-
Kaini Wakagara no Shungu DzakakuraFundai no Ngano Dziri mu Bhaibheri
-
-
NGANO 4
Kaini Wakagara no Shungu Dzakakura
Mumasure mekuti Adhamu na Evha abuda mu munda we Edheni, awona akagara no ana akawanda. Mwana wekutanga waizwi Kaini uye wecipiri waizwi Abheri. Kaini waiita basa re kurima zviro zvakawanda zvakaita hingana micero, zviro zve masakani uye zvimweniwo, asi Abheri waipfuya mabira.
Zuwa rimweni, Kaini uye Abheri akasanangura kupasa Djehovha cipo. Unoziya kuti anhu e kare aidainza kudini zvipo izvi? Aidainza kuti mipiro kana kuti zvibairo. Djehovha akapfarira maningi cipo ca Abheri, asi aazi kupfarira cipo ca Kaini. Izvona zvakasiya Kaini ano shungu dzakakura maningi. Djehovha akazviona uye akabvunza Kaini kuti: ‘Kana iwewe ukarumbwa uno shungu, ucapedzesera waita ciro cakashata.’ Asi Kaini aazi kuda kuzwa ngwadzo ii.
Hino, iyena wakabvunza Abheri kuti: ‘Ambai kombopasiyari padoko.’ Paainga ari oga, Kaini wakauraya Abheri. Djehovha akatsukwara maningi nge zviya zvakaizwa ndi Kaini. Ndiyo ndaa, akabvunza Kaini kuti aende kure no mhuri yake uye iyena aazozi kukwanisa kuhwirira kumba.
Tinofundei? Pamweni paya zviro zvingakwanisa kuitika ngo mushobo watisikakariri uye izvona zvingakwanisa kutisiya no shungu dzakakura. Asi kana tikazviona kana kuti munhu umweni akazviona otingwadza, tinodikana kungwarira uye tosiya kugara no shungu ciriporipoco. Kana tikatama kuita kudaro, idzona dzinokwanisa kutunhudzira uye toguma pakuita ciro cakashata maningi.
Kodi Djehovha akanganwa Abheri here? Haiwa. Abheri wainga ari mwanarume wakanaka uye waida Djehovha. Ndiyo ndaa, Djehovha aazombomukanganwi. Uye nyika paicacinjwa kuti igare paraizo, Djehovha acaita kuti Abheri araramezve.
“Tanga wagadzirisa runyararo ne hama yako, wozohwirira wopa cipo cako.” —Mateu 5:24
-
-
Areka ya NowaFundai no Ngano Dziri mu Bhaibheri
-
-
NGANO 5
Areka ya Nowa
No kuhamba ke nguwa, nyika yakazodzara no anhu. Asi anhu akawanda aiita zvakashata. Kunyazi ngirozi dzimweni dzakaitawo zvakashata. Idzona dzakasiya mbuto yadzo kudenga, dzakauya pa nyika uye dzakacinja dzogara anarume. Unoziya kuti ngei idzona dzakaita izvona? Ngokuti idzona dzaida kuwaka anakadzi.
Ngirozi idzona dzakashata, dzakabara ana no anakadzi aya. Ana akhona akakura uye akagara no simba maningi. Awona aipfarira kutuka anhu uye kuaponda. Asi Djehovha aida kupedza izvona. Ndiyo ndaa akasanangura kutsakatisa anhu ese akashata eciseenzesa ndambi huru. Unoziya here kuti cinyi cinozwi ndambi huru? Yainga iri mvura yakawanda, ino simba uye yakadzadza nyika yese.
Asi pa nyika pano painga pano mwanarume umweni wakanaka waida maningi Djehovha. Iyena waizwi Nowa. Nowa wainga ano mukadzi uye wainga ano ana atatu aidainzwa kuti Semi, Kami na Djafeti, uyewo mwana umwe na umwe wa Nowa wainga ano mukadzi. Djehovha aida kuponesa Nowa no mhuri yake pa Ndambi Huru. Ndiyo ndaa, Djehovha akabvunza Nowa kuti awake areka. Areka rainga riri bhokisi rakakura maningi ro matabwa raiberuka pa denga pe mvura. Djehovha akabvunzazve Nowa kuti akande zvinyama zvakawanda mu areka kuti zvisafe no Ndambi Huru.
Nowa no mhuri yake aazi kunonoka, awona akatanga kuwaka areka. Awona akaiwaka nge mushobo waakabvunzwa ndi Djehovha. Pakapera makore anokwana kuita 50 kuti areka ipere kuwakwa. Nowa paaiwaka areka, iyena waingwadzawo anhu ngezve Ndambi Huru. Asi apana akazvitenda.
Hino yakaguma nguwa yekuti apinde mu areka. Asi cinyi cakazoitika mumasure mazvo?
“Ngokuti hinga zvainga zvakaita mu mazuwa a Nowa, ndizvo zvicaitikawo pa kuoneka ke Mwana we munhu.”—Mateu 24:37
-