Mibvunzo Inobva Ku Aerengi

Zvierengo 30:18, 19 inobhuya kuti “gwanza ro mwanarume no musikana” rinoshamisa. Izvona zvinoda kureyei?

Anhu akawanda kunyazi aya akafunda maningi anodzibvundzisa kuti kodi masoko awona anoda kureyei. Tsamba yese mu Bhaibheri—Shanduro yeNyika Itsva inobhuya kuti: “Pano zviro zvitatu zvinondishamisa zvirongomuna zvandisikazwisisi: Gwanza re godzi kumatenga, gwanza re nyoka pa buwe, gwanza re bharko mu bahari uye gwanza re mwanarume no musikana.”—Zvie. 30:18, 19.

Kare taizwisisa kuti masoko okuti “gwanza re mwanarume no musikana” ainga akabatanidzwa pa zviro zvakashata ngekuti mavhersikuro amweni ari sure anobhuya zviro zvisikazi kunaka zvekuti “azvimboguti” uye azvimbobhuyi kuti “zvakwana.” (Zvie. 30:15, 16) Kusiya izvona, vhersikuro 20 inobhuya ngezve “mwanakadzi hure” wekuti unobhuya kuti aazi kuita ciro cakashata. Hino tairangarira kuti kuita hingana godzi rinomburuka kudenga, nyoka inohamba pa buwe kana kuti bharko rinohamba mu bahari uye zvese izvi zvinohamba zvisikasii mutaro, mwanarume ungakwanisa kuitawo ciro asikabatiki. Maererano no marangariro awona taizwisisa kuti masoko okuti “gwanza ro mwanarume no musikana” zvaida kureya zviro zvakashata: Kuti kuno mudjaha wakangwara waiedza kuita kuti musikana amude musikanewo asikazii cinangwa ce mudjahewo.

Tinozvikonzero zvakawanda zvekuti tione zviro izvi hinga zvakanaka. Zvezvirokwazvo mutari waiga ecishamisika no zviro zviya zvaainga abhuya.

Atari eci Hebheru anotsigira zano rokuti vhersikuro ii inoreya zviro zvakanaka. Maererano no Léxico Teológico ye Testamento ye Kare, soko rakaturikirhwa kuti “zviro zvinondishamisa” mu ci Hebheru pana Zvierengo 30:18 “rinoreya ciro cekuti munhu unociona hingana cakakura, cisikabviri kana kuti cinoshamisa.”

Crawford Howell Toy profesori we cikora ce pamusoro-soro cinozwi Harvard, ciri ku Estados Unidos wakagumawo padanho rokuti masoko aya e mu Bhaibheri aareketi ngezve zviro zvakashata. Iyena unoti: “Kubhuya zvazviri, mutari waiedza kupanganidza kuti zviro izvona zvaishamisa kudini.”

Hino zvinomusoro kurangarira kuti masoko ari pana Zvierengo 30:18, 19 anopanganidza zviro zvinotishamisa maningi. Kuita hingana mutari we zvierengo ii, tinoshamiswa nge kuona godzi recimburuka kudenga, nyoka isina murenje yecihamba pa buwe bharko rinorema maningi recihamba mu bahari uye mwanarume no musikana ecidanana uye eciwaka upenyu unopfadza ari ese.