Mareferensiya e Urongwa we Musangano Basa Redu uye Kurarama
© 2023 Watch Tower Bible and Tract Society of Pennsylvania
NOVEMBRO 6-12
UPFUMI UNOBVA MU SOKO RA MWARI | DJOBO 13-14
“Kana Munhu Akafa, Angararamazve Here?”
w99 10/15 paji. 3 mandi. 1-3
Kupsvaka Kedu Upenyu Wakareba
KUNYAZI na nyamasi uno, anhu padoko ndiwona angaphikisa nzero ii yakaringana no kufupika kakaita upenyu, kunyazi hazvo iyona yakatarhwa makore anokwana kuita 3500 adarika. Nguwa dzese anhu anoona zvecinyangadza kuedza upenyu we nguwa doko uye ocembera no kufa. Ndiyo ndaa, mishobo yekuita kuti upenyu urebe yakadzara mu ngano dze anhu.
Mu mazuwa a Djobo, Aedjipitu airhya mabhora e zvinyama kuti aedzezve kugara madjaha asi zvisikabudiriri. Cimwe ce zvinangwa zvikuru zvaiitisa kuti agadzire ma alquimia medieval ainga ari e kugadzira mutombo waizoita kuti upenyu urebe. Azii akawanda aitendera kuti oro yakagadzirhwa yaikwanisa kupasa upenyu we kutama kufa uye kuti kurhyira mu parato dze oro kaizoita kuti upenyu urebe. Ataoista e China e kare airangarira kuti ainga asikazofi nge kucinja makimika e mwiri eciseenzesa mishobo yakaita hinga kunyasa kurangarira, kuita maezersisiyo e kufema uye kuita dhiyeta.
Mupunguri we ku Espanha Juan Ponce de León anoziikanwa ngo kupsvaka kake asikagutsikani no maambo e udjaha. Medhiko umweni we muzana re makore re ci 18 akakohomedzesa mu bhuku raizwi Hermippus Redivivus kuti mhandwe ye cidjaha dzicengethwe mu cikwartu cidoko mu nguwa ye marimo uye kuti mwiya wadzaifema ukandwe mumagarafa kuti uzoseenzeswe hinga mutombo we kurebesa upenyu. Kupedza nguwa kubhuya kuti mishobo yese ii aizi kubudirira.
w15 4/15 paji. 32 mandi. 1-2
Muti Wakatemwa Ungapfipfitirazve Here?
MITI ye miorivhi inokura yecipomberedzana aidakadzi kuona kana yeciezaniswa no misidhari inosiridza ye ku Líbano. Asi miorivhi ingakwanisa kurumbwa ye cirarama kana migariro ye kunza isikazi kunaka. Imweni yakhona ingakwanisa kuguma makore anokwana kuita 1000. Nzinde dze miorivhi dzinoenda pasi-pasi zvoita kuti kunyazi muti wakhona ukatemwa unokwanisa kupfipfitirazve kana nzidedzo dzisati dzafa.
Djobo wainga ano rugondo rekuti kunyazi akafa, waizoraramazve. (Djobo 14:13-15) Wakareketa eciseenzesa mufanikiso we muti—kuti apangidze rugondo raainga anaro—rekuti Mwari aikwanisa kumumutsa. Pamweni Djobo wairangarira ngezve muti we miorivhi paakati: “Kunyazi muti ino kariro,” iyena wakatizve. “Kana uwona ukatemwa unopfipfitirazve.” Mvura painonaya mumasure me nguwa yakareba isikanayi, nhungirwa dzinotanga kubuda pa nzinde ye muti we miorivhi wakatemwa, obudisa “nhai hinga muti mupsva.”—Djobo 14:7-9.
w11 3/1 paji. 22 ndi. 5
“Mucagara no Cisuwo”
Masoko a Djobo anotifundisa fundo inonyaradza ngezva Djehovha: Iyena anoda anhu akaita hingana Djobo, okuti anodzikanda munyara dzake, eciaumba kuti agare anhu aanoda mu madziso make. (Isaya 64:8) Djehovha anokoshesa maningi anamati ake akagondeka. Iyena ano “cisuwo” ce anhu aya akafa akagondeka. Muzii umweni unoti soko re Cihebheru rakaturikirhwa pano “rinonyasa kupanganidza masoko okuti cisuwo uye cido.” Djehovha aaedzuriri basi anamati ake akafa asi ano cido cakakura ce kuwamutsa.
Upfumi Watinogumira mu Bhaibheri
it-1 paji. 492
Marota
Marota aiseenzeswawo kuti areye ciro cisikakoshi kana kuti cisikabetseri. Ngo muezaniso Abrahamu wakatendera pamberi pa Djehovha kuti: “Inini ndiri bukuta uye marota.” (Ge 18:27; onaiwo Isa 44:20; Djob 30:19.) Uye Djobo wakaezanisa masoko e anyaradzi ake ekunyepa no “zvierengo zvo marota.”—Djob 13:12.
NOVEMBRO 13-19
UPFUMI UNOBVA MU SOKO RA MWARI | DJOBO 15-17
“Erifaji Unopangidza Mushobo we Kutama Kunyaradza”
w05 9/15 paji. 26 mandi. 4-5
Rambai Marangariro Akashata!
Paakareketa katatu kese, Erifaji wakabhuya kuti Mwari anoda zvakawanda ku aseenzi ake uye kuti apana zvingaizwa no aseenzi ake zvingamupfadza. “Iyena aagondi aseenzi ake,” uye “anoona zvishaishi ku ngirozi dzake.” (Djobo 4:18, masoko e pasi) Wakareketazve ngezva Mwari kuti: “Iyena aagondi acena ake, uye kunyazi denga arizi kucena pamberi pake.” (Djobo 15:15) Uye wakabvunzisa kuti: “Kodi Wemasimba Ese ano basa no unatsi wako here?” (Djobo 22:3) Bhiridhadhi waitenderana no maonero aya, ngekuti wakati: “Kunyazi mwedzi auzi kudjeka; uye nyeredzi adzizi kucena pamberi pake.”—Djobo 25:5.
Tinodikana kudzidziirira pa marangariro aya akashata. Awona angaita kuti tirangarire kuti Mwari anoda zvakawanda katiri uye kugara no marangariro awona kunokwanisa kukuwadza ushamwari wedu na Djehovha. Kusiya izvona, kana tikatenda marangariro akadai, taizoita kudini kudai tapaswa mupango? Pane kuti totenda tecidzidodosa, pamweni mwoyo wedu “waizotsamwira Djehovha” uye kucengeta bundu. (Zvierengo 19:3) Izvona zvingatibarira ngozi yakakura pakunamata!
w15 2/15 paji. 9 ndi. 16
Teedzerai Kudzidodosa uye Upfawi wa Djesu
16 Masoko edu. Kuda katinoita anhu kunotiitisa kuti “tinyaradze aya akaora mwoyo.” (1 Ate. 5:14) Tingareketei kuti tianyaradze? Tingaapfadza ngekupangidza kuti tinoada maningi. Tingaasimba no mwoyo wese kuti tiabetsere kuona mawara awo uye zvaanokwanisa kuita. Tingaaedzurira kuti Djehovha akaakweya ku Mwana wake, hino awona anokosha maningi kaari. (Juau 6:44) Tinokwanisa kuagondesa kuti Djehovha anokoshesa maningi aseenzi ake “akaora mwoyo” kana kuti “anoponesa aya akatsukwara.” (Pis. 34:18) Masoko edu e upfawi anokwanisa kurapa aya anoda kunyaradzwa.—Zvie. 16:24.
Upfumi Watinogumira mu Bhaibheri
w06 3/15 paji. 14 ndi. 11
Mafundo Makuru Anobva mu Bhuku ra Djobo
7:9, 10; 10:21; 16:22—Masoko aya anopangidza kuti Djobo wainga asikatendi mu rumuko here? Masoko aya aipangidza zvaida kuzoitika kuna Djobo mu nguwa yainga iri dhuze. Hino aida kureyei? Masoko aya aida kureya kuti kana iyena akafa apana munhu wairarama pa nguwa iyona waizomuonazve. Mu maonero awo, iyena wainga asikazohwiririzve kumba kake kana kuziikanwazve dakara nguwa yakasanangurhwa na Mwari yaguma. Masoko a Djobo anokwanisawo kureya kuti apana angakwanisa kumuka ega ecibva ku Makuwa. Cipangidzo cakadjeka cokuti Djobo wainga ano kariro ye rumuko ye mberi tinocigumira pana Djobo 14:13-15.
NOVEMBRO 20-26
UPFUMI UNOBVA MU SOKO RA MWARI | DJOBO 18-19
“Musambosiye aya Amunonamata Nawo”
Zvatingafunda Kubva pa Misodzi ya Djesu
9 Imwimwi mungabetsera munhu wakafirhwa. Djesu akacema na Marta uye na Mariya, asi iyena akazwawo zviro zvaaida kubhuya uye iyena akareketa masoko anonyaradza. Isusu tingakwanisawo kuteedzera muezaniso wa Djesu. Dan, mukuru unoraramira ku Austrália, unoti: “Inini ndakada rubetso rakakura maningi mumasure mekufirhwa ne mukadzi wangu. Kazado dzakawanda dzakadzipira kuti dzindizwe pa nguwa yandainga ndecida rubetso. Awona akandisiya kuti ndirekete zvese zvandainga ndecizwa, uye aazi kutsukwara pandainga ndecitanga kucema. Kusiya izvona, awona akandibetsera pa nguwa yandainga ndecida. Pa mazuwa andainga ndisikakwanisi kuita ciro, awona aisuka karu yangu, ainditengera zviro zvandaida uye aitondibikira. Awona ainamata neni pa nguwa dzese. Awona akapangidza kuti ainga ari shamwari dze zvirokwazvo, uye kuti ainga ari hama dzakagadzirira kubetsa ‘mu nguwa ye matambudziko.’”—Zvie. 17:17.
Kana Munhu Wamunoda Akasiya Djehovha
16 Rumbwai mecitsigira hama dzino anyaukama akadzingwa. Awona anoda kupangidzwa rudo uye kubambiswa ndimwi. (Aheb. 10:24, 25) Nguwa dzimweni, hama dzimweni dzinoima kureketa no hama dze munhu wakadzingwa uye awona anopedzesera aakuzwa hingana kuti akadzingwawo. Musasiye izvona zveciitika! Kunyanya madjaha ano baba kana mai akadzingwa, anoda maningi kusimbwa no kubambiswa. Maria, wakaona mwamuna wake ecidzingwa uye ecisiya mhuri, unoti: “Shamwari dzangu dzinganani dzakauya kumba kangu, dzotibikira uye dzakatibetsera kuita fundo ye mhuri. Awona akarhwadziwa na inini uye akacema na inini. Pakatanga kurekethwa masoko asiriopi nge zvangu, awona akandidziirira. Zvezvirokwazvo, awona akandibambisa!”—Aro. 12:13, 15.
w90 9/1 paji. 22 ndi. 20
Imwimwi Munosopsvaka Kugara no Ubaba Here?
20 Dare re akuru rinodikana kuzwisisa kuti kusiya kuseenza hingana muonereri kana kuti mubati anoseenzera zvingakwanisa kurhwadza, kunyazi iyena akatosanangura kusiya ega ubaba uwona. Kana akatama kudzingwa, uye akuru oona kuti akaora mwoyo, anodikana kupasa rubetso re kumwiya. (1 Atesaronika 5:14) Anodikana kumubetsera kuti azwisise kuti iyena anokosha mu ungano. Kunyazi kudai painga paoneka cikonzero cekupasa mazano, pamweni azvidikani kutora nguwa yakareba kuti munhu anodzidodosa atambirezve ubaba mu ungano.
Upfumi Watinogumira mu Bhaibheri
w94 10/1 paji. 32
Simba re Soko re Unaki
Djobo paaida kubambiswa, Erifaji no shamwari dzake aazi kubhuya masoko ano unaki. Idzona dzakapasa ndaa Djobo nge ndaa ye matambudziko ake, zvecida kureya kuti iyena wainga eciiga zvitema. (Djobo 4:8) Aturikiri e Bhaibheri anoti: “Cinodiwa na Djobo ngecekupangidzirhwa usisi no munhu. Pano kudaro, wakatambira masoko anorhwadzisa mwoyo anoziikanwa no anhu ese hinga fundiso uye tsika ye ‘zvirokwazvo’ uye yakanaka.” Djobo wakanetseka maningi ngekuzwa Erifaji no shamwari dzake dzecibhuya masoko akamuitisa kuti aceme eciti: “Mucarumbwa mecindirhwadzisa uye mecindiputsa no masoko dakara rini?”—Djobo 19:2.
Atitombodikani kuita ciro cinoita kuti munamati wa Mwari anetseke kana kucema nge ndaa yo masoko asikazi kunyasa kurangarirhwa anobva pa muromo pedu. (Ezanisai Dheuteronomiyo 24:15.) Cirewo cimweni ce Bhaibheri cinotingwadza kuti: “Masoko amunoreketa angaponesa kana kuparadza upenyu; ndiyo ndaa, tinodikana kunyasa kuseenzesa zvakanaka masoko edu, kana tikadaro ticakomborerhwa.”—Zvierengo 18:21, BLH.
NOVEMBRO 27–DEZEMBRO 3
UPFUMI UNOBVA MU SOKO RA MWARI | DJOBO 20-21
“Kugara Munhu Munatsi Akutsamiri Pakupfuma”
w07 8/1 paji. 29 ndi. 12
Imwimwi “Makapfuma kuna Mwari Here”?
12 Pa masoko ake, Djesu unosiyanisa kupfuma kuna Mwari no kudziunganidzira upfumi kana kuti kugara no zviro zvakawanda. Hino, Djesu aireya kuti mu upenyu wedu atidikani kunyanya kukoshesa kuunganidza zviro kana kuti kudakadzwa maningi no zviro zvatinazvo. Pane kudaro, tinodikana kuseenzesa upfumi watinawo nge mushobo wakanaka kana kuti kubambisa ushamwari wedu na Djehovha. Kuita izvona zvezvirokwazvo zvicaita kuti tigare anhu akapfuma kuna Mwari. Ngei? Ngekuti zvinoita kuti Djehovha atikomborere. Bhaibheri rinoti: “Makomborero a Djehovha—ndiwona anoita kuti munhu apfume uye iyena aatunhudziri marhwadzo.”—Zvierengo 10:22.
Upfumi Watinogumira mu Bhaibheri
w95 1/1 paji. 9 ndi. 19
Kukunda Sathani no Mabasa Ake
19 Zvinokosha kuziya kuti Djobo museenzi wa Mwari waidikana kurhwisana no “marangariro akashata” a Sathani akabhuiwa eciseenzesa Erifaji na Zofari. (Djobo 4:13-18; 20:2, 3) Djobo wakashuphika nge ndaa ye “matambudziko” izvona zvakamuitisa kuti arekete masoko “asikazi kurangarira” nge ndaa ye “zviro zvinothyisa” zvaimushupha mu ndangariro make. (Djobo 6:2-4; 30:15, 16) Eriu wakanyasa kupurutana Djobo uye wakamubetsera kuzwisisa mushobo unorangarirhwa na Djehovha pa nyaya iyona. Ngo mushobo umwewo, nyamasi uno akuru anozwisisa anopangidza kuti anoda maningi aya akaora mwoyo ngekusama “kuapasa mutoro.” Nge mushobo umwewo kuitawo hingana Eriu anoapurutana no mwoyo unononoka kutsamwa uye pedzepo anoreketa masoko anonyaradza ari mu Soko ra Mwari. (Djobo 33:1-3, 7; Tiyago 5:13-15) Ngokudaro ese aya ano marangariro angakwanisa kupedza mupfaro wawo nge ndaa ye zviro zvakashata zvakaitika kamare kana kuti zvisikazi kuitika, kana kuti aya “anothyisidzirhwa . . . no zviro zvaanorota, kana kuti zvaanoona” hingana Djobo angakwanisa kunyaradzwa no Bhaibheri, mukati me ungano.—Djobo 7:14; Tiyago 4:7.
DEZEMBRO 4-10
UPFUMI UNOBVA MU SOKO RA MWARI | DJOBO 22-24
“Munhu Unokosha kuna Mwari Here?”
w05 9/15 paji. 27 mandi. 1-3
Rambai Marangariro Akashata!
Marangariro amweni akatodzana okuti Mwari anoda zvakawanda ku aseenzi ake ngoo kuti anhu aakoshi kaari. Erifaji paakareketa katatu kese, wakabvunzisa kuti: “Munhu unokosha here kuna Mwari, kana kuti munhu uno uzii angakwanisa kumubetsera here?” (Djobo 22:2) Erifaji wakabhuya kuti munhu aakoshi kuna Mwari. Bhirdhadhi ecirangarira zvimwezvo, wakabvunzisa kuti: “Hino munhu anofa angakwanisa kudini kugara munatsi pamberi pa Mwari kana kuti munhu akabarhwa no mwanakadzi angagara kudini asina ndaa?” (Djobo 25:4) Maererano no marangariro awona, Djobo munhuwo hake unofa, waizokwanisa kudini kugara munhu munatsi pamberi pa Mwari?
Akawanda nyamasi uno ano marangariro akashata ngezvawo kamare. Mushobo waakarerhwa, zvinetso zve upenyu, kuzondwa kana kuti rusananguro uye dzinza zvingakwanisa kuita kuti anhu agare no marangariro awona. Asi Sathani no madhimoni ake anopfarirawo kuodza mwoyo ye anhu. Munhu unopfuridzirhwa nawo kuti atende kuti zvaanoita azvikwani pakupfadza Mwari we Masimba Ese, unowira pa ngozi yokuora mwoyo. Nokuhamba ke nguwa pamweni iyena angasiya kuseenzera Mwari mupenyu.—Ahebheru 2:1; 3:12.
Kucembera uye zvinetso zve uthongo zvingatipingaidza kuita zvakawanda. Tingaona hingana kuti zvatiri kuita zvino mu basa re Umambo zvidoko teciezanisa no zvataiita kare patainga ticiri madjaha, ticino uthongo wakanaka uye tino simba. Zvinokosha kutendera kuti Sathani no madhimoni ake anoda kuti titendere kuti zvatinoitira Mwari azvikwani! Tinodikana kuramba maonero aya.
w95 2/15 paji. 27 ndi. 6
Fundo Yekuti Tingakwanisana Kudini no Zvinetso
Shamwari nhatu dza Djobo dzakareketa masoko awo kamare ano oresa mwoyo, pane kureketa ngezve uzii we kudenga. Erifaji akaguma pakubhuya kuti Mwari aana kutenda ku aseenzi ake uye kuti painga pasina musiyano kuna Mwari kuti Djobo wainga ari munatsi here kana kuti haiwa. (Djobo 4:18; 22:2, 3) Zvinoshupha kurangaridza masoko anorhwadza—kana kuti asiripi e zviro kwazvo—kupinda aya! Azvishamisi kuti mu masure mazvo Djehovha akasumurura Erifaji no shamwari dzake nge ndaa ye manyepo aya. Iyena akati: “Ngekuti amuzi kureketa cokwadi nge ndaa yangu.” (Djobo 42:7) Asi masoko amweni anonyanya kurhwadza ainga acada kuuya.
w03 4/15 mapaji. 14-15 mandi. 10-12
Madjaha Anopfadza Mwoyo wa Djehovha
10 Hingana zvinobhuiwa no Bhaibheri, Sathani wakapumha haiwa basi kugondeka ka Djobo, asiwo kugondeka ke aseenzi ese a Mwari—kutobatanidzawo imwimwi. Cinopangidza ngecekuti ecibhuya nge anhu ese, Sathani wakati kuna Djehovha: “Zvese zvaanazvo munhu [haiwa basi Djobo asi munhu wese] ucapasa zvese eciitira upenyu wake.” (Djobo 2:4) Muri kuona mushobo wamakabatanidzwa pa nyaya ii inokosha here? Hingana zvinobhuiwa pana Zvierengo 27:11 Djehovha ari kubhuya kuti pano ciro camungamupasa—cikonzero kuti iyena apase mhinduro ku uya uno mushora, Sathani. Rangaridzai—Cangamire we Zvese ari kumukumbirai kuti mubatanidzwe pakugadziriswa ke nyaya yakakura maningi kupinda dzese. Ubaba wakakura uye makomborero amunawo! Munoona kuti munokwanisa kuita zvamuri kukumbirhwa na Djehovha here? Djobo wakakwanisa. (Djobo 2:9, 10) Djesu uye anhu akawanda, kutobatanidzawo madjaha akawanda akakwanisa. (Afiripi 2:8; Zvakapangidzwa 6:9) Imwimwi mungakwanisawo. Asi camunodikana kuziya ngecekuti amukwanisi kugara musina dii ramuri pa nyaya ii. No zvamunoita, imwimwi mucapangidza kuti munotsigira kushora ka Sathani kana kuti mhinduro ya Djehovha. Cisananguro cenyu ngacipi?
Djehovha Anomukoshesai!
11 Kodi Djehovha anokoshesa kamare zvisananguro zvamunoita here? Anhu akagondeka anodikanwa aasati akwana here kuti Djehovha apase mhinduro yakananga kuna Sathani? Icokwadi kuti zvaapamhene kuti kupumha ka Sathani kekuti apana anoseenzera Djehovha nge rudo, i manyepo. Kunyazi zvakadaro, Djehovha anoda kuti imwimwi mugare ku dii rake pa nyaya ye ucangamire, ngekuti iyena anomukoshesai maningi. Djesu akati: “Baba angu e kudenga aadi kuti kunyazi umwe we adoko aya apsveteke.”—Mateu 18:14.
12 Zviri pamhene kuti Djehovha anoda kuziya gwanza ramunoda kusanangura. Kupinda izvona, cisananguro cenyu cinomubata-bata. Bhaibheri rinosiya pamhene kuti zviito zve anhu zvakanaka kana kuti zvakashata zvinobata-bata mazwiro a Djehovha. Ngo muezaniso, Djehovha “airhwadziwa” Aisraeri paaimupandukira. (Pisarema 78:40, 41) Ndambi huru ya Nowa isati yaitika “zviro zvakashata pazvainga zvawanda,” Djehovha “akatsukwara mu mwoyo.” (Genesi 6:5, 6) Rangarirai kuti izvi zvinoreyei. Kana imwimwi makasanangura kuita zvakashata, mungakwanisa kutsukwarisa Musiki wenyu. Izvi azvirei kuti Mwari aana simba kana kuti unoita zviro ecikonzereswa no mazwiro. Kusiya izvona, iyena anomudai maningi, uye anoda kuti mugare zvakanaka. Nge dii rimweni, paya pamunoita zviro zvakanaka munopfadza mwoyo wa Djehovha. Iyena anopfara haiwa basi ngekuti anopasa mhinduro kuna Sathani, asiwo ngekuti Anomukomborerai. Uye izvona ndizvona zvaanoda kuita. (Ahebheru 11:6) Djehovha ndi Baba ano rudo rakakura kamuri!
Upfumi Watinogumira mu Bhaibheri
w04 7/15 mapaji. 21-22
Sanangurai Zvinangwa zve Kumwiya Zvinokudza Musiki Wenyu
Cimborangarirai kuti Djehovha akasika kudini zviro zvese cinangwa cake cekusika cinocokuita no nyika. No masoko ekuti “kakagara no usiku uye kakagara no macibesi,” Djehovha akasiyanisa nguwa inoteerana yokusika. (Genesi 1:5, 8, 13, 19, 23, 31) Pakutanga ke nguwa imwe na imwe ye kusika, iyena ainyasa kuziya cinangwa kuitira zuwa irona. Uye Mwari akadzadzisa cinangwa cake. (Zvakapangidzwa 4:11) Djobo wakabhuya kuti: “Zvinoda mwoyo wake [Djehovha] ndizvona zvaanoita.” (Djobo 23:13) Djehovha akapfara maningi ngekuona “zvese zvainga asika” uye kubhuya kuti “zvainga zviri zvakanaka”!—Genesi 1:31.
Kuti zvinangwa zvedu zvigare zve zvirokwazvo, tinodikana kugara no cido cakakura ce kuzvidzadzisa. Cinyi cicamubetsera kuti musakurire cido ici? Kunyazi nyika payainga isati yagadziriswa uye isina ciro, Djehovha aikwanisa kuona mugumisiro wakhona—nyika yakanakisisa inoita kuti akudzwe uye areremedzwe. Nge mushobo umwewo, cido cekuita zvatinonga tasanangura cingakwanisa kusakurirhwa nge kunyasa kurangarira ngezve mugumisiro waco uye pazvakanakira kudzadzisa cinangweco. Izvi ndizvona zvakaitika na Tony une makore 19. Iyena aazi kukanganwa kupfara kaakaita paakavhakacira kekutanga eskritoriyo ye Apupuri a Djehovha ku Europa Ocidental. Kubvira ipona kuenda mberi, iyena waidzibvunzisa kuti: ‘Zvaizopfadza kudini kugara uye kuseenza pa mbuto yakadai?’ Tony aazi kusiya kurangarira ngezve mukana iwona uye wakarumbwa ecipeta masimba kuti adzadzise cinangwa ici. Tony wakapfara maningi petisao yake payakadairhwa kuti aende kooseenzera ku sedhi!
DEZEMBRO 11-17
UPFUMI UNOBVA MU SOKO RA MWARI | DJOBO 25-27
“Kuperera Akutsamiri Pakugara Munhu Wakakwana”
it-1 mapaji. 1235-1236 ndi. 7
Kuperera
Djobo. Djobo wekuti pamweni wakararama mumasure mekufa ka Zuzee uye makore manganani Mozesi asati abarhwa, iyena unobhuiwa nge zvake hinga mwanarume “ainga asina ndaa [Hebr., tam] uye munatsi, waithya Mwari uye wairamba kuita zvakashata.” (Djobo 1:1; onai DJOBO.) Kubvunzisa kakaita Djehovha Sathani ngezva Djobo, Sathani paakauya pamusangano mukuru we ngirozi dze kudenga, zvinopangidza kuti kuperera ke anhu kunobatanidzwa pa nyaya ya Djehovha na Sathani. Sathani wakapumha Djobo ecibhuya kuti iyena wainamata Mwari haiwa ngekuti waimuda asi nge ndaa ye zviro zvaaipaswa. Nge mushobo uwona, iyena wakakanda pa muedzo kuperera ka Djobo. Sathani wakatenderhwa kuti atsakatise zviro zvake zvese kutobatanidzawo no ana ake uye iyena wakakonerhwa kupingaidza kuperera ka Djobo. (Djobo 1:6–2:3) Sathani wakabhuya kuti Djobo ngekuda zvakamunakira basi wakadzipira kushingirira kuruza zviro zvake zvese no ana kuti aponese upenyu wake. (Djobo 2:4, 5) Mumasure mazvo, wakabatana no nhenda yakakura uye oedza kupfuridzirhwa no mukadzi wake kuti asarumbwe akaperera uye kushorhwa no kupsvinyirhwa no shamwari dzokunyepa dzainga dzisikateereri mitemo ya Mwari uye zvinangwa zvake (Djobo 2:6-13; 22:1, 5-11), asi zvakaizwa na Djobo zvinopangidza kuti iyena wainga asanangura kusama kusiya kuperera kake. Iyena akati: “Dakara pakufa, andizosiyi kuperera kangu kuna Mwari! Ndicarumbwa ndeciita zve unatsi uye andizombosii kuzviita; mwoyo wangu auzombondipasi ndaa pandinonga ndiciri mupenyu.” (Djobo 27:5, 6) Kuperera kaakaita kakapangidza pamhene kuti Muzondi wa Mwari munyepi.
w19.02 paji. 3 mandi. 3-5
Garai Makaperera!
3 Munhu wakaperera ndi uya unoda Djehovha no mwoyo wese uye unogondeka nguwa dzese. Pazvisananguro zvaanoita, munhu wakaperera unomborangarira kuti Djehovha anoona kudini ngezve cisananguro caanoda kuita. Mu Bhaibheri soko rekutanga rakaturukirhwa kuti “kuperera” rinoreya ciro cakakwana, comutero, cisina pacakashaishika. Ngo muezaniso, Mutemo wa Mozesi waibhuya kuti zvinyama zvaipaswa hinga cibairo kuna Djehovha zvaidikana kugara zvisikazi kuremara. (Rev. 22:21, 22) Kudai cinyama icona cikashota murenje, nzee, dziso; kana kuti ciri kurhwara Djehovha ainga asikacitenderi hinga cibairo. Djehovha aida cinyama cakakwana, comutero, uye cisina pakashaishika. (Mara. 1:6-9) Mutemo uu wa Djehovha uno musoro. Ngo muezaniso, cimborangaridzai maenda kootenga ciro cakaita hingana mucero, bhuku, kana kuti feramenta. Imwimwi maizocitenda here kana icona cino maboo akakura kana kuti pano dii riri kushota? Zviri pamhene kuti haiwa. Tinoda ciro cakakwana, comutero, cisina pakashaishika. Ndizvo zvinoetsera Djehovha ku rudo redu kaari, nokugondeka kedu. Iyena anoda ciro cakakwana, comutero, cisina pakashaishika.
4 Hino zvinoda kureya kuti tinodikana kugara anhu akakwana kuti tigare takaperera here? Zvingashupha kurangarira kuti Djehovha anotiona hinga tisina pakashaishika. Ngokuti tinoita zvishaishi zvakawanda. Asi pano zviro zviiri zvatinodikana kuedzurira. Cekutanga, Djehovha aakandi ndangariro dzake pazvishaishi zvedu. Bhaibheri rinoti: “Kudai mairingisa zvishaishi, Haiwa Jah, ndiani waizorumbwa akaima Haiwa Djehovha?” (Pis. 130:3) Iyena anoziya kuti tiri anhu asikazi kukwana, ndiyo ndaa anotirekerera no rupo. (Pis. 86:5) Cecipiri, Djehovha anoziya patinogumira. Iyena aaetseri kuti tiite zvatisikakwanisi kuita. (Erengai Pisarema 103:12-14.) Hino, cinyi cinoita kuti Djehovha aone munhu hinga akakwana, omutero, uye asina pakashaishika?
5 Ku aseenzi a Djehovha, ciro cikuru cinoita kuti agare akaperera, i rudo. Rudo redu kuna Mwari uye kugondeka kedu kaari zvinodikana kugara zvakakwana, zvomutero, uye zvisina pakashaishika. Kana rudo redu rikarumbwa rakadaro, kunyazi patinosongana no muedzo ticagondeka. (1 Mak. 28:9; Mat. 22:37) Rangariraizve ngezve Apupuri a Djehovha atatu abhuiwa ngezvawo mu ndima yokutanga. Ngei akaita ngo mushobo uwona? Kodi musikanewo aapfariri zvekudziwaraidza here? Kodi mudjaha unoda kuti mudoni wake amuseke paanonga eciparidzira? Kodi mwanarumewo unoda kuruza basa here? Izvirokwazvo kuti haiwa. Cinoita ngecekuti awona anoziya cinoona Djehovha hinga cakanaka no cakashata, uye akasanangura kupfadza Mwari. Ngekuti awona anoda Djehovha, paakaita zvisananguro awona akarangarira ngezvinodiwa na Djehovha. Ngokudaro awona akapangidza kuti ainga ari anhu akaperera.
Upfumi Watinogumira mu Bhaibheri
w16.11 paji. 9 ndi. 3
Anhu Akarongeka Anopurutana Nhungamiriro dze Bhaibheri
3 Zvisikwa zvinopangidza kuti Djehovha ndi Mwari Akarongeka. Bhaibheri rinoti: “Djehovha akasika nyika no uzii,” irona rinotizve. “Akasika denga no ungwaru.” (Zvie. 3:19) Kuno zviro zvakawanda zvatisikazii ngezva Mwari. Zvezvirokwazvo Bhaibheri rinobhuya kuti tinondoziya “kumuceto ngezve makwanza a [Mwari]” uye “zvatinozwa ngezvake ciwewewe basi.” (Djobo 26:14) Asi padoko patinoziya ngezve kusikwa zvinotibetsera kuona kuti mapraneta, nyeredzi, uye magarakisiya zvakanyasa kurongwa. (Pis. 8:3, 4) Mamiriyonji e nyeredzi anoumba magarakisiya. Uye nyeredzi dzinotenderera kudenga dzakarongeka. Mapraneta anotenderera zuwa hingana kuti ari kutondowedza mitemo yemumakwanza! Marongerhwe akaizwa zvisikwa anoshamisa zvekuti tinoguma pakutendera kuti: Djehovha “akasika denga no kuzwisisa” uye nyika, akasisira kukudzwa, kugondeka kedu uye kunamata kedu.—Pis. 136:1, 5-9.
DEZEMBRO 18-24
UPFUMI UNOBVA MU SOKO RA MWARI | DJOBO 28-29
“Munozikanika Hingana Mushobo Waizikanika Djobo Here?”
w02 5/15 paji. 22 ndi. 19
Pangidzai Usisi ku Aya Asina Zvekurarama Nazvo
19 Ngano dze Bhaibheri dzataona dzinopangidzawo kuti tinodikana kupangidza usisi ku aya asina zvekurarama nazvo. Kuitira kuti dzinza rake rienderere mberi, Abrahamu waida kubetserhwa na Bhetueri. Kuti mutumbi wake uendeswe ku Kanani, Djakobo waida kubetserhwa na Zuzee. Uye kuti agare no uya waizogara no nhaka, Noemi waida rubetso ra Rute. Abrahamu, Djakobo uye Noemi ainga asikazokwanisi kuita izvona asina rubetso. Ngo mushobo umwewo, nyamasi uno tinodikana kupangidza usisi ku aya asina zvekurarama nazvo. (Zvierengo 19:17) Tinodikana kuteedzera Djobo waizwira usisi “arombo aida kubetserhwa uye ku nherera uye no ese aya ainga asina waiabetsera” uyewo no aya “aisara padoko kuda kufa.” Djobo ‘waiita kuti mwoyo ye mufirhwakadzi upfare’ uye ‘wainga ari madziso ku bofu no tsoka ku aya akaremara.’—Djobo 29:12-15.
it-2 paji. 1193 ndi. 9
Zvekupfeka
Kunozvipangidzo zvakawanda zvinoezanisira macira. Kuita hingana uniforme kana kuti macira anopfekwa pakupangidza ciitiko kana cikwata ce anhu kana dii raano tsigira, hino macira, hinga mushobo wa zvinoezaniswa mu Bhaibheri, anopangidza mugariro we munhu dii raari kana kuti mabasa aanoita, hingana muezaniso wakaita Djesu nge ndaa ye macira o mucato. (Mt 22:11, 12; onai CIFUKIDZO CO MUSORO; SANDARIYA.) Pana Zvakapangidzwa 16:14, 15, Djesu Kristu akangwadza ngezve kuwata pamwiya uye kutama kuziikanwa hinga mupupuri wakagondeka wa Mwari we zvirokwazvo. Izvi zvingazokwanisa kubara matambudziko sezvoo tiri padhuze ne “hondo huru ye zuwa ra Mwari we Masimba Ese.”
w09 2/1 paji. 15 mandi. 3-4
Mazina pane Zvaanoreya Here?
Atikwanisi kudzisanangurira tega zina paya patinobarhwa. Asi kuziikanwa kedu kunobva katiri. (Zvierengo 20:11) Ngei amudzibvunzisi kuti: ‘Kudai Djesu kana aphostori ake ainga ano mukana, i zina ripi raaizondisanangurira? I zina ripi raizosisira raizotsanangura unhu wangu uye kuziikanwa kangu?’
Mibvunzo idzi dzinoita kuti tinyase kurangarira. Ngei? “Zvakanaka kugara no zina rakanaka pane kugara no upfumi wakawanda,” wakatara kudaro muzii Mambo Soromoni. (Zvierengo 22:1) Zviri pamhene kuti kana tikaita zina rakanaka, mu mutanha matinogara, tinozogara no ciro cikuru cinokosha. Asi cinokosha kupinda zvese, kugara no zina rakanaka pamberi pa Mwari, tinogara no upfumi unorumbwa uripo. Kuita kudini? Mwari anotigondesa kuti anozotara mu “bhuku rake re ciedzuriro” mazina o aya anomuthya uye unoapasa kariro ye upenyu usikaperi.—Marakiya 3:16; Zvakapangidzwa 3:5; 20:12-15.
Upfumi Watinogumira mu Bhaibheri
g00 7/8 paji. 11 ndi. 3
Nyemwererai—Izvona Zvinoita kuti Muzwe Zvakanaka!
Hino kunyemwerera kunoita here kuti munhu azwe zvakanaka? Honde, imwimwi munoedzurira here paya pekuti kunyemwerera ke munhu kakaita kuti kumunyaradze kana kuti imwimwi makazwa makasudzunuka? Pamweni kutama kunyemwerera kakaita kuti mugare makanyangadzwa kana kuona hinga musikadiwi? Hinga zvamaona, kunyemwerera kunoita kuti muzwe zvakanaka, haiwa basi ku munhu unonyemwerera asi na uya unonyemwererhwa. Djobo unorekethwa mu Bhaibheri, wakareketa eciti ngezve azondi ake: “Inini ndainyemwerera kaari —awona ainga asikazvitenderi—uye kudjeka ke hope yangu kaiabambisa.” (Djobo 29:24) “Kudjeka” ke hope ya Djobo pamweni kaipangidza mupfaro wake.
DEZEMBRO 25-31
UPFUMI UNOBVA MU SOKO RA MWARI | DJOBO 30-31
“Djobo Akarumbwa Kudini Akacena”
w10 4/15 paji. 21 ndi. 8
Musaringire Zviro Zvisikabatsiri!
8 Akristu e zvirokwazvo anobathwawo no cido ce madziso uye nyama. Nokudaro, Soko ra Mwari Bhaibheri rinotibvunza kuti tidzibate pa zviro zvatinoona no zvatinoda. (1 Ako. 9:25, 27; erengai 1 Juau 2:15-17.) Djobo mwanarume wainga akaperera waiziya kubatana ke kuona uye kuda. Iyena wakati: “Ndakaita citenderano no madziso angu. Hino ndingaringisa kudini mhandwe no cinangwa ce kumuda?” (Djobo 31:1) Pane kuramba basi kubata mwanakadzi nge mushobo we uhure, Djobo wakarambawo kuzvirangarira. Djesu akapangidza kuti ndangariro dzinodikana kugara dzakacena paakati: “Asi inini ndinomubvunzai kuti, munhu wese unorumbwa wakaringisa mwanakadzi ecimusirira, unonga watoita upombwe naye mu mwoyo make.”—Mat. 5:28.
w08 9/1 paji. 11 ndi. 4
Rangarirai Ngezve “Mugumisiro Wakhona”
Musati matanga kuhamba mu gwanza iri dzibvunzisei kuti: ‘Rinondiendesa kupi?’ Kumboima morangarira ngezve “mugumisiro wakhona” pamweni zvingamubetserai kuti musahambe nge mugwanza rinomupasai mugumisiro wakashata. SIDA no nhenda dzimweni dzinopaswana ngo kuita zve pamaponde, mimba isikakarirhwi, kubuda ke mimba, mucato usikagari ke nguwa yakareba uye hana yakarema zvese izvi ndizvona zvinoitika ku aya anosanangura kusateerera shapa ye cipangidzo. Mugumisiro we gwanza re aya anosanangura kuita upombwe unonyasa kupanganidzwa na muphostori Pauro. Awona “aazogari nhaka ye umambo wa Mwari.”—1 Akorinti 6:9, 10.
w10 11/15 mapaji. 5-6 mandi. 15-16
Madjaha—Tungamirirhwai no Soko ra Mwari
15 Munorangarira kuti kugondeka kenyu kuna Mwari kungaedzwa—pamunonga muri no amweni kana kuti muri mwega? Pamunonga muri ku cikora kana kubasa pamweni munonga makagadzirira kudziirira kutenda kenyu. Imwimwi munonga makangwarira zviro zvingakwanisa kukanda pangozi ushamwari wenyu na Mwari. Pamunonga makakanganwa musina zvamunorangarira ndipo pari nyore kuti ukama wenyu na Djehovha ukandwe pangozi.
16 Ngei imwimwi mecidikana kupurutana Djehovha pamunonga muri mwega? Edzurirai kuti: Imwimwi mungakwanisa kutsukwarisa Djehovha kana kuti mungakwanisa kupfadza mwoyo wake. (Gen. 6:5, 6; Zvie. 27:11) Zviito zvenyu zvinobata-bata Djehovha ngokuti “iyena anomucengetai.” (1 Ped. 5:7) Iyena anoda kuti mumupurutane kuti zvimubetsere. (Isa. 48:17, 18) Mu Israeri yo kare, ngokutama kuzwira nhungamiriro ya Djehovha, aseenzi ake amweni akamurhwadzisa. (Pis. 78:40, 41) Nge dii rimweni, Djehovha aida maningi muphorofita Dhanyeri, zvekuti ngirozi imweni yakamubvunza kuti “mwanarume waidiwa maningi.” (Dha. 10:11) Ngei? Dhanyeri wainga akagondeka kuna Mwari pasinei nokuti painga pakadzara anhu here kana kuti ari ega.—Erengai Dhanyeri 6:10.
Upfumi Watinogumira mu Bhaibheri
w05 11/15 paji. 11 ndi. 3
Uzii Wekuzwa no Rudo
Shamwari dzekunyepedzera dza Djobo dzakazwa basi masoko gumi pa mharidzo ya Djobo. Kunyazi zvakadaro Djobo wakati: “Ndiani angandipasa munhu angandipurutana!” (Djobo 31:35) Ngei iyena wakareketa izvona? Ngekuti shamwari dzake dzekunyepedzera dzainga dzisikamupurutani nge mushobo unonyaradza. Awona ainga asina basa na Djobo, ainga asikadi kuzwa mazwire a Djobo. Zvezvirokwazvo ainga asikapangidzi kumuzwira usisi kana kugara apurutani anozwisisa. Nge ndaa yazvo, muphostori Pedru anokohomedzesa kuti: “Garai makabatana mu marangariro, mecirhwadziwa nge kutambidzika ke amweni, mecidanana hinga hama, mecizwirana usisi, uye kudzidodosa.” (1 Pedru 3:8) Tingapangidza kudini kuzwira usisi amweni? Mushobo we kuita izvona ngewe kurangarira mazwiro o munhu umweni uye kuedza kumuzwisisa. Masoko anopangidza kuzwisisa akaita hingana aya “izvona zvakaita kuti mutsukware” kana kuti “pamweni makaona kuti amweni aazi kunyasa kumuzwisisa” mushobo wekupangidza kuzwira amweni. Mushobo umweni ngewe kuphinda masoko anonga arekethwa nge munhuwo kuti tipangidze kuti tinonyasa kuzwisisa zvaaida kureketa. Kuzwa no rudo zvinoda kureya kunyasa kupurutana haiwa basi masoko, asi mazwire o munhuwo uye zvazvinoda kureya.