Mareferensiya e Urongwa we Musangano Basa Redu uye Kurarama
© 2022 Watch Tower Bible and Tract Society of Pennsylvania
MARSO 6-12
UPFUMI UNOBVA MU SOKO RA MWARI | 1 MAKORONIKA 23-26
“Mushobo we Kunamata mu Tempro Wakanyasa Kurongeka”
it-2 paji. 223
Arevhi
Mabasa e Arevhi akanyasa kurongwa ndi Dhavhidhi, iyena wakagadza aonereri, abetseri, atongi, arindi, anocengeta mare, no abetseri amweni akawanda kuti abetsere apristi mu tempro, pa ruwanze uye mbuto yokurhyira anhu, zvinobatanidzwa no zvipo, zvibairo, basa rokucenesa uye ne rekupima zviro ne mabasa amweni akasiyana-siyana. Arevhi ainga ano uzii wekuemba ainga akarongwa nge zvikwata zvinokwana 24, kuezana no kurongwa kainga kakaizwa apristi uye aiseenza ecicinjana. Mabasa aisanangurhwa no mudjenya. Paiseenzeswawo mudjenya kuti asanangure kuti ndiyani waienda ko rinda.—1Mk 23, 25, 26; 2Mk 35:3-5, 10.
it-2 paji. 897
Mupristi
Pabasa re mu tempro apristi ainga akarongwa pa mabasa akasiyana-siyana. Aikandira mudjenya pamabasa amweni aaiita. Pazvikwata 24 cikwata cimwe caiseenza kamwe pa sumana uye paipera gore cikwata cimwe caiseenza kairi. Zviri pamhene kuti apristi ese aiseenza panguwa ye mitambo uye anhu ndipo paiuya koopasa zvibairo zvakawanda, hinga zvaakaita pakadimurhwa tempro. (1Mk 24:1-18, 31; 2Mk 5:11; ezanisai na 2Mk 29:31-35; 30:23-25; 35:10-19.) Mupristi pamweni waiseenza nguwa dzimweni, asi wainga asikadikani kupingaidza basa raakapaswa hinga mu pristi. Maererano ne tsika ye cirabhinika Djesu painga ari pa nyika, apristi ainga akawanda, zvekutoti basa re pa sumana raikowaniswa pakati pe mhuri dzakasiyana-siyana dzaiumba cikwata, mhuri imwe na imwe yaiseenza zuwa rimwe kana mazuwa akawanda zvecienderana no kuwanda kawo.
it-2 paji. 430
Ngoma
Zvecienderana no kugadzirhwa ke tempro ya Djehovha, Dhavhidhi wakasanangura Arevhi 4000 kuti aite basa roku emba. (1Mk 23:4, 5) Pa anarume aya 288 “aifundiswa kuembera Djehovha ese ainga ano uzii wakakura.” (1Mk 25:7) Urongwa wese waimirirhwa ne aembi atatu ano uzii, Asafe, Hemani, uye Djedhutuni (umwe wakhona anozwiwo Etani). Nge ndaa yekuti anarume atatu ese ainga ari abarirhwana e umwe e ana atatu a Revhi, Gersom, Koati Merari, mhuri nhatu dze Arevhi dzaimirirhwa pa cikwata ce aembi co pa tempro. (1Mk 6:16, 31-33, 39-44; 25:1-6) Ana e anarume aya atatu aikwana 24, ese aibatanidzwa pa 288 ambopanganidzwa aiemba zvakanaka. Mwana umwe na umwe waisanangurhwa peciseenzeswa mudjenya kuti agare muonereri we cikwata ce aembi. Muonereriwo aitungamirirhwa no anarume anokwana kuita 11 ano “uzii,” akasanangurhwa pakati pe ana ake pakati pe Arevhi amweni. Ngo mushobo uwona 288 ([1 + 11] × 24 = 288) Arevhi aiemba ane uzii, pamwepo no apristi, akaita zvikwata zvinokwana 24. Kudai ‘afundi’ ese akasara 3712 akakoaniswa ngo mushobo wakaezana, izvona zvaizoita kuti pasare ne numero yakaezana ye 155 anarume pa zvikwata 24, zvecireya kuti painga pane Arevhi 13 mumatanhu akasiyana-siyana ekufundiswa kuemba kuna umwe na umwe ano uzii. (1Mk 25:1-31) Ngokuti airidza ma trombeta ainga ari apristi, aizotunhudzira aembi e Arevhi.—2Mk 5:12; ezanisai na Nu 10:8.
it-2 paji. 683
Acengeti e Musuwo
Mu Tempro. Mambo Dhavhidhi, paainga ari dhuze kuda kufa, wakagadzirira Arevhi uye no aseenzi amweni o pa tempro, kutobatanidzawo no acengeti o musuwo, aikwana kuita 4000. Awona aiseenza mu zvikwata zvawo pa sumana kamwe. Ainga ano basa re ku rinda nyumba ya Djehovha, uye kuonerera kuti misuwo dza funungurhwa uye dza fungwa here pa nguwa kwayo. (1Mk 9:23-27; 23:1-6) Pane kuita basa rekucengeta basi, amweni ainga ano basa rekutambira mipiro. (2Md 12:9; 22:4) Panguwa imweni mupristi mukuru Djeoyadha, wakadzodza Djoashi hinga mambo, pakagadzwa arindi kuti aonerere Djoashi ngo ndaa ye Mambokadzi Atariya. (2Md 11:4-8) Mambo Djosiya paakaparadza kunamata ke kunyepa, acengeti e misuwo akabetsera kubvisa zviro zvaiseenzeswa pakunamata Bhaari mu tempro. Akaenda koozvipisira kunza ko thaundi.—2Md 23:4.
Upfumi Watinogumira mu Bhaibheri
Kunamata ke Cokwadi Kucatunhudzira Mupfaro Wenyu
10 Isusu tinonamata Djehovha patinoemba no hama dzedu. (Pis. 28:7) Aisraeri aiwona kuemba hingana ciro cinokosha pakunamata kawo. Mambo Dhavhidhi wakagadza Arevhi anokwana kuita 288 kuti aembe mu tempro. (1 Mak. 25:1, 6-8) Nyamasi uno, tingapangidza kuti tinoda Djehovha nge kuemba ngoma yekurumbidza. Azvinei kuti tinoemba zvakanaka here kana kuti haiwa. Ngo muezaniso: Patinoreketa, “tese isusu tinokuhunyika kakawanda,” asi izvona azvitiitisi kuti tisarekete mu ungano uye mu basa rekuparidzira. (Tig. 3:2) Ngo mushobo umwewo, isusu atidikani kusiya kuembera Djehovha ngekurangarira kuti atikwanisi kuemba zvakanaka.
MARSO 13-19
UPFUMI UNOBVA MU SOKO RA MWARI | 1 MAKORONIKA 27-29
“Baba Ano Rudo Anopangira Mwana Wawo”
w05 2/15 paji. 19 ndi. 9
Ngatibatisise Kuziikanwa Kedu Hinga Akristu
9 Nyasai kuzwisisa zvokwadi zviri mu Bhaibheri pacenyu. Marangariro edu ekuziikanwa hinga aseenzi a Djehovha angakwanisa kupera kana tikasama kunyasa kubambisa uzii wedu uri mu Bhaibheri. (Afiripi 1:9, 10) Mukristu wese—mudoko kana mukuru—unodikana kugara no cokwadi pacake, uye kuny asa kugutsikana, kuti zvaanotenda i zvokwadi zvinobva mu Bhaibheri. Pauro wakati ku akristu: “Garai no cokwadi ce zviro zvese; batisisai zviro zvakanaka.” (1 Atesaronika 5:21) Ana e Apupuri a Djehovha anodikana kuzwisisa kuti aangararami ngekutenda ke abereki awo. Baba a Soromoni, Dhavhidhi, akabvunza mwana wake kuti “ziya Mwari wa baba ako uye museenzere no mwoyo wese.” (1 Makoronika 28:9) Zvainga zvisikazokwani kuna Soromoni kuona basi baba ake ecisakurira kutenda kuna Djehovha. Soromoni waidikana kuziya Djehovha pacake kamare, uye iyena wakazviita. Iyena wakadeketerera kuna Mwari eciti: “Ndipasei ungwaru no uzii kuti Nditungamirire anhu aya ngekuti Ndiyani angatonga anhu aya akawanda kudai.”—2 Makoronika 1:10.
w12 4/15 paji. 16 ndi. 13
Rumbwai Muno Mwoyo Wakaperera Kuna Djehovha
13 Fundo rakhona riri pamhene. Zvinotendwa kugara teciita zviro zvinowaka zvinobambisa uye zvinogutsa hinga kupinda musangano ye ungano uye kubuda mu basa rekuparidzira. Asi kuseenzera Djehovha no mwoyo wese zvinobatanidza zvakawanda. (2 Mak. 25:1, 2, 27) Kana Mukristu nge mukati me mwoyo unorumbwa ecida “zviro zvo sure”—zvakadai hingana, zviro zvakashata zve munyika—unonga uri pangozi yekuruza ushamwari wake wakabamba na Mwari. (Ruka 17:32) Isusu “ticatenderhwa mu umambo wa Mwari” kana “tikazonda zvakashata [uye] toda zviro zvakanaka.” (Aro. 12:9; Ruka 9:62) Ndiyo ndaa tese isusu tinodikana kungwarira kuti tisasiye ciro cipi haco ciri mu nyika ya Sathani, citiitise kuti tisaite zviro zvinocokuita no Umambo no mwoyo wese.—2 Ako. 11:14; erengai Afiripi 3:13, 14.
w17.09 paji. 32 mandi. 20-21
“Garai no Ushingi . . . uye Itai Zvia Zvamunokwanisa”
20 Mambo Dhavhidhi wakagondesa Soromoni kuti Djehovha waizogara naye dakara kuwakwa ko tempro kapera. (1 Mak. 28:20) Masoko a Dhavhidhi akagara ari mu musoro uye no mu mwoyo wa Soromoni, ngokudaro Soromoni aazi kusiya kuti thunga rake uye kutama kuziya zvakawanda kumuitise kuti asaite ciito. Iyena wakagara no ushingi, uye no rubetso ra Djehovha wakakwanisa kupedza tempro iya yainyasa kushamisa ke makore manomwe no hafu.
21 Ngo mushobo waakabetsera Soromoni, Djehovha ungakwanisa kumubetserai kuti mugare no ushingi uye muite ciito. (Isa. 41:10, 13) Tikagara no ushingi mu basa ratinoitira Djehovha, tingakwanisa kugara no rugondo rokuti Djehovha acatikomborera. Hino, “ngatigare no ushingi . . . uye toita zvia zvatinokwanisa.”
Upfumi Watinogumira mu Bhaibheri
w17.03 paji. 29 mandi. 6-7
Kugara no Shamwari Kunyazi Panguwa Inoshupha
Dhavhidhi wainga ano shamwari dzimweni dzaigara ku dii rake munguwa dzinoshupha. Umwe wakhona ndi Usai, Bhaibheri rinomudainza kuti “shamwari ya Dhavhidhi.” (2 Sam. 16:16; 1 Mak. 27:33) Usai pamweni wainga ari museenzi wa Dhavhidhi uye waibata-bata nyaya dzakaigika dza mambo Dhavhidhi.
Pa nguwa yekuti umwe we mwana wa Dhavhidhi Absaromi, wakaedza kugara pambuto ya baba ake hinga mambo, Aisraeri akawanda akagara kudii ra Absaromi, asi Usai aazi. Panguwa yaitiza Dhavhidhi Usai wakaenda kaari. Dhavhidhi wainga wakatsukwara maningi ngekuti wainga apandukirhwa nge mwana wake kamare uye no anhu amweni. Asi Usai wakarumbwa akagondeka kuna Dhavhidhi. Iyena wakatokanda upenyu wake pangozi nge kurambidza Absaromi kuti asagare pa mbuto ya Dhavhidhi. Usai aazi kuita izvona ngekuti rainga riri basa rake hinga mukuru. Iyena wakaita izvona ngokuti wainga ari shamwari ye zvirokwazvo.—2 Sam. 15:13-17, 32-37; 16:15–17:16.
MARSO 20-26
UPFUMI UNOBVA MU SOKO RA MWARI | 2 MAKORONIKA 1-4
“Mambo Soromoni Akaita Cisananguro Asikazi Kuseenzesa Ungwaru”
it-1 paji. 900 ndi. 2
Anyahondo
Soromoni paaitonga hinga mambo, Pakatarhwa zviro zvipsva zvinobatanidza ngano dze hondo dze Aisraeri. Kutonga kake kainga kune runyararo, asi ayena akaunganidza makavharo ne karo dze hondo. (Onai KARU.) Kajinji kakhona makavharo aya aitengwa ku Edjipitu. Paidikana kuwakwa mathaundi ku mbuto dzese kuti paoneke mbuto ipsva dze kugara zviro zvo hondo. (1Md 4:26; 9:19; 10:26, 29; 2Mk 1:14-17) Ngokudaro, Djehovha aazi kumbokomborera cisananguro icona ca Soromoni, uye iyena paakafa uye umabo pawakagurhwa, cikwata ce hondo cakapera. Maererano no zvakatarhwa na Isaiya mu nguwa yakazoteera kuti: “Ano dambudziko rakakura aya anoenda ku Edjipitu ecipsvaka rubetso, anogonda makavharo, uye anonyanya kugonda kuwanda ke makaru e hondo, no simba re makavharo e hondo asi awona aapsvaki Mucena we Israeri uye aapsvaki rubetso ra Djehovha.”—Isa 31:1.
it-1 paji. 437
Karu dzo Hondo
Ku Israeri akuzi kuzogara no cikwata cino karu dze hondo dzinoshamisa, kusiya basi panguwa ya Soromoni. Izvi zvakaitika nge ndaa ye zvakabhuiwa na Mwari, kuti mambo aadikani kudziunganidzira makavharo, ngekuti kudziirirhwa kawo kainga kusikazotsamiri pa makavharo awona. Mutemo uwona waiitisa kuti makaro asanyanye kuseenzeswa, ngekuti paiseenzeswa makavharo kuti dzikweye karu. (Dhe 17:16) Samueri paakabhuya nge zve mutoro waizotunhudzirhwa ku anhu nge ndaa ye kugara no madzimambo ayena wakati: “Acatora ana enyu kuti amuseenzere mu karu dzake dze hondo.” (1Sa 8:11) Absaromi na Adhoniya paakaedza kutora umambo, akaitisa karu ye hondo, no anarume anokwana 50 kuti agogome pamberi pake. (2Sa 15:1; 1Md 1:5) Dhavhidhi paakarhwisa mambo weku Zobha, wakaiga makavharo anokwana 100 dzo ku tiro.—2Sa 8:3, 4; 10:18.
Mambo Soromoni wakatenga karu dze hondo dzinokwana kuita 1400, kuti abambise anyahondo eku Israeri. (1Md 10:26, 29; 2Mk 1:14, 17) Kusiya Djerusarema, mathaundi amweni aiziikanwa hingana mathaundi e karu dzo hondo ainga ano mbuto dzokuseenzesa midziyo yese yo hondo.—1Md 9:19, 22; 2Mk 8:6, 9; 9:25.
Upfumi Watinogumira mu Bhaibheri
w05 12/1 paji. 19 ndi. 6
Mafundo Makuru Anobva mu Bhuku ra Makoronika Wecipiri
1:11, 12. Cikumbiro ca Soromoni cakapangidza kuna Djehovha kuti kugara no ungwaru uye uzii zvainga zviri zviro zvinokosha kuna mambo. Minamato yedu kuna Mwari inonyasa kupangidza zvatinonyasa kukoshesa mu upenyu. Ticapangidza kuti tino ungwaru kana tikanyasa kuongorora zvatinobhuya pamunamato.
MARSO 27–ABRIRI 2
UPFUMI UNOBVA MU SOKO RA MWARI | 2 MAKORONIKA 5-7
“Mwoyo Wangu Ucarumbwa Uripo”
w02 11/15 paji. 5 ndi. 1
Musasiye Kuungana
Nokuhamba ke nguwa, Dhavhidhi paainga ari mambo we ku Djerusarema, iyena wakapangidza cido cakabamba cokuda kuwaka nyumba yaizotora zina ra Djehovha. Ngokudaro, ngekuti Dhavhidhi wainga ari mwanarume we hondo, Djehovha akati kaari: “Auzondiwakiri nyumba inokudza zina rangu.” Kusiya izvona, Iyena wakasanangura mwana wa Dhavhidhi Soromoni kuti awake tempro. (1 Makoronika 22:6-10) Soromoni wakadimura tempro muna 1026 K.A.A., mumasure mekuwaka tempro ke makore anokwana kuita manomwe no hafu. Djehovha wakatenda nyumbeyo eciti: “Ndacenesa nyumba ii yawandiwakira ndecikanda imona zina rangu kuenda no kuenda; uye madziso angu uye mwoyo wangu zvicarumbwa zviripo nokusikaperi.” (1 Madzimambo 9:3) Aisraeri kana akarumbwa akagondeka, Djehovha waizokomborera nyumba iya. Hino, kana awona akaita zviro zvakashata, Djehovha waizobvisa makomborero ake pambuto iyona uye ‘nyumba ii yaizogara mathuku.’—1 Madzimambo 9:4-9; 2 Makoronika 7:16, 19, 20.
it-2 paji. 1093
Tempro
Ngano. Tempro yakaguma muna 607 K.A.A., payakaparadzwa nge Bhabhironiya yaitungamirirhwa na Mambo Nabhukodhonozori. (2Md 25:9; 2Mk 36:19; Dje 52:13) Nge ndaa yekuti Aisraeri ainamata anamwari ekunyepa, Mwari wakasiya kuti madzinza amweni arhwise Djudha no Djerusarema, nguwa dzimweni aitora upfumi wainga uri mu tempro. Tempro yakabatanawo no dambudziko rokusaonererhwa zvakanaka. Mumazuwa a Robhuamo mwana wa Soromoni paapadarika makore 33 mumasure mekuti tempro yadimurhwa (993 K.A.A.) Mambo Sizaki weku Edjipitu wakaba upfumi wainga uri mu tempro. (1Md 14:25, 26; 2Ch 12:9) Mambo Aza (977-937 K.A.A.) waireremedza nyumba ya Djehovha, asi kuti adziirire Djerusarema iyena asikazi kurangarira zvakanaka wakadyekera Mambo Bheni-hadhadhi I weku Siriya, no parata uye oro ye upfumi wo mu tempro kuti iyena aputse citenderano caakaita na Bhaaza mambo we Israeri.—1Md 15:18, 19; 2Mk 15:17, 18; 16:2, 3.
Upfumi Watinogumira mu Bhaibheri
w10 12/1 paji. 11 ndi. 7
Ayena Anoziya “Mwoyo ye Ana e Anhu”
Munamato wa Soromoni ungakwanisa kutinyaradza. Pamweni shamwari dzedu adzinyasi kuzwisisa mazwiro edu emukati—“anotikuwadza” uye “anotirhwadza.” (Zvierengo 14:10) Asi Djehovha anoziya mwoyo wedu uye anotirangarira. Kudurura mwoyo yedu kaari kungaita kuti zvigare nyore kushingirira matambudziko edu. “Khandirai zvese zvinomurhyai mwoyo kaari,” Bhaibheri rinobhuya kudaro, “ngekuti iyena anomudziirirai.”—1 Pedru 5:7.
ABRIRI 10-16
UPFUMI UNOBVA MU SOKO RA MWARI | 2 MAKORONIKA 8-9
“Iyena Waikoshesa Ungwaru Wa Mwari”
w99 11/1 paji. 20 ndi. 4
Pakagara no Rupo Rakawanda
Mambokadzi weku Shebha wakapsvaka nguwa uye wakapeta masimba kuti avhakacire Soromoni. Zvinoita hingana kuti Shebha ndi mutanha watinogumira munyika iri kuzwi mazuwa ano República do Iêmen; ndiyo ndaa mambokadzi uye no cikwata cake no makamero akahamba makirometro anodarika [1600 km] dakara Djerusarema. Maererano no zvakabhuya Djesu “iyena wakabva kure ke nyika.” Ngei mambokadzi weku Shebha wakanetseka kudaro? Iyena wakauya maka-maka “kuti azwe ungwaru wa Soromoni.”—Ruka 11:31.
w99 7/1 paji. 30 mandi. 4-5
Kuvhakacira Kakaunza Makomborero Akawanda
Pasinei no mushobo upi hawo mambokadzi wakaguma ku Djerusarema “no anhu akawanda aimuperekedza, makamero akathwara mafuta e barsamo, uye no oro yakawandisisa no mapuwe anokosha.” (1 Madzimambo 10:2a) Anhu amweni anobhuya kuti “anhu akawanda” aya aibatanidzwawo no masurudado. Izvi zvine musoro tecirangarira kuti mambokadzi wainga ari munhu anoreremedzwa ano simba uye kuti waithwara zviro zvinokosha maningi zvaikwana kuita makumi emamiriyonji e dorari.
Onai kuti, mambokadzi wakazwa nge zve mbiri ya Soromoni “yakaringana no zina ra Djehovha.” Asi rhwendo riya rainga risiripi basi re zve kutengeserana. Zvese zvinopangidza kuti cinangwa cakhona cainga cokuzwa ungwaru wa Soromoni—pamweni kuti afundire zviro zvino cokuita na Mwari wake, Djehovha. Sezvo pamweni wainga ari muzukuru wa Sem kana kuti wa Kaa, ainga ari aseenzi a Djehovha, pamweni waida kuziya zvakawanda nge zve kunamata kaiita madzitsekuru ake.
w99 7/1 mapaji. 30-31
Kuvhakacira Kakaunza Makomborero Akawanda
Mambokadzi weku Shebha wakashamisika maningi no ungwaru wa Soromoni uye no kubudirira ke umambo wake zvekutoti “wakatama no cokureketa.” (1 Madzimambo 10:4, 5) Amweni anozwisisa kuti masoko aya anoda kureya kuti “iyena wakapererhwa no mwiya wekufema.” Mupsvakisisi umweni wakabhuya kuti iyena wakakomoka! Pasinei no zvazvinoreya, mambokadzi wakashamisika no zvaakaona uye ngezvaakazwa. Iyena wakabhuya kuti aseenzi a Soromoni aipfara nge kuzwa masoko e ungwaru a mambo, uye akakudza Djehovha ngekugadza Soromoni hinga mambo. Ngekudaro akapasa mambo zvipo zvaidhura maningi, zvekutoti oro basi mu mare ye mazuwa ano inokwana kuita 40 miriyonji ye madorari. Soromoni wakapasawo mambokadzi zvipo “zvese zvaaida uye zvaakamukumbira.”—1 Madzimambo 10:6-13.
it-2 paji. 917
Soromoni
Mumasure mekuti mambokadzi waona kurungama kainga kakaita tempro, nyumba ya Soromoni, basa re pameza uye zvokumwa, nozvokupfeka zvo aseenzi uye zvibairo zvaipisirhwa mu tempro, iyena “wakatama no cokureketa,” zvekutoti iyena wakabhuya kuti, “Onai! Zvandakabvunzwa nge zvenyu azvigumi pa hafu ye zviya zvandakaona. Ungwaru ne kubudirira kenyu zvinodarika pazviya Zvandakazwa.” Pedzepo iyena wakabhuya kuti anopfara aseenzi aiseenzera mambo. Zvese izvi zvakamuitisa kuti akudze Djehovha, ecireketa zvakanaka kuna Djehovha Mwari, wakapangidza rudo rake ku Aisraeri nge kugadza Soromoni hinga mambo, kuti aite cisananguro cokutonga no unatsi.—1Md 10:4-9; 2Mk 9:3-8.
Upfumi Watinogumira mu Bhaibheri
it-2 mapaji. 1159-1160
Mupando
Mupando umwe wa mambo we ku Israeri unoreketwa mukhaindi wa wainga wakaita ndi wa Soromoni. (1Md 10:18-20; 2Mk 9:17-19) Hingana yaigara pa “Vharanda re Mupando,” cimwe ce ciwakwa caigara ku Dondu Moriya ku Djerusarema. (1Md 7:7) Wainga uri ‘mupando mukuru we marfim, wakaizwa no oro yakanaka maningi, no dossel kusure, uye no moko.’ Kunyazi marfim ndiwona akanyanya kuseenzeswa pakugadzira kadera ii ya mambo, mushobo wekuwaka tempro waipangidza hingana pakaseenzeswa matabwa, yakafukidzwa ne oro yakarungama uye yainga yakarungamiswa no mapaineri e marfim. Kuno uya waiuwona, mupando uu waiita hingana kuti wese wainga uri we marfim no oro. Mumasure mekubhuya nge zve masikada anokwana 6 aienda pa mupando uu, panobhuiwazve kuti: “Mhondoro mbiri dzainga dzakaima ku dii re moko. Uye painga pano mhodoro dzinokwana 12 dzaiga dzakaima pa masikada 6, ku dii rimwe na remwe.” (2Mk 9:17-19) Mifanikiso dze mhondoro dzainga dzakasisira, zvecipangidza simba re utongi. (Ge 49:9, 10; Re 5:5) Zvinoita hingana kuti mhondoro 12 dzaiimirira madzinza 12 e ku Israeri, pamweni zvaipangidza rureremedzo uye kutsigira mambo waigara pa mupando. Bvudzi rimwe re oro raigara rakasungirhwa pa mupando. Hingana zvinopanganidzwa nge zvayo, mupando uu we marfim uye we oro—wakakwirira, wakafukidzirhwa no dossel uye no mhondoro dzinoreremedzwa pa mberi—unopindiridza mupando upi hawo unoreketwa pa nguwa iyona, apana umweni wakatodzana nawo. Hingana zvakarekekwa no mutari umweni: “Apana umambo umweni wakagadzira mupando hingana uwona.”—2Mk 9:19.
ABRIRI 17-23
UPFUMI UNOBVA MU SOKO RA MWARI | 2 MAKORONIKA 10-12
“Betserekai no Mazano Ano Ungwaru”
w18.06 paji. 13 ndi. 3
Ayena Angadai Akagara Shamwari ya Mwari
Cikumbhiro ici cainga cisiripi nyore! Kudai Robhoamu akatendera, iyena, no mhuri yake pamwepo no nhengo dzodare aidikana kusiya upfumi umweni uye oetsera kuti anhu asaseenze maningi. Nge dii rimweni kudai Robhoamu waizoramba, anhu aizomupandukira. Hino waizoita kudini? Mambo wakasanangura kukumbira zano ku anarume akuru, aya aipasa Soromoni mazano. Anarume aya akabvunza Robhoamu kuti atendere zvaainga akumbirhwa no anhu. Mumasure mazvo, wakaenda kookumbira mazano ku madjaha aainga akura nawo. Madjaha aya akamubvunza kuti asatende cikumbiro ce anhu. Eciteerera zano re madjaha aya, Robhoamu wakasanangura kuomesera anhu. Iyena wakati: “Ndicatunhudzira mitoro yenyu, uye Ndoiremesa maningi. Baba angu akamuphanicai no mushamu, Inini ndicamuphanicai no mushamu uno baya.”—2 Mak. 10:6-14.
w01 9/1 mapaji. 28-29
Tingaita Kudini Zvisananguro Zvakanaka
Djehovha anotipasawo anhu akakura pakunamata mu ungano, atinokwanisa kureketa nawo nge zve zvisananguro zvedu. (Aefeso 4:11, 12) Kunyazi zvakadaro patinocedza no amweni, atidikani kuteedzera muezaniso we aya anoenda koopsvaka mazono ku munhu wese wese dakara azoona raanoda. Ociteerera zano ro munhuwo. Tinodikana kuedzurira muezanisa we ngwadzo ya Robhoamu. Paaida kuita cisananguro cinokosha, iyena wakatambira zano rakanaka re akuru ainga akamboseenza na baba ake. Nge kudaro, pane kuteerera zano rawo, iyena wakaenda koopsvaka mazano ku madjaha aainga akakura nawo. Eciteerera zano re madjaha aya iyena wakaita cisananguro cakashata maningi uye mugumisiro wakhona wakaruza anhu akawanda aitsigira umambo wake.—1 Madzimambo 12:1-17.
Pamunonga mecipsvaka mazano, kumbirai kuna aya aano maesperiensiya mu upenyu uye anoziya zvakanaka Matarhwa no anoreremedza zvokwadi zvisikacinji zvo mu Bhaibheri. (Zvierengo 1:5; 11:14; 13:20) Kana zveciita psvakai nguwa yekunyasa kurangarira zvese zvinobatanidzwepo uye no mazano ese amapaswa. Pamunoguma pakuona zviro ngemushobo unooniwa na Djehovha, zvinozomuitirai nyore kuita cisananguro cakanaka.—Afiripi 4:6, 7.
it-2 paji. 863 ndi. 3
Robhoamu
Muitiro uu wakashata wakaizwa ndi Robhoamu, wakaitisa kuti anhu akawanda asiye kumutsigira. Madzinza akarumbwa ecitsigira nyumba ya Dhavhidhi ainga ari Djudha uye Bhenjamini, apristi uye Arevhi e umambo wese, uyewo munhu umwe na umwe pacake we madzinza gumi, akarumbwa ecimutsigirawo.—1Md 12:16, 17; 2Mk 10:16, 17; 11:13, 14, 16.
Upfumi Watinogumira mu Bhaibheri
it-1 paji. 668
Madhimoni Akaita Hinga Mbudzi
Masoko a Djoshuwa, muna Djoshuwa 24:14 anopangidza kuti Aisraeri aitoitawo kunamata ke kunyepa kaiizwa mu Edjipitu paainga ecigaremo, Ezekiyeri unopangidza kuti maitiro awona okunyepa akarumbwa eciabata-bata ke nguwa yakareba. (Eze 23:8, 21) Ndiyo ndaa, azii amweni anorangarira kuti mutemo wakabhuiwa ku renje, wecirambidza Aisraeri kupasa “zvibairo ku madhimoni akaita hinga mbudzi” (Re 17:1-7) uye Jerobhoamu wakagadza apristi ake “pambuto dzakakhwirira kuti aseenzere madhimoni akaita hinga mbudzi uye no mifanikiso dzaainga akaita” (2Mk 11:15) zvinopangidza kuti kainga kuno kunamata ke mbudzi pakati pe Aisraeri hingana zvaiizwa ku Edjipitu, maka-maka ku Edjipitu yo Pasi. Herodhoto (II, 46) unobhuya kuti kainga kuri kunamata ke Aedjipitu zvekuti Agrego akatanga kutenda kawo kuna Paa uyewo no satiro, madzimwari e nyika yawo aigara ku froresta, aiita hingana ano nyanga, mushe uye no mirenje dzakaita hingana dzo goto-koto. Amweni anobhuya kuti mushobo uwona wakaita hingana cinyama, we madzimwari aya ekunyepa, ndiwona matangire e musambo wekuona Sathani hingana ane mushe, nyanga uye mateme, muitiro waiizwa no maphorofita Ekunyepa munguwa ye Zvemashiriphiti.
Azvizwisisiki kuti “anyaukuse” (seʽi·rimʹ) ainga ari ani. Amweni aiaona hingana goto-koto izvi azvidi kureya kuti ndizvona; uyewo apana matarhwa anopangidza izvona. Soko irona raindoda kupangidza kuti mundangariro dze ainamata madzimwari awona ekunyepa mainga makaita hingana mbudzi kana kuti anyaukuse. Zvingadawo kureya kuseenzesa soko rokuti “goto-koto” mu mareferensiya aya, zvaida kupangidza kusareremedza ku midziyo yese ye mifanikiso, zvimwezvimwezvoo no mifanikisoyo kamare, pa matarhwa akawanda, zvakabva ku soko rinonyasa kuziikanwa hinga “psvina ye mbudzi,” zvainga zvisikapangidzi kuti mifanikiso yaigadzirhwa ne psvina ye mbudzi.—Re 26:30; Dhe 29:17.
ABRIRI 24-30
UPFUMI UNOBVA MU SOKO RA MWARI | 2 MAKORONIKA 13-16
“Gondai Djehovha—Rini?”
Madjaha—Mungagondwa Kudini no Anhu Amweni?
12 Paainga aciri djaha, Mambo Aza waidzidodosa uye wainga ano ushingi. Ngo muezaniso, mu masure mekufa ka baba ake, Abhias, Aza wakagara mambo, uye wakatanga kuita gwitikwiti rokupedza kunamata zvidhori. Uyezve “wakabvunzawo a Djudha kuti apsvake Djehovha Mwari we madzitsekuru awo uye kuti acengete Mutemo ne nhungamiriro.” (2Mak. 14:1-7) Uye Zera mu Etiyopi, paakapinda mu Djudha no masurudado anokwana kuita 1000 000 Aza no ungwaru wakapsvaka kubetswa ndi Djehovha eciti: “Haiwa Djehovha, kamuri azvina basa kuti amurikubetsera akawanda here kana kuti aana simba. Haiwa Djehovha Mwari wedu, tibetserei ngekuti tinogonda nemwi.” Masoko aya anopangidza kuti Aza, waigonda kuti Djehovha waikwanisa kuponesa iyena pamwepo no anhu ake. Aza wakagonda na Baba ake e kudenga, uye “Djehovha akakunda a Etiyopiya.”—2Mak. 14:8-12.
Madjaha—Mungagondwa Kudini no Anhu Amweni?
13 Imwimwi mungazvitendawo kuti kurhwisana no masurudado anokwana kuita 1000 000 cineso cakakura maningi, asi Aza wakabudirira. Asi zvinosiririsa nge zve kuti, nokuhamba ke nguwa, Aza paakazosongana no cineso cidoko aazi kupsvaka rubetso ra Djehovha. Paakashushwa ndi Mambo we Israeri Bhaaza, Aza wakapsvaka rubetso ra mambo we a Siriya. Cisananguro ici cakaunzisa marhwadzo! Eciseenzesa muphorofita Hanani, Djehovha akati kuna Aza: “Ngekuti wakagonda na mambo we Siriya, wosama kugonda na Djehovha Mwari wako, anyahondo a mambo we a Siriya apukunyuka mu nyara dzako.” Zvezvirokwazvo kubvira apona Aza wairarama mu hondo ecirhwisana na Bhaaza. (2 Mak. 16:7, 9; 1 Mad. 15:32) Tinofundei?
Madjaha—Mungagondwa Kudini no Anhu Amweni?
14 Musafe makasiya kudzidodosa uye kurumbwa mecigonda Djehovha. Pemakabhabhatidzwa, imwimwi makapangidza kuti munokutenda kakakura uye maigonda Djehovha. Uye Djehovha akapfara maningi, nge kugara nhengo ye mhuri yake. Hino cinodikana nge cekurumbwa mecigonda Djehovha. Zvingaita nyore kugonda Djehovha pamunonga mecida kuita cisananguro cinocinja upenyu wenyu, asi zvakadini kana mecida kuita cinanaguro cidoko? Zvinokosha kugonda Djehovha pakuita zvisananguro, zvingaita zvidoko zvakaita hingana kusanangura cokudziwaraidza naco kana zvakakura zvakaita hingana kusanagura basa uye cinangwa camunoda kugumira! Musathembe uzii wenyu. Pane kuita kudaro, psvakai nhungamiriro dze Bhaibheri, uye dziseenzesei, zvaa zvadaro seenzesai zviya zvamunonga mafunda. (Zvie. 3:5, 6) Kana mukazviita Djehovha acapfara maningi uye imwimwi mucaita kuti hama dziri mu ungano dzimugonde.—Erengai 1 Timoti 4:12.
Upfumi Watinogumira mu Bhaibheri
w17.03 paji. 19 ndi. 7
Seenzerai Djehovha no Mwoyo Wese!
7 Mushobo umwe wekuteedzera mambo Aza nge we kuseenzera Djehovha no mwoyo wese, kunyazi zvecishupha. Tingazviziya kudini kuti tiri kuita izvona? Tingadzibvunzisa kuti, ‘Ndakagadzirira here kugara ndakagondeka kuna Djehovha uye kuita kuti ungano igare yakacena pa zviro zvakashata?’ Aza waidikana kugara no ushingi wakakura kuti aduse mbiya ake Maaka, pa mbuto ya “mambokadzi” panguwa iyona! Zvingaita kuti nguwa dzimweni imwimwi munodikana kugara no ushingi hinga mambo Aza. Ngo muezaniso, cimborangarirai kuti umwe we mu mhuri yenyu kana kuti shamwari yenyu tsika ndi tsikewo yadzingwa ngekuti yaita citema uye aizi kucinyuka. Imwimwi maizoita cisananguro cokutama kushamwaridzana naye here? Mwoyo wenyu waizoita kuti muitei pakadaropo?