Isaia
TE MAU ENEMI I TE PAURAA I TE MESIA RA.
63 O vai teie, mai Edoma mai? e mai Bozara mai ma te ahu rapaau-hua-hia? teie ma te ahu unauna to ˈna; e ma te puai to ˈna haerea? o vau, o tei faaite i te parau-tia nei, o tei puai hoi ia faaora ra. 2 Eaha te mea i uteute ai to ahu? e mai te taata i taataahi i te farii vine to oe ra ahu? 3 O vau anaˈe tei taataahi i te farii vine; area te mau taata ra, aore roa ïa, o vau anaˈe ra. Ua taahi au ia ratou ma tau riri; e ua taataahi hoi au ia ratou ma tau riri rahi tahoo ra: i pîpîhia mai ai to ratou toto i nia i ta ˈu ahu; e ua viivii ia ˈu ta ˈu e ahu nei. 4 No te mea tei tau aau te mahana tahooraa; e ua tae i te matahiti o tei faaorahia e au ra. 5 Ua hiˈo ihora vau, e aore roa e faatia; e ua maere ihora vau i te mea aita roa e turu: i ohipa ˈi to ˈu iho rima i te ora no ˈu, e na to ˈu iho riri i tauturu mai ia ˈu. 6 Ua taataahi ihora vau i te mau taata i tau riri; e paruparu aˈera ratou ia ˈu i tau riri tahoo; manii ihora to ratou toto ia ˈu i raro i te repo.
7 E tamau vau i te faahiti i te aroha o Iehova, i te mau mea atoa ta Iehova i horoa mai no tatou: e to ˈna hamani maitai i te utuafare o Iseraela, ta ˈna i horoa no ratou ra, no to ˈna aroha e te hamani maitai rahi no ˈna ra. 8 Ua parau hoi oia e, E taata mau hoi ratou no ˈu, e tamarii ïa e ore e haavare mai; riro atura oia ei ora no ratou. 9 To ratou atoa ra mau ati aore oia i mârô atu ia ratou; na te melahi ra no mua i tana aro ratou i faaora; no to ˈna aroha e to ˈna hamani maitai i faaora ˈi oia ia ratou; e na ˈna ratou i mau, e na ˈna ratou i hopoi i te mau mahana atoa mai tahito maira.
10 Ua patoi râ ratou, e ua faariri i to ˈna varua maitai; riro atura oia ei enemi no ratou; e ua tamaˈi maira ia ratou. 11 Ua manaˈo ihora oia i te mau mahana i mutaaihora, o Mose e tana mau taata: i te na ôraa mai, Teihea oia tei aratai mai ia ratou mai raro mai i te tai ra, e te tiai atoa o ta ˈna ra nǎnǎ? teihea hoi oia tei tuu i tana Varua maitai i roto ia ˈna ra? 12 I te aratairaa i te rima atau o Mose i to ˈna iho rima i hanahana ˈi oia ra; i te vahiraa i te moana na mua ia ratou, ia faariro oia i to ˈna iˈoa ei iˈoa moe ore? 13 I te aratairaa ia ratou na te abuso, mai te puaahorofenua i te vahi papu ra, e aore roa ratou i tiaia? 14 Mai te nǎnǎ e pou i raro i te peho faaea ai ra, na te varua o Iehova i faafaaea ia ratou; mai te reira to oe aratai i to mau taata, ia hanahana roa to oe ra iˈoa.
15 A hiˈo mai na oe mai te raˈi mai, mai to oe ra parahiraa moˈa e te nehenehe: teihea to oe ra itoito e te mana rahi; te aroha o to aau e to hamani maitai ia ˈu nei? ua ore anei ïa? 16 O oe â to matou metua, ore noâ ˈtu Aberahama i te haapao mai ia matou nei, e ore noâ hoi Iseraela i te ite mai ia matou: o oe, e Iehova, o to matou ïa metua; o to matou ïa ora, mai tahito mai to oe iˈoa.
17 E Iehova, eaha oe i tuu noa ˈi ia matou ia hape noa na i to oe eˈa? e ia faaita noa na i to matou aau ia ore ia mǎtaˈu ia oe? e fariu mai i to mau tavini nei, i te mau opu hoi o ta oe ra tufaa. 18 E parahiraa iti poto to oe ra mau taata moˈa i reira, e ua taataahihia to vahi moˈa e to matou mau enemi. 19 Ua maoro aˈenei matou, mai te mea e ere oe i te tavana no matou nei. Mai te feia aore i mairihia i to oe ra iˈoa.