Roma

AITA TE ATUA I FAARUE I TO ˈNA TAATA TA ˈNA I ITE I MUTAA IHORA.

11 E teie nei, teie ta ˈu parau, Ua faarue anei te Atua i to ˈna taata? Aore roa ïa. E ati Iseraela atoa hoi au, no te huaai o Aberahama, no te opu o Beniamina. 2 Aitâ te Atua i faarue i to ˈna taata ta ˈna i ite i mutaa ihora. Aita outou i ite i ta te parau i papaihia ra i parau mai ia Elia ra? ia ˈna i parau atu i te Atua ia Iseraela ra, a na ô atu ai ra e, 3 E Iehova, ua taparahi ratou i te mau peropheta na oe, e ua taihitumu i te mau fata na oe, e o vau anaˈe iho nei te toe, e te titau mai nei ratou ia ˈu ia pohe. 4 Te nahea maira râ ta te Atua parauraa mai ia ˈna? Ua vaiihohia e au e hitu tausani taata no ˈu, aore â ratou i tuu i te turi i mua ia Baala. 5 Oia atoa i teie nei, te vai nei te tahi pae no te maitiraa a te aroha mau ra. 6 E no te aroha mau ra, e ere atura ïa i to te ohipa: no reira ra, e ere atura te aroha mau i te aroha mau i reira. E no te ohipa ra, e ere atura i to te aroha mau: no reira ra, e ere atura te ohipa i te ohipa i reira.

7 Eaha hoi taua parau nei? Aitâ i noaa ia Iseraela ta ˈna i imi ra; ua noaa râ i tei maitihia ra, e ua haamatapohia te tahi pae, 8 (oia hoi tei papaihia ra e, Ua tuu mai te Atua i te varua taoto rahi ia ratou, te mata hiˈo ore, e te tariˈa faaroo ore;) e tae roa aˈenei i teie nei mahana. 9 Ua parau hoi Davida, Ia riro ta ratou amuraa ei upeˈa, e ei marei, ei turoriraa, e ei utua hoi na ratou. 10 Ia haapourihia to ratou mata, ia ore ratou ia ite, e ia piˈo to ratou tua i raro eiaha ia faaea. 11 E ui na râ vau, Ua turori hiˈa roa anei ratou? Eiaha roa ïa; ua tae râ te ora i te Etene i taua turori no ratou ra, ei faaooo atu ia ratou ia tipaupau. 12 E teie nei, o taua turori no ratou ra ta to te ao nei ïa faufaa, e to ratou ereraa, o to te Etene ïa faufaa, a tae ai hoi i to ratou rahiraa? 13 O outou o te Etene ta ˈu e parau atu nei, te haamaitai nei au i to ˈu nei toroa, no te mea o vau te aposetolo a te Etene: 14 peneiaˈe o te ooo faatipaupau to ˈu ra nunaa ia ˈu, e ia ora te tahi pae. 15 To ratou faarueraahia ra, o te faite ïa o to te ao, a tae ai hoi i te fariiraa ˈtu ia ratou, e ore anei e riro mai te ora no te pohe mai? 16 Te moˈa ra te hoturaa matamua ra, oia atoa te rahi atoa; e te moˈa ra te tumu ra, oia atoa te mau amaa. 17 E i ofene-ê-hia tahi pae i taua mau amaa ra, e o oe hoi, e te amaa o te tahi olive ê ra, tei poihia i roto ia ratou, e tei ia oe atoa te tumu e te hinu o taua olive ra; 18 eiaha oe e faaooo teoteo atu i to mau amaa ra. Ia teoteo hoi oe ra, e haamanaˈo e ere oe te mau i te tumu, o te tumu râ te mau ia oe. 19 E parau mai anei oe e, I ofene-ê-hia te mau amaa ia poihia vau i roto. 20 Ua tia ïa; no te faaroo ore i ofene-ê-hia ˈi ratou, e e tia faaroo hoi to oe. Eiaha ei aau teitei, ei mǎtaˈu râ. 21 Aore te Atua i faaherehere i te mau amaa mau ra, e ara, o te ore atoa hoi oia o te faaherehere ia oe: 22 e teie nei, a hiˈo na i te hamani maitai e te faaherehere ore a te Atua, faaherehere ore i te feia i hiˈa ra, area ia oe ra, o te hamani maitai ïa, ia haapao tamau oe i to ˈna hamani maitai, aore râ, e ooti-ê-atoa-hia oe.

23 E o ratou atoa hoi, ia ore ratou ia tamau mârô i te faaroo ore ra, e poihia ïa i roto: e tia hoi i te Atua ia poi faahou ia ratou i roto. 24 Ia ooti-ê-hia mai oe no nia i te olive oviri mau, e i poi-ê-hia oe i roto i te olive maitai: a tae ai hoi ia ratou i te amaa mau ra, e poihia mai ïa i roto i to ratou iho olive! 25 Aore hoi au i hinaaro, e au mau taeae, e ia ore outou ia ite i teie nei parau aro (o te teitei hua hoi to outou manaˈo ia outou iho;) e ua roohia Iseraela i te pouri poto, e ia ô atoa mai te rahi atoa o te Etene ra. 26 E ora paatoa ˈi Iseraela atoa: oia hoi tei papaihia ra e, E tae mai te Faaora mai roto mai ia Siona, e e faaore oia i te paieti ore i Iakoba ra. 27 E o ta ˈu â hoi teie faufaa ia ratou ra, ia hopoi ê atu vau i ta ratou ra hara. 28 I te haapaoraa i te evanelia nei, ua riro ïa ratou ei enemi ia outou: area i te maitiraa te herehia nei ïa ratou no to ratou feia metua. 29 O ta te Atua hoi i horoa noa e ta ˈna parauraa, aore ïa faaoreraa. 30 Mai ia outou hoi aore i faaroo i te Atua i mutaa ihora, e teie nei râ, ua arohahia mai outou i to ratou faaroo ore ra: 31 oia atoa hoi ratou ua ore aˈenei ua faaroo i teie nei, o outou i arohahia mai, ia aroha-atoa-hia mai ratou. 32 E faaroo ore anaˈe hoi ratou atoa i te vaiihoraahia e te Atua, ia aroha mai oia ia ratou atoa.

33 Auê te rahi hau ê atu o te paari e te ite o te Atua e! e te imiraa ore o tana faaauraa, e tana mau haerea i te itea ore ia imi e! 34 O vai hoi tei ite i te aau o te Fatu? e o vai to ˈna aˈo atu? 35 O vai hoi tei horoa ˈtu i te faufaa na ˈna, e tahoo-faahou-hia mai ïa oia? 36 No ˈna mai hoi, e na ˈna, e no ˈna te mau mea atoa nei: ei ia ˈna te haamaitai mure ore. Amene.