Mibvunzo Inobva ku Aerengi
Muphostori Pauro waida kureyei paakadzibhuya kuti “wakabarhwa asikazi kuguma”? (1 Akorinti 15:8)
Pana 1 Akorinti 15:8, Pauro wakati: “Akapedzesera ngekudzipangidzawo kandiri, munhu wakabarhwa nguwa isati yaguma.” Mabhuku edu aipanganidza kuti Pauro waireketa nge zve eshiperiyensia yaakagara nayo, eciona Djesu mu umambo wake ku matenga. Zvaiita hinga watambira mokomborero e kubarhwa kana kuti kumutswa kuti ararame kudenga. Makore akawanda adarika rumuko irona arisati raitika, asi mumasure me kunyasa kuongorora vhersikuro ii, takaona kuti taidikana kugadzirisa mazwisisiro edu.
Pauro zvezvirokwazvo waireketa nge zve ciono caakaona ca Djesu paaienda ku Dhamasko. Hino waida kubhuyei paakareketa kuti “wakabarhwa asikazi kuguma”? Onai mapanganidzirhwe ozvakaizwa.
Mushobo wakagara Pauro Mukristu kakaitika nokukasika uye ngo mushobo unoshamisa. Panobarhwa mwana asikazi kuguma, kajinji kakhona zvinosoitika tisikakariri. Izvona zvakaitikawo na Sauro (uye nokuhamba ke nguwa wakazodainzwa kuti Pauro). Paaiita rhwendo ecienda ku Dhamasko kooteerera Akristu ikona, iyena wainga asikatozvirangariri kuti waizoona ciono ce rumuko ra Djesu. Mushobo wakagara Pauro Mukristu wakashamisa, haiwa basi kaari, asi ku Akristu ese e ku Dhamasko. Zvakaitika na Pauro, i eshiperiyensiya yakaitika nokukasika uye inoshamisa zvekutoti wakafa madziso ke cinguwa.—Zvii. 9:1-9, 17-19.
Pauro wakagara Mukristu pa “nguwa isiriyopi.” Mu ciGerego soko rekuti “kubarhwa usikazi kuguma” ringaturikirhwawo kuti “munhu wakabarhwa pa nguwa isiriyopi.” A Bíblia Almeida, revista e atualizada inobhuya kuti: “Ndakaita hinga ndakabarhwa pasina munhu waizvikarira.” Panguwa yakagara Pauro Mukristu, Djesu ainga atohwirira kudenga. Kusiyana no aya akarekethwa na Pauro mu ndima dzadarika, awona ainga asati aona Djesu asati ahwirira kudenga. (1 Ako. 15:4-8) Hino, Djesu akauya kuna Pauro iyena asikakariri paainga aakudenga, hingana pa “nguwa isiriyopi.”
Pauro waidzidodosa paaireketa nge zvake. Maererano no afundi amweni, soko rakaseenzeswa ndi Pauro apa, zvingatibetsera kuziya kuti iyena waidzipasa ndaa. Kana izvi zviri zvirokwazvo, hino iyena waitendera kuti wainga asikasisiri kutambira cikomborero cekugara muphostori. Iyena wakatoti: “Inini ndiri mudoko pa aphostori ese, andizi kusisira kudainzwa muphostori ngekuti ndaitambudza ungano ya Mwari. Asi nyasha dza Mwari dzakaita kuti ndigare zvandiri.”—1 Ako. 15:9, 10.
Zvingaita kuti Pauro waireketa zviro zvitatu. Cekutanga, mushobo waakauya Djesu asikakariri, cecipiri, kugara Mukristu pa nguwa isiriyopi, uye cecitatu, kudziona hingana asikasisiri kugara muphostori. Isusu atinyasi kuziya zvaida kurekethwa ndi Pauro, asi tinoziya kuti iyena wakakoshesa maningi ciono caakaona, ngekuti zvezvirokwazvo ciono icona ndico cakamubetsera kuona kuti zvezvirokwazvo Djesu amutswa. Azvishamisi kuzwa kuti iyena waibhuya nge zve eshiperiyensiya ii paaiparidzira anhu amweni nge zve rumuko.—Zvii. 22:6-11; 26:13-18.