Teedzerai Muezaniso we Ngirozi

1-2. (a) Takasiyana papi no ngirozi? (b) Zviro zvipi zvatakaezana no ngirozi?

HINGA aseenzi a Djehovha, isusu tiri dii re mhuri ino rudo ino munamata, mhuri ii inobatanidza hama no hanzvadzi dzedu dze mu nyika yese uye mamiriyonji e ngirozi. (Dha. 7:9, 10) Patinoima, torangarira ngezve ngirozi kakawanda kakhona tinokanda ndangariro dzedu pa mushobo wedzakasiyana na isusu. Ngo muezaniso, ngirozi dziriyo kubvira kare kudarika isusu. (Djobo 38:4, 7) Uye idzona dzino simba rakakura maningi, dzicena, dzino unatsi kudarika isusu ngokuti isusu tiri anhu asikazi kukwana.—Ruka 9:26.

² Kunyazi tino musiyano uu, isusu tino zviro zvakaezana no ngirozi. Ngo muezaniso, isusu tingakwanisa kuteedzera mawara a Djehovha, tino rusununguko re kusanangura kuitawo hingana idzona. Kuitawo hingana isusu, ngirozi imwe na imwe ino zina rayo, unhu uye makomborero akasiyana-siyana. Uyewo tese isusu tinonamata Musiki wedu.—1 Ped. 1:12.

3. Zvinyi zvatingafunda ngezve ngirozi?

³ Sezvo takaezana no ngirozi, miezaniso yadzo yakanaka ingatibambisa uye kutifundisa mafundo anokosha. Mu fundo ino, ticaona kuti tingateedzera kudini kudzidodosa ke ngirozi pa kupangidza kadzo rudo ku anhu, kushingirira kadzo uye kupeta masimba kadzinoita kuti ungano dzirumbwe dzakacena.

NGIROZI DZINODZIDODOSA

4. (a) Ngirozi dzinopangidza kudini kudzidodosa? (b) Ngei ngirozi dzinodzidodosa? (Pisarema 89:7)

⁴ Ngirozi dzakatendeka dzinodzidodosa. Kunyazi idzona dzino maesperiensiya, simba, uye ungwaru idzona dzinozwira nhungamiriro dza Djehovha. (Pis. 103:20) Padzinoita mabasa adzo, idzona adzigai kana kupangidza simba. Idzona dzinoita zviri zvese kuti dziite zvadzinobvunzwa na Mwari, kunyazi amweni asikazogumi pa kuziya zina radzo.a (Gen. 32:24, 29; 2 Mad. 19:35) Idzona dzinoramba kukudzwa kupi hako kakasisira Djehovha. Ngei ngirozi dzecidzidodosa kudai? Ngokuti idzona dzinoda Djehovha uye dzinomureremedza.—Erengai Pisarema 89:7.

5. Ngirozi yakapangidza kudini kuti yaidzidodosa payakasumurura muphostori Juau? (Onaiwo mufanikiso.)

⁵ Ngatione zviitiko zvinopangidza kudzidodosa ke ngirozi. Mu makore 96 K.A., ngirozi isikaziikanwi zina rayo yakapangidza cipangidzo cinoshamisa ku muphostori Juau. (Zvak. 1:1) Juau wakaitei no cipangidzo ici? Iyena wakaedza kunamata ngiroziyo. Asi cisikwa ici cekumwiya cakagondeka, cakamurambidza nokukasika, ceciti: “Ngwarira! Usadaro! Ndindoriwo murandadoni wako no murandadoni we hama dzako . . . Namata Mwari!” (Zvak. 19:10) Ii i mhinduro ye kudzidodosa! Ngiroziyo yainga isikadi kutambira rukudzo kana kushamiswa nge zvayo. Iyona nokukasika yakabvunza Juau kuti anamate Djehovha Mwari. Pa nguwa imweyo iyona aiizi kurangarira kuti yaikosha maningi kudarika Juau. Kunyazi ngiroziyo yainga yaano nguwa yakareba yeciseenzera Djehovha uye yainga ino simba rakakura kudarika Juau, iyona nokudzidodosa yakabvunza muphostori Juau kuti iyona i murandadoni wayo. Kunyazi ngirozi yaidikana kusumurura Juau, iyona aizi kumusumurura nge mushobo usikazi kunaka kana unorhwadza. Pane kudaro, ngiroziyo yakareketa no unaki. Pamweni yakazwisisa kuti Juau wakagodama ngokuti wainga ecishamiswa nge ndaa yo cipangidzo caainga aona.

6. Tingateedzera kudini kudzidodosa ke ngirozi?

⁶ Tingateedzera kudini kudzidodosa ke ngirozi? Isusuwo tingakwanisa kuita mabasa edu tisikagai kana kuedza kutambira rukudzo nge ndaa ye zvatinokwanisa kuita. (1 Ako. 4:7) Atidikani kudziona hingana takakhwirira kupinda amweni ngokuti tiri kuseenzera Djehovha ke nguwa yakareba kudarika awona kana kuti ngokuti tino makomborero amweni. Zvezvirokwazvo, patinonga tino mabasa akawanda tinodikana kudziona hingana tiri ana adoko. (Ruka 9:48) Tinoda kuseenzera amweni kuitawo hingana ngirozi. Isusu atidikani kuita kuti anhu arangarire kuti tinokosha maningi kupina anhu amweni.

7. Tingapangidza kudini kuti tinodzidodosa patinosumurura munhu kana kupasa mazano?

⁷ Isusu tingapangidza kudzidodosa paya patinonga tecida kusumurura kana kupasa zano munhu—hama yo mu ungano kana kuti ana edu. Nguwa dzimweni tinodikana kupasa zano rakananga uye takanyasa kugondeka. Asi kuitawo hingana ngirozi yakapasa zano Juau no unaki, isusu tinodikanawo kupasa zano rakananga asi tisikaiti kuti munhuwo atsukware. Kana isusu tikasama kudziona kuti takakhwirira kudarika amweni, ticapasa mazano ecitsamira mu Bhaibheri nge mushobo unopangidza rureremedzo uye rudo.—Ako. 4:6.

NGIROZI DZINODA ANHU

8. (a) Maererano na Ruka 15:10, ngirozi dzinopangidza kudini rudo radzo ku anhu? (b) Ubaba upi uno ngirozi mu basa re kuparidzira? (Onaiwo foto ye pa )

⁸ Ngirozi adzioni anhu hinga asina basa kana asikakoshi, idzona dzinopfarira anhu. Uye idzona dzinopfara maningi paya pekuti munhu waita citema cakakura ocinyuka. Uyezve, kana munhu akasiya kuseenzera Djehovha uye ohwirira kumuseenzerazve idzona dzinopfarawo maningi, uyewo dzinopfara kana munhu akafunda ngezva Djehovha osanangura kuita cinjo mu upenyu wake kuti amuseenzere. (Erengai Ruka 15:10.) Ngirozi dzinobatikanawo maningi pa basa re kuparidzira. (Zvak. 14:6) Kunyazi idzona dzisikaparidziri anhu hinga mushobo watinoita, idzona dzingakwanisa kutungamirira muparidzi kuti agumire munhu ano cido cekufunda ngezva Djehovha. Izvirokwazvo kuti atingabhuyi no rugondo kuti ngirozi dzakatibetsera pa mugariro wakati kana wakati. Kubhuya zvazviri, Djehovha angaseenzesa makwanza amweni akaita hinga mwiya mucena kuti abetsere anhu kana kutungamirira aseenzi ake. (Zvii. 16:6, 7) Hino, patinoziisa anhu ngezve masoko akanaka, tingagara no rugondo rokuti ngirozi dzinonga dziripo kuti dzitibetsere.—Onai bhokisi rakazwi: “Minamato Yawo Yakadairhwa.”b

9. Tingateedzera kudini ngirozi uye kupangidzira rudo ku anhu?

⁹ Tingateedzera kudini ngirozi uye kuda anhu? Patinozwa ciziiso cekuti hama yahwirinzwa, isusu tingapfara maningi hinga mapfarire anoita ngirozi. Isusu tingaita zviri zvese kuti tipangidze kuti tinoada. (Ruka 15:4-7; 2 Ako. 2:6-8) Isusu tingakwanisa kuteedzera ngirozi ngokuita zvese zvatinokwanisa kuita pa basa re kuparidzira. (Mup. 11:6) Kuitawo hingana ngirozi dzinotibetsera pa basa redu, isusu tingakwanisawo kupsvaka mishobo ye kubetsera hama no hanzvadzi dzedu pa basa re kuparidzira. Ngo muezaniso, kodi tingakwanisa here kupangana no aparidzi asina maesperiensiya akawanda kuti tibude nawo mu basa re kuparidzira? Kana kuti tingabetsera here hama no hanzvadzi dzakura kana dziri kurhwara kuti dzikwanisewo kubuda mu basa re kuparidzira?

10. Tafundei no muezaniso wa Sara?

¹⁰ Uye zvakadini kana isusu tisikakwanisi kuita zvese zvataida mu basa ra Djehovha nge ndaa ye mugariro watinawo? Kunyazi zvakadaro, isusu tingakwanisa kugumira mishobo yekuseenza no ngirozi mu basa re kuparidzira. Ngatione muezaniso wa Sara,c hanzvadzi yo ku Índia. Mumasure me kuseenza hingana mupiyonera ke makore 20, Sara wakabatana no nhenda yakakura, yaiita kuti iyena andogare ari pakama. Iyena wakatsukwara maningi. Asi no rubetso ro rudo rakapangidzwa no mhuri yake uye no kuerenga kake Bhaibheri, Sara padoko no padoko wakahwirirazve kugara no maonero akanaka. Izvirokwazvo kuti iyena waidikana kudjairana no mushobo we kuparidzira waienderana no mugariro wake mupsva. Ngokuti iyena wainga asikakwanisi kugara pasi kuti atare tsamba, iyena waindokwanisa kuparidzira eciseenzesa terefoni. Hino, iyena wakafonera marevhizita ake uye awona akamupasa numero dze anhu ekuti pamweni aidawo kufunda Bhaibheri. Ngaupi mugumisiro wakhona? Mu mwedzi minganani basi, Sara wakagara no fundo dze Bhaibheri dzinokwana kuita 70—fundo dzekuti iyena wainga asikakwanisi kudzifundisa ega! Hino iyena wakapasa hama dzinganani kuti afundise fundo dzimweni. Uye akawanda e afundi aya, aakupinda musangano. Ngirozi dziri kupfara maningi ngokuseenza pamwepo no hama no hanzvadzi dzakaita hingana Sara, dzinoita zvese zvadzinokwanisa pa basa re kuparidzira!

NGIROZI DZINOSHINGIRIRA

11. Ngirozi dzakapangidzira kushingirira pa migariro ipi?

¹¹ Ngirozi i muezaniso wakanaka wekushingirira. Idzona dzakadikana kushingirira zviro zvisina unatsi uye matambudziko ke zviuru zve makore. Idzona dzakaona Sathani uye no zvisikwa zvimweni zvekumwiya, zvecipandukira Djehovha, zvekuti kareko aiseenzera Djehovha ari pamwepo. (Gen. 3:1; 6:1, 2; Djud. 6) Bhaibheri rinoreketa ngezve ngirozi imweni yakatendeka, iyona yakabatana no kuphikiswa kakakura, no dhimoni rimweni rainga rino simba. (Dha. 10:13) Kusiya izvona, kubvira pakasikwa anhu, ngirozi dzakaona anhu akawanda ecisanangura kusiya kuseenzera Djehovha. Kunyazi no zvese izvi, ngirozi idzi dzakagondeka dzakasanagura kurumbwa dzeciseenzera Djehovha no mupfaro uye dzecishingaira. Idzona dzinozviziya kuti pa nguwa yakasisira, Mwari acapedza zviro zvese zvisina unatsi.

12. Cinyi cicatibetsera kushingirira?

¹² Isusu tingateedzera kudini kushingirira ke ngirozi? Kuita hingana ngirozi, isusuwo tinosoona zviro zvakawanda zvisina unatsi, kana kubatanawo no kuphikiswa. Asi, kuitawo hingana idzona, isusu tino rugondo rokuti pa nguwa yakasisira, Djehovha acapedza zviro zvese zvisikazi kunaka. Hino isusu tiri kuda kuteedzera ngirozi dzakatendeka uye ‘kutama kusiya kuita zviro zvakanaka.’ (Aga. 6:9) Uye Djehovha anotigondesa kuti acatibetsera kuti tishingirire. (1 Ako. 10:13) Isusu tinganamata kuna Djehovha tecikumbira mwiya mucena, uye izvona zvicatibetsera kugara no mwoyo unononoka kutsamwa uye mupfaro. (Aga. 5:22; Ako. 1:11) Asi zvakadini kana imwimwi muri kubatana no kuphikiswa? Gondai Djehovha no mwoyo wese uye musathye. Djehovha acamubetserai uye kumubambisai nguwa dzese.—Aheb. 13:6.

NGIROZI DZINOBETSERA UNGANO KUTI IRUMBWE YAKACENA

13. Ubaba upi unokosha uno ngirozi mu mazuwa ano ekupedzesera? (Mateu 13:47-49)

¹³ Djehovha akapasa ngirozi ubaba unokosha mu mazuwa ekupedzesera. (Erengai Mateu 13:47-49.) Basa re kuparidzira rinokweya mamiriyonji e anhu e mu nyika yese. Amweni akhona anoita cinjo mu upenyu wawo uye ogara Akristu e zvirokwzvo, uye amweni akhona aaiti izvona. Ngirozi dzakagadzwa kuti dziparadzanise anhu “akashata no anatsi.” Nge masoko amweni izvi zvinoreya kuti idzona dzakagadzwa kuti dzicengetedze ruceno ro ungano. Izvi azvirei kuti aya akasiya ungano aangakwanisizve kuhwirira pasinei no cikonzero cakaita kuti adaro. Uyewo izvi azvirei kuti ungano aizombogari isina zvinetso. Isusu tingagara no cokwadi cokuti ngirozi dziri kuseenza no simba kuti ungano dzigare dzakacena.

14-15. Tingateedzera kudini kubatikana kunoita ngirozi pakucenesa ungano? (Onaiwo mafoto.)

¹⁴ Tingateedzera kudini kubatikana kunoita ngirozi kuti ungano dzirumbwe dzakacena? Ngekuita dii redu kuti ungano irumbwe yakacena mu ndangariro uye ku mwiya. Kuti izvona zviitike isusu tinopeta masimba kuti tidziirire mwoyo wedu. Umwe we mushobo we kuita izvona, ngewe kusanangura shamwari dzinoda Djehovha uye kugara kure no ciro cipi haco cingatikhwededza kure na Djehovha. (Pis. 101:3) Isusu tingakwanisawo kubetsera hama dzedu kuti dzirumbwe dzakatendeka kuna Djehovha. Ngo muezaniso, mungaitei kana mukaziya kuti hama yaita citema cakakura? Nge ndaa ye rudo ratinozwa ku hama ii, zvinokosha maningi kuikohomedzesa kuti ipanganidze zvese ku akuru. Kana iyona ikatama kuzviita, isusu kamare tinodikana kupanganidza zvese zvakaitika ku akuru. Isusu tinoda kuti munhu upi hake ari kuda rubetso re kumwiya abetserhwe nokukasika kana zvecibvira!—Tig. 5:14, 15.

¹⁵ Zvinotsukwarisa kuti amweni anoita zvishaishi zvakakura zvinotoguma pakuti abviswe mu ungano. Pa mugariro wakadaro, isusu “tinoima kushamwaridzana” no anhu awona.d (1 Ako. 5:9-13) Izvi zvinobetsera kuti ungano irumbwe yakacena. Kusiya izvona, patinosiya kushamwaridzana no munhu wabviswa mu ungano, zvezvirokwazvo tinonga tecipangidzira unaki ku munhuwo. Ngei tecibhuya kudaro? Ngokuti izvi zvinobetsera munhuwo kuti azwisise kuti unodikana kuhwirira kuna Djehovha. Kana iyena akaita izvona, isusu na Djehovha pamwepo no ngirozi ticapfara maningi.—Ruka 15:7.

16. Tingateedzera kudini ngirozi?

¹⁶ Makomborero akakura maningi kuziya padoko ngezve ngirozi uye kuseenza pamwepo nadzo. Isusu tinoda maningi kuteedzera mawara adzo akaita hinga kudzidodosa, rudo ku anhu, kushingirira uye kuita kuti ungano irumbwe yakacena. Kana tikateedzera ngirozi dzakatendeka, isusuwo ticaita dii re mhuri ye anamati a Djehovha nokusikaperi.