Mareferensiya e Urongwa we Musangano Basa Redu uye Kurarama
© 2022 Christian Congregation of Jehovah’s Witnesses
JANERO 2-8
UPFUMI UNOBVA MU SOKO RA MWARI | 2 MADZIMAMBO 22-23
“Ngei Tecidikana Kudzidodosa?”
w00 9/15 mapaji. 29-30
Djosiya Waidzidodosa uye Waidiwa na Djehovha
Kubvira macibese aseenzi aiseenza no simba ecigadzirisa tempro. Izvirokwazvo kuti Djosiya waitenda Djehovha nge ndaa yo aseenzi aigadzirisa kuparadza kakaita madzitsekuru ake akashata mwoyo mu nyumba ya Mwari. Basa raienderera mberi, Shafani unouya kosiya masoko. Asi wainga anei munyara make? Iyena wainga ano mupumburu! Shafani wakapanganidza kuti Mupristi Mukuru Hirkia wainga waona “bhuku ro mutemo wa Djehovha raakapasa Mozesi.” (2 Makoronika 34:12-18) Wakaona ciro cinokosha maningi—pasina mubvunzo rainga riri kopiya ye bhuku re Mutemo!
Djosiya unoda kuzwa masoko esse ari mu bhuku irona. Uye Shafani uno erenga, mambo anoedza kuona mashandire anoidzwa mutemo umwe na umwe kaari uye ku anhu. Iyena wakashamisika maningi nge kuti bhuku irona raibambisa maningi kunamata kakacena uye nokureketa nge zve matambudziko e utapwa kana anhu akazopinda mucitendero cekunyepa. Uye ecizviziya kuti aimutemopi yese ya Mwari yaitererhwa, Djosiya unomwesa macira ake uye unopasa Hirkia, Shafani, no amweni mutemo wekuti: ‘Bvundzisai Djehovha nge zve masoko e mu bhuku iri, ngekuti shungu dza Djehovha dzakatungidzwa katiri uye dzakakura ngekuti madzitsekuru edu aazi kupurutana masoko ari mu bhuku iri.’—2 Madzimambo 22:11-13; 2 Makoronika 34:19-21.
w00 9/15 paji. 30 ndi. 2
Djosiya Waidzidodosa uye Waidiwa na Djehovha
Atumwa ndi Djosiya akaenda kuna muphorofitakadzi Huridha ku Djerusarema uye akauya no masoko. Huridha akagondesa soko ra Djehovha zvecipangidza kuti matambudziko akatarhwa mu bhuku rainga rabva kuoneka aizouya ku esse aya ainamata ana mwari ekunyepa. Asi ngekuti Djosiya wakadzidodosa pamberi pa Djehovha Mwari, iyena wainga asikazooni matambudziko aya. Iyena waizounganidzwa kumadzitsekuru ake uye oendeswa kumakuwa murunyararo.—2 Madzimambo 22:14-20; 2 Makoronika 34:22-28.
Upfumi Watinogumira mu Bhaibheri
w01 4/15 paji. 26 mandi. 3-4
Mungakwanisa Kubudirira Kunyazi Nemarererhwe Amakaizwa
Kunyazi ne maimirire e zviro zvakashata aibatana na Djosiya aciri mwana, iyena wakazoita zviro zvakanaka pamberi pa Djehovha. Utongi wake wakabudirira zvekutoti Bhaiberi rinoti: “Mumasure make apazi kuoneka mambo wakaezana naye, wakatendeukira kuna Djehovha no mwoyo wake wese, no mwiya wake wese, ne simba rake rese eciteerera mitemo yese ya Mozesi; uye apana umweni wakazotera wakaezana naye.”—2 Madzimambo 23:19-25.
Muezaniso unopfadza maningi wakapangidzwa na Djosiya kuno aya akashingirira udoko waishupha maningi! Tingafundei no muezaniso wa Djosiya? Cinyi cakabetsera Djosiya kuti asanangure gwanza rakanaka uye kurumbwa ari imona?
JANERO 9-15
UPFUMI UNOBVA MU SOKO RA MWARI | 2 MADZIMAMBO 24-25
“Garai Makagadzirira Kuteerera Nhungamiriro Nokukasika”
w01 2/15 paji. 12 ndi. 2
Zuwa Rokutonga ka Djehovha ra Padhuze!
2 Apana mubvunzo kuti zvakaphorofitwa na Zefaniya zvakabetsera Djosiya kuona kuti zvaikosha maningi kuparadza kunamata ke kunyepa. Asi zviito zva mambo zvokubvisa kunamata ke kunyepa munyika azvizi kubvisa ushaishi wese we anhu, uye autozi kutopfudzawo zvitema zva Mambo Manase tsekuru ake, “ayena wainga adzadza Djerusarema ne ngazi isina ndaa.” (2 Madzimambo 24:3, 4; 2 Makoronika 34:3) Nge kudaro, apana mubvunzo kuti zuwa rokutonga ka Djehovha raidikanadi kamare kuuya.
w07 3/15 paji. 11 ndi. 10
Mafundo Makuru Anobva mu Bhuku ra Djeremiya
Yainga riri 607 K.A.A. riri gore reci 11 rekutonga ka Zedhekiya. Mambo Nabhukodhonozori we Bhabhironiya wainga akundha Djerusarema ke gore rimwe ne hafu. Pazuwa reci 7 ro mwedzi weci 5 wegore reci 19 re kutonga ka Nabhukodhonozori Nebhuzaradhani shefi we masurudado, ‘wakauya ku,’ Djerusarema. (2 Madzimambo 25:8) Pamweni ainga akandwa mumusasa wake kunza ko muru we thaundi, Nebhuzaradhani akavhevha maitiro akhona e zviro ecirangarira kuita ciro. Mazuwa 3 gare gare, pazuwa reci 10 no mwedzi wakhona ‘akapinda’ mu Djerusarema opisa thaundiro.—Djeremiya 52:12, 13.
Upfumi Watinogumira mu Bhaibheri
w05 8/1 paji. 12 ndi. 1
Mafundo Makuru Anobva mu Bhuku ra Madzimambo Wecipiri
24:3, 4. Djehovha “aazi kutendera kurekerera” Djudha nge ndaa ye ngazi ya Manasi. Mwari anoreremedza ngazi isina ndaa. Tinokwanisa kugonda kuti Djehovha acatsiya ngazi yese isina ndaa ngekutsakatisa aya anodurura ngazi isina ndaa.—Pisarema 37:9-11; 145:20.
JANERO 16-22
UPFUMI UNOBVA MU SOKO RA MWARI | 1 MAKORONIKA 1-3
“Bhaibheri—Bhuku re Cokwadi, Haiwa re Ngano”
w09 9/1 paji. 14 ndi. 1
Adhamu na Evha—Akararamadi Here?
Hinga muezaniso rangarirai nge zve mundandanda we madzitsekuru e Djudha akatarhwa mu Bhaibheri mu bhuku ra 1 Makoronika kapituro 1 dakara 9 uye mu Evhangeri ya Ruka kapituro 3. Madzinza aya anobatanidzawo abarirhwana 48 uye 75 eciteererana. Bhuku ra Ruka rine ngano ye dzinza ra Djesu Kristu, Makoronika rine mundandanda we madzitsekuru we madzimambo no apristi o dzinza ra Israeri. Mundandanda miiri ii inobhuya nge zve mazina e anhu anoziikanwa maningi hinga Soromoni, Dhavhidhi, Djakobo, Izaki, Abrahamu, Nowa, uye Adhamu. Mazina ese aya akatarhwa apa ngee cokwadi, munhu wekutanga uye we cokwadi pamadzinza ese aya ndi Adhamu.
w08 6/1 paji. 3 ndi. 4
Nowa uye Ndambi—Cokwadi, Haiwa Ngano
Ngano mbiri dzemadzinza dziri mu Bhaibheri dzinogondesa kuti Nowa wainga ari munhu kamare. (1 Makoronika 1:4; Ruka 3:36) Esdra na Ruka, akatara mundandanda we madzinza aya, ainga ari akwarakwatisi akangwarira. Mubarirhwana wa Djesu Kristu wakatarhwa ndi Ruka wakabatanidzawo Nowa.
w09 9/1 mapaji. 14-15
Adhamu na Evha—Cokwadi, Haiwa Ngano
Ngo muezaniso, fundiso ye Bhaibheri inokosheswa no anhu akawanda e magereja ndi—rusudzunuro. Maererano no fundiso ii, Djesu Kristu akapasa upenyu wake wakakwana hinga rusudzunuro kuti aponese anhu pazvitema zvawo. (Mateu 20:28; Juau 3:16) Hingana zvatinoziya, rusudzunuro ndimutengo we mare yakatodzana no rusudzunuro kana kuti kutengazve ciro cimweni cainga capsveteka uye cakatorhwa. Ndiyo ndaa Bhaibheri rinoezanisa Djesu “hinga rusudzunuro.” (1 Timoti 2:6) Pamweni imwimwi mungadzibvunzisa kuti, zvinoendererana neyi? Bhaibheri rinoti: “Ngekuti anhu ese arikufa nge ndaa ya Adhamu, uye ese acamutswawo nge ndaa ya Kristu.” (1 Akorinti 15:22) Upenyu wakakwana wakabairhwa na Djesu kuti asudzunure anhu anoteerera, unotodzaniswa no upenyu wakakwana wakaruza Adhamu na Evha nge ndaa ye citema caakaita mu munda we Edheni. (Aroma 5:12) Zviri pamhene kuti, kudai Adhamu asikazi kurarama, cibairo co rusudzunuro ca Kristu cainga cisikazoseenzi.
Upfumi Watinogumira mu Bhaibheri
it-1 paji. 1040 mandi. 1-2
Dzinza
Mazina e Anakadzi. Anakadzi aimbobhuiwa mu matarhwa e madzinza pakaoneka cikonzero kuti abhuiwe. Pana Genesi 11:29, 30, Sarai (Sara) unobhuiwa, nge kuda ke cikonzero ciri panhene cokuti Mbeu yakapikirhwa yaizouya nge ndaa yake, haiwa nge mwanakadzi umweni wa Abrahamu. Pamweni zvingaita kuti Mirka wakabhuiwawo zina rake ngekuti wainga ari mbiya a Rabheka mukadzi wa Izaki, zvecipangidza kuti dzinza ra Rabheka rakabva ku hama dza Abrahamu, nge ndaa yekuti Izaki wainga asikadikani kugara no mukadzi we madzinza amweni. (Ge 22:20-23; 24:2-4) Pana Genesi 25:1, panopangidza zina ra Ketura mukadzi wa Abrahamu. Izvi zvinopangidza kuti Abrahamu, wakawakazve mumasure mekufa ke mukadzi wake Sara uye kuti simba rake rekubara rainga riciri kuseenza kunyazi kainga kadarika makore 40 mumasure mekupaswazve simba irona na Djehovha nge gwanza rinoshamisa. (Aro 4:19; Ge 24:67; 25:20) Panopangidzawo ukama wa Midhiyani no madzinza amweni eci Arabhe no Aisraeri.
Reya, Rakeri, uye makonkubhina a Djakobo, anobhuiwa mazina awo pamwepo no ana aakabara. (Ge 35:21-26) Izvi zvinotibetsera kuzwisisa zvakazoita Mwari no ana aya. No zvikonzero zvakatodzana, tinoona muzvitarhwa zve madzinza mazina e anakadzi amweni. Pamweni mazina awo akabatanidzwawo paibhuiwa nge zve nhaka. (Nu 26:33) Izvirokwazvo kuti Tamari, Rakabhi na Rute akasiyana no amweni. Panyaya imwe na imwe, pano ciro cinoshamisa cakapangidzwa no anakadzi aya muubarirhwana wa Mesiya Djesu Kristu. (Ge 38; Ruk 1:3-5; 4:13-15; Mt 1:1-5) Pakati po zviitiko zvimweni zvo anakadzi anoreketwa mu madzinza zvinooneka pana 1 Makoronika 2:35, 48, 49; 3:1-3, 5.
JANERO 23-29
UPFUMI UNOBVA MU SOKO RA MWARI | 1 MAKORONIKA 4-6
“Minamato Yangu Inopangidzei Nge Zvangu?”
w10 10/1 paji. 23 mandi. 3-7
“Muzwi we Munamato”
Zviri pamhene kuti Djabhezi wainga ane musambo we kuita munamato. Iyena wakatanga munamato wake nge kudeketera kuti Mwari amukomborere. Mumasure mazvo wakakumbira zviro zvitatu zvinopangidza kuti wainga ano kutenda kakabamba.
Cokutanga, Djabhezi wakadeketerera Mwari kuti: “Akudze nharaunda yake.” (Vherisikuro 10) Mwanarume uu unokudzwa wainga asikadi zvakamunakira basi, iyena wainga asikadi munda we anyacigarisano ake. Cikumbiro cake ce mwoyo wese pamweni cainga cakabatanidzwa pakubetsera anhu. Zvingaita kuti Djabhezi wainga ecikumbira kuti nharaunda yake ikudzwe murunyararo kuitira kuti anamati akawanda a Mwari we cokwadi araramiremo.
Cecipiri, Djabhezi wakadeketerera “moko” wa Mwari kuti ugare naye. Moko wa Mwari wekuezanisira i simba rake rinoseenza, raanoseenzesa kuti abetsere anamati ake. (1 Makoronika 29:12) Kuti zvido zvake zviitike, Djabhezi wakanamata kuna Mwari ane moko usikazi kufupika kuti abetsere aya anokutenda maari.—Isaya 59:1.
Cecitatu, Djabhezi wakanamata kuti: “Ndicengetei padambudziko, kuti risandikuadze.” Masoko o kuti “zvisandikuadze” angapangidza kuti Djabhezi wakanamata, ecikumbira, haiwa kutiza dambudziko asi kuti asanyanye kutsukwara kana kuora mwoyo migumisiro ye zviro zvakashata.
Mu munamato wake, Djabhezi wakapangidza kutenda muna uya unopurutana munamato uye nekugara nocido ne kunamata kwecokwadi. Djehovha akaitei? Ngano ii idoko inopedzesera no masoko anoti: “Nekudaro Mwari akaita zvaakakumbirhwa.”
Upfumi Watinogumira mu Bhaibheri
w05 10/1 paji. 9 ndi. 7
Mafundo Makuru Anobva mu Bhuku ra Makoronika Wekutanga
5:10, 18-22. Mu mazuwa a Mambo Sauro, madzinza ari kumabvazuwa ke Djordhani, kunyazi hazvo ainga ari padoko asikagumi pakati akakwanisa kukunda Agareni. Izvi zvakaitika ngekuti ainga ari anarume akashinga aingonda Djehovha uye akatsvaka kubetserhwa naye. Ngatigarei nekugonda kakadzara kuna Djehovha patinorhwisana ne azondi akawanda kupinda isusu.—Aefeso 6:10-17.
JANERO 30–FEVRERO 5
UPFUMI UNOBVA MU SOKO RA MWARI | 1 MAKORONIKA 7-9
“Imwimwi Mungakwanisa Kuita Mabasa Anoshupha no Rubetso Ra Djehovha”
w05 10/1 paji. 9 ndi. 8
Mafundo Makuru Anobva mu Bhuku ra Makoronika Wekutanga
9:26, 27. Arevhi aionerera musuwo aiita basa rakakura uye rinosimbwa maningi, ngekuti ainga apaswa shavhi dze misuwo dze mbuto cena mu tempro. Aidikana kugondwa kuti afunungure musuwo mazuwa ese. Nge mushobo umwewo isusu takapaswawo ubaba wekupsvaka anhu e mundima yedu uye kuabetsera kuti anamate Djehovha. Atidikaniwo here kugara anhu akagondeka hingana Arevhi aifunungura musuwo?
w11 9/15 paji. 32 ndi. 7
Mungakwanisa Kuteedzera Muezaniso wa Fineya Pamunonga Mecibatana no Zvinetso Here?
Fineya wainga ano ubaba wakakura mu Israeri yokare; asi, no ushingi, ne ungwaru uye ne kugonda na Mwari, iyena wakabudirira paiisongana no zvinetso. Kuseenza no simba kaiita mu ungano kakapfadza Djehovha. Paapadarika makore 1000, Esdra wakafemerhwa kutara kuti: “Fineya mwana wa Ereazar ndiyena wainga ari mutungamiriri wawo kare. Djehovha ainga anaye.” (1 Mak. 9:20) Tinoetsera kuti zviitikewo zvimwezvo no ese ari kutungamirira anhu a Mwari mazuwa ano, tingatoti no Akristu ese anomuseenzera akagondeka.
Upfumi Watinogumira mu Bhaibheri
w10 12/15 paji. 21 ndi. 6
Emberai Djehovha!
6 Aciseenzesa aphorofita ake, Djehovha akabvunza anamati ake kuti amurumbidze no ngoma. Aembi e dzinza roupristi aitosunungurhwa pamabasa amweni aidiwa no Arevhi kuitira kuti agare no nguwa yakakwana yo ku emba, uye yekutogadzirirawo.—1 Mak. 9:33.
FEVRERO 6-12
UPFUMI UNOBVA MU SOKO RA MWARI | 1 MAKORONIKA 10-12
“Bambisai Cido Cenyu ce Kuita Kuda ka Mwari”
w12 11/15 paji. 6 mandi. 12-13
“Ndifundisei Kuita Kuda Kenyu”
12 Zvinokosha kuti titeedzere muezaniso wa Dhavhidhi we kukoshesa Mutemo uye kuuteerera. Onai zvakaitika Dhavhidhi paakabhuya nge zve cido cake cakabamba ce “kumwa mbvura ye murindi ro Bheterehema.” Anarume ake atatu akapinda mu thaundi, rainga recigarhwa ne Afiristiya, akamuunzira mbvura. Asi, “Dhavhidhi aazi kutenda kuimwa, asi wakaidururira kuna Djehovha.” Ngei? Dhavhidhi wakapanganidza kuti: “Handigamboiti zvakadaro kuna Mwari wangu! Ndingamwa ngazi ye anarume aya akakanda upenyu wawo pangozi here? Ngekuti kuunza kwaakaita mbvureyo kainga kuri kukanda upenyu wawo pangozi.”—1 Mak. 11:15-19.
13 Maererano no Mutemo Dhavhidhi waiziya kuti ngazi yaidikana kudururirhwa kuna Djehovha haiwa kuiseenzesa pakuirhya. Iyena waizviziyawo kuti ngei izvi zvaidikana kuizwa. Dhavhidhi waiziya kuti “mwiya we nyama uri mu ngazi.” Asi awona akamuunzira mbvura, haiwa ngazi. Ngei Dhavhidhi akaramba kuimwa? Ngekuti Dhavhidhi waizwisisa mutemo. Kuna Dhavhidhi, mbvurewo yaikosha hingana ngazi ye anarume aya atatu. Ngekudaro iyena wakaona zvisikaiti kuimwa. Pane kudaro wakaona kuti waidikana kuidurura pasi.—Rev. 17:11; Dhe. 12:23, 24.
w18.06 paji. 17 mandi. 5-6
Fundisai Hana yenyu ne Mitemo uye no Zvokwadi Zvisikacindji zva Mwari
5 Mitemo ya Mwari inokwanisa kutibetsera maningi. Asi kuti itibetsere atidikani basi kuierenga uye kuiziya. Tinodikana kuida uye kuireremedza. Soko ra Mwari rinoti: “Zondai zvakashata, uye idai zvakanaka.” (Amos 5:15) Tingazviita kudini? Cinokosha kufundira kuona zviro no maonero anoizwa na Djehovha. Ngo muezaniso: Rangarirai kuti murikunetseka ngekusama kuwata. Imwimwi munoenda kuna medhiko uye iyena unomubvunzai kuti munodikana kusanangura zva mungarthya, kuita maezersisiyo uye kucindja maitiro amweni. Imwimwi munoita zvese zvaanobhuya uye motanga kuwata zvakanaka hingana zvamaiita kare. Apana mubvunzo kuti maizoda kutenda medhiko uu wakamubetsera kuzwa zviri nani.
6 Nge mushobo umwewo, Musiki wedu wakatipasa mitemo dzinganani dzingatidziirira dzingacindja upenyu wedu uye kutidzirira pamigumisiro ye zvakashata inobarhwa no citema. Nge muezaniso, ayena akatipasa mitemo inopangidza zvaanorangarira nge zve kunyepa, kusagondeka, kuba, useki, bvinga uye zvemudzimu. (Erengai Zvierengo 6:16-19; Rev. 21:8) Patinoteerera mitemo ii upenyu wedu unogara uri nani. Izvona zvinotiitisa kuti titende maningi uye kugara no rudo kuna Djehovha no mitemo dzake.
Upfumi Watinogumira mu Bhaibheri
it-1 paji. 556 mandi. 6-7
Mwoyo
Kuseenza ne “Mwoyo Wese.” Mwoyo kamare unodikana kugara wakakwana kuti useenze zvakanaka, asi mwoyo wekuezanisa ungakwanisa kugara wakaparadzana. Dhavhidhi wakanamata kuti: “Batanidzai mwoyo wangu kuti utye zina renyu,” zvecipangidza kuti mwoyo yo munhu ungagara wakaparadzana pamusoro pa zviya zvaanoda uye zvaanoreremedza. (Pis 86:11) Anhu akadaro angagara ne “mwoyo yakaparadzana”—wakatonhora pakunamata Mwari. (Pis 119:113; Re 3:16) Munhu ungakwanisawo kugara ne “mwoyo miiri” (zvezvirokwazvo, mwoyo umwe uye no mwoyo umwe), eciedza kuseenzera matenzi mairi, ecinyepedzera kubhuya ciro cimweni, asi ecirangarira cimweni. (1Mk 12:33; Pis 12:2, masoko e pasi) Djesu wakashora maningi maitiro aya okunyepedzera akaringana ne mwoyo miiri.—Mt 15:7, 8.
Uya unopsvaka kupfadza Mwari aadikani kugara ne mwoyo miiri uye mwoyo yakaparadzana, asi unodina kumuseenzera ne mwoyo wese. (1Mk 28:9) Izvi zvinoda kuseenza no simba, ngekuti mwoyo wakashata uye unoda kuiita zvakashata. (Dje 17:9, 10; Ge 8:21) Zviro zvinotibetsera kuti tirubwe teciseenzera Mwari no mwoyo wese: kuita munamato no mwoyo wese (Pis 119:145; Mari 3:41), kufunda Soko ra Mwari mazuwa ese (Esd 7:10; Zvie 15:28), kushingaira mu basa re kuparidzira masoko akanaka (ezanisai na Dje 20:9), uye kushamwaridzana no amweni anoseenzera Djehovha no mwoyo wese.—Ezanisai na 2Md 10:15, 16.
FEVRERO 13-19
UPFUMI UNOBVA MU SOKO RA MWARI | 1 MAKORONIKA 13-16
“Kuteerera Nhungamiriro Kunounzisa Kubudirira”
w03 5/1 mapaji. 10-11
Imwimwi Munosobvunzisa kuti, “Djehovha Ari Kupi?”
12 Mumasure mekuti areka ye citenderano yahwirinzwa ku Israeri uye yaigwa mu Kiriyati-Djearimi ke makore akawanda, Mambo Dhavhidhi aida kuiendesa ku Djerusarema. Ayena wakabvunzisa akuru e anhu uye wakabhuya kuti Areka yaizoendeswa ‘kana akaona kuti zvainga zvakanaka kaari uye kuti zvaitenderhwa na Djehovha.’ Asi ayena aazi kunyasa kupsvakisisa kuti cinyi caidiwa na Djehovha pa nyaya iyona. Kudai waita izvona, Areka yainga isikazi kuthwarhwa mungoro, asi pamapfudzi e Arevhi, no Akowati, maererano no zvainga zvakatobhuiwa na Mwari. Kunyazi hazvo Dhavhidhi aibvunzisa Djehovha pa zvese, aazi kuita nge mushobo wakanaka panguwa ii. Mugumisiro wakhona auzi kunaka. Dhavhidhi wakazotendera kuti: “Djehovha Mwari wedu, akatitsamwira maningi ngekuti atizi kumupsvaka nge mushobo wakanaka.”—1 Makoronika 13:1-3; 15:11-13; Numero 4:4-6, 15; 7:1-9.
w03 5/1 paji. 11 ndi. 13
Imwimwi Munosobvunzisa kuti, “Djehovha Ari Kupi?”
13 Pakupedzesera Areka payakathwarhwa ne Arevhi kubva kunyumba ya Obhedhi-Edhomu kuenda ku Djerusarema, kakaembiwa ngoma yakatarhwa ndi Dhavhidhi. Yaibatanidza ciedzuriro cakaizwa ne mwoyo wese: “Psvakai Djehovha no simba rake, psvakai hope yake nguwa dzese. Edzurirai mabasa anoshamisa aakaita, zvishamiso zvake uye no mitemo yake yaakaziisa.”—1 Makoronika 16:11, 12.
Upfumi Watinogumira mu Bhaibheri
w14 1/15 paji. 10 ndi. 14
Namatai Djehovha, Mambo Asina Mugumo
14 Dhavhidhi akaunza areka cena ye citenderano ku Djerusarema. Pa nguwa iyona ye mupfaro, Arevhi akaemba ngoma ye kutenda yainga ino masoko anokosha, ari pana 1 Makoronika 16:31 anoti: “Bhuyai pakati pe madzinza ese: ‘Djehovha agara Mambo!’” Pamweni munhu ungadzibvunzisa kuti, ‘Sezvo Djehovha ndi Mambo asina mugumo, akagara kudini Mambo pa nguwa iyona?’ Djehovha anogara Mambo paanopangidza utongi wake kana kuti paanogadza mushobo we kudziimirira pa nguwa yakasisira kana kuti paanogadzirisa zviro zvimweni. Mushobo uwona wo kutonga ka Djehovha unoreya zviro zvakawanda. Dhavhidhi asati afa, Djehovha akamugondesa kuti kutonga kake kaizorumbwa kuripo nokusikaperi: “Ndicazoitisa kuti dzinza rako mumasure mako, mwana wako we mwanarume agare mambo, uye Ndicazobambisa umambo wake.” (2 Sam. 7:12, 13) Zvezvirokwazvo masoko aya akadzadzika pa nguwa yekuti “mubarirhwana” wa Dhavhidhi akauya mumasure me makore anodarika 1000. Mubarirhwana uu ndiani, uye waizogara Mambo rini?
FEVRERO 20-26
UPFUMI UNOBVA MU SOKO RA MWARI | 1 MAKORONIKA 17-19
“Rumbwai Mecipfara Pasinei Nekuti Zvamaida Azvizozi Kuitika”
w06 7/15 paji. 19 ndi. 1
Rumbwai Mecinyasa Kuona Unaki we Sangano ra Djehovha
DHAVHIDHI we ku Israeri yekare ndi umwe we anhu anonyanya kurekethwa mu Matarhwa eci Hebheru. Muushi uu, muembi, muphorofita uye mambo waigonda Djehovha Mwari no mwoyo wake wese. Ushamwari wake wakabamba na Djehovha wakamuitisa kuti agare no cido cokuda kuwaka nyumba ya Mwari. Nyumba iyona kana kuti tempro, yaizogara mbuto ye kunamathwa ke cokwadi ku Israeri. Dhavhidhi waizviziya kuti kuwakwa ke tempro kaizounza makomborero ku anhu a Mwari. Ngekudaro, iyena akaemba kuti: “Anopfara uya wamunosanangura kuti agare dhuze na imwimwi [Djehovha] kuti agare mu ruwanze renyu. Ticagutiswa no zviro zvakanaka zve pa nyumba yenyu, tempro yenyu cena.”—Pisarema 65:4.
Pfarai no Basa Ramunaro mu Sangano ra Djehovha
11 Kana tikaseenza no simba rese pa basa ripi haro ratinopaswa mu sangano ra Djehovha ticagara no mupfaro mukuru. Hino “dzipirei no mwoyo wese” mu basa rekuparidzira uye mu mabasa e mu ungano. (Zvii. 18:5; Aheb. 10:24, 25) Endai ku misangano makanyasa kugadzirira kupasa mhinduro dzakanakisisa. Matii amunopaswa pa misangano ye pakati pe sumana atambirei no mwoyo wese. Kana akuru akamukumbirai kuti muite basa, riitei nokukasika uye garai makagondeka. Musazomborangarire kuti amudikani kupedza nguwa no basa ramunonga mapaswa. Khorovherai mikana yese kuti mutunhudzire zvamunokwanisa kuita. (Zvie. 22:29) Paya pamunonyasa kudzipira, mucabudirira nokukasika uye mucagara no mupfaro wakakura. (Aga. 6:4) Uyewo zvicaita nyore kamuri kupfara kana amweni akapaswa mabasa amaizodawo kuita.—Aro. 12:15; Aga. 5:26.
Upfumi Watinogumira mu Bhaibheri
w20.02 paji. 12, bhokisi
Isuso Tinoda Maningi Baba Edu, Djehovha
Djehovha Arikundionawo Here?
Makamborangarirawo kuti: ‘Munyika mune mabhirionji e anhu. Ngei Djehovha waizoona inini kamare?’ Kana makambodzibvunzisa kudaro, ziyai kuti andimwipi mwega. Mambo Dhavhidhi wakatara kuti: “Haiwa Djehovha munhu icinyi kuti mumuitire usisi, uye mwana we munhu kuti mumurangarire?” (Pis. 144:3) Dhavhidhi ainga ane rugondo rekuti Djehovha aimuziya zvakanaka. (1 Mak. 17:16-18) Uye eciseenzesa Bhaibheri no sangano rake, Djehovha anomugondesai kuti anowona rudo ramunopangidza kaari. Onai zviro zvinganani zvinorekethwa no Bhaibheri zvinga mubetserai kuti mugare no rugondo irona:
• Djehovha akamuonai pamainga amusati mabarhwa.—Pis. 139:16.
• Djehovha anoziya mwoyo wenyu uye marangariro enyu.—1 Mak. 28:9.
• Djehovha wene anopurutana munamato umwe na umwe wamunoita.—Pis. 65:2.
• Zvamunoita zvinobata-bata mazwiro a Djehovha.—Zvie. 27:11.
• Djehovha akamukweerai kaari.—Juau 6:44.
• Kana imwimwi mukafa, Djehovha acamumutsai ngekuti anonyasa kumuziyai. Ayena acawakazve mwiri wenyu uye acakanda mundangariro dzenyu zviro zvese zvamaiziya no zvimweniwo zvinopangidza unhu wenyu.—Juau 11:21-26, 39-44; Zvii. 24:15.
FEVRERO 27–MARSO 5
UPFUMI UNOBVA MU SOKO RA MWARI | 1 MAKORONIKA 20-22
“Betserai Madjaha kuti Abudirire”
w17.01 paji. 29 ndi. 8
“Betserai Madjaha kuti Abudirire Pamabasa Akakura e mu Ungano”
8 Erengai 1 Makoronika 22:5. Dhavhidhi pamweni wakarangarira kuti Soromoni wainga asati wakadzigadzirira kuti aite basa irona. Ngekuti, tempro yaidikana “kugara inodadisa kamare,” uye Soromoni wainga aciri “djaha uye asikazii zvakawanda.” Asi Dhavhidhi waizviziya kuti Djehovha aizobetsera Soromoni kuita basa rakanaka. Hino Dhavhidhi wakabatikana no zviya zvaikwanisa kuita kuti abetsere, hingana kupasa zviro zvakawanda zvaizoseenzeswa pakuwaka.
w17.01 paji. 29 ndi. 7
“Betserai Madjaha kuti Abudirire Pamabasa Akakura e mu Ungano”
7 Dhavhidhi pamweni wakarangarira kuti, andinipi ndicawaka tempro, hino apana ciro candinoda kubetsera. Inini ndini ndakadusa nzero ii, uye ndiumweni acakudzwa. Zvirokwazvo nyumba ii aizi kuzikanwa hingana tempro ya Dhavhidhi asi tempro ya Soromoni. Pamweni Dhavhidhi wakatombo tsukwara, asi wakaita zvese zvaaikwanisa kuti abetsere basero. Iyena wakaronga zvikwata zve aseenzi uye akaakuanisa zviro zvakadai hingana simbi, kobhre, parata, oro uye matabwa akarungama maningi. Kunze ko izvona zvese iyena wakabambisa Soromoni eciti: “Hino, iwewe mwana wangu, Djehovha ngaagare newe, ubudirire kuwaka nyumba ya Djehovha Mwari wako, hingana zvaakakupikira.”—1 Mak. 22:11, 14-16.
w18.03 mapaji. 11-12 mandi. 14-15
Abereki, Murikubetsera Mwana Wenyu kuti Agume Pakubhabhatidzwa Here?
14 Akuru anokwanisa kubetsera abereki. Ngo mushobo upi? Ngekutora nguwa yakawanda ecireketa nge zve zvinagwa mubasa ra Djehovha. Hanzvadzi imweni inoedzurira kuti payainga ino makore 6, Hama Charles T. Russell akauya kooreketa nayo. Iyona inoti, “Awona akapedza miseswa 15 ecireketa neni ngezve zvinangwa zvangu zvekunamata.” Zvaakacedza zvakabetsera maningi hanzvadzi ii. Awona nokuhamba ke nguwa akazogara piyonera uye akarumbwa ari mu basa irona ke makore anodarika 70. Mawona kuti masoko akanaka uye anobambisa anokwanisa kucindja-upenyu we munhu umweni. (Zvie. 25:11) Akuru angapikawo abereki uye ana awo kuti abetsere pakuita mabasa e munyumba ye Umambo. Awona angakwanisa kukumbira ana kuti aite zvinoenderana no zvaanokwanisa ecizviita maererano no thunga rawo.
15 Dzimweni hama dze muungano dzingakwanisa kubetserawo. Awona anopangidza kuti anocido no madjaha. Ngo muezaniso, nyasai kungwarira kudai pane madjaha ari kupangidza kuti ari kuhambira mberi pane zviro zvekunamata. Muungano menyu mune djaha rakapasa mhinduro yakanaka pamusangano here? Ndiyani wakaita dii pamusangano we pakati pe sumana? Idjaha ripi rakakwanisa kuparidzira munhu kucikora? Ndiyani wakasongana no muedzo uye wakaita zvakanaka ngekuti ano kutenda kakabamba? Hino musanonoke tendai djaha irona. Garai no cinangwa cokutora nguwa ye kubhuya no madjaha aya musangano isati yatanga kana kuti yapera. Izvona zvinokwanisa kubetsera kuti awona awone kuti ndi dii re “ungano yakakura.”—Pis. 35:18.
Upfumi Watinogumira mu Bhaibheri
w05 10/1 paji. 11 ndi. 6
Mafundo Makuru Anobva mu Bhuku ra Makoronika Wekutanga
21:13-15. Djehovha akapasa mutemo ngirozi kuti iimise nhenda ngekuti ayena anorhwadziwa maningi paanoona anhu ake ecinetseka. Zvezvirokwazvo, “usisi wake wakawandisa.”