Salamo

I PURE DAVIDA IA ORA I TO ˈNA RA MAU ENEMI.

Na te Menasehe, na nia i te Ionata-elema-rekokima. Miketama a Davida i te haruraahia e te mau Philiseti i Gata ra.

56 E aroha mai oe ia ˈu, e te Atua e, e hinaaro horomii to te taata nei ia ˈu; te tamaˈi maira oia ia ˈu i te mau mahana atoa nei ia ino vau. 2 Te titau maira tau mau enemi i te mau mahana atoa nei ia pau vau; e rave rahi tei tamaˈi ia ˈu, e Tei Teitei e. 3 Ia roohia vau e te mǎtaˈu ra, e tiaturi au ia oe ra. 4 E haamaitai au i te Atua i ta ˈna ra parau; e tiaturi au i te Atua, e ore e mǎtaˈu i ta te taata nei ia rave mai ia ˈu. 5 Te ruri ê nei ratou i ta ˈu nei parau i te mau mahana atoa nei; ta ratou opuaraa ia ˈu nei, ia ino ïa vau. 6 Te amui huna noa ra ratou, te hiˈo ra i ta ˈu nei haerea; te tiai maite nei ratou ia pohe au ia ratou ra. 7 E ora anei ratou i ta ratou hara? e huri atu oe i te mau taata i raro i to oe na riri, e te Atua.

8 Ua taiohia e oe to ˈu nei mau haerea; a tuu na oe i to ˈu nei roimata i roto i ta oe ra farii: aita anei i roto atoa i ta oe ra parau? 9 Ia tae i te mahana e tiaoro atu ai au ia oe ra, e hoˈi ai tau mau enemi i muri: o ta ˈu ïa i ite, e tei to ˈu nei paeau te Atua. 10 E haamaitai au i te Atua i ta ˈna ra parau! e haamaitai au ia Iehova i ta ˈna ra parau! 11 E tiaturi au i te Atua, e ore e mǎtaˈu i ta te taata ia rave mai ia ˈu. 12 Ua euhe atu vau ia oe, e te Atua, e hopoi atu hoi au i taua euhe ra ia oe, ma te haamaitai. 13 Ua faaora hoi oe i tau varua i te pohe: e ore anei oe e faaitoito mai i o ˈu pue avae ia ore ia pahee, ia hahaere au i mua i te aro o te Atua ma te maramarama o te feia i ora ra?