Djehovha Anotibetsera Kudini kuti Tibudirire mu Basa Rekuparidzira

1. Ngazvipi zvatingaetsera, uye tingagara no rugondo ripi?

ISUSU tinozviziya kuti tingasongana nokuteererhwa patinoita basa redu re kuparidzira. No kuhamba ke nguwa pamweni kuteererhwa uku kungabambirira. (Dha. 11:44; 2 Ti. 3:12; Zvak. 16:21) Tingakwanisa kugara no rugondo rekuti Djehovha acatipasa zvatinoda. Ngei? Ngekuti nguwa dzese, Djehovha akabetsera aseenzi ake kuti akwanise kuita basa rawo—kunyazi pazvaishupha. Nge muezaniso, ngatione zviro zvinganani zvakaitika mu upenyu wa Ezekiyeri paakaparidzira ku Bhabhironi.

2. Anhu aida kuparidzirhwa na Ezekiyeri ainga akaita kudini? (Ezekiyeri 2:3-6)

² Ezekiyeri waidikana kuparidzira anhu akaita kudini? Djehovha akabhuya kuti iyena waidikana kuparidzira anhu “asikateereri,” “akaoma musoro,” uye “apanduki.” Zvaitoita hinga kuti Ezekiyeri wainga akatendererhwa ne minzwa uye no zvinyakon’a. Azvishamisi kuti Djehovha ainga abvunza Ezekiyeri kakawanda kuti: “Usathye”! (Erengai Ezekiyeri 2:3-6.) Ezekiyeri wakakwanisa kuita basa rake ngekuti (1) Djehovha ndiye ainga amutuma, (2) mwiya mucena wa Mwari wakamupasa simba raaida uye (3) soko ra Mwari rakabambisa kutenda kake. Zviro zvitatu izvi zvakabetsera kudini kutenda kake? Uye zvingatibetserawo kudini mazuwa ano?

DJEHOVHA AKATUMA EZEKIYERI

3. Masoko api pamweni akabambisa Ezekiyeri, uye Djehovha akapangidza kudini kuti aizogara ku dii rake?

³ Djehovha akati kuna Ezekiyeri: “Ndiri kukutuma.” (Ezek. 2:3, 4) Masoko aya pamweni akabambisa maningi Ezekiyeri. Ngei? Ngokuti pamweni, iyena wakaedzurira kuti Djehovha akareketa masoko akaezana paakagadza Isaya na Mozesi hinga aphorofita. (Eki. 3:10; Isa. 6:8) Ezekiyeri waiziyawo kuti Djehovha akabetsera anarume airi aya kuti akunde zvitsinzwa. Ndiyo ndaa, Djehovha paakareketa kuna Ezekiyeri kairi kese eciti: “Ndiri kukutuma,” iyena wakagara no rugondo rokuti waizogara no rubetso ra Djehovha. Kusiya izvona, mu bhuku ra Ezekiyeri tinogumira kakawanda masoko ekuti: “Soko ra Djehovha rakauya kandiri reciti.” (Ezek. 3:16) Uye Ezekiyeri wakatara kakawanda kuti, “Soko ra Djehovha rauyazve kandiri.” (Ezek. 6:1) Apana mubvunzo kuti Ezekiyeri wainga ano rugundo rokuti wainga watumwa na Djehovha. Ezekiyeri wainga ari mwana we mupristi, zvingabvira kuti iyena wakazwa kakawanda baba ake eciti, Djehovha akagondesa aphorofita ake kuti nguwa dzese aizogara ku dii rawo. Umwe we muezaniso wakhona, ndizvo zvakarekethwa na Djehovha ecibvunza Isaya, Djakobo na Djeremiya eciti: “Inini ndinewe.”—Gen. 26:24; 28:15; Djer. 1:8.

4. Masoko api pamweni akabambisa Ezekiyeri?

⁴ Aisraeri aizotambira kudini kuparidzirhwa kaaizwa ndi Ezekiyeri? Djehovha akati: “Nyumba ya Israeri icaramba kukupurutana, ngokuti awona aadi kundipurutana.” (Ezek. 3:7) Nge kuramba kupuruta Ezekiyeri, zvezvirokwazvo awona airamba kupurutana Djehovha. Masoko a Djehovha, aigondesa Ezekiyeri kuti kutama kupurutanwa kaiizwa, zvainga zvisikareyi kuti waainga washaisha kuseenza hinga muphorofita. Djehovha ainga agondesawo Ezekiyeri kuti kana kutonga kaakabhuya kukatanga kuitika, “anhu aizoziya kuti painga pano muphorofita pakati pawo.” (Ezek. 2:5; 33:33) Apana mubvunzo kuti masoko aya a Djehovha, akapasa Ezekiyeri simba raiida kuti akwanise kuita basa rake.

DJEHOVHA ANOTITUMAWO MAZUWA ANO

5. Maererano no Isaya 44:8, cinyi cinotipasa ushingi?

⁵ Kuitawo hingana Ezekiyeri, isusu tinogara no ushingi we kuparidzira ngekuti tinoziya kuti Djehovha ndiye ari kutituma. Djehovha akatigadza hinga “apupuri” ake. (Isa. 43:10) Aya ndi makomborero akakura katiri! Hingana mushobo wakabvunza Djehovha Ezekiyeri kuti: “Usathye,” Djehovha anotibvunzawo kuti: “Musathye.” Ngei tisikadikani kuthya aphikisi? Ngekuti kuita hingana Ezekiyeri, isusu tino rubetso ra Djehovha.—Erengai Isaya 44:8.

6. (a) Masoko api a Djehovha anotipasa rugondo rekuti tinorubetso rake? (b) Cinyi cinotinyaradza uye cinotipasa simba?

⁶ Djehovha anogondesa kuti acatibetsera. Ngo muezaniso, Djehovha asati abhuya kuti: “Imwimwi muri Apupuri angu,” ayena akati: “Paunopinda nge mu mvura, ndicagara newe, paunodarika ngo mu mirambo aizokueredzi, paunopinda nge pamuriro auzopiswi uye murazvo we muriro auzokufuhuri.” (Isa. 43:2) Patinoparidzira, kakawanda kakhona tinosongana no zvitsinzwa zvakaita hinga kudzarisa ke mvura uye matambudziko angaezaniswa no muriro. Kunyazi zvakadaro, no rubetso ra Djehovha tinorumbwa teciparidzira. (Isa. 41:13) Kuitawo hinga munguwa ya Ezekiyeri, nyamasi uno anhu akawanda anorambawo masoko edu. Isusu tinozviziyawo kuti kutama kawo kutambira azvidi kureya kuti atiripi kuita zvakanaka basa redu hinga Apupuri a Mwari wedu. Cinotinyaradza uye cinotipasa simba, ngece kuziya kuti Djehovha anopfadzwa patinorumbwa teciparidzira masoko akanaka takagondeka. Muphostori Pauro wakati: “Munhu umwe na umwe ucatambira mubairo maererano no basa rake.” (1 Ako. 3:8; 4:1, 2) Hanzvadzi imweni inoseenza hinga mupionera ke makore akawanda yakati: “Cinondipfadza ngece kuziya kuti Djehovha anokomborera kupeta masimba kedu.”

MWIYA MUCENA—WAKABAMBISA EZEKIYERI

7. Ezekiyeri waizwa kudini pairangarira ngezve ciono caakaona? (Onai foto ye pa kapa.)

⁷ Ezekiyeri wakaona kukura ke simba re mwiya mucena. Ezekiyeri wakaona ciono cakamubetsera kuziya kuti mwiya mucena waipasa simba ngirozi kuti dzihambisa marodha akakurisisa e karu ye kudenga. (Ezek. 1:20, 21) Ezekiyeri wakaitei? Iyena wakatara zvakaitika. “Pandakazviona, ndakagodama ndohwarara.” Ezekiyeri wakashamisika maningi zvekutoti wakatombwera pasi. (Ezek. 1:28) Mumasure mazvo, pese paaiedzurira ciono caakaona cinoshamisa, Ezekiyeri pamweni wakatobambiswa nge kuziya kuti no rubetso ro mwiya wa Mwari, iyena waizokwanisa kubudirira pa basa rake.

8-9. (a) Ezekiyeri wakapaswa mutemo upi na Djehovha? (b) Ezekiyeri wakapaswa rubetso ripi na Djehovha kuti akunde zvinetso zvaaibatana nazvo mu nharaunda make?

⁸ Djehovha akati kuna Ezekiyeri: “Mwana we munhu, rumbwa wakaima kuti ndirekete newe.” Mutemo wakabva ku mwiya wa Mwari wakapasa simba Ezekiyeri kana kuti mwiya waaida kuti akwanise kurumbwa akaima. Ezekiyeri wakati: “Mwiya wakapinda mandiri uye wakaita kuti ndiime no tsoka dzangu.” (Ezek. 2:1, 2) Kubvira ipona dakara panguwa yese yo basa rake, Ezekiyeri wakatungamirirhwa no “nyara” ya Mwari—kana kuti no mwiya mucena wa Mwari. (Ezek. 3:22; 8:1; 33:22; 37:1; 40:1) Mwiya wa Mwari wakabambisa Ezekiyeri kuti akwanise kuita basa raakapaswa—kuparidzira “ano misoro yakaoma uye mwoyo yakaoma.” (Ezek. 3:7) Djehovha akati kuna Ezekiyeri: “Ndakaomesa hope yako hinga zvakaita hope dzawo uye ndakaomesa huma yako hinga zvakaita huma dzawo. Ndaita kuti huma yako iite hinga dhiyamanti, iome kupinda buwe rakaomesesa. Usaathye kana kupatika nge kuona hope dzawo.” (Ezek. 3:8, 9) Zvaiita hinga kuti Djehovha waibvunza Ezekiyeri kuti: ‘Kutama kuzwa ke anhuwo ngakusaite kuti uore mwoyo. Ndicakubambisa.’

⁹ Mumasure mazvo, mwiya wa Djehovha wakatungamirira Ezekiyeri pa basa rake rese re kuparidzira. Ezekiyeri wakatara kuti “Nyara ya Djehovha yainga yakabamba kandiri.” Kakapera sumana imwe kuti Ezekiyeri anyase kuzwisisa soko raaidikana kuparidzira uye kureketa no rugondo. (Ezek. 3:14, 15) Djehovha akati aende mu bani ngekuti kweneyo “mwiya mucena waizopinda maari.” (Ezek. 3:23, 24) Zvino Ezekiyeri wainga akagadzirira kuti aite basa rake.

MWIYA MUCENA UNOTIBAMBISA

10. Rubetso ripi ratinoda kuti tikwanise kuparidzira, uye ngei?

¹⁰ Rubetso ripi ratinoda kuti tikwanise kuita basa redu re kuparidzira? Kuti mukwanise kudaira, rangariraizve zvakaitika na Ezekiyeri. Ezekiyeri asati atanga kuparidzira mwiya mucena wa Mwari wakamupasa simba raaida. Hinga zvakaitika na Ezekiyeri, nyamasi uno isusu tinokwanisa kuparidzira nge ndaa ye rubetso re mwiya mucena wa Mwari. Ngei? Ngekuti Sathani urikutirhwisa uye urikuda kuti tisiye kuparidzira. (Zvak. 12:17) Mu maonero e anhu, pamweni tingagara hinga tisina cidziiriro pamberi pa Sathani. Asi nge ndaa ye basa re kuparidzira, isusu tiri kunyisa sathani! (Zvak. 12:9-11) Nge gwanza ripi? Patinopinda mu basa re kuparidzira, tinopangidza kuti atiripi kuthya zvimhingamupini zva Sathani. Nguwa yese yatinoparidzira unonga ecitonyiswa pacake. Hino mugumisiro upi watingagara nawo patinorumbwa teciparidzira kunyazi teciteererhwa? Zvinogara pamhene kuti tinotenderhwa na Djehovha uye kuti ayena ari kutipasa mwiya mucena wake.—Mat. 5:10-12; 1 Ped. 4:14.

11. Mwiya mucena wa Mwari unoitei katiri, uye tingarumbwa kudini teciutambira?

¹¹ Rugondo ripi ratingagara naro nge kuziya kuti Djehovha ainga aomesa hope no huma ya Ezekiyeri nge mushobo wekuezanisira? Izvona zvinotigondesa kuti mwiya mucena wa Mwari unotipasa simba kuti tikunde matambudziko api hawo atingabatana nawo mu basa re kuparidzira. (2 Ako. 4:7-9) Asi tingaitei kuti tirumbwe tecitambira mwiya mucena wa Mwari? Tinodikana kuita munamato nguwa yese, tecigara no rugondo rekuti Djehovha acatizwa uye acatipasa mwiya mucena. Djesu akafundisa afundi ake kuti: “Rumbwai mecikumbira, . . . rumbwai mecipsvaka, . . . rumbwai mecigogodza.” Nge kudaro, Djehovha “anopasa mwiya mucena kuno uya anoukumbira.”—Ruka 11:9, 13; Zvii. 1:14; 2:4.

SOKO RA MWARI RAKABAMBISA KUTENDA KA EZEKIYERI

12. Maererano na Ezekiyeri 2:9–3:3, mupumburu uu wakabvepi uye zvinyi zvainga zvakatarhwa imona?

¹² Mwiya mucena wa Mwari wakapasa Ezekiyeri simba uye ushingi waaida kuti arumbwe eciparidzira asi izvi andizvopi basi, Soko ra Mwari rakatobambisawo kutenda ka Ezekiyeri. Paciono, Ezekiyeri wakaona nyara yakabata mupumburu. (Erengai Ezekiyeri 2:9–3:3.) Mupumburu uu wakabva kupi? Zvinyi zvainga zvakatarhwa imona? Uye zvakabambisa kudini kutenda ka Ezekiyeri? Ngatione. Mupumburu uu wakabuda kamare kucigaro ca Djehovha. Pamweni Djehovha akaseenzesa imwe ye ngirozi pa mirongomuna dzakaonekwa na Ezekiyeri kuti imupase mupumburu. (Ezek. 1:8; 10:7, 20) Mu mupumburumo mainga makatarhwa masoko a Mwari—anocokuita no kutonga kaizobhuiwa na Ezekiyeri ku apanduki ainga ari kuutaphwa. (Ezek. 2:7) Soko iri rainga rakatarhwa mberi uye sure ke mupumburu.

13. Djehovha akabvunza Ezekiyeri kuti aitei no mupumburu, uye ngei waitapira?

¹³ Djehovha wakabvunza muphorofita wake kuti arhye mupumburu “odzadza ndani [yake] nawo.” Ezekiyeri wakapurutana, uye wakarhya mupumburu wese. Dii iri re ciono rinoda kureyei? Ezekiyeri waidikana kunyasa kuzwisisa masoko aaidikana kuparidzira uye iyena waidikana kutendera masoko aya uye wokwanisa kuareketa no rugondo. Pedzepo zviro zvainga zvisikakarirhwi zvakaitika. Ezekiyeri wakazoona kuti mupumburu “waitapira hingana uci.” (Ezek. 3:3) Ngei? Kuna Ezekiyeri, kugara no cikomborero cokuimirira Djehovha zvaitapira uye zvaidakadza. (Pis. 19:8-11) Iyena waitenda kamare Djehovha nge kumusanangura kuti aseenze hinga muphorofita wake.

14. Cinyi cakabetsera Ezekiyeri kuti atende basa raakapaswa?

¹⁴ Pedzepo, Djehovha akabvunza Ezekiyeri kuti: “Purutana masoko ese andinokubvunza ugare nawo mu mwoyo mako.” (Ezek. 3:10) No masoko aya, Djehovha aida kubvunza Ezekiyeri kuti aedzurire masoko ari mu mupumburu uye onyasa kuarangarira. Izvi zvaizobambisa kutenda ka Ezekiyeri. Pa nguwa imwe-imweyo, iyena wakapaswa masoko ano simba aaidikana kubvunza anhu. (Ezek. 3:11) No masoko a Mwari mumwoyo uye mu muromo make, Ezekiyeri wainga akagadzirira kutenda uye kuita basa raainga apaswa.—Ezanisai na Pisarema 19:14.

SOKO RA MWARI RINOBAMBISA KUTENDA KEDU

15. Kuti tibudirire pa basa re kuparidzira, tinodikana kutendei “mu mwoyo medu”?

¹⁵ Kuti tikwanise kushingirira mu basa re kuparidzira, tinodikanawo kubambisa kutenda kedu nge kuseenzesa Soko ra Mwari. Isusu tinodikana “kutambira no mwoyo wese” zvese zvatinobvunzwa na Djehovha. Mazuwa ano, Djehovha anoreketa na isusu eciseenzesa Bhaibheri. Hino tinodikana kuitei kuti Soko ra Mwari rirumbwe reciseenza katiri pa mazwire uye pa maitiro edu?

16. Tinodikana kuitei kuti tinyase kuzwisisa Soko ra Mwari?

¹⁶ Paya patinorhya uye togeya, mwiri wedu unogara wakabamba uye wakanaka, nge mushobo umwewo, tikaerenga Soko ra Mwari uye tonyasa kurangarira zvataerenga, kutenda kedu kunonyasa kubamba. Ii ndiyo fundo inoda Djehovha kuti tiiedzurire teciseenzesa ciono ce mupumburu. Djehovha anoda kuti “tidzadze ndani yedu” nge Soko rake, izvi zvinoreya kuti Djehovha anoda kuti tinyase kuzwisisa Bhaibheri. Tingaita izvona paya patinoita munamato, patinoerenga uye patinonyasa kurangarira. Pakutanga tinoita munamato kuti tigadzirire mwoyo wedu kuti tinyase kuzwisisa marangariro anoita Djehovha. Mumasure mazvo toerenga tsamba yo Bhaibheri. Pedzepo, tinomboima kuti tinyase kurangarira zviya zvataerenga. Mugumisiro we zvese izvi ngaupi? Patinonyasa kurangarira Soko ra Mwari, zvinobambisa kutenda kedu.

17. Ngei zvecikosha maningi kurangarira zviya zvatinonga tecierenga mu Bhaibheri?

¹⁷ Ngei zvecikosha kuerenga Bhaibheri uye kunyasa kurangarira zvatinoerenga? Ndizvo zvicatipasa simba zvino kuti tiparidzire soko re Umambo uye pamweni mune ramangwana paticaparidzira soko rokutonga. Kusiya izvona, patinonyasa kurangarira mawara akanaka a Djehovha, ushamwari wedu naye unonyasa kubamba. Izvi zvicatipasa zviro zvinotapira, kana kuti zvinodakadza—runyararo ro mukati uye kugutsikana.—Pis. 119:103.

SIMBA REKUTI TISHINGIRIRE

18. Anhu e mundima medu acaziyei uye ngei?

¹⁸ Ezekiyeri wainga ari muphorofita asi isusu atiripi aphorofita. Kunyazi zvakadaro, takashinga kurumbwa teciparidzira masoko akasiya Djehovha mu Bhaibheri dakara ayena azobhuya kuti tisiye kuparidzira. Nguwa ye kutonga ikaguma, anhu e mundima medu aazobhuyi kuti awona aazi kuparidzirhwa kana kuti Mwari waakanganwa. (Ezek. 3:19; 18:23) Kunyazi zvakadaro, awona acaziya kuti masoko ataiparidza aibuda kuna Mwari.

19. Cinyi cicatibetsera kuti tikwanise kuita basa redu re kuparidzira?

¹⁹ Cinyi cicatipasa simba kuti tikwanise kuita basa redu re kuparidzira? Zviro zvimwezvo zvitatu zvakabambisa Ezekiyeri. Isusu tinoparidzira ngekuti tinorugondo rekuti takatumwa ndi Djehovha, tinobambiswa no mwiya mucena wa Mwari, uye tinodzirhyisa nge Soko ra Mwari. No rubetso ra Djehovha, tino simba rekuti tirumbwe teciita basa redu re kuparidzira uye kushingirira “dakara ku mugumo.”—Mat. 24:13.