga ambobetserhwa naye. Bhazirai wainga asikadi kubetserhwa ngekuti wainga ari mupfumi. Pamweni Dhavhidhi aida kuti Bhazirai agare ari mudare ra mambo nge ndaa ye mawara anoshamisa ainga anawo uye ngekuti ainga ari mwanarume wakura. Kugara ari pa mbuto iyona kaizoita kuti akudzwe, zveciita kuti Bhazirai agare no makomborero okugara shamwari ya mambo.
w07 7/15 paji. 14 ndi. 7
Bhazirai—Mwanarume Waiziya Paaidikana Kugumira
Cimwe ce zvikonzero cakaita kuti Bhazirai asanangure izvi nge cekuziya kuti wainga akura uye wainga asisina simba. Pamweni Bhazirai wairangarira kuti wainga asikacararamizve ke nguwa yakareba. (Pisarema 90:10) Iyena wainga aita zviri zvese kuti atsigire Dhavidhi, asi waiziyawo kuti wainga asikakwanisi kuita zvakawanda nge ndaa ye kukura. Iyena aazi kusiya kuti marangariro e kugara no mbiri amuite kuti asabhuye zviro zvaainga asikacakwanisi kuita. Kusiyana na Absaromi waida cigaro, Bhazirai wakapangidza kuti wainga ano maonero ari pakati no pakati.—Zvierengo 11:2.
w07 7/15 paji. 15 mandi. 1-2
Bhazirai—Mwanarume Waiziya Paaidikana Kugumira
Ngano ya Bhazirai inopangidza kuti zvakanaka maningi kugara no maonero ari pakati no pakati. Nge dii rimweni, atidikani kuramba ropapfazo kana kusama kudziseenzera, ngekuti tinonga tecida kurarama tisina zvakawanda zvokuita mu upenyu kana kuti tinozwa hingana kuti atikwanisi kuita basa ratinopaswa. Mwari anokwanisa kutibetsera no simba no ungwaru kana tikagonda naye.—Afiripi 4:13; Tiyago 4:17; 1 Pedru 4:11.
Nge dii rimweni, tinodikana kuziya kuti atikwanisi kuita zvese. Nge muezaniso, pamweni hama yakawandirhwa nge mabasa anocokuita nokunamata. Iyona inozviziya kuti kutenda ropapfadzo imweni zvingakwanisa kuzoita kuti isazoite zvinodiwa no Bhaibheri zve kuriritira mhuri yayo. Pakadaro, zvinonga zvisikazi kunaka kupangidza maonero ari pakati no pakati uye kuzwisisa nge kuramba ropapfadzo dzimweni here?—Afiripi 4:5; 1 Timoti 5:8.
Upfumi Watinogumira mu Bhaibheri
w20.04 paji. 30 ndi. 19
“Gogomai Dakara ku Mugumo”
19 Kana imwimwi muri kubatana no cinetso ce uthongo, uye mecizwa kuti apana munhu uri kuzvirangarira, muezaniso wa Mefibhozeti unotibetsera kuti tigare no simba. (2 Sam. 4:4) Pane kugara no matambudziko e uthongo, iyena wakatongwa zvisina unatsi ndi Mambo Dhavhidhi. Mefibhozeti wainga asikazi kuita ciro kuti abathwe kudaro, kunyazi zvakadaro iyena aazi kugara no marangariro akashata. Kusiya izvona, iyena waikanda ndangariro dzake pazviro zvakanaka zvaiitika mu upenyu wake. Mefibhozeti waitenda nge unaki waainga akapangidzirhwa ndi Dhavhidhi. (2 Sam. 9:6-10) Ndiyo ndaa, Dhavhidhi paakamutonga zvisina unatsi, Mefibhozeti wakaona zvese. Iyena aazi kugara munhu uno mazwiro akashata nge ndaa ye cishaishi ca Dhavhidhi. Uye iyena aazi kupasa ndaa Djehovha ngo zviya zvakaizwa ndi Dhavhidhi. Mefibhozeti wakakanda ndangariro dzake pa zviya zvaaidikana kuita kuti abetsere mambo wakadzodzwa wa Djehovha. (2 Sam. 16:1-4; 19:24-30) Djehovha wakasiya muezaniso wakanaka wa Mefibhozeti mu Bhaibheri kuti utibetsere.—Aro. 15:4.
JULHO 11-17
UPFUMI UNOBVA MU SOKO RA MWARI | 2 SAMUERI 20-21
“Djehovha ndi Mwari we Unatsi”
it-1 paji. 1059 ndi. 1
Gibhiyoni
Ke mazana e makore, Agibhiyoni e pakutanga akarumbwa ariyo, kunyazi hazvo Mambo Sauro ainga aronga kuaparadza. Agibhiyoni akaetsera no mwoyo unononoka kutsamwa kuti Djehovha agadzirise ne unatsi. Iyena akaita kuti paitike nzara ke makore matatu pa nguwa yaitonga Dhavhidhi. Paakabvunzisa Djehovha uye paakaziya kuti paibatanidzwawo ndaa ye ngazi, Dhavhidhi wakabvunzisa Agibhiyoni kuti aziye kuti cinyi caidikana kuizwa kuti atsiye. Agibhiyoni akadaira kuti yainga isiripi “parata kana oro”, ngekuti, maererano no Mutemo, apana rusudzunuro raidikana kuizwa pa muurai. (Nu 35:30, 31) Akaziyawo kuti ainga asikatenderhwi kuuraya munhu zvisiripi pa mutemo. Hino, izvi zvakazoitika basi mu masure mekuti Dhavhidhi abvunzisazve nge zvazvo, ndipona paakakumbira kuti “ana” anomwe a Sauro auraiwe. Sauro no mhuri yake ese ainga ano ndaa ye ngazi, zvinoita hinga kuti kunyazi hazvo Sauro pamweni ndiye wainga ecitungamirira pakuuraiya, “ana” a Sauro pamweni ainga aripo kana kuti aitsigirawo ciitiko ici. (2Sa 21:1-9) Pa ndaa ii, painga pasikareyi kuti ana aurairhwe zvitema zve madzibaba awo (Dhe 24:16) asi zvaibatanidza kutonga no unatsi, maererano no mutemo we “upenyu no upenyu.”—Dhe 19:21.
Upfumi Watinogumira mu Bhaibheri
w13 1/15 paji. 31 ndi. 14
Akuru e Cikristu—‘Anoseenza Pamwepo na Isusu Kuti Tipfare’
14 Mu nyika yese, isusu anhu a Djehovha tiri kuita basa redu re kuparidzira pasinei ne zvinetso zvatinobarirhwa ndi Sathani no aseenzi ake. Amweni edu akasongana ne zvitsinzwa zvakakura, asi akazvinyisa ngekuti akanyasa kugonda na Djehovha. Asi nguwa dzimweni, kugara tecirhwisana no matambudziko e nyika ino kunotipedza simba uye kunotiodza mwoyo. Takaremba kudaro, tinonga tiri pa ngozi yokunyiswa no matambudziko amweni ataikwanisa kunyinsa. Pa nguwa ii, rubetso ratinopaswa no akuru rinokwanisa kutibetsera kupfarazve uye kugara no simba, hinga zvakaitika no amweni akawanda. Mupiyonera umweni uno makore 65 wakati: “Mu nguwa imweni yadarika, ndainga ndisikazwi zvakanaka uye basa rangu re kuparidzira raindishuphira. Mukuru umweni wakaona kuti ndainga ndisisina simba uye wakauya kuzocedza neni. Takacedza nge zve mazano ari mu Bhaibheri anobambisa. Ndakaseenzesa mazano aakandipasa, uye akandibetsera maningi.” Wakatunhudzira eciti: “Mukuru uu wakapangidza rudo re cokwadi paakaona kuti ndainga ndaremba uye akandibetsera!” Zvezvirokwazvo zvinobambisa kuziya kuti tino akuru anogara eciona kuti zviro zviri kutihambira zvakadini, uye akagadzirira kutibetsera hinga zvakaizwa ndi Abhishai.
JULHO 18-24
UPFUMI UNOBVA MU SOKO RA MWARI | 2 SAMUERI 22
“Gondai no Rubetso ra Djehovha”
cl paji. 19 ndi. 11
Zvinoitadi Kamare “Kukhwedere Dhuze na Mwari” Here?
11 Kuerenga kuti Mwari “ano simba guru” kakasiyana nokuerenga nge zve kununura kaakaita Aisraeri paakabira Bahari Rekupsvuka uye pedzepo kakuriritira dzinza iri ke makore 40. (Isaya 40:26) Rangaridzai mvura yakawanda yeciparadzana no pakati kakufunungura gwanza. Rangaridzai dzinza iri—pamweni anhu anokwana 3000 000—ecihamba pakati pe bahari pakaoma, mvura yakaima ku matii mairi hingana maparedhi akabamba. (Ekisodho 14:21; 15:8) Rangaridzai kuti Mwari akaariritira kudini paainga ari murenje. Akaita kuti mvura ibude pa buwe. Akaita kuti pasi paoneke zve kurhya zvakaita hinga mbeu yekucena. (Ekisodho 16:31; Numero 20:11) Djehovha apa akapangidza kuti aana basi simba, asi kuti anoriseenzesa pakubetsera anhu ake. Azvinyaradzi here kuziya kuti minamato yedu inoenda kuna Mwari ano simba uye “citiziro cedu no simba redu, mubetseri ari padhuze dhuze pa nguwa dzekushuphika”?—Pisarema 46:1.
w10 6/1 paji. 26 mandi. 4-6
“Mucagara Akagondeka”
Ngatimboongorore masoko a Dhavhidhi. Soko ro cihebheru rinoturikirhwa kuti “mucagara akagondeka” ringakwanisa kuturikirhwa kuti “nyasha dze rudo.” Rudo ndicona ciro cikuru pakugondeka ke zvirokwazvo. Djehovha akagondeka kuno aya akagondeka kaari.
Onai kuti kugondeka akugumi basi pakureketa, zvese zvatinoita zvinodikana kupangidza kuti takagondeka. Dhavhidhi wakatokwanisa kuona kuti Djehovha akagondeka. Panguwa yaaishuphika, Djehovha akamubetsera nokumudziirira uye akamupasa nhungamiriro hinga mambo akagondeka. Dhavhidhi wakatenda maningi uye wakaona kuti Djehovha ndiyena ainga amununura “munyara dze azondi ake ese.”—2 Samueri 22:1.
Tinofundei pa masoko a Dhavhidhi? Djehovha aacinji. (Tiyago 1:17) Djehovha anoita zvinoenderana no mitemo yake uye anoita zvaanonga agondesa. Mupisarema rimweni, Dhavhidhi wakatara kuti: “Djehovha . . . aazosii akagondeka ake.”—Pisarema 37:28.
Upfumi Watinogumira mu Bhaibheri
w12 11/15 paji. 17 ndi. 7
Sakurirai Mwiya we Munhu Anodzidodosa
7 Muezaniso wekudzidodosa wa Mwari wakabetsera maningi Dhavhidi, mutari we pisarema. Iyena wakaembera Djehovha eciti: “Mucandipasa civhikhiro cenyu ceruponeso, kudzidodosa kenyu ndikona kunoita kuti ndigare mukuru.” (2 Sam. 22:36) Dhavhidhi wakati ukuru wese waainga anawo mu Israeri kainga kuri kudzidodosa ka Djehovha—kureya kuti Mwari aidziteredza, kana kuti aidzidodosa kuti arangarire nge zva Dhavhidhi. (Pis. 113:5-7) Zvakasiyana here no zvaanotiitira? Mawara api, ruziyo uye makomborero atinawo atisikazi kupaswa na Djehovha? (1 Ako. 4:7) Munhu anodzidodosa ndiye mukuru ngekuti unokosha pamberi pa Djehovha. (Ruka 9:48, masoko e pasi) Ngatione kuti zvinoita kudini.
JULHO 25-31
UPFUMI UNOBVA MU SOKO RA MWARI | 2 SAMUERI 23-24
“Imwimwi Muri Kudzipira Here?”
it-1 paji. 177
Arauna
Zvinoita hinga kuti Arauna wakapasa mbuto ii yaipurirhwa zviro, pamwepo no zvinyama, matabwa ne midziyo ye matanda kuti apisire zvibayiro, iyena aazi kurongosa, asi Dhavhidhi waindoda basi kuripa. Masoko ari pana 2 Samueri 24:24 anopangidza kuti Dhavidhi wakatenga mbuto yaipurirhwa zviro no zvinyama ngo mutengo unokwana mashekeri 50 e parata ($ 110). Hino, ngano iri pana 1 Makoronika 21:25 inobhuya nge zva Dhavhidhi eciripa mashekeri 600 e oro (c. $77,000) pa mbuto ii. Mutari we bhuku ra Samueri we cipiri unobhuya basi nge zve kutenga, sezvo kunocokuita no mbuto yo artari no zviro zvaizoseenzeswa pakupiswa ke zvibairo, zvinoita hingana kuti mutengo waakatenga nawo waibatanidzawo zviro izvi. Nge dii rimweni, mutari we bhuku re Makoronika wekutanga wakabhuya nge zve nyaya dzinocokuita no tempro yakazowakwa pa mbuto ii, uye anobatanidza kutenga no kuwakwa ke tempro. (1Mk 22:1-6; 2Mk 3:1) Sezvo mbuto yese ye tempro yainga yakakura maningi, zvinoita hingana kuti mashekeri 600 e oro akasenzeswa pakutengwa ke mbuto ii yakakura, pane cimbuto cidoko caidikanwa pa artari yakawakwa ndi Dhavhidhi pakutanga.
w12 1/15 paji. 18 ndi. 8
Fundai Kubzva ‘Pakutangwa Kakaithwa Cokwadi’
8 Kana cibairo co Muisraeri cainga ciri cokudzipira kuti apangidze kuti waitenda Djehovha, kana kuti cibairo cinopiswa kuti atenderhwe ndi Mwari, pakadaro zvainga zvisikamushuphiri kusanangura cinyama cakasisira. Munamati uu waizopfara maningi ngekupasa Djehovha zvakanakisisa zvaainga anazvo. Mazuwa ano Akristu aapasi zvibairo hinga zvinorekethwa mu Mutemo wa Mozesi; asi anopasawo zvibairo pakuti anoseenzesa nguwa yawo, simba rawo uye zviro zvaanazvo kuti aseenzere Djehovha. Muphostori Pauro wakabhuya “nge zve kuziisa pamhene” kariro ye Cikristu uye “kuita zvakanaka nokupasawo amweni zvamunazvo” hinga zvibairo zvinopfadza Djehovha. (Ahe. 13:15, 16) Kudzipira kunoita anhu a Djehovha pa mabasa aya zvinopangidza kutenda kawo uye kukoshesa zvese zvaanoapasa. Hino, kuita hingana aya aipasa zvibairo mu nguwa dzokare tinodikana kuongorora kuti tinozwa kudini ngekuseenzera Mwari uye zvinyi zvinoitawo kuti tidaro.
Upfumi Watinogumira mu Bhaibheri
w05 5/15 paji. 19 ndi. 6
Mafundo Makuru Anobva mu Bhuku ra Samueri Wecipiri
23:15-17. Dhavhidhi waireremedza maningi mutemo wa Mwari unocokuita no upenyu uye no ngazi, zvokuti pa nguwa iyona, iyena wakasiya kuita kunyazi ciro cipi haco cainga cisikapindirani no mutemo uu. Isusuwo tinodikana kugara no maonero amwewo pa mutemo dza Mwari.
AGOSTO 1-7
UPFUMI UNOBVA MU SOKO RA MWARI | 1 MADZIMAMBO 1-2
“Munofunda Kubva pa Zvishaishi Zvenyu Here?”
it-2 paji. 914 ndi. 1
Soromoni
Paakazwa ngoma yecibva ku Gihoni, yainga isiripi kure, uye anhu ecidainzira eciti: “Mambo Soromoni ngararame mazuwa akawanda”, Adhoniya no cikwata cake akatiza ngokuthya, uye nokutama kuzwirana. Soromoni wakaitisa kuti paoneke runyararo pakutonga kake ngokuti wainga asikadi kuwhirinzira no zvakashata. Kudai asikazi kuzviita Soromoni pamweni waida kufa. Adhoniya wakatizira ku mbuto cena kuti aone rubetso, hino Soromoni wakaita kuti Adhoniya abudisweyo ecimubvunza kuti waizorumbwa ari mupenyu kudai pasikazi kuoneka cakashata kaari, hino Soromoni wakamuendesa kumba.—1Md 1:41-53.
it-1 paji. 53
Adhoniya
Mumasure mekuti Dhavhidhi wafa, Adhoniya wakacengedza Bhati-Sebha omuita kuti aite hingana muonereri wake pamberi pa Soromoni, kuti akumbire Abhishagi wainga ari murapi uye shamwari ya Dhavidhi, kuti agare mukadzi wake. Masoko a Adhoniya ekuti “umambo ucagara wangu uye kuti Aisraeri ese ari kuda kuti ndigare mambo,” anopangidza kuti iyena wainga atorerhwa citenderhwa cake, kunyazi hazvo iyena waiti Mwari waitomutungamirira. (1Md 2:13-21) Kunyazi hazvo kuti cikumbiro cake pamweni caibva pakuda kuriphwa kuruza kaainga aita umambo, zvakapangidza pamhene kuti Adhoniya wainga acakatsukwara, sezvo maererano no mutemo we Kumabvazuwa, akadzi no akadzi amweni a mambo aizogara ake zve pamutemo. (Ezanisai na 2Sa 3:7; 16:21.) Hino Soromoni wakaona cikumbiro ici cakaizwa pamberi pa mai ake, uye akaita kuti Adhoniya aurahwe, izvi zvakazoizwa ndi Bhenaya.—1Md 2:22-25.
Upfumi Watinogumira mu Bhaibheri
w05 7/1 paji. 30 ndi. 1
Mafundo Makuru Anobva mu Bhuku ra Madzimambo Wekutanga
2:37, 41-46. Zvinongozi yakakura kurangarira kuti munhu unokwanisa kuposha mitemo ya Mwari uye apana caanoizwa! Aya anosiya kuhamba “mu gwanza rinotiendesa ku upenyu” eciziya, acatambudzika nge ndaa yecisananguro cawo cakashata.—Mateu 7:14.
AGOSTO 8-14
UPFUMI UNOBVA MU SOKO RA MWARI | 1 MADZIMAMBO 3-4
“Kukosha ke Ungwaru”
w11 12/15 paji. 8 mandi. 4-6
Muezaniso Wakanaka Kamuri Here Kana Kuti i Ngwadzo?
4 Soromoni paakatanga kutonga, Mwari akadzipangidza kaari mu hope ecirota, akamubvunza kuti akumbire zvaiida. Ngekuti waizviziya kuti wainga asina ruziyo rakawanda, Soromoni wakakumbira ungwaru. (Erengai 1 Madzimambo 3:5-9.) Ecipfadzwa ngekuti mambo wakakumbira ungwaru pane kukumbira upfumi nokukudzwa, Mwari akamupasa “mwoyo wo ungwaru, unozwisisa,” uye kubudirira. (1 Mad. 3:10-14) Hingana zvakarekethwa na Djesu, Soromoni wainga ano ruziyo rakakura zvekutoti mambokadzi we Shebha wakazwa ngo zvawo uye wakaita rhwendo rakakura kuti azvionere ega.— 1 Mad. 10:1, 4-9.
5 Isusu aticaetseri kuitirhwa cishamiso cokupaswa ungwaru. Soromoni wakati “Djehovha anopasa ungwaru,” asi akabhuyawo kuti tinodikana kuseenza no simba kuti tigare nawo: “Nyasai kupurutana ungwaru no nzee dzenyu, kuti muite kuti mwoyo wenyu ude ungwaru.” Soromoni akabhuyazve kuti tinodikana ‘kucemera’ uye ‘kurumbwa tecipsvaka.’ (Zvie. 2:1-6) Zviri pamhene kuti zvinoita kamare kugara no ungwaru.
6 Zvakanaka kudzibvunzisa kuti: ‘Ndinonyasa kuteerera muezaniso wa Soromoni panocokuita nokukoshesa ungwaru wa Mwari?’ Matambudziko pa nyaya yo mare zvinoitisa kuti anhu akawanda akande ndangariro dzawo pa mabasa awo uye pakupsvaka mare, izvona zvinoitawo kuti asanangure fundo dze pamusoro-soro. Zvakadini kamuri no mhuri yenyu? Zvisananguro zvenyu zvinopangidza kuti munokoshesa uye munopsvaka ungwaru wa Mwari here? Kucinja zvinangwa zvamunazvo zvinoita kuti mugare no ungwaru? Zvezvirokwazvo, kugara uye kuseenzesa ungwaru zvinotibetsera nokusikaperi. Soromoni wakatara kuti: “Ipona mucazwisisa unatsi, kutonga no unatsi, uye kugondeka, izvi ndizvona zviro zvakanaka”.—Zvie. 2:9.
Upfumi Watinogumira mu Bhaibheri
w98 2/1 paji. 11 ndi. 15
Djehovha ndi Mwari we Citenderano
15 Dzinza ra Abrahamu parakarongeka pa mutemo, Djehovha akaakomborera maererano no zvaakapikira Abrahamu. Muna 1473 K.A.A., Djoshuwa, mutsii wa Mozesi, wakatungamirira Aisraeri kuti apinde mu Kanani. Kukowaniswa ke nyika kakazoteera pakati pe madzinza kakadzadzisa cipikirhwa ca Djehovha, cokupasa nyika mbeu ya Abrahamu. Aisraeri paaigondeka, Djehovha aidzadzisa cipikirhwa cake cokuabetsera kuti akunde azondi awo. Izvona zvaiitika maka-maka pa nguwa yokutonga ka Mambo Dhavhidhi. Pa nguwa yo mwana wa Dhavhidhi Soromoni, dii recitatu recitenderano ca Abrahamu rakadzadzika. “Adjuda no Aisraeri ainga akawanda, hingana djeca riri padhuze no bahari, airhya ecimwa uye ecipfara.”—1 Madzimambo 4:20.
AGOSTO 15-21
UPFUMI UNOBVA MU SOKO RA MWARI | 1 MADZIMAMBO 5-6
Yakagadzirhwa no Nyara Dzawo uye no Mwoyo Yawo
w11 2/1 paji. 15
Maizviziya Here?
Misidhari yo ku Rebhanoni yainyanya kuziikanwa ngokubamba kayo, kurungama uye kunuhwirira ko matabwa akhona, kusamunyiwa ne madjuru. Hino Soromoni wakaseenzesa zviro zvakanakisisa pakuakwa ko tempro. Mazuwa ano, kumatunhu e ku Rebhanoni kainga kakadzara ne miti yo misidhari kandosara miti padoko basi.
it-1 paji. 461
Misidhari
Ngo kunyanya kuseenzeswa kaiizwa misidhari kaikumbirhwa zviuru zve aseenzi kuti ateme miti, kuithwara dakara ku Tiro kana kuti Sidhoni kumuceto ke bahari, aidzisunga kuti akwanise kudarika nadzo pamweni dakara Jope. Dzaizothwarhwa kuendeswa ku Djerusarema. Izvi zvakarongwa pacitenderano cakaizwa ndi Soromoni na Hiramu. (1Md 5:6-18; 2Mk 2:3-10) Mumasure me izvi matabwa akarumbwa eciwanda, zvekuti Soromoni wakaita kuti matabwa e misidhari agare hingana e mitsamvi, nge ndaa yokuwanda kadzanga dzakaita panguya yokutonga kake.—1Md 10:27; ezanisai na Isa 9:9, 10.
it-2 paji. 1092 ndi. 6
Tempro
Paaigadzirira basa iri, Soromoni wakapika anarume e ku Israeri anokwana 30 000, ecitumira zvikwata zvo anhu zvinokwana 10000 pa mwedzi wega wega, anocitenderhwa cokugara pa nyumba ke mwedzi miiri paaihwirira. (1Md 5:13, 14) Wakapika athwari anokwana 70 000 “e nyika dzimweni” uye atemi e miti anokwana 80 000. (1Md 5:15; 9:20, 21; 2Mk 2:2) Soromoni wakagadza anarume anokwana 550 hingana aonereri e basa, uye akagadzawo anarume anokwana 3300 hingana abetseri. (1Md 5:16; 9:22, 23) Pa anhu aya, 250 ainga ari Aisraeri uye 3600 ainga ari “e nyika dzimweni” ainga ari mu Israeri.—2Mk 2:17, 18.
Upfumi Watinogumira mu Bhaibheri
g 5/12, bhokisi riri pa pajina 17
Bhaibheri—I Bhuku Rino Uphorofita we Cokwadi, Dii 1
BHAIBHERI RINOBHUYA ZVIROKWAZVO NGE ZVE NGUWA
Muezaniso unonyasa kupangindza kuti Bhaibheri rinobhuya zvirokwazvo uri pana 1 Madzimambo 6:1, panobhuya nge zve nguwa yakatanga Mambo Soromoni kuwaka tempro mu Djerusarema. Panoti: “Mu gore re mazana marongomuna no makumi masere [479 makore ese] mumasure mekuti ana a Israeri abuda mu Edjipitu mugore re cirongomuna rokutonga ka Soromoni mu Israeri, mu mwedzi wa Zivhi, kureya mwedzi wecipiri, mambo Soromoni wakatanga kuwaka nyumba ya Djehovha.”
Maererano no kuerengwa ke nguwa mu Bhaibheri, gore recirongomuna rokutonga ka Soromoni rainga riri 1034 K.A.A. Tikaerenga tecihwirira sure makore 479 zvinotigumisa mu gore ra 1513 K.A.A., gore rakabuda Aisraeri mu Edjipitu.
AGOSTO 22-28
UPFUMI UNOBVA MU SOKO RA MWARI | 1 MADZIMAMBO 7
“Zvatingafunda Kubva pa Mapirari Mairi”
w13 12/1 paji. 13 ndi. 3
‘Mucacera Kobre Mumatunhu’
Mambo Soromoni wakaseenzesa kobre yakawanda maningi paigadzirhwa tempro ku Djerusarema. Yakawanda yakhona yainga yakaunganidzwa ndi Baba ake, paakakunda Siriya. (1 Makoronika 18:6-8) “Dziya re simbi yakanyunguruswa,” basiya guru re kobre raisukirhwa apristi, raikwanisa kupinda maritro anopinda 66 000 o nvura uye rairema 30 matoneradha. (1 Madzimambo 7:23-26, 44-46) Pa musuwo po tempro painga pano mapirari mairi o kobre akakura ainga akareba mametru anokwana kuita 8 uye ainga asina ciro mukatimo, ainga akapunda mametru aida kukwana 2, uye maparedhi ainga ano masentimetru anodarika 7. Pamusoro pawo painga pakareba mametru anodarika 2. (1 Madzimambo 7:15, 16; 2 Makoronika 4:17) Kobre yakaseenzeswa pakuwaka tempro yainga yakawanda maningi zvekuti zvaishamisa.
it-1 paji. 370
Bhoazi, II
Mapirari makuru mairi e kobre ainga akaimiswa pamberi pe berere ro tempro ya Soromoni, yo dii re katemaidumba yaizwi Bhoazi, pamweni zvaida kureya “No Simba.” Pirari ye kakutsi yaizwi Jakini, zvecireya “Kuti [Djehovha] Ngaanyase Kubambisa.” Tecierenga kubva ku muoko kwawo tecienda ku muoko boshwe zvingareya: ‘Kuti [Djehovha] ngaanyase kubambisa [tempro] no simba.’—1Md 7:15-21; onai MISORO DZE MAPIRARI.
Upfumi Watinogumira mu Bhaibheri
it-1 paji. 288
Kusamba
Anamati a Djehovha anokohomedzeswa kuti agare akacena mukati uye no kunza. Izvi tinokwanisa kuzviona maererano no zvaiizwa pa tabhernakuro uye no basa raiizwa pa tempro. Pa nguwa yokugadzwa kake, mupristi mukuru Aroni no ana ake akasamba asati asimira macira o upristi. (Eki 29:4-9; 40:12-15; Re 8:6, 7) Kuti akarawe nyara no kusuka mirenje dzawo, apristi aiseenzesa basiya re kobre rainga riri pa ruanze re tabhernakuro, uye pamweni aiseenzesawo dziya guru re simbi yakanyunguruswa rainga riri pa tempro ya Soromoni. (Eki 30:18-21; 40:30-32; 2Mk 4:2-6) Pa Zuwa Rokurekerera, mupristi mukuru waisamba kairi. (Re 16:4, 23, 24) Aya aiendesa mbudzi kuna Azazeri, zvia zvainga zvasara pa zvibairo zve zvinyama uye n’ombe yokupsvuka ye cibairo kunza ko musasa aidikana kusamba uye kuphadza macira awo asati apindazve mu musasa.—Re 16:26-28; Nu 19:2-10.
AGOSTO 29–SETEMBRO 4
UPFUMI UNOBVA MU SOKO RA MWARI | 1 MADZIMAMBO 8
“Munamato we Kudzidodosa we pa Mwoyo wa Soromoni”
w09 11/15 paji. 9 mandi. 9-10
Dzikisai Minamato Yenyu nge Kufunda Bhaibheri
9 Kuti munamato uzwike, tinodikana kunamata zvecibva pa mwoyo. Soromoni wakanamata no mwoyo wese, zvakatarhwa pana 1 Madzimambo kapituro 8, wakanamata ari pamberi pe anhu ainga akaungana ku Djerusarema kuzodimura tempro ya Djehovha muna 1026 K.A.A. Mumasure mekuti areka yecitenderano yakandwa mu mbuto yakacenesesa, gore ra Djehovha rakadzara mu tempro, Soromoni wakakudza Mwari.
10 Ongororai munamato wa Soromoni muone zvaunobhuya nge zve mu mwoyo. Soromoni wakabhuya kuti Djehovha ndiye basi anoziya mwoyo wo munhu. (1 Mad. 8:38, 39) Munamato wakhona unopangidza kuti mushaishi unohwirira kuna Mwari no mwoyo wake wese unotambirhwa na Mwari. Kudai muzondi aizotora anhu a Mwari, kucema kawo kaizozwika kana mwoyo wawo wakaperera kuna Djehovha. (1 Mad. 8:48, 58, 61) Zvezvirokwazvo minamato dzedu dzinodikana kubva pa mwoyo.
w99 1/15 paji. 17 mandi. 7-8
Mutsai Muoko Dzakagondeka Meciita Munamato
7 Kunyazi tecinamata pano anhu, kana kuti tiri tega, cokwadi cisikacinji cinokosha catinodikana kuedzurira ngecekuti tinodikana kudzidodosa patinoita munamato. (2 Makoronika 7:13, 14) Mambo Soromoni akapangidza kudzidodosa paiita munamato pano amweni panguwa yokuti tempro ya Djehovha yaipirhwa ku Djerusarema. Soromoni wainga apedza kugadzira imwe nyumba yakanaka maningi isati yakambowakwa pa nyika. Asi akaita munamato ecidzidodosa: “Mwari we zvirokwazvo angagara pa nyika here? Onai amungakwani mumatenga, mumatenga ekumatenga, hino kuzoti nyumba ii yandakawaka!”—1 Madzimambo 8:27.
8 Kuita hingana Soromoni, tinodikana kudzidodosa patinoita munamato pamberi pe anhu akawanda. Kunyazi hazvo tisikadikani kureketa teciidziita hinga takanaka maningi, izwi redu ringakwanisa kupangidza kuti tinodzidodosa. Minamato yekudzidodosa andiyopi iya inoizwa ngekuda kuonekwa kana kuti kushamisira. Inoita kuti anhu akande ndangariro dzawo haiwa pa munhu uri kunamatewo asi pa uya uri kubhuiwa naye. (Mateu 6:5) Tinopangidzawo kudzidodosa pa zviya zvatinobhuya teciita munamato. Kana tikanamata tecidzidodosa atizobhuyi hingana kuti tiri kubvunza Mwari kuti aite zviro mu maonero edu. Pakutanga, tinokumbira Djehovha aite zvese maererano no zviya zvaanoda. Mutari we Pisarema wakaezanisira mushobo wekunamata paakati: “Tapota Djehovha tiponeseiwo! Djehovha, itai kuti tibudirire, tapota!”—Pisarema 118:25; Ruka 18:9-14.
Upfumi Watinogumira mu Bhaibheri
it-1 paji. 472 ndi. 4
Denga
Soromoni, muwaki we tempro mu Djerusarema, wakareketa kuti “honde! Mwari aangakwani kumatenga mumatenga ekumatenga.” (1Md 8:27) Mbuto ya Djehovha hingana Musiki we matenga, yakakwirira kudarika zvese, uye “zina rake basi riri kumusoro kusikagumiki. Kukudzwa kake kuri pamusoro pe nyika ne denga.” (Pis 148:13) Djehovha anopima matenga zviri nyore hinga mushobo unopima munhu ciro nge kutatamura zvikunwe zvake, kuitira kuti ciroco cigare pakati pe gunwe guru no gunwe rimweni doko. (Isa 40:12) Masoko a Soromoni aareyi kuti Mwari aana mbuto yake kamare yaanogara. Uyewo aareyi kuti ari kese-kese pakuti iyena unonga ari kese eciona zviro zvese. Izvi zvinokwanisa kuoneka mu masoko a Soromoni ecireketa nge zva Djehovha hinga anozwa “ari kumatenga, mbuto yake yaanogara,” kureya kuti matenga e kumbuto cena.—1Md 8:30, 39.