Djehovha Anotibetsera Kudini kuti Tishingirire Zvinetso no Mupfaro

1-2. (a) Mibvunzo dzipi dzaticadaira? (b) Cinyi cinopangidza kuti Djehovha anoda kutibetsera?

DJEHOVHA angatibetsera kukunda zvinetso zvatinosongana nazvo mu upenyu wedu uye togara ne mupfaro patinomuseenzera. Djehovha anozviita kudini? Uye tinganyasa kukhorovhera kudini rubetso raanotipasa? Fundo ino icatibetsera kuona mhinduro dze mibvunzo idzi. Asi ticatanga ngekudaira mubvunzo uu: Icokwadi kuti Djehovha anodadi kamare kutibetsera here?

² Pa tsamba yake ku Ahebheru, mu phostori Pauro wakaseenzesa masoko anotibetsera kugumira minduro ye mubvunzo uu. Iyena wakatara kuti: “Ngatigare takanyasa kushinga teciti. Munhu angandiitei?” (Aheb. 13:6) Mabhuku amweni e Bhaibheri anobhuya kuti soko rekuti “mubetseri,” zvezvirokwazvo rinobhuya ngezve munhu unogogoma kuti abetsere munhu anoda rubetso. Cimborangarirai Djehovha ecigogoma kuti aponese munhu ari pangozi, zvezvirokwazvo masoko aya akasisira kuna Djehovha. Iyena anoda maningi kugara mubetseri wedu. No rubetso rake, isusu tingakwanisa kukunda muedzo upi hawo no mupfaro.

3. Djehovha anoseenzesa makwanza api matatu kuti atibetsere kukunda zvinetso zvedu nemupfaro?

³ Djehovha anotibetsera kudini kurhwisa zvinetso nomupfaro? Kuti tidaire mubvunzo uu, ngatifunde matii manganani e bhuku ra Isaya. Ngei? Ngekuti uphorofita wakawanda wakafemerhwa Isaya kuti atare unoseenzawo katiri nyamasi uno. Kusiya izvona, Isaya wakareketa ngezva Djehovha nge mushobo uri nyore kuzwisisa. Nge muezaniso, onai kapituro 30 ye bhuku ra Isaiya. Imona, Isaya anoseenzesa miezaniso yakawanda inotibetsera kuona kuti Djehovha anoriritira kudini anhu ake. Ayena anoita izvona (1) nge kuzwa uye kudaira minamato yedu, (2) nge kutipasa nhungamiriro uye (3) nge kutikomborera nyamasi uye mune ramangwana. Zvino ngatitange kufunda makwanza matatu aya anoseenzeswa na Djehovha kuti atibetsere.

DJEHOVHA ANOTIPURUTANA

4. (a) Djehovha akadainza kudini Adjudha e mu nguwa ya Isaya uye Djehovha akatendera kuti cinyi ciitike kaari? (b) Djehovha akapasa kariro ipi ku Adjudha akagondeka? (Isaya 30:18, 19)

⁴ Pakutanga pe bhuku ra Isaya kapituro 30, Djehovha anoreketa ngezve Adjudha hinga “ana asikazwi,” aiita “zvitema zvakawanda.” Uye Djehovha akatobhuya kuti: “I dzinza re apanduki, . . . asikadi kuzwa mutemo wa Djehovha.” (Isa. 30:1, 9) Isaya wakaphorofita kuti Djehovha aizotendera kuti anhu ake aphanicwe ngekuti aazi kuda kuzwa masoko. (Isa. 30:5, 17; Djer. 25:8-11) Uye ndizvo kamare zvakaitika, anhu akatorhwa hinga asungwa kuti aende ku Bhabhironi. Asi Adjudha amweni ainga akagondeka kuna Djehovha uye Isaya wainga ano masoko e kariro kaari, iyena akaabvunza kuti Djehovha aizoita kuti ahwirire ku Djerusarema. (Erengai Isaya 30:18, 19.) Hino izvi zvakaitikadi kamare. Cipikirhwa ici cakaitika paakasudzunura anhu ake ku Bhabhironi. Asi izvi azvizi kuitika ciriporipoco. Soko rekuti “Djehovha anoetsera no mwoyo unonoka kutsamwa kuti aaitire nyasha,” raipangidza kuti Djehovha aizosudzunura anhu ake mumasure me makore akawanda. Aisraeri akagara makore anokwana 70 ku Bhabhironi amweni asati atenderhwa kuwhirira ku Djerusarema. (Isa. 10:21; Djer. 29:10) Kucema kaakaita ku Bhabhironi nge kutsukwara, parizvino aizocema nge mupfaro.

5. Isaya 30:19 inotigondesei?

⁵ Isusu tingabambiswa maningi no masoko ari mu bhuku ra Isaya e kuti: “Kana mukadeketera mecikumbira rubetso ayena zvezvirokwazvo anomupangidzirai nyasha.” (Isa. 30:19) Isaya anotigondesa kuti Djehovha anonyasa kutipurutana patinomukumbira rubetso uye anodaira nokukasika minamato yedu. Uye Isaya wakatunhudzira eciti: “Ayena anodaira paanotozwa kudeketera kenyu.” Masoko aya anonyaradza anotiedzurira kuti Baba edu akagadzirira—uye ano cido—cokubetsera aya anokhwedera dhuze naye. Kuziya izvi, zvinotibetsera kushingirira nemupfaro.

6. Masoko a Isaya anopangidza kudini kuti Djehovha anozwa munamato we umwe na umwe we aseenzi ake?

⁶ Tsamba ya Isaya 30:19 inotigondesazve cinyi ngezve minamato yedu? Djehovha anonyasa kupurutana munamato we umwe na umwe wedu. Ngei tingabhuya kudaro? Mavhersikuro e kutanga e bhuku ra Isaya kapituro 30, Djehovha anobhuya ngezve anhu ake eciseenzesa soko rekuti “imwimwi” kana kuti ecibhuya ngezvawo hinga cikwata. Asi pa vhersikuro 19 Djehovha anoseenzesa soko rekuti “iwewe,” ngekuti ayena anoda kugumisa masoko ake ku umwe na umwe we aseenzi ake, umwe na umwe pacake. Isaya wakatara kuti: “Iwewe auzocemi”; “kana iwewe ukadeketera wecikumbira rubetso”; “Ayena acakuzwira nyasha uye acakudaira.” Hinga Baba ane rudo, Djehovha aazobvunzi mwana wawo kuti: “Unodikana kubamba hinga hama yako,” kusiya izvona ayena anonetseka ngezve umwe na umwe wedu uye anozwa minamato ye umwe na umwe wedu.—Pis. 116:1; Isa. 57:15.

7. Isaya na Djesu akapangidza kudini kuti zvinokosha kurumbwa teciita munamato?

⁷ Patinoita munamato kuna Djehovha ngezve zviya zvinotinetsa, pamweni ciro cokutanga catinopaswa na Djehovha i simba kuti tikwanise kurhwisa zviya zvatiri kusongana nazvo asi kana cinetso icona cikarumbwa ciripo pamweni tinodikana kurumbwa tecikumbira simba ra Mwari nguwa dzese kuti tirumbwe tecishingirira zvinetso izvona. Kureketa zvezvirokwazvo Djehovha anoda kuti tiite izvona, masoko a Isaya ndizvo zvaanobhuya. Iyena akatara kuti: “Musazorodze Djehovha.” (Isa. 62:7) Izvi zvinoda kureyei? Isusu tinodikana kurumbwa teciita minamato kuita hingana tisikapasi Djehovha mukana wekuzorora. Masoko a Isaya anotiedzurira zvakabhuya Djesu ngezve munamato uri pana Ruka 11:8-10, 13. Ipona Djesu akatikohomedzesa kuti “Tirumbwe teciita munamato uye tisikathyi” uye “kurumbwa tecikumbira” mwiya mucena. Isusu tingadeketerawo kuna Djehovha tecikumbira uzii kuti tikwanise kuita zvisananguro zvakanaka.

DJEHOVHA ANOTIPASA NHUNGAMIRIRO

8. Masoko a Isaya 30:20, 21 akadzadzika kudini?

⁸ Erengai Isaya 30:20, 21. Masurudado e Bhabhironi paakaunganira thaundi re Djerusarema ke gore rimwe ne hafu, matambudziko uye zvinetso zvakatanga kugara zviro zve zuwa ne zuwa ku anhu. Asi maererano no maversikuro 20 na 21, Djehovha akapikira kuti kana Adjudha akacinyuka uye ocinja maitiro awo, ayena aizoaponesa. Isaya akadainza Djehovha kuti ndi “Mufundisi Mukuru,” izvi zvakadzadzika Adjudha paakabuda mu Bhabhironi. Zvezvirokwazvo Djehovha akagara Mufundisi Mukuru ku Adjudha eciteerera nhungamiriro dza Djehovha kaari kuti akwanise kuhwirinza kunamata kakacena. Uyewo nyamasi uno takakomborerhwawo nge kugara no Mufundisi Mukuru, Djehovha.

9. Mishobo dzipi dzinganani dzinoseenzeswa na Djehovha mazuwa ano kuti atitungamirire?

⁹ Pana Isaya 30:20, 21, Isaya unotiezanisa ne afundi anofundiswa na Djehovha Mwari uye ayena anotifundisa nge mishobo miiri. Isaya unotibvunza kuti mushobo wokutanga ndi uu: “Imwimwi mucaona Mufundisi Mukuru no madziso enyu kamare.” Mu muezaniso uu, zvinoita hinga kuti ndimufundisi uri pamberi pe afundi ake. Isusu takaita hingana afundi aya uye tinomakomborero akakura ekufundiswa na Djehovha. Ayena anotifundisa kudini? Djehovha anoita izvona eciseenzesa sangano rake. Isusu tinotenda maningi nge kupaswa nhungamiriro dzakadjeka dzecibva kusangano ra Djehovha! Nhungamiriro dzese dzatinopaswa pa misangano ye ungano, mu magungano, mu mabhuku edu, mu jw broadcasting uye nge mishobo imweni yakawanda, dzingatibetsera kuti tishingirire miedzo ipi hayo yatingasongana nayo ne mupfaro.

10. Tinozwa “Soko ra Mwari sure kedu“ nge mushobo upi?

¹⁰ Isaya unobhuya mushobo wecipiri unotifundisa Djehovha, iyena wakati: “Nzee dzako dzicazwa izwi sure kako.” Apa Isaya unopanganidza Djehovha hinga mufundisi akangwarira, ecihamba sure ke afundi ake ecipangidzira mberi eciabvunza kuti igwanza ripi ratinodikana kuteera. Nyamasi uno, isusu tinozwa izwi ra Mwari sure kedu. Nge mushobo upi? Masoko akafemerhwa a Mwari akatarhwa mu Bhaibheri mu makore akawanda adarika. Hino patinoerenga Bhaibheri tinoita hinga tiri kuzwa soko ra Mwari sure kedu.—Isa. 51:4.

11. Tinodikana kuitei kuti tishingirire no mupfaro, uye ngei?

¹¹ Tingabetsereka kudini no nhungamiriro dza Djehovha dzaanotipasa eciseenzesa sangano rake uye Bhaibheri? Makwanisa kuona here kuti Isaya wabhuya ngezve zviro zviiri. Cekutanga “iri ndiro gwanza.” Cecipiri, “hambai naro.” (Isa. 30:21) Hino azvikwani basi kuziya “gwanza.” Asi tinodikana “kuhamba naro.” Teciseenzesa Soko ra Mwari uye nozvatinofundiswa no sangano rake, isusu tinofundira kuita zviro zvinoda Djehovha katiri. Djehovha anotifundisawo kuti tiseenzese zviya zvatafunda. Kuti tishingirire ne mupfaro pa basa ratinoitira Djehovha, tinodikana kuziya kuti gwanza ndiripi uye tohamba naro. Nge kudaro, tinogara norugondo rekuti Djehovha acatibetsera.

TINOKOMBORERHWA NA DJEHOVHA

12. Maererano na Isaya 30:23-26, Djehovha aizokomborera kudini anhu ake?

¹² Erengai Isaya 30:23-26. Uphorofita uu wakadzadzika kudini no Adjudha akahwirira ku Israeri mu masure mekusungwa makore akawanda ku Bhabhironi? Awona akatambira makomborero akawanda—ekunyama kutobatanidzawo eku mwiya. Makomborero a Djehovha akaita kuti anhu agare no zvokurhya zvakawanda. Asi zvinokosha kupinda zvese, Djehovha akakomborera anhu ake no zviro zvakawanda zve kumwiya zvakatendera kuti ahwirirezve kunamata Mwari nge mushobo wakanaka. Anhu a Mwari e mu nguwa iyona, akakomborerhwa na Mwari nge mushobo waainga asati akamboita, makomborero akapaswa anhu a Mwari pa nguwa iyona, akapindiridza zvese zvaainga akamboona mukutanga. Vhersikuro 26 inopangidza kuti Djehovha akatunhudzirazve maningi ciedza cokumwiya, ecibetsera anhu ake kuti anyase kuzwisisa Soko rake. (Isa. 60:2) Makomborero a Djehovha akabetsera anhu ake kuti arumbwe ecimuseenzera no mupfaro uye ecishingaira “nge ndaa yekugara no mwoyo wakanaka.”—Isa. 65:14.

13. Uphorofita unoreketa ngezve kuhwirinza kunamata kakacena uri kudzadzika kudini mazuwa ano?

¹³ Kodi uphorofita unoreketa ngezve kuhwirinza kunamata kakacena uciri kuseenza nyamasi uno katiri? Zvezvirokwazvo, honde! Asi nge mushobo upi? Kubvira muna 1919 K.A., mamiriyonji e anhu akasiya kugara asungwa e Bhabhironi guru. Awona akaendeswa ku mbuto yakanaka maningi kudarika mu Nyika Yakapikirhwa ku Aisraeri ekare uye awona akaendeswa ku paraizo ye kumwiya. (Isa. 51:3; 66:8) Cinyi cinozwi paraizo ye kumwiya?

14. Cinyi cinozwi paraizo ye kumwiya uye ndiani uri kuraramemo mazuwa ano? (Onai pakazwi Nyasai Kuzwisisa.)

¹⁴ Kubvira muna 1919 K.A., Akristu akadzodzwa arikurarama mu paraizo ye kumwiya.b Nokuhamba ke nguwa, aya ano kariro ye kurarama pasi pano anozwi “mabira amweni,” akatangawo kugara mu paraizo ye kumwiya uye ecitambira makomborero akawanda maningi a Djehovha.—Juau 10:16; Isa. 25:6; 65:13.

15. Paraizo ye kumwiya inoonekepi?

¹⁵ Tinoigumira kupi paraizo ye kumwiya mazuwa ano? Anhu a Djehovha anooneka mu nyika yese. Ndiyo ndaa, tingabhuya kuti paraizo ye kumwiya inooneka mu nyika yese. Azvinei kuti tinogara kupi tingakwanisa kugara mu paraizo ii ye kumwiya kana tikatsigira no mwoyo wese kunamata kakacena.

16. Tinodikana kuitei kuti tikwanise kuona kurungama ke paraizo ye kumwiya?

¹⁶ Kuti tirumbwe tiri mu paraizo ye kumwiya, tinodikana nge mushobo umweni kukoshesa hama dzedu dzese. Tingazviita kudini? Isusu tinoita izvona nge kukanda ndangariro dzedu pa zviro zvakanaka zvaanoita haiwa pakusakwana ke aya anogarawo mu paraizo ye kumwiya. (Juau 17:20, 21) Ngei izvona zvecikosha? Rangarirai ngezve muezaniso unoteera. Patinoenda koovhakacira parki yakarungama maningi, isusu tinoetsera kuona miti yakawanda yakasiyana-siyana. Nge mushobo umwewo, nyamasi uno mu ungano isusu tinogumira hama no hanzvadzi dzakasiyana-siyana hingana miti. (Isa. 44:4; 61:3) Isusu tinodikana kukanda ndangariro dzedu pakurungama ke “parki” haiwa kushata kana kuremara katingagumira ku “miti” dzakasiyana-siyana. Atidikani kutendera kuti kusakwana kedu kana kusakwana ke amweni kukangaidze kurungama ke kubatana ke hama ne hanzvadzi dzedu mu nyika yese.

17. Umwe na umwe wedu ungabetsera kudini kuti ungano irumbwe yakabatana?

¹⁷ Umwe na umwe wedu angabetsera kudini pakubatana uku? Nge kugara murunyararo. (Mat. 5:9; Aro. 12:18) Pese paya patinogara wekutanga pa kuita ciro kuti tirumbwe tino runyararo no hama dzedu, tinonga tecibetsera kurungama ke paraizo ye kumwiya. Tinodikana kuedzurira kuti, Djehovha akadainza umwe na umwe uri mu paraizo ye kumwiya kuti amunamate nge mushobo wakacena. (Juau 6:44) Cimborangarirai kuti Djehovha angapfara kudini paanotiona tecipeta masimba kuti tibambise kubatana kedu uye runyararo ku aseenzi ake—aanoona kuti anokosha maningi kaari!—Isa. 26:3; Ajeu 2:7.

18. Tinodikana kugara tecirangarira nge zvei uye ngei?

¹⁸ Tingakhorovhera kudini makomborero atinopaswa na Djehovha? Isusu tinoita izvona nge kunyasa kurangarira zvatinofunda mu Soko ra Mwari uye mu mabhuku edu. Izvona zvinotibetsera kuti tigare no mawara e Cikristu, anotikohomedzesa kuti tipangidze “rudo ku anhu ese” uye ‘tecizwirana usisi ku umwe na umwe wedu’ mu ungano. (Aro. 12:10) Patinonyasa kurangarira ngezve makomborero atinawo, tinobambisa ushamwari wedu na Djehovha. Patinoima torangarira ngezve makomborero atakapikirhwa na Djehovha aticapaswa mune ramangwana, kariro yekuseenzera Djehovha no kusikaperi, icagara ye zvirokwazvo katiri. Zvese izvi zvicatibetsera kuti tiseenzere Djehovha no mupfaro nyamasi uno.

KUSHINGA KUSHINGIRIRA

19. (a) Maererano na Isaya 30:18, tingagara no rugondo ripi? (b) Cinyi cicatibetsera kuti tishingirire no mupfaro?

¹⁹ Djehovha acagara “ku dii redu” paacaunzisa mugumo we nyika ino yakashata. (Isa. 30:18) Isusu atina mubvunzo kuti Djehovha—“Mwari we unatsi”—aazotenderi kuti nyika ya Sathani irarame kunyazi zuwa rimwe haro. (Isa. 25:9) Isusu tinoetsera no mwoyo unononoka kutsamwa kuti Djehovha aunzise zuwa raticazogara takasudzunuka mu nyika ino. Pa nguwa doko ii, isusu takagadzirira kukoshesa makomborero e munamato, kufunda nokuseenzesa zvatinofunda mu Soko ra Mwari no kunyasa kurangarira makomborero atinawo. Kana tikaita izvona, Djehovha acatibetsera kuti tirumbwe tecishingirira no mupfaro pakumunamata katinomuita.