Te faatiaraa a Mareko

11 A piri atu ai ratou ia Ierusalema, faaea aˈera ratou i te mouˈa Oliveta to reira na oire rii o Betephage e Betania.+ Tono atura Iesu e piti o ta ˈna mau pǐpǐ+ 2 e na ô atura: “A haere i tera oire iti i mua ia orua, e ia tomo atu orua, e ite orua i te hoê fanauˈa asini tei taamuhia e aita â i parahihia ˈtura e te taata, a tatara e a putô mai. 3 E ia parau mai te tahi taata: ‘Te aha nei orua?,’ a na ô atu: ‘Te hinaaro mai ra te Fatu i teie animara. E faahoˈi oioi mai oia.’” 4 Reva ˈtura raua e ite aˈera i te fanauˈa asini tei taamuhia i mua i te uputa o te hoê fare i te pae purumu e tatara ihora.+ 5 Na ô maira râ vetahi e tia noa ra: “Eaha orua e tatara ˈi i tena fanauˈa asini?” 6 Parau atura raua mai ta Iesu i parau e vaiiho atura ratou ia raua ia haere.

7 Putô maira raua i te fanauˈa asini+ ia Iesu ra, tuu aˈera te mau pǐpǐ i to ratou ahu tapoˈi i nia iho, e parahi ihora Iesu i nia i te fanauˈa asini.+ 8 Vauvau atoa aˈera e rave rahi i to ratou ahu tapoˈi i nia i te purumu. Te tahi atu râ, ua tâpû ïa i te mau amaa raau na te pae purumu.+ 9 Te tuô noa ra te nahoa i mua e i muri mai ia ˈna: “A faaora na ia ˈna!+ Ia haamaitaihia tei haere mai ma te iˈoa o Iehova!*+ 10 Ia haamaitaihia te Faatereraa arii a* to matou metua ra o Davida+ e fatata mai ra! A faaora na ia ˈna, e te Atua i te raˈi teitei e!” 11 Tae atura Iesu i Ierusalema, tomo ihora i roto i te hiero e hiˈo atura i te mau mea atoa ati aˈe. No te mea râ ua ahiahi ê na, reva ˈtura oia e na 12 i Betania.+

12 I to muri iho mahana, a faarue ai ratou ia Betania, poia ihora Iesu.+ 13 Ite atura oia i te atea ê i te hoê tumu suke tei rauerehia, e haere atura e hiˈo e maa anei to nia iho. I to ˈna râ piriraa ˈtu, e rauere anaˈe ta ˈna i ite, e ere hoi i te tau e maahia ˈi te tumu suke. 14 Parau atura oia i taua tumu raau ra: “E ore roa te taata e amu faahou i to oe maa.”+ Te faaroo noa mai ra ta ˈna mau pǐpǐ.

15 Tae aˈera ratou i Ierusalema. Tomo ihora Iesu i roto i te hiero, tiahi atura i rapae i te feia e hoo atu ra e e hoo mai ra i roto i te hiero, e huri ihora i te mau amuraa maa a te feia taui moni e te mau parahiraa a te feia hoo uupa i raro.+ 16 Opani atura oia i te taata atoa ia tie i te taihaa na roto atu i te hiero. 17 Haapii atoa ˈtura oia i te taata a na ô ai: “Aita anei i papaihia: ‘E parauhia to ˈu fare e fare no te pure no te mau nunaa atoa’?+ Ua faariro râ outou i te reira ei ana no te eiâ.”+ 18 Faaroo aˈera te mau tahuˈa tiaau e te mau papai parau i te reira, e imi atura i te ravea no te haapohe ia Iesu+ no to ratou mǎtaˈu ia ˈna, no te mea te maere ra te nahoa atoa i ta ˈna haapiiraa.+

19 E ahiahi ihora, haere atura Iesu e ta ˈna mau pǐpǐ i rapae i te oire. 20 I te aahiata aˈe râ, a haere ai ratou na te purumu, ite atura ratou i te tumu suke tei mǎrô ê na mai te aˈa mai.+ 21 Haamanaˈo ihora Petero i te ohipa i tupu e na ô maira ia Iesu: “Rabi, a hiˈo na, ua mǎrô te tumu suke ta oe i faaino.”+ 22 Parau atura Iesu ia ratou: “A tiaturi i te Atua. 23 Oia mau ta ˈu e parau atu, ia na ô te taata i teie mouˈa: ‘Ia pee oe e ia taorahia i roto i te miti,’ e tupu iho â te reira ia ore to ˈna aau e feaa, ia tiaturi râ oia e e tupu iho â ta ˈna parau.+ 24 No reira, te parau atu nei au: Te mau mea atoa ta outou e ani ia pure outou, a tiaturi e ua noaa ia outou, e noaa iho â ïa.+ 25 E ia pure outou a tia noa ˈi, a faaore i ta vetahi ê hapa ia outou ia faaore atoa hoi to outou Metua i te raˈi ra i ta outou.”+ 26 *——

27 Hoˈi faahou maira ratou i Ierusalema. A haere noa ˈi Iesu i roto i te hiero, tapiri maira te mau tahuˈa tiaau, te mau papai parau e te mau aratai ati Iuda 28 e na ô maira ia ˈna: “I teihea mana e rave ai oe i teie mau mea? Aore ra na vai i horoa ia oe i teie mana no te rave i teie mau mea?”+ 29 Na ô atura Iesu: “E uiraa atoa ta ˈu. Ia pahono mai outou, e faaite atoa ˈtu ïa vau i teihea mana e rave ai au i teie mau mea. 30 Te bapetizoraa a Ioane,+ no te raˈi mai anei aore ra no ǒ mai i te taata ra? A pahono mai.”+ 31 Feruri ihora ratou e na ô aˈera te tahi i te tahi: “Ia parau tatou: ‘No te raˈi mai,’ e na ô mai ïa oia: ‘No te aha ïa outou i ore ai i tiaturi ia ˈna?’ 32 Ua ati râ tatou ia parau: ‘No ǒ mai i te taata ra’?” Te mǎtaˈu ra hoi ratou i te nahoa o te tiaturi ra e e peropheta mau â Ioane.+ 33 Pahono aˈera ïa ratou ia Iesu: “Aita matou i ite.” Na ô atura Iesu: “Eita atoa ïa vau e faaite atu i teihea mana e rave ai au i teie mau mea.”