“Murazvi wa Djah” Ngaurumbwe Wakabaka

1. Bhaibheri rinobhuya kudini ngezve rudo re zvirokwazvo?

BHAIBHERI rinoreketa ngezve rudo re zvirokwazvo nge mushobo wakarungama maningi! Irona rinoti: “Murazvi wakhona wakaita hingana muriro urikubaka, murazvi wa Djah. Mvura ino simba aikwanisi kudzimisa rudo, uyezve murambo aukwanisi kurieredza.”b (Ngo. 8:6, 7) Masoko aya anopasa rugondo rakanaka ku anhu akacata rekuti: Imwimwi mungakwanisa kugara no rudo re zvirokwazvo.

2. Kazado inodikana kuitei kuti rudo rawo risatonhore?

² Rudo re zvirokwazvo uye rinogara nokusikaperi pakati pe mwamuna no mukadzi rinooneka kana ese akapeta masimba. Ngo muezaniso, cimborangarirai ngezve muriro. Uwona ungarumbwa wakabaka nokusikaperi, asi imwimwi munodikana kurumbwa mecitunhudzira huni. Kana mukatama kungwarira, uwona ungadzima. Ngo mushobo umwewo, rudo riri pakati pe mwamuna no mukadzi ringakwanisa kurumbwa rakabamba nokusikaperi, asi kuti izvona zviitike, awona anodikana kurumbwa ecipeta masimba kuti rudo irona rirumbwe rakabamba. Pamweni paya makazado angakwanisa kuzwa kuti rudo rawo riri kutonhora, maka-maka paya paanonga ecisongana no zvinetso zve mare, zve uthongo kana kuti zvinetso zvekurera ana. Hino kana imwimwi makacata, mungakwanisa here kuita kuti “murazvi c wa Djah” urumbwe wakabaka mu mucato wenyu? Mu fundo ino ticaona zviro zvitatu zvamungaita kuti murumbwe mecibambisa mucato wenyu uye mecipfara.d

RUMBWAI MECIBAMBISA USHAMWARI WENYU NA DJEHOVHA

3. Ushamwari wakabamba na Djehovha unotunhudzira kudini rudo re akawakana? (Muparidzi 4:12) (Onai mufanikiso.)

³ Kuti “murazvi wa Djah” urumbwe wakabaka, mwamuna no mukadzi anodikana kupeta masimba kuti agare no ushamwari wakabamba na Djehovha. Ngei kuita izvona zvakanakira kazadoyo? Kana mwamuna no mukadzi ecikoshesa ushamwari wawo na Djehovha, awona anoseenzesa mazano ake uye izvona zvinoabetsera kuti anzvenge uye arhwisane no zvinetso zvaizoita kuti rudo rawo ritonhore. (Erengai Muparidzi 4:12.) Munhu wakakura pakunamata unopeta masimba kuti ateedzere mawara a Djehovha akadai hingana unaki, mwoyo unononoka kutsamwa uye kurekerera. (Aef. 4:32–5:1) Kana kazado ikapangidza mawara aya, rudo riri pakati pawo ricakura. Hanzvadzi imweni inozwi Lena yakacata ke makore anodarika 25 inoti: “Zviri nyore kuda uye kureremedza munhu wakakura pakunamata.”

4. Ngei Djehovha akasanangura Zuzee na Mariya kuti agare abereki a Mesiya wakapikirhwa?

⁴ Ngatione muezaniso umwe we mu Bhaibheri. Paaida kusanangura abereki a Mesiya wakapikirhwa, Djehovha ainga ano anhu akawanda e kusanangura pakati pe mibarirhwana ya Dhavhidhi, asi Iyena akasanangura Zuzee na Maria. Ngei? Ngekuti awona ari airi ainga ano ushamwari wakabamba na Djehovha, uye Djehovha aizviziya kuti iyena aizogara pa mbuto yekutanga pamucato wawo. Kazado dzingafundei no muezaniso wa Zuzee na Mariya?

5. Amuna angafundei no muezaniso wa Zuzee?

⁵ Zuzee wainga asikanonoki kuteerera nhungamiriro dza Djehovha, uye izvona zvakaita kuti agare mwamuna wakanaka. Pa migariro mitatu yatinoziya, iyena wakatambira nhungamiriro dza Mwari dzinocokuita no mhuri yake. Katatu kese, iyena wakazwira nokukasika, kunyazi izvona zvaireya kuti waidikana kuita cinjo dzakakura. (Mat. 1:20, 24; 2:13-15, 19-21) Ngekuteerera nhungamiriro dza Mwari, Zuzee wakadziirira, wakatsigira uye wakariritira Mariya. Tino rugondo rekuti izvona zvakaita kuti rudo uye rureremedzo raizwa Mariya kuna Zuzee zvitunhudzirike maningi! Amuna, imwimwi mungateedzera muezaniso wa Zuzee ngekupsvaka nhungamiriro dze mu Bhaibheri pese pamunoriritira mhuri yenyu.e Kunyazi zvecidikana kuita cinjo, pamunoteerera mazano ari mu Bhaibheri, imwimwi munonga mecipangidza kuti munoda mukadzi wenyu uye munobambisa mucato wenyu. Hanzvadzi imweni inogara ku Vanuatu yaano makore anodarika 20 yawakwa, inoti: “Mwamuna wangu paanopsvaka uye kuteerera nhungamiriro dza Djehovha, rureremedzo rangu kaari rinorumbwa recitunhudzirika. Inini ndinozwa ndakacengeteka uye ndinogonda zvisananguro zvaanoita.”

6. Akadzi angafundei no muezaniso wa Mariya?

⁶ Mariya wainga ano ushamwari wake kamare na Djehovha. Kutenda kake kainga kusikatsamiri pana Zuzee. Iyena wainyasa kuziya Matarhwa. (Onai masoko e pasi ekufunda ari pana Ruka 1:46.) Iyena waipsvakawo nguwa yekuti anyase kurangarira. (Ruka 2:19, 51) Apana mubvunzo kuti ngekugara munhu wakakura pakunamata, Mariya wainga ari mukadzi wakanaka. Nyamasi uno, akadzi akawanda anopeta masimba kuti ateedzere muezaniso wa Mariya. Ngo muezaniso, hanzvadzi imweni inozwi Emiko inoti: “Pandainga ndisati ndawakwa ndainga ndino urongwa wangu kamare we zviro zvekunamata. Asi pandakacata, mwamuna wangu ndiye waitiitira munamato uye waitungamirira kunamata ke mhuri. Ndakaona kuti ndainga ndaakutanga kuetsera kuti iyena andiitire zvese, asi ndakazoonawo kuti ndini ndaidikana kuriritira ushamwari wangu na Djehovha. Mazuwa ano ndaakupsvaka nguwa yekugara ndiri ndega na Djehovha ndecinamata, kuerenga Bhaibheri uye kunyasa kurangarira nge zvandaerenga.” (Aga. 6:5) Akadzi rumbwai mecipeta masimba kuti mubambise ushamwari wenyu na Djehovha, kana mukadaro, amuna enyu acagara no zvikonzero zvakawanda zvekumusimbai uye kumudai maningi.—Zvie. 31:30.

7. Makazado angafundei kubva kuna Zuzee na Mariya ngezve kunamata ari pamwepo?

⁷ Kuna Zuzee na Mariya, kurumbwa ecibambisa ushamwari wawo na Djehovha rainga riri basa raaidikana kuita pamwepo. Awona aizviziya kuti zvaikosha maningi kunamata Djehovha ari pamwepo hinga mhuri. (Ruka 2:22-24, 41; 4:16) Pamweni ici cainga ciri cinetso maka-maka paakagara no ana akawanda, asi awona akazvikwanisa. Uu muezaniso wakanaka ku makazado e mazuwa ano! Kana imwimwi muno ana hinga Zuzee na Mariya, zvingashupha kuenda ku misangano uye kuona nguwa yekuita kunamata ke mhuri. Pamweni zvingashupha kuona nguwa yekuti mufunde uye kunamata pamwepo hingana kazado basi. Asi musakanganwe kuti pamunonamata Djehovha muri pamwepo, imwimwi munokhwedera dhuze na Djehovha uye ku umwe na umwe wenyu. Hino kandai zviro zvekunamata pa mbuto yekutanga.

8. Cinyi cingabetsera kazado iri kusongana no zvinetso zvekuita kunamata kayo ke mhuri?

⁸ Mungaitei kana imwimwi mecisongana no zvinetso mu mucato wenyu? Pamweni imwimwi amutona cido cekuita kunamata ke mhuri muri pamwepo. Pa mugariro uwona, pamweni zviri nyore kutanga no nyaya dzidoko, nyaya dzekuti mwese munopfarira kufunda ngezvadzo. Kuita izvona, kucabambisa rudo renyu uye kucatunhudzira cido cenyu cekuita zviro zvekunamata pamwepo.

PEDZAI NGUWA MURI MWESE

9. Ngei mwamuna no mukadzi anodikana kupedza nguwa ari ese?

⁹ Makazado, imwimwi mungakwanisa kuita kuti rudo renyu rirumbwe rakabamba ngekupedza nguwa muri mwese. Kuita izvona kucamubetserai kuti musazwe kuti amuziyani, asi mucanyasa kuziya marangariro uye mazwiro e umwe na umwe wenyu. (Gen. 2:24) Onai zvakaonekwa na Lilia uye na Ruslan mumasure mekuti abva kucata mumakore 15 adarika. Lilia unoti: “Tairangarira kuti mumasure mekucata taizopedza nguwa yakawanda tiri tese, asi andizvopi zvakaitika. Nguwa dzese isusu tainga tino zviro zvakawanda zvekuita. Mabasa edu, mabasa e pa nyumba, pedzepo ana. Takaona kuti taidikana kupsvaka mikana yekupedza nguwa tiri pamwepo, kudai tisikazi kudaro, taizopedzesera taparadzana.”

10. Makazado angaseenzesa kudini zviri pana Aefeso 5:15, 16?

¹⁰ Kazado dzinodikana kuitei kuti dzipedze nguwa dziri pamwepo? Pamweni anodikana kupsvaka kana kuronga nguwa yekuti apedze ari ese. (Erengai Aefeso 5:15, 16.) Hama imweni inogara ku Nigéria inozwi Uzondu inoti: “Pandinoita urongwa we zviro zvandinoda kuzoita, ndinorongawo ka nguwa kandinoda kupedza ndino mukadzi wangu, uye izvona ndinozvikanda pa mbuto yekutanga.” (Afi. 1:10) Onai muezaniso wa Anastasia unogara ku Moldávia. Iyena ndi mukadzi we muonereri we nharaunda, uye wakaona mushobo wekuseenzesa zvakanaka nguwa yake. Iyena unoti: “Inini ndinoedza kuita zviro zvangu zvese panguwa yekuti mwamuna wangu wakabatikana no mabasa ake. Ngekudaro paanopedza zvaari kuita tinozoona mukana wekugara tiri tese.” Asi zvakadini kana imwimwi makanyanya kubatika zvekuti zvinoshupha kuona nguwa yekupedza muri mwese?

11. Akira na Prisira aiita ese mabasa api?

¹¹ Amuna no akadzi angafunda zvakawanda no muezaniso wa Akira na Prisira, kazado yaidiwa maningi nge Akristu ekutanga. (Aro. 16:3, 4) Bhaibheri arireketi zvakawanda ngezve mucato wawo, asi rinopangidza kuti awona aiseenza, aiparidzira uye aibetsera amweni. Aona aiita zvese izvi ari pamwepo. (Zvii. 18:2, 3, 24-26) Pese panobhuiwa ngezva Akira na Prisira mu Bhaibheri, irona rinobhuya ngezvawo ari pamwepo.

12. Mwamuna no mukadzi angaitei kuti apedze nguwa yakawanda ari ese? (Onai mufanikiso.)

¹² Makazado angateedzera kudini Akira na Prisira? Rangarirai ngezve mabasa akawanda amunawo ekuita. Zvinoita here kuti muite mabasa awona muri pamwepo hinga mwamuna no mukadzi? Imwimwi munoronga here kubuda pamwepo mu basa re kuparidzira? Akira na Prisira aiitawo mabasa ari pamwepo. Pamweni imwimwi amuseenzi pa basa rimwero, asi zvinoita here kuita mabasa manganani muri pamwepo akadai hingana kupukuta uye kucenesa pa nyumba? (Mup. 4:9) Kana umwe akabetsera mudoni wake mabasa, imwimwi munozwa kuti zvezvirokwazvo muri cikwata uye munoona mikana yakawanda yekucedza. Robert na Linda aano makore 50 aa acata. Robert unoti: “Isusu atina nguwa yekuti tiite zviro tiri pamwepo uye timbotambe. Asi pandinonga ndecisuka maparato, mukadzi wangu unouya koondibetsera uye pandinonga ndeciita mabasa ku jardim iyena unouyawo koondibetsera, uye inini ndinopfara maningi. Kuita zviro tiri pamwepo kunoita kuti tigare takanyasa kubatana. Uye rudo redu rinorumbwa recikura.”

13. Mwamuna no mukadzi anodikana kuitei kuti agare akabatana zvezvirokwazvo?

¹³ Edzurirai kuti kugara muri pamwepo, azvirei kuti makabatana. Mukadzi umweni unogara ku Brasil unoti: “Nyamasi uno kuno zviro zvakawanda zvinotiwaraidza, uye zviri nyore maningi kuwira pa murau wekuti tiri kupedza nguwa tiri tese ngekuti tiri kugara pa nyumba imweyo. Inini ndakafundira kuti kugara tiri tese idii rimwe basi re zviro zvandinodikana kuita, dii rimweni ikupedza nguwa no mwamuna wangu ndecinyasa kumupurutana uye ndecipsvaka kuziya zvaanoda.” Onai zvinoizwa na Bruno no mukadzi wake Tays kuti apedze nguwa ecicedza uye ecipurutana umwe na umwe wawo. Iyena unoti: “Patinoona mukana wekugara tiri tese isusu tinosiya mathurufunu kumuceto uye tonyasa kukhorovhera mukana watinawo we kugara tiri pamwepo.”

14. Kana kazado isikapfariri kupedza nguwa iri yese, zvinyi zvaingaita?

¹⁴ Asi zvakadini kana imwimwi musingapfariri kupedza nguwa muri mwese? Pamweni pamunonga muri mwese, zvinoita nyore kukasika kunyangadzirhwana nge kuti amupfariri zviro zvimwezvo. Hino zvinyi zvamungaita? Rangariraizve ngezve muezaniso we muriro. Muriro aunyasi kubaka ciriporipoco. Zvinodikana kurumbwa mecikhwindidzira murirowo ngekukanda zvihuni zvakati kurei padoko no padoko. Meciteedzera muezaniso uu, zvakadini kutanga ngekupedza nguwa doko muri mwese mazuwa ese? Edzai kuita zviro zvekuti mwese munozvipfarira, uye musaite zviro zvinoita kuti muzopedzesere maakureketedzana. (Tig. 3:18) Mecitanga padoko no padoko, imwimwi mungabatidzazve rudo renyu.

REREMEDZANAI

15. Ngei rureremedzo iciro cinokosha kuti rudo re kazado rirumbwe rakabaka?

¹⁵ Rureremedzo rinokosha maningi mu mucato. Irona ringaezaniswa no oxigênio. Pasina oxigênio muriro unodzima nokukasika. Ngo mushobo umwewo, pasina rureremedzo, rudo riri pakati pe mwamuna no mukadzi ringatonhora nokukasika. Nge dii rimweni, kana mwamuna no mukadzi akapeta masimba kuti apangidzirane rureremedzo, aona acaita kuti rudo rawo rirumbwe recibaka. Pamweni imwimwi mungarangarira kuti muri kupangidza rureremedzo, asi umweni wenyu arikuzwa kuti arikureremedzwa here. Penny no mwamuna wake Aret akawakana ke makore 25. Iyena unoti: “Rureremedzo ratinopangidzirana rinoita kuti e mu mhuri medu agare mu mbuto yakanaka. Isusu tinozwa takasudzunuka pakucedzesana ngekuti tinoziya kuti umwe na umwe wedu unokosha.” Hino munodikana kuitei kuti mwamuna wenyu kana kuti mukadzi wenyu azwe kuti arikureremedzwa? Onai muezaniso wa Abrahamu na Sara.

16. Amuna angafundei no muezaniso wa Abrahamu? (1 Pedru 3:7) (Onai mufanikiso.)

¹⁶ Abrahamu waibata Sara no rureremedzo. Iyena waipurutana maonero ake uye waireremedza mazwiro ake. Pamugariro umweni, Sara wainga akanyangadzwa maningi, uye wakabvunza mwamuna wake Abrahamu zvese zvaaizwa. Iyena wakatoguma pakupasa ndaa Abrahamu nge zvese zvakaitika. Kodi Abrahamu wakanyangadzirhwa Sara here? Haiwa. Iyena waizviziya kuti Sara wainga ari mwanakadzi waidzikanda pasi uye waimutsigira. Abrahamu wakapurutana Sara uye wakaedza kugadzirisa nyaya ii. (Gen. 16:5, 6) Tingafundei? Amuna, tinozviziya kuti imwimwi muno ubaba wekuita zvisananguro mu mhuri. (1 Ako. 11:3) Kunyazi zvakadaro, zvaizonga zvakanaka maningi kudai maipurutana maonero e akadzi enyu musati maita cisananguro, maka-maka kana cisananguro icona cecibata-bata mukadzi wenyu. (1 Ako. 13:4, 5) Pamweni paya mukadzi wenyu uno stresi uye urikudawo kureketa mazwiro ake. Imwimwi munoreremedza mazwiro ake uye munomupurutana here? (Erengai 1 Pedru 3:7.) Angela na Dmitry aano makore 30 aa acata. Angela unopanganidza zvinoizwa no mwamuna wake kuti iyena azwe kuti unoreremedzwa. Iyena unoti: “Unogara akagadzirira kundipurutana pandinonga ndakatsamwa kana kuti pandinoda kucedza basi. Iyena unopangidza mwoyo unononoka kutsamwa kandiri kunyazi pandinonga ndakanyangadzwa.”

17. Akadzi angafundei no muezaniso wa Sara? (1 Pedru 3:5, 6)

¹⁷ Sara waipangidza kuti unoreremedza Abrahamu nge kutsigira zvisananguro zvake. (Gen. 12:5) Zuwa rimweni pakaguma arendo panguwa isikakarirhwi uye Abrahamu wakasanangura kuapika kuti arhye nawo. Iyena wakakumbira kuti Sara asiye zvaaiita kuti abike pau dzakawanda. (Gen. 18:6) Sara wakatsigira cisananguro ca Abrahamu uye panguwa iyona kamare wakaita zvaainga akumbirhwa. Akadzi, imwimwi mungateedzera muezaniso wa Sara, ngekutsigira zvisananguro zve amuna eyu. Nge kuita izvona, imwimwi munobambisa mucato wenyu. (Erengai 1 Pedru 3:5, 6.) Dmitry wamborekethwa ngezvake mu ndima yadarika unopanganidza zvinoizwa no mukadzi wake kuti iyena azwe kuti anoreremedzwa. Iyena unoti: “Ndinopfarira maningi mushobo unonditsigira Angela kunyazi maonero edu paanonga akasiyana. Kunyazi zviya zvandasanangura zvikasama kubudirira iyena aandireketeri.” Zviri pamhene kuti zviri nyore maningi kuda munhu anokureremedza!

18. Cinyi cicaitika kana kazado ikapeta masimba kuti muriro we rudo urumbwe wakabaka?

¹⁸ Mazuwa ano, Sathani uri kuita zviri zvese kuti apedze rudo riri mukati me mucato. Iyena unozviziya kuti kana kazado ikaruza rudo rainayo ku umwe na umwe wayo, zvinonga zviri nyorewo kuruza rudo raanaro kuna Djehovha. Asi rudo re zvirokwazvo, arimboperi! Itai zviri zvese kuti rudo ramunaro mu mucato menyu riite hinga rudo rinorekethwa mu Ngoma ya Soromoni. Kandai Djehovha pa mbuto yekutanga mu mucato menyu, pedzai nguwa yakawanda muri mwese uye pangidziranai rureremedzo ku mazwiro no zvido zve umwe na umwe wenyu. Ngekuita izvona, imwimwi mucapasa mbiri Djehovha, Manyuku e rudo re zvirokwazvo. Kuita hinga muriro wakanyasa kubaka, rudo pakati penyu ricarumbwa rakabamba nokusikaperi.