Salamo

TE TIATURI RA DAVIDA I TE ATUA.

Na te Menasehe, na Iedutuna. E Salamo na Davida.

62 Te tiai mau nei tau varua i te Atua: no ˈna mai hoi to ˈu ora. 2 Oia anaˈe ra to ˈu pǎpǎ e to ˈu ora; tau faatia, e ore au e aueue hua.

3 Mai te aha ra te maoro o to outou opuaraa i te ino i te taata nei? e pohe anaˈe outou, e riro hoi outou mai te patu aueue ra, e mai te aua i parari ra! 4 Te feruri nei râ ratou ia hurihia oia i raro i to ˈna ra vahi teitei; te hinaaro ra ratou i te haavare; te haamaitai nei to ratou vaha, te tuhi ra râ i roto. Sela.

5 E tau varua, o te Atua anaˈe ra ta oe e tiai: tei ia ˈna hoi tau manaˈoraa. 6 Oia anaˈe ra tau pǎpǎ e tau ora; tau faatia, e ore au e aueue hua. 7 No ǒ i te Atua ra to ˈu ora e to ˈu hinuhinu; o to ˈu ra ïa pare e etaeta ˈi, e tau haapuraa, o te Atua ïa. 8 E tiaturi ia ˈna eiaha e faaea, e te mau taata e! e ninii hua i to outou aau i mua ia ˈna! o te Atua anaˈe ra to tatou haapuraa: Sela. 9 E mea faufaa ore te taata rii haehaa, e te mau taata teitei ra, e haavare ïa; ia tuu apipiti-atoa-hia i roto i te faito ra, e mâmâ rahi to ratou i to te faufaa ore ra.

10 Eiaha e tiaturi i te hamani ino, e eiaha e fanaˈo i tei haruhia ra. Te tupu ra i te rahi te taoˈa ra, eiaha e haamau i to outou aau i reira.

11 Hoê aˈenei a te Atua parauraa; apiti aˈenei o ˈu faarooraa; e no te Atua te mana! 12 Tei ia oe atoa, e Iehova, te aroha; te tahoo maira oe i te taata atoa i ta ˈna ra ohipa i rave ra.