Musatendere Kuparadzaniswa na Djehovha

1. Tinozviziya kudini kuti Djehovha anoda kuti tikhwedere kaari?

DJEHOVHA anotipika kuti tikhwedere kaari. (Tig. 4:8) Ayena anoda kugara Mwari wedu, Baba edu, uye Shamwari yedu. Djehovha anodaira minamato yedu uye anoda kutibetsera pamigariro inoshupha. Ayena anoseenzesa sangano rake, kuti ritifundise uye ritidziirire. Asi isusu tinodikana kuitei pacedu kuti tikhwedere kuna Djehovha?

2. Tingakhwedera kudini kuna Djehovha?

² Tingakhwedera kuna Djehovha nge kunamata kaari, kuerenga Bhaibheri uye kunyasa kurangarira. Izvi zvicatunhudzira rudo redu uye kutenda kedu kaari. Mugumisiro wakhona, ngewekuti ticagara no cido cekupasa Djehovha zvaakasisira, kumuzwira kedu no kumunamata kedu. (Zvak. 4:11) Patinonyasa kuziya Djehovha tinonyanya kugonda ayena uye no sangano rake raanoseenzesa kuti atibetsere.

3. (a) Zvinyi zvinoizwa na Sathani kuti atiparadzanise na Djehovha? (b) Cinyi cicatibetsera kuti tisambosiye Djehovha uye sangano rake? (Pisarema 31:13, 14)

³ Dhiyabhorosi unoedza kutiparadzanisa na Djehovha, maka-maka patinonga tecisongana no zvinetso. Asi iyena unozviita kudini? Iyena unoedza padoko no padoko kurembesa rugondo redu kuna Djehovha uye no sangano rake. Asi isusu atidikani kuwira pamurau iwona. Kana kutenda kedu uye rugondo redu kuna Djehovha zvakabamba, apana unotiparadzanisa na Djehovha uye no sangano rake.—Erengai Pisarema 31:13, 14.

4. Ticaonei mu fundo ino?

⁴ Mu fundo ino, ticaona zvinetso zvitatu zvinobva kunza ke ungano, zvingarembesa rugondo redu kuna Djehovha uye no sangano rake. Zvinetso izvona, zvingatiparadzanisa kudini na Djehovha? Uye cinyi catingaita kuti tisawire pamirau ii ya Sathani?

PATINOSONGANA NO ZVINETSO

5. Zvinetso zvingarembesa kudini rugondo renyu kuna Djehovha uye no sangano rake?

⁵ Pamweni paya, tese isusu ticasongana no zvinetso—zvakadai hinga kuphikiswa no anyaukama kana kuti kupererhwa no basa. Zvinetso izvi zvingarembesa rugondo redu mu sangano ra Djehovha, uye zvotiparadzanisa na Djehovha. Zvingaitika kudini? Kana cinetso cikatora nguwa yakareba, isusu tingazwa hingana kuti tasiiwa uye toora Mwoyo. Sathani unokhorovera migariro hingana ii kuti titange kutama kugonda rudo ra Djehovha katiri. Iyena unoda kuti titange kudzibvunzisa kuti Djehovha anondidadi kamare kana kuti Djehovha no sangano rake ndiwo ari kukonzera zvinetso zvedu here? Zviro hingana izvi, zvakaitikawo ku Aisraeri ku Edjipitu. Pakutanga, awona aitendera kuti Djehovha akasanangura Mozesi na Aroni kuti aasudzunure mu utaphwa ku Edjipitu. (Eki. 4:29-31) Asi no kuhamba ke nguwa Farao paakatanga kutunhudzira zvinetso zvawo, awona akatanga kupasa ndaa Mozesi na Aroni, awona akati: “Maita kuti Farawo no aseenzi ake atizonde uye makanda supada mu nyara dzawo kuti atiuraye.” (Eki. 5:19-21) Awona akapasa ndaa aseenzi akagondeka a Mwari. Izvi zvainga zvisina musoro! Kana maakusongana no zvinetso ke nguwa yakareba, cinyi cingamubetserai kuti murumbwe mecigonda Djehovha uye no sangano rake?

6. Tingafundei no muphorofita Abhakuki? (Abhakuki 3:17-19)

⁶ Namatai kuna Djehovha no mwoyo wese uye kumbirai Rubetso rake. Muphorofita Abhakuki wakasongana no zvinetso zvakawanda. Zvese zvinopangidza kuti iyena wakazoguma pakukana-kana kuti Djehovha waimudadi here. Iyena wakafungura mwoyo wake kuna Djehovha uye akamubvunza mazwire ake ese. Abhakuki wakati: “Dakara riini Djehovha ndecideketera ndecikumbira rubetso imwimwi musikandizwi? . . . Ngei mecitendera kuti kudzvinyirirhwa kuoneke?” (Abha. 1:2, 3) Djehovha akadaira munamato uu wa Abhakuki waibva pasi pe mwoyo. (Abha. 2:2, 3) Abhakuki wakatanga kurangarira zvese zvakaizwa na Djehovha ku anhu ake, izvi zvakaita kuti atangezve kugara no mupfaro. Abhakuki wakaona pamhene kuti Djehovha waimurangarira uye waizomubetsera pazvinetso zvipi hazvo. (Erengai Abhakuki 3:17-19.) Tingafundei? Kana mukasongana no zvinetso, namatai kuna Djehovha mecimubvunza mazwiro enyu ese uye mukumbirei rubetso. Imwimwi mungagara no rugondo rekuti Djehovha acarumbwa ecimupasai simba kuti mukwanise kushingirira. Kana mukazwa kuti Djehovha ari ku dii renyu, kutenda kenyu kucanyasa kubamba.

7. Umwe we anyaukama a Shirley akaedza kuitei? Asi iyena wakaitei?

⁷ Garai ne urongwa wakanaka pane cekuita ne zviro zve kunamata. Shirley hanzvadzi ye ku Papua Nova Guiné, yakasongana no zvinetso zvakawanda.b Mhuri yawo yainga arombo, uye pamweni paya zvaitoshupha kuona zvekurhya. Umwe we anyaukama awo akaedza kuita kuti Shirley asiye kugonda Djehovha. Iyena wakati: “Iwewe unoreketa kuti mwiya mucena uri kukubetsera, asi rubetso rakhona riripi? Imwimwi muciri arombo uye iwewe uri kupedza nguwa weciparidzira.” Shirley wakabhuya kuti, ndakazoguma pa kudzibvunzisa kuti: ‘Djehovha anotidadi kamare inini ne mhuri yangu here?’ Hino ndakanamata kuna Djehovha uye ndakamubvunza zvese zvandairangarira. Ndakarumbwa ndecierenga Bhaibheri ne mabhuku o sangano redu, uyewo ndaiparidzira no kupinda misangano. Shirley wakatanga kuona kuti Djehovha airiritira mhuri yake, awona aazi kumbotama cekurhya uye aipfara. Iyena wakapanganidza eciti: “Ndakazwa kuti Djehovha aidaira minamato yangu.” (1 Ti. 6:6-8) Kana imwimwi mukarumbwa muno urongwa wakanaka pane cekuita ne zvekunamata zvinetso kana kuti mibvunzo azvizomuparadzanisii na Djehovha.

KANA HAMA DZINOTUNGAMIRIRA DZIKATEERERHWA

8. Cinyi cingaitika no hama dzirikutungamirira sangano ra Djehovha?

⁸ Eciseenzesa interneti ne maredhi sosiari, azondi edu anobararisa manyepo ne masoko asiripi e zvirokwazvo, nge zve hama dzinotungamirira sangano ra Djehovha. (Pis. 31:13) Hama dzimweni dzakasungwa uye dzakanyeperhwa kuti adzizwiri mutemo. Asi izvi azvitishamisi, Akristu e mu nguwa ye kare akasonganawo no mugariro uu muphostori Pauro paakasungwa okandwa mukaraboso asina ndaa. Awona akarhwisana kudini no mugariro uu?

9. Akristu amweni akaitei muphostori Pauro paakasungwa?

⁹ Muphostori Pauro paakasungwa ku Roma, Akristu amweni akasiya kumutsigira. (2 Ti. 1:8, 15) Ngei? Awona akatanga kupvseruka ngekuti Pauro waoniwa hinga munhu asikazwiri mutemo here? (2 Ti. 2:8, 9) Kana kuti awona akathya kuzoteererhwawo? Pasinei ne zvikonzero zvipi hazvo, rangarirai kuti Pauro wakazwa kudini. Iyena wakasongana no zvinetso zvakawanda, iyena wainga wakatombokanda upenyu wake pangozi nge ndaa ye hama dziya. (Zvii. 20:18-21; 2 Ako. 1:8) Zvezvirokwazvo atidi kuita hingana hama dziya dzakasiya Pauro pa nguwa yaaida rubetso kamare. Tinodikana kuedzurirei kana hama dzinotungamirira dzikateererhwa?

10. Tinodikana kuedzurirei kana hama dzinotungamirira sangano ra Djehovha dzikateererhwa uye ngei?

¹⁰ Edzurirai kuti ngei tinoteererhwa uye kuti ndiyani uri kukonzera izvona. Bhaibheri rinobhuya pana 2 Timoti 3:12 reciti: “Ese anoda kurarama ecidzipira kuna Mwari muna Kristu Djesu acatambudzwawo.” Hino azvishamisi kuona Sathani eciteerera aya ano ubaba mu sangano ra Djehovha. Cinangwa cake ngece kuita kuti hama idzi dzisiye kugondeka kuna Djehovha, kusiya izvona iyena unoda kuti tithye uye tiore mwoyo.—1 Ped. 5:8.

11. Tingafundei no muezaniso wa Oneziforo? (2 Timoti 1:16-18)

¹¹ Rumbwai makagondeka uye mecibetsera hama dzenyu. (Erengai 2 Timoti 1:16-18.) Munguwa yekare, Mukristu umweni waizwi Oneziforo aazi kuita hingana hama dziya dzainga dzasiya kutsigira Pauro. Iyena aazi kupsveruka ngekuti Pauro ainga ari mukaraboso. ‘Oneziforo wakapsvaka Pauro uye wakaedza kumupasa rubetso rese raaida.’ Ngekuita izvi, Oneziforo wakakanda upenyu wake pa ngozi. Tingafundei no muezaniso uu? Atidikani kusiya kuti kuthya kutinyise uye toguma pakusiya kutsigira hama dzedu, pane kudaro tinodikana kudzidziirira uye todzibetsera pa zviro zvadzinoda. (Zvie. 17:17) Idzona dzinoda maningi rudo redu no rubetso.

12. Tinofundei no muezaniso we hama ne hanzvadzi dze ku Rusiya?

¹² Onai muezaniso we hama dzedu dzinogara ku Rusiya, idzona adzimbosii kubetsera hama no hanzvadzi dzedu dziri mu karaboso. Kana imwe ye hama dzedu ikatorhwa kuti iende kootongwa ku tribhunari, hama no hanzvadzi dzedu dzinoendawo kootsigira hameyo. Tinofundei? Kana hama dzinotungamirira dzikashorhwa, kusungwa kana kuteererhwa musathye, namatai nge zvadzo uye betserai pa kutsigira mhuri dzawo. Uye rangarirai mishobo imweni yamungaita kuti mubetsere.—Zvii. 12:5; 2 Ako. 1:10, 11.

PATINOSHEERERWHA

13. Kusheererhwa kungarembesa kudini rugondo redu kuna Djehovha uye no sangano rake?

¹³ Anyaukama edu, adoni edu e kubasa no adoni edu e ku cikora, angatisheerera ngekuti tinoparidzira uye tinorarama maererano no mitemo ya Djehovha. (1 Ped. 4:4) Pamweni awona angabhuya kuti: “Inini ndinokuda, asi cinoshupha i gereja rakoro, arisii kuti iwewe uite ciro uye iwewe apatona caunoita.” Zvinoshorhwa no anhu akawanda i nyaya ye kudzingwa, awona anoti: Imwimwi munoparidza ngezve rudo, asi onai mushobo wa munobata munhu wakadzingwa? Nyaya hingana idzi, dzingaita kuti titange kukanakana. Tingatanga kudzibvundzisa kuti: Djehovha aaripi kunyanyisawo here pa zviro zvaanotikumbira? Sangano ra Djehovha rainga risikadikani kutenderawo zviro zvimweni here? Kana imwimwi muri kusongana no migariro yakaita hingana ii, mungaita kudini kuti murumbwe muri dhuze na Djehovha uye no sangano rake?

14. Tinodikana kuitei kana amweni akatishora ngekuti tinorarama maererano no mitemo ya Djehovha? (Pisarema 119:50-52)

¹⁴ Garai makagadzirira kuita zvinobhuyiwa na Djehovha kuti zvakanaka. Djobo wakateerera nhungamiriro dza Djehovha kunyazi paaishorhwa nge ndaa yazvo. Umwe we ashamwari dze kunyepa dza Djobo wakaedza kuita kuti iyena atendere manyepo, iyena wakabhuya kuti kuna Mwari zvainga zvisina basa kuti Djobo waiita zvakanaka kana zvakashata. (Djobo 4:17, 18; 22:3) Asi Djobo aazi kutendera manyepo aya. Djobo waizviziya kuti mitemo ya Djehovha yakanaka nguwa dzese uye iyena wainga akagadzirira kurarama maererano no mitemo iyona. Iyena aazi kusiya kuti ciro cipi haco kana kuti munhu upi hake acinje marangariro ake. (Djobo 27:5, 6) Tinofundei? Musasiye kuti kushorhwa kamunoizwa nge anhu kurembese rugondo renyu kuna Djehovha. Cimborangarirai zvese zvamakasongana nazvo mu upenyu. Imwimwi makaona kuti mitemo ya Djehovha ino cinangwa cakanaka, uye kuiteerera kakatinakira. Hino, garai makagadzirira kutsigira sangano rinoteerera nhungamiriro idzi. Ngekudaro, azvinei kuti anhu angana anotishora isusu atisii kuita ciro cipi haco kana kuti munhu upi hake atiparadzanise na Djehovha.—Erengai Pisarema 119:50-52.

15. Ngei Brizit wakasongana no kushorhwa?

¹⁵ Onai zvakaitika na Brizit hanzvadzi inogara ku Índia, yakasongana no kushorhwa mu mhuri. Mumasure me kubhabhatidzwa mu gore ra 1997, mwamuna wayo wainga asiripi Mupupuri wa Djehovha wakapererhwa no basa. Nge ndaa yazvo, awona akafuruka oenda ko rarama ku guta rimweni no abereki e mwamunewo. Kweneyo Brizit wakasongana no zvinetso zvakakura maningi. Nge muezaniso, ngekuti mwamuna wake wainga asikacasenzi, iyena waidikana kusenza zuwa rese kuti ariritire mhuri. Kusiya izvona, Nyumba ye Umambo yainga iri padhuze naye yaigara pano makirometru anokwana 350. Zvinotsukwarisa kuti anyaukama e mwamuna wake akatanga kumuphikisa maningi nge ndaa ye zvitenderhwa zvake. Zviro zvakatonyanya kushata zvekuti awona akafurukazve. Pedzepo, pa nguwa yaainga asikakariri mwamuna wake wakafa, uye mumasure mecinguwa, mwana wake wainga ano makore 12 basi wakafawo ngo kanser. Kusiya izvona anyaukama a Brizit akabhuya kuti kudai iyena asikazi kugara Mupupuri wa Djehovha, zvese izvi zvingadai zvisikazi kuitika, kana kuti iyena ndiye ainga ano ndaa pa matambudziko ese aakasongana nawo. Kunyazi zvakadaro, Brizit wakarumbwa ecigonda na Djehovha, uye aazi kugara kure no sangano rake.

16. Brizit wakakomborerhwa kudini nge kurumbwa akagondeka kuna Djehovha pamwepo no sangano rake?

¹⁶ Ngekuti Brizit waigara kure no ungano, muonereri we nharaunda wakamukohomedzesa kuti iyena aparidzire kaaigara uye kuti aitire misangano panyumba pake kamare. Pakutanga iyena wakaona kuti zvaizoshupha maningi asi kunyazi zvakadaro iyena wakateerera zanoro. Brizit waiparidzira, waipinda misangano panyumba pake kamare uye waiita kunamata ke mhuri masumana ari ese no ana ake e asikana. Mugumisiro wakhona ngaupi? Iyena wakakwanisa kuita fundo dzakawanda dze Bhaibheri, uye afundi ake akawanda akabhabhatidzwa. Mu gore ra 2005, iyena wakatanga kuseenza hinga piyonera. Rugondo ra Brizit kuna Djehovha uye kugondeka kake ku sangano ra Djehovha zvakakomborerhwa. Ana ake e asikana ari kuseenzera Djehovha akagondeka, uye kaano ungano mbiri kumbuto yaaiparidzira! Brizit unotendera kuti Djehovha akamupasa simba raaida kuti akwanise kushingirira kunyazi ecishorhwa no anyaukama.

RUMBWAI MAKAGONDEKA KUNA DJEHOVHA UYE NO SANGANO RAKE

17. Tinodikana kugara takagadzirira kuitei?

¹⁷ Sathani unoda kuti isusu titendere kuti Djehovha anotisiya patinosongana no zvinetso mu upenyu, uye kuti kurumbwa takagondeka kuna Djehovha zvicaita kuti zvinyanye kushupha. Iyena unoedza kuita kuti tithye kana hama dzinotungamirira dzikatukwa, kuteererhwa, kana kusungwa. Uye eciseenzesa kushorhwa, Sathani unoda kurembesa rugondo redu ku mutemo ya Djehovha no sangano rake. Asi isusu tinonyasa kuziya mirau ya Sathani uye aticengedzerhwi. (2 Ako. 2:11) Garai makagadzirira kuramba manyepo a Sathani uye kurumbwa makagondeka kuna Djehovha pamwepo no sangano rake. Edzurirai kuti Djehovha aazombomusii. (Pis. 28:7) Hino musasiye kuti ciro cipi haco kana kuti munhu upi hake amuparadzanisei na Djehovha!—Aro. 8:35-39.

18. Ticaonei mu fundo inoteera?

¹⁸ Mu fundo ino, taona zvinetso zvatingasongana nazvo zvinobva kunza ke ungano. Asi rugondo redu kuna Djehovha no sangano rake zvingaedzwawo no zviro zvinobva mukati me ungano. Tingarhwisana kudini no zvinetso izvona. Ticazviona mu fundo inoteera.