Zina ra Djehovha—Rinoreyei kuna Djesu

1-2. (a) Djesu akaitei pa usiku asati afa? (b) Mibvunzo dzipi dzaticadaira mu fundo ino?

KAINGA koodoka, Cirongomuna 14 ya Nisani ye gore ra 33 K.A., Djesu ainga ooda kutengeswa, kutongwa uye kuuraiwa. Iyena no aphostori ake akagondeka ainga abva kooita kurarira ka Tenzi mu nyumba imweni ye pa musoro. Mumasure me kupera kurhya, Djesu akapasa mazano manganani ekupedzesera ku aphostori ake kuti aagadzirire uye aabambise. Asati abuda, Djesu akaita munamato waibva pasi-pasi pe mwoyo. Muphostori Juau wakatara munamato uwona uye tingaugumira mu bhuku ra Juau kapituro 17.

² Djesu ainga ecinetseka nei paakaita munamato uwona? Munamato uwona unotibetsera kudini kuzwisisa kuti cinyi cainyanya kukosha kuna Djesu paainga ari pa nyika? Ngatione mhinduro dze mibvunzo idzona.

“ININI NDAKAAZIISA ZINA RENYU”

3. Djesu akabhuyei ngezve zina ra Djehovha uye iyena aida kubhuyei ngezvazvo? (Juau 17:6, 26)

³ Pamunamato wake Djesu akati: “Ndakaaziisa zina renyu.” Zvakagara pamhene kuti nyaya iyona yaikosha maningi kuna Djesu ngokuti iyena akaibhuya kairi kese. (Erengai Juau 17:6, 26.) Djesu aida kubhuyei? Kodi iyena akafundisa afundi ake kuti zina ra Mwari ngaripi? Afundi ake ainga ari Adjudha, hino awona aitoziya kuti zina ra Mwari ndi Djehovha. Zina irona rinooneka kanokwana kuita 7000 mu Matarhwa e Cihebheru. Cakaizwa ndi Djesu akubhuyapi basi kuti zina ra Mwari ndi Djehovha. Zvezvirokwazvo iyena akafundisa kuti zina irona rinoda kureyei. Djesu akabetsera afundi ake kunyasa kuziya Djehovha kutobatanidza cinangwa cake no nyika uye anhu, zviro zvaakaita, zvaacadzoita uye mawara ake. Djesu basi ndiye aizonyasa kufundisa izvona ngokuti iyena ndiye anonyasa kuziya Djehovha zvakanaka kudarika munhu upi hake.

4-5. (a) Pasai muezaniso wekuti zina ro munhu ringakosha kudini katiri? (b) Ngei zina ra Djehovha rakazonyasa kukosha ku afundi a Djesu?

⁴ Ngo muezaniso, rangaridzai kuti mu ungano menyu muno mukuru umweni unozwi David uye iyena unoitisa ngezve operasau. Pedzepo, zuwa rimweni imwimwi munobathwa no mugariro unoshupha zvekuti munotodikana kuenda ku cipitari nokukasika kuya kunoseenza hama iya uye iyona inoponesa upenyu wenyu. Parizvino imwimwi munonyasa kuda hama iya uye pamunozwa ngezve zina rayo munoedzurira zviya zvaakamuitira. Iwona mukuru wamunonyasa kuziya ke makore akawanda. Asi ndi medhiko wekuti wakaponesa upenyu wenyu.

⁵ Ngo mushobo umwewo, afundi a Djesu ainga aakuziya zina ra Djehovha. Asi nge daa ye kuparidza kakaita Djesu, zina irona rakanyasa kukosha kaari. Ngei? Ngekuti Djesu ainyasa kupangidza unhu wa Baba ake pa zvese zvaaibhuya uye zvaaiita. Hino, afundi a ake akanyasa “kuziya” Djehovha nge kuzwa mushobo waifundisa Djesu uye kuona mushobo waaibata anhu.—Juau 14:9; 17:3.

“ZINA RENYU ZINA RAMAKANDIPASA”

6. Djesu aida kureyei paakabhuya kuti zina ra Djehovha rainga rapaswa iyena? (Juau 17:11, 12)

⁶ Pamunamato wake Djesu akaita cikumbiro kuitira afundi ake eciti: “Aonererei nge ndaa yo zina renyu, zina ramakandipasa.” (Erengai Juau 7:11, 12.) Kodi izvona zvaida kureya kuti parizvino zina ra Djesu rainga raa Djehovha? Haiwa. Djesu akabhuya ngezve zina ra Djehovha eciti “zina renyu.” Nge kudaro, zvinogara pamhene kuti zina ra Djesu rainga risiripi Djehovha. Hino ngei Djesu akabhuya kuti zina ra Mwari rainga rapaswa iyena? Cokutanga, Djesu ainga ari muimiriri uye Mupi we Masoko a Djehovha. Iyena akauya mu zina ra Baba ake uye akaita zviro zvinoshamisa mu zina rawo. (Juau 5:43; 10:25) Kusiya izvona, zina ra Djesu rinoreya kuti “Djehovha i Muponesi.” Hino, zina rokuti Djehovha rakabatana no zina rokuti Djesu.

7. Pasai muezaniso unopangidza kuti Djesu aizoreketa mu zina ra Djehovha.

⁷ Kuti munyase kuzwisisa, rangarirai ngezve muezaniso unoteera. Muimiriri we nyika (kana kuti embaixador) ndi munhu unoimirira anyautongi e nyika uye unoreketa mu zina rawo. Ndiyo ndaa, masoko e muimiriri ano simba rakatodzana uye akaezana no masoko e mutongiwo kamare. Nge mushobo umwewo, Djesu aiimirira Djehovha uye aireketa mu zina rake.—Mat. 21:9; Ruka 13:35.

8. Nge mushobo upi zina ra Djehovha rainga “rina” Djesu kunyazi iyena asati auya pa nyika? (Ekisodho 23:20, 21)

⁸ Bhaibheri rinodainza Djesu kuti Soko ngokuti Djehovha akaseenzesa Djesu kuti apase masoko uye nhungamiriro ku ngirozi uye anhu. (Juau 1:1-3) Zvinoita hingana kuti Djesu ainga ari ngirozi yakatumwa na Djehovha kuti icengete Aisraeri paainga ari kurenje. Djehovha paakapasa Aisraeri nhungamiriro kuti azwire ngirozi iya, iyena akabhuyawo cikonzero cakhona. Iyena akati: “Ngekuti zina rangu riri pairi.”a (Erengai Ekisodho 23:20, 21.) Djehovha akabhuya izvona ngekuti “Djesu anomuimirira” uye ndi munhu wekutanga anodziirira uye kucenesa zina ra Baba ake.

“BABA, KUDZAI ZINA RENYU”

9. Djesu aikoshesa kudini zina ra Djehovha? Panganidzai.

⁹ Hingana zvatamboona pakutanga, zina ra Djehovha cainga ciri ciro cinokosha maningi kuna Djesu kunyazi asati auya panyika. Paainga ari pa nyika, Djesu akaita zviri zvese kuti apangidze kuti zina ra Djehovha cainga ciri ciro cinokosha maningi kaari! Pakupedzesera ke basa rake re kupadzira Djesu akakumbira Djehovha kuti: “Baba kudzai zina renyu.” Pa nguwa iyona kamare Baba ake akamudaira no izwi rakakura raaiita hinga ro mheni. Djehovha akati: “Inini ndakarikudza uye ndicarikudzazve.”—Juau 12:28.

10-11. (a) Djesu akakudza kudini zina ra Djehovha? (Onai mufanikiso.) (b) Ngei zina ra Djehovha raidikana kuceneswa uye kudziirirhwa?

¹⁰ Djesu akakudzawo zina ra Baba ake. Kuita kudini? Umwe we mushobo waakaita i kureketa ngezve mawara awo anoshamisa uye zviro zvinoshamisa zvakaizwa ndi Baba ake. Asi izvona basi zvainga zvisikazi kukwana. Zina ra Djehovha raidikanwawo kuceneswa uye mbiri yake yaidikanwa kudziirirhwa.b Djesu akapangidza kuti izvona zvaikosha maningi paakafundisa afundi ake munamato unonyasa kuziikanika. Iyena akati: “Baba edu muri kudenga, zina renyu ngariceneswe.”—Mat. 6:9.

¹¹ Asi ngei zina ra Djehovha raidikana kuceneswa uye kudziirirhwa? Ngekuti mu munda we Edheni Sathani wakapsvipisa uye wakareketa manyepo ngezva Djehovha Mwari. Sathani wakabhuya kuti Djehovha ainga ari munyepi uye kuti ainga eciramba zviro zvakanaka kuna Adhamu na Evha. (Gen. 3:1-5) Sathani wakabhuyawo kuti mushobo wa Djehovha we kuita zviro wainga usiripi wakanaka. Nge ndaa ye manyepo ake, anhu aizorangarira zviro zvakashata ngezva Djehovha Mwari. Paapadarika nguwa, mu mazuwa a Djobo, Sathani wakapumha aseenzi kuti aiseenzera Djehovha nge daa ye kuda ciro. Iyena wakapumhawo anhu kuti ainga asikadi Djehovha zvezvirokwazvo zvekuti aazomuseenzeri mu nguwa dzinoshupha. (Djobo 1:9-11; 2:4) No kuhamba ke nguwa, zvaizodjeka kuti munyepi ainga ari Djehovha here kana kuti Sathani.

“NDINOPA UPENYU WANGU”

12. Djesu ainga agadzirira kuitei nge ndaa ye rudo raanaro ku zina ra Djehovha?

¹² Nge daa ye rudo rake kuna Djehovha, Djesu aida kuita zviri zvese kuti acenese uye adziirire zina ra Djehovha. Iyena ainga akagadzirira kufa kuti apangidze kuti Djehovha i mucena uye kuti mushobo wake we kuita zviro wakanaka.c Ndiyo ndaa Djesu akati: “Ndinopa upenyu wangu.” (Juau 10:17, 18) Anhu ekutanga akakwana Adhamu na Evha, akapandukira Djehovha uye akagara ku dii ra Sathani. Kusiyana nawo, Djesu ainga akagadzirira kuuya pa nyika kuti apangidze rudo raaizwa kuna Baba ake. Iyena akaita izvona nge kuzwira Djehovha pa mugariro wese we upenyu wake. (Aheb. 4:15; 5:7-10) Iyena akarumbwa akaperera ke upenyu wake wese, dakara pa rufu rake pa mutanda wekutambudzikira. (Aheb. 12:2) Nge mushobo uwona, iyena akapangidza rudo rake kuna Djehovha uye ku zina rake.

13. Ngei Djesu ainga ari munhu akasisira kuti apangidze kuti Sathani i munyepi? (Onaiwo mufanikiso.)

¹³ Zvese zvakaizwa na Djesu zvakanyasa kupangidza kuti munyepi wainga ari Sathani haiwa Djehovha! (Juau 8:44) Djesu ainyasa kuziya zvakanaka Djehovha kudarika munhu upi hake wakamborarama. Hino, kudai manyepo akabhuya Sathani ngezva Djehovha ainga ari ecokwadi, Djesu aizonyasa kuziya izvona. Asi ainga asiripi e cokwadi. Ndiyo ndaa, Djesu akarumbwa akagondeka ecidziirira zina ra Djehovha. Kunyazi pazvaiita hingana kuti Djehovha ainga amusiya, Djesu aitoda kupasa upenyu wake pane kupandukira Baba ake ano rudo.—Mat. 27:46.d

“NDAPEDZA BASA RAMAKANDIPASA”

14. Djehovha akakomborera kudini Djesu nge kugara akagondeka?

¹⁴ Pamunamato waakaita usiku asati afa, Djesu akati: “Ndakapedza basa ramakandipasa kuti ndiite.” Djesu aigonda kuti kudai akarumbwa akagondeka kuna Djehovha, Djehovha aizomukomborera uye iyena ainga ari mu gwanza. (Juau 17:4, 5) Djehovha ainga asikazotenderi kuti Djesu arumbwe ari mu guwa. (Zvii. 2:23, 24) Djehovha akamutsa Djesu uye akamukhwidziridza pambuto ye pamusoro-soro ku denga. (Afi. 2:8, 9) No kuhamba ke nguwa, Djesu akagara Mambo we Umambo wa Mwari. Cinyi cicaizwa nge Umambo uwona? Djesu anotipasa mhinduro pa dii re cipiri ro munamato unonyasa kuziikanwa unoti: “Umambo wenyu ngauuye. Kuda kenyu ngakuizwe pasi pano hinga zvakunoizwa kudenga.”—Mat. 6:10.

15. Djesu acaiteizve?

¹⁵ Nokukasika Djesu acarhwisa azondi ese a Mwari uye acatsakatisa ese akashata pa hondo ye Amagedhoni. (Zvak. 16:14, 16; 19:11-16) Pedzepo, Djesu acakhandira Sathani mu “rindi rakadzikisisa,” zvekuti Sathani aazokwanisi kuita ciro ucagara hingana kuti wafa. (Zvak. 20:1-3) Djesu acaunza runyararo pa nyika uye acabetsera anhu akawanda kuti agare akakwana pa nguwa yaanonga ecitonga pa Umambo wake ke Makore 1000. Iyena acamutsa akafa uye acaita kuti nyika yese igare Paraizo. Pakupedzesera cinangwa ca Djehovha cicadzadzika!—Zvak. 21:1-4.

16. Upenyu ucange wakadini mumasure me Kutonga ke Makore 1000?

¹⁶ Upenyu ucagara wakadini mumasure me Makore 1000? Citema uye kusama kukwana azvizoonekizve. Anhu aazokumbirizve kurekererhwa pa zvitema zvawo. Aazodizve kusudzunurhwa, munhu unoaimirira kana kuti mupristi kuti azogare shamwari ya Djehovha. Pakupedzesera, “muzondi mukuru ucabviswa i rufu retakabva naro nge ndaa ye Adhamu.” Mu makuwa munonga musisina ciro ngekuti akafa anonga amutswa anhu ese anonga akakwana.—1 Ako. 15:25, 26.

17-18. (a) Cinyi cicaitika mu kupera ke Kutonga ke Makore 1000? (b) Djesu acaitei mu kupera ke kutonga kake? (1 Akorinti 15:24, 28) (Onai mufanikiso.)

¹⁷ Peno ciro cimweni cakanaka maningi cicaitika mu kupera ke Makore 1000. I cinyi? Apanazve ucagara no mubvunzo wekuti Djehovha ndi Mwari mucena uye munatsi. Kuita kudini? Mu munda we Edheni Sathani wakapumha Djehovha kuti ainga asikatongi anhu no rudo uye kuti i munyepi. Kubvira pa nguwa iyona zina ra Djehovha rakacenetswa kakawanda nge aya anomukudza uye anomureremedza. Hino, mu kupera ke Kutonga ke Makore 1000, mbiri ya Djehohva inonga yanyasa kudziirirhwa. Djehovha anonga apangidza kuti iyena ndi Baba e kudenga ano rudo rakakura.

¹⁸ Pakupedzesera zvicagara pamhene kuti zvese zvakabhuiwa ndi Sathani i manyepo. Djesu acaitei kana kutonga kake kukapera? Kodi iyena acateedzera muezaniso wa Sathani uye opandukira Djehovha here? Haiwa, iyena aazombozviiti! (Erengai 1 Akorinti 15:24, 28.) Djesu acahwirinza Utongi kuna Baba ake uye acadzikanda pasi pe utongi wawo. Zvezvirokwazvo, kusiyana na Sathani, Djesu akagadzirira kuita zvese izvona ngekuti anoda maningi Djehovha.

19. Zina ra Djehovha rinoreyei kuna Djesu?

¹⁹ Djehovha anozvikonzero zvakanaka kuti apase zina rake Djesu, uye Djesu i muimiriri wakakwana wa Baba ake. Hino, zina ra Djehovha rinoreyei kuna Djesu? Rinoreya zvese. Iciro cinonyanya kukosha kudarika ciro cipi haco. Djesu akatopasa upenyu wake kuitira zina irona. Pakupedzesera ke Makore 1000 iyena acapasa zvese Baba ake. Tingateedzera kudini muezaniso wa Djesu? Ticadaira mhinduro we mubvunzo uu mufundo inoteera.