Bhaibheri Rinobhuyei nge zve Kupinda mu Mucato Kana Kuti Kugara Makadaro?

Mu nyika dzimweni, anhu anorangarira kuti azviiti kuti munhu apfare mu upenyu asikazi kuwaka kana kuwakwa. Asi kuno makazado akawanda asikapfari, uye kuno anhu anopfara asikazi kuwaka kana kuwakwa. Zvezvirokwazvo, Bhaibheri rinobhuya kuti zvese zviri zviiri, kucata kana kugara zvakadaro, icipo.

1. Zvakanakira papi kusama kuwaka kana kuwakwa?

Bhaibheri rinobhuya kuti: “Uya anowaka kana kuwakwa ucaita zvakanaka, asi uya asikawaki kana asikawakwi ucaita zvakanaka kudarika ipona.” (Erengai 1 Akorinti 7:32, 33, 38.) Zvinoreyei kuti munhu usikazi kuwaka kana kuwakwa “ucaita zvakanaka kupinda apona”? Akristu asikazi kuwaka kana kuwakwa aanetseki nge zve zviro zvinodiwa no mwamuna kana mukadzi. Ndiyo ndaa, awona ano nguwa yakawanda yekuita zviro zvaanopfarira. Ngo muezaniso, amweni angakhorovhera mikaneyo kuti aite zvakawanda mu basa rekuparidzira nge mushobo unopfadza, wakaita hingana kuenda koparidzira masoko akanaka ku nyika dzimweni. Kupinda izvona, awona ano nguwa yakawanda yekukhwedera dhuze na Djehovha.

2. Kucata zviri pamutemo kunobetsera kudini?

Pano pezvakanakirawo kuwaka kana kuwakwa. Bhaibheri rinobhuya kuti “airi ari nani kupinda umwe basi.” (Muparidzi 4:9) Izvi zvinonyanya kuitika ku Akristu anoseenzesa mazano e mu Bhaibheri mu mucato wawo. Anhu anowakana zviri pa mutemo anopika kuti acadanana, acareremedzana uye acacengetana. Izvi zvinoita kuti awona agare akacengeteka kudarika aya anogara ese asikazi kucata pa mutemo. Mucato wakadaro unoita kuti ana arerhwe zvakanaka.

3. Djehovha anoona kudini mucato?

Djehovha paakaitisa mucato we anhu airi e kutanga, akati: “Mwanarume ucasiya baba ake na mai ake uye ucabatana no mukadzi wake.” (Genesi 2:24) Djehovha anoda kuti mwamuna no mukadzi adanane uye arumbwe ari pamwepo ke upenyu wawo wese. Anotendera kuti awona arambane kana umwe wawo akaita uhure. Panyaya yakadaro, Djehovha anopasa munhu unonga ashaishirhwa citenderhwa cekusanangura kurumbwa ari mu mucato, kana kuugurisa.a (Mateu 19:9) Djehovha aatenderi kuti Akristu apharike.—1 Timoti 3:2.

FUNDAI ZVAKAWANDA

4. Seenzesai zvakanaka cipo cekusama kuwaka kana kuwakwa

Djesu aiwona kusama kuwaka kana kuwakwa hinga cipo. (Mateu 19:11, 12) Erengai Mateu 4:23, pedzepo cedzai nge zve mubvunzo unoteera:

• Djesu akaseenzesa kudini cipo cekusama kuwaka pakuseenzera Baba ake uye kubetserawo amweni?

Akristu asikazi kuwaka kana kuwakwa anokwanisa kupfadzwa ngekuseenzesa cipo cawo hinga zvakaizwa na Djesu. Ridzai VHIDHIYO, pedzepo cedzai nge zve mubvunzo unoteera.

Ridzai VHIDHIYO: Anarume no Anakadzi Akagondeka Asikazi Kuwaka Kana Kuwakwa (3:11)

• Zvakanakira papi kusama kuwaka kana kuwakwa?

Maizviziya here?

Bhaibheri aribhuyi makore atinodikana kuwaka kana kuwakwa nawo. Asi rinokohomedzesa kuti munhu amboetsere dakara “adarika thunga re mwana mudoko,” ngekuti pamakore awona cido cekuda kuita zve maponde cinonga cakabamba maningi zvekuti cingakwanisa kuita kuti munhu asasanangure no ungwaru munhu wekuwakana naye.—1 Akorinti 7:36.

5. Sanangurai no ungwaru munhu wekuwakana naye

Nyaya yekusanangura munhu wekuwakana naye inokosha maningi mu upenyu wedu. Erengai Mateu 19:4-6, 9, pedzepo cedzai nge zve mubvunzo unoteera:

• Ngei mukristu asikadikani kukasikira kuwaka kana kuwakwa?

Bhaibheri rinokwanisa kumubetsera kuti muziye zvamunodikana kuona pa munhu wekuwakana naye. Asi cinonyanya kukosha camunodikana kuona, ngecekuti unoda Djehovha here kana kuti haiwa.b Erengai 1 Akorinti 7:39 uye 2 Akorinti 6:14, pedzepo cedzai nge zve mibvunzo dzinoteera:

• Ngei tecidikana kuwaka kana kuwakwa no muKristu basi?

• Munorangarira kuti Djehovha anozwa kudini patinowaka kana kuwakwa no munhu asikamudi?

6. Onai mucato hinga maonero anoita Djehovha

Mu nguwa dze Aisraeri, anarume amweni airamba akadzi awo ecipsvaka zvakaanakira. Erengai Marakiya 2:13, 14, 16, pedzepo cedzai nge zve mubvunzo unoteera:

• Ngei Djehovha ecizonda anhu anorambana pasina zvikonzero zvinorekethwa no Bhaibheri?

Ridzai VHIDHIYO, pedzepo cedzai nge zve mubvunzo unoteera.

VHIDHIYO: Mucato Mubatanidzwa we Upenyu Wese (4:30)

• Kana mwamuna wenyu kana kuti mukadzi wenyu asikatendi, mungaitei kuti mupfare mu mucato wenyu?

7. Seenzesai zvinorekethwa no Bhaibheri nge zve mucato

VHIDHIYO: Zvinodiwa na Djehovha nge zve Mucato Azvishuphi (4:14)

Erengai Ahebheru 13:4, pedzepo cedzai nge zve mibvunzo dzinoteera:

• Munorangarira kuti zvinoita kuseenzesa mitemo ya Djehovha yakaringana no mucato here? Ngei mecidaro?

Mu nyika dzakawanda, anyautongi anoda kuti anhu ataririse mucato paanowakana uye apfudzise mucato paanorambana. Djehovha anoimira kuti Akristu azwire mitemo iyona. Erengai Tito 3:1, pedzepo cedzai nge zve mubvunzo unoteera:

• Kana makawaka kana kuwakwa muno cokwadi cekuti mucato wenyu unoziikanwa nge anyautongi here?

MUCIGWAGWA

Kuwaka kana kugara makadaro, zvese zvipo zvinobva kuna Djehovha. Ese angapfara uye angagutsikana kana akaita kuda ka Djehovha.

Mibvunzo yekuhwirinzira

• Munhu ungaseenzesa kudini nguwa yake zvakanaka paanonga asati awaka kana kuwakwa?

• Ngei Bhaibheri recibhuya kuti tiwake kana kuwakwa no mukristu basi?

• Ngacipi cikonzero cimwe basi cinotenderhwa no Bhaibheri kuti anhu arambane?

ZIYAI ZVAKAWANDA

Zvinoreyei kuwaka kana kuwakwa “muna Tenzi” basi?

“Mibvunzo Inobva ku Aerengi” (Murindiri wa 1 ya Julho wa 2004)

Onai mavhidhiyo mairi madoko angamubetsera kuti muite cisananguro cakanaka nge zve kunamorari uye kuwaka kana kuwakwa.

Kugadzirira Kuti Muzocate (11:53)

Onai kuti ngei hama imweni yecirangarira kuti zvayakapaswa na Djehovha zvinokosha kupinda zvese zvayakasiya sure.

Ndaitorangarira Kuti Aizofundawo Bhaibheri (1:56)

Ngazvipi zvinodikanwa kurangarirhwa no munhu asati asanangura kupfudzisa mucato kana kuti kurambana no munhu?

“Kudzai Zvasungwa Pamwepo pa Djoki na Mwari’” (Murindiri wa Dezembro wa 2018)