Numera

TE TAIÂ RA TE TAMARII A ISERAELA I TE PAPE ORE.

20 I reira to te amuiraa tamarii atoa a Iseraela taeraa mai i te medebara ra o Zina, i te marama matamua ra: parahi ihora taua mau taata ra i Kadesa; pohe ihora Miriama i reira, e i reira to ˈna tanuraahia. 2 E aore roa e pape ta taua amuiraa ra; e ua haaputuputu maira ratou ia Mose raua o Aarona. 3 Ua mârô maira te taata ia Mose, na ô maira, Ahiri matou i pohe atoa a pohe ai to matou mau taeae i mua i te aro o Iehova ra! 4 Eaha hoi orua i aratai mai ai i te amuiraa i ǒ nei i teie nei medebara, ia pohe matou e ta matou mau puaa atoa i ǒ nei? 5 Eaha hoi orua i aratai mai ai ia matou mai Aiphiti mai e hopoi mai ia matou i ô nei i teie nei vahi ino? e vahi huero maa ore, e te suke ore, e te vine ore, e te remuna ore; e te vahi pape ore hoi ia inu. 6 Haere atura Mose raua o Aarona mai te aro atu o taua amuiraa ra i te uputa o te tiahapa amuiraa, ua tipapa ihora raua i raro to raua mata; e ua fa maira te hanahana no Iehova ra ia raua.

7 Ua parau maira Iehova ia Mose, na ô maira, 8 A rave i te raau ra, a haaputuputu mai i te amuiraa atoa ra; o oe, e to tuaana o Aarona, a parau atu ai i te mato i mua mau i to ratou mata; e na te reira e tuu mai i te pape, na oe e faatahe mai i te pape na ratou no roto i taua mato ra, a hopoi atu ai i te pape na taua amuiraa ra e ta ratou mau taoˈa atoa. 9 Ua rave ihora Mose i te raau i mua i te aro o Iehova ra, ta ˈna i faaue mai ia ˈna ra. 10 Ua haaputuputu ihora Mose raua o Aarona i te amuiraa i mua i taua mato ra, e ua na ô atura ia ratou, A faaroo mai na, tena na mau faaroo-atâ; e tia anei ia mâua ia hopoi atu i te pape na outou no roto i teie nei mato? 11 Ua aa atura Mose i tana rima, ua tairi atura i te mato i ta ˈna raau e piti tairiraa; ua tahe maira te pape e mea rahi roa, ua inu ihora taua amuiraa ra, e ta ratou mau taoˈa atoa. 12 Ua parau maira Iehova ia Mose raua o Aarona, No te mea, aita aˈenei orua i faaroo mai ia ˈu, ia tura vau i te aro o te tamarii a Iseraela; eita ˈtura orua e aratai i teie nei amuiraa i te fenua ta ˈu e horoa ˈtu no ratou ra. 13 O Meriba hoi teie nei pape, no te mea ua mârô te tamarii a Iseraela ia Iehova, e tura ˈtura oia ia ratou ra.

14 Ua tono atura Mose i na vea i te arii o Edoma mai Kadesa ˈtu, e na ô atu e, Te na ô maira, to mau taeae, te ati Iseraela ra, Ua ite oe i to matou ati i roohia mai ai matou ra; 15 e ua haere to matou hui metua i Aiphiti, e i Aiphiti to matou parahiraa e maoro roa aˈenei; e ua hamani ino mai to Aiphiti ia matou e to matou hui metua atoa: 16 ia matou râ i tiaoro ia Iehova ra, ua faaroo mai oia i to matou reo, e ua tono mai i te melahi, e ua aratai mai ia matou mai Aiphiti maira; e inaha tei Kadesa matou, tei te hopea o to oe ra fenua ïa oire. 17 Teie ta matou parau ia oe, e tuu mai oe ia matou e na roto matou i to oe nei fenua i te haere: e ore matou e na roto i te aua, e ore hoi e na roto i te mau ô vine ra, e ore hoi matou e inu i te pape no te mau apoo pape ra; e na nia noa matou i te eˈatia a te arii ra; e ore matou e ohipa ê na te pae atau e na te pae aui, e mairi noa mai to oe ra fenua. 18 Ua na ô maira râ te ati Edoma ia ratou, Eiaha outou e na roto mai i to matou nei fenua, o te farerei atu hoi matou ia outou ma te ˈoˈe. 19 Ua parau atura te tamarii a Iseraela ia ratou, E na te eˈatia noa matou i te haere: e ia inu matou, e ta matou mau puaa i ta outou pape, na matou ïa e hoo, e tuu noa mai outou ia matou ia haere noa na roto i to outou fenua mai te ratere ra. 20 Ua parau maira râ ratou, Eiaha outou e na ǒ nei mai i te haere: tei rapae au maira te arii o Edoma e aro ia ratou, ma te taata atoa e rave rahi e te itoito rahi. 21 Aita aˈera i tia i te ati Edoma i te tuu mai i te eˈa ia haere te ati Iseraela na roto i to ratou ra fenua; fariu ê aˈera te ati Iseraela ia ˈna.

22 Ua haere anaˈe maira te tamarii a Iseraela, te amuiraa atoa ra mai Kadesa mai, e tae maira i te mouˈa ra o Hora. 23 Ua parau maira Iehova ia Mose raua o Aarona i te mouˈa ra o Hora, i te hiti o te fenua o Edoma ra, na ô maira, 24 E amui-atoa-hia Aarona i to ˈna ra nunaa, e ore hoi oia e tae i te fenua ta ˈu e horoa i te tamarii a Iseraela ra, no te mea, ua haapao-atâ orua i ta ˈu parau i te pape ra o Meriba. 25 Aratai oe ia Aarona e ta ˈna tamaiti ia Eleazara, e i nia i te mouˈa nei o Hora; 26 a iriti ai i te ahu moˈa i nia ia Aarona, a tuu ai i nia i ta ˈna tamaiti ia Eleazara; e e pohe Aarona i reira ra, e e amui-atoa-hia ˈtu i to ˈna ra nunaa. 27 Ua na reira hoi Mose i ta Iehova i faaue mai ia ˈna ra: haere atura hoi ratou i nia i taua mouˈa ra o Hora, i mua i te aro o taua amuiraa atoa ra. 28 Ua iriti aˈera Mose i te ahu moˈa i nia ia Aarona, e ua tuu atura i nia i ta ˈna tamaiti ia Eleazara; pohe ihora Aarona i reira i nia iho i taua mouˈa ra, popou maira hoi Mose raua o Eleazara, mai nia mai i taua mouˈa ra. 29 E ite aˈera te amuiraa atoa e, ua pohe Aarona, ua oto ihora te utuafare atoa o Iseraela ia Aarona, e a toru aˈera ahuru o te rui.