Mitemo ye mu Bhaibheri inotibatsira kudini?

1. Ngei tecida Kutungamirirwa?

Musiki wedu anoziya maningi kupinda isusu. Hinga Baba ane rudo iyena anoticengeta. Mwari aazi kutisika kuti tidzitonge tega. (Djeremiya 10:23) Kuita hingana mwana mudoko unoda kutungamirirwa no apsvari ake, isusu tese tinodikana kutungamirirwa na Mwari. (Isaya 48:17, 18) Nhungamiriro yatinopaswa no mitemo ye mu Bhaibheri icipo ca Mwari.—Erengai 2 Timoti 3:16.

Mitemo dza Djehovha dzinotifundisa mararamiro akanaka nyamasi uno uye dzinotipangidza kuti tinodikana kuitei kuti titambire mubairo usikaperi mu ramagwana redu. Ngokuti Mwari wakatisika tinodikana kureremedza nhungamiriro dzake.—Erengai Pisarema 19:7, 11; Zvakapangidzwa 4:11.

2. Soko ra Mwari rinotitungamirira kudini?

Zvokwadi zvimweni zvo Bhaibheri zvinotipangidza zvinoda Mwari kuti tiite mu mhingampini dzakawanda dze upenyu. Mitemo dzimweni dzinoseenzeswa mu mararamiro majinji akareketwa kamare. (Dheuteronomiyo 22:8) Tinodikana kuseenzesa simba rokurangarira kuti tizwisise kuti mitemo dziri mu Bhaibheri tingadziseenzesa kudini mu upenyu wedu. (Zvierengo 2:10-12) Ngo muezaniso, Bhaibheri rinotifundisa kuti upenyu ndi cipo catakapaswa na Mwari. Cokwadi ici cinotitungamirira ku basa, pa nyunba uye patinoita rwendo. Cokwadi ici cinotitungamirirazve kuti tisapinze upenyu wedu no waamweni pa ngozi.—Erengai Zviito 17:28.

3. Ndeipi mitemo miiri inokosha?

Djesu wakabhuya nge zve mitemo miiri inokosha maningi. Wokutanga unopangidza kuti ndecipi cinangwa ce upenyu we anhu: kuziya Mwari, kumuda uye kumuseenzera takatendeka. Mutemo wokutanga uu unodikana kurangarirwa nge zvawo patinosanangura cokuita mu upenyu. (Zvierengo 3:6) Aya anoseenzesa mutemo uu acagara shamwari ya Mwari, no mupfaro we cokwadi uye acagara no upenyu usikaperi.—Erengai Mateu 22:36-38.

Mutemo wocipiri unotitungamirira kuti tigarisane zvakanaka no amweni. (1 WaKorinte 13:4-7) Kuseenzesa mutemo uu kunobatanidza kuteedzera mabatire anoita Mwari ku anhu.—Erengai Mateu 7:12; 22:39, 40.

4. Mitemo ye mu Bhaibheri inotibatsira kudini?

Mitemo ye mu Bhaibheri dzinofundisa mhuri kuti dzigare dzakabatana mu rudo. (WaKorosi 3:12-14) Soko ra Mwari rinotodziwirira mhuri ngokudzifundisa mutemo unotungamirira wokuti: mucato unodikana kugara mubatanidzwa wo kwenda no kwenda.—Erengai Genesi 2:24.

Ngokuterera mitemo ye Bhaibheri, isusu tinokwanisa kuzvidziwirira kudii ro zvokurarama nazvo uye mu ndangariro. Ngo muezaniso, magwiri anoseenzerwa kajinji kamare anosoda aseenzi anoteerera mitemo ye mu Bhaibheri inokohomedzesa kugara museenzi akagondeka uye anoseenza no simba. (Zvierengo 10:4, 26; WaHebheru 13:18) Soko ra Mwari rinotifundisa kugara takadakara paya patinodzadzisirwa zviro zvishomanani zvokurarama nazvo. Uyezve tinofunda kureremedza kamare ushamwari wedu na Mwari kupinda zviro zvokurarama nazvo.—Erengai Mateu 6:24, 25, 33; 1 Timoti 6:8-10

Kuseenzesa mitemo ye Bhaibheri kunodziwirira uthongo wedu. (Zvierengo 14:30; 22:24, 25) Ngo muezaniso, kuzwa mutemo wa Mwari wokurambidza kumwa doro kupindiridza mudida kunotidziwirira ku nhenda dzinouraya uye tsaona. (Zvierengo 23:20) Djehovha aarambidzi kumwa doro asi zvinodikana kumwa mudida uri pakati no pakati. (Pisarema 104:15; 1 WaKorinte 6:10) Mitemo ya Mwari inotibatsira ngokutifundisa kuti tinodikana kungwarira zviito zvedu uye ndangariro edzdu. (Pisarema 119:97-100) Asi maKristu e cokwadi aareremedzi mitemo ya Mwari ngo umbau. Awona anoreremedza mitemo ya Djehovha kuitira kuti amukudze.—Erengai Mateu 5:14-16.