Ioba
IA MǍTAˈUHIA TE ATUA I TA ˈNA RA MAU OHIPA MANA E TIA ˈI.
37 Te rurutaina nei tau aau i te reira, e te turorirori nei i to ˈna vairaa. 2 A faaroo na outou i te ahehe o to ˈna reo, e te haruru no roto mai i to ˈna vaha. 3 Tei raro aˈe i te raˈi atoa nei te anaparaa, e ua tae roa ta ˈna uira i te hopea mai o te fenua ra. 4 E muri aˈera, o taua haruru rahi ra ïa, e reo teitei to ˈna i te patiri; e e ore roa oia e tapea ia ratou ia faaroohia to ˈna ra reo.
5 E patiri-maere-hia te reo o te Atua; e parau rahi ta ˈna e rave nei, e ore e tia ia faataa. 6 Ua parau hoi oia i te hiona, Ei nia oe i te fenua ra, e te ûa toriirii, e te tia ûa o to ˈna ra mana. 7 Ua tapiri oia i te rima o te taata atoa, ia ite te taata atoa i ta ˈna e rave ra. 8 Ei reira te mau taehae e reva ˈi i te apoo, e ua parahi maite i to ratou ra pupuniraa.
9 No te pae i apatoa te puahiohio; e te mâriri ra, no te pae i apatoerau. 10 No te mataˈi a te Atua e paari ai te vai, e te pape aano ra e etaeta ˈi. 11 Mai reira hoi, te pee nei te ata meumeu ia ˈna i te tia ûa ra, e e purara ê hoi te ata rahi aano i te maramarama no ˈna. 12 Te na reira ra oia i te tioi i to ratou haerea i ta ˈna ra parau, ia rave ratou i ta ˈna i faaue atu ia ratou ra, i nia i te fenua i parahihia e te taata nei; 13 ei aˈoraa ˈtu, e aore ra, no to ˈna fenua, e aore ra, no te aroha, i hopoi mai ai oia i te reira.
14 E faaroo mai i teie, e Ioba, eiaha e hauti, e haamanaˈo i te ravea taa ê a te Atua ra. 15 Te ite ra oe i ta te Atua ravea i te reira, ia faaanaana mai oia i te maramarama o tana ra ata? 16 Te ite ra oe i te faafaitoraa i te mau ata, te ohipa taa ê e te Itehope ra? 17 E te mea i mahanahana ˈi to ahu, ia vaiiho noa i te fenua i te mataˈi no te pae i apatoa ra? 18 O oe atoa anei e oia i te hohoraraa i te raˈi, tei etaeta, mai te hiˈo faatôhia ra? 19 E haapii mai maori oe i ta matou parau ia parau atu, e ore matou e tia ia parau atu ia ˈna, no te pouri. 20 E faaitehia ˈtu anei oia e te parau nei au? i parau anaˈe te taata ra, e riro ïa i te pohe roa. 21 I teie nei hoi, e ore te taata e tia ia hiˈo i te maramarama, ia anaana maitai i nia i te raˈi ra; te farara nei râ te mataˈi e ua anaana ïa. 22 Tei te mataˈi ra e faapiti e fa mai ai te mahana; tei te Atua ra te hanahana rahi. 23 I te Puaihope ra! e ore e itea e tatou; aore ïa e faito i te mana e te auraa o te parau, te rahi roa ra te parau-tia na ˈna, e ore e hamani ino. 24 E teie nei, ia mǎtaˈu te taata ia ˈna e tia ˈi: e ore hoi oia e ite noa ˈtu i tei paari te aau ra.