Deuteronomi

30 “Ia tae mai teie mau parau atoa i nia ia oe, te haamaitairaa e te ati ta ˈu i tuu i mua ia oe,+ ia haamanaˈo oe i te reira+ i rotopu i te mau nunaa i reira Iehova to Atua e haapurara ˈi ia oe,+ 2 ia hoˈi oe ia Iehova to Atua+ e ia faaroo oe i to ˈna reo ia au i te mau mea atoa ta ˈu e faaue nei ia oe i teie mahana, ia oe e to mau tamarii, ma to oe aau atoa e to oe ora* atoa,+ 3 e faahoˈi mai ïa Iehova to Atua ia oe mai te faatîtîraa,+ e aroha hamani maitai oia ia oe+ e e haaputuputu faahou oia ia oe mai roto mai i te mau nunaa atoa i reira Iehova to Atua i haapurara ˈi ia oe.+ 4 Purara noa ˈtu to mau taata tae noa ˈtu i te hopea o te raˈi, mai reira mai Iehova to Atua e haaputuputu ai ia oe e e faahoˈi mai ai ia oe.+ 5 E aratai Iehova to Atua ia oe i te fenua ta to mau metua i fatu, e o oe te fatu i te reira. E faarahi oia i ta oe mau faufaa e e faarahi oia i to huaai hau aˈe i to to oe mau metua.+ 6 E tamâ* Iehova to Atua i to aau e te aau o to huaai,+ ia here hoi oe ia Iehova to Atua ma to oe aau atoa e to oe ora* atoa, e e ora oe.+ 7 E e faatae Iehova to Atua i teie mau ati atoa i nia i to oe mau enemi, tei hae e tei hamani ino ia oe.+

8 “E hoˈi e e faaroo oe i te reo o Iehova e e haapao oe i ta ˈna mau faaueraa atoa ta ˈu e faaue nei ia oe i teie mahana. 9 E ninii mai Iehova to Atua i te haamaitairaa rahi i nia i te ohipa atoa a to rima,+ a faarahi ai i ta oe mau tamarii e ta oe mau animara e te maa o to oe fenua. E oaoa faahou hoi Iehova i te faarahi i ta oe mau faufaa, mai ia ˈna i oaoa i to mau tupuna.+ 10 E faaroo hoi oe i te reo o Iehova to Atua e e auraro oe i ta ˈna mau faaueraa e faatureraa papaihia i roto i teie buka o te Ture. E e hoˈi oe ia Iehova to Atua ma to oe aau atoa e to oe ora* atoa.+

11 “E ere hoi teie faaueraa ta ˈu e faaue nei ia oe i teie mahana i te mea fifi roa no oe, e ere atoa mea atea ia oe.+ 12 Aita te reira to nia i te raˈi, a parau atu ai oe: ‘O vai te haere i nia i te raˈi e tii i te reira no tatou, ia faaroo e ia haapao tatou i te reira?’+ 13 Aita atoa te reira to te tahi atu pae o te moana, a parau atu ai oe: ‘O vai te fano i te tahi atu pae o te moana e tii i te reira no tatou, ia faaroo e ia haapao tatou i te reira?’ 14 Tei pihai iho roa hoi te parau ia oe, to roto i to oe iho vaha e to roto i to oe iho aau,+ ia faaohipa oe i te reira.+

15 “Inaha, te tuu nei au i mua ia oe i teie mahana i te ora e te maitai, te pohe e te ino.+ 16 Ia faaroo oe i te mau faaueraa a Iehova to Atua ta ˈu e faaue nei ia oe i teie mahana, ma te here ia Iehova to Atua,+ ma te haere na to ˈna mau eˈa, e ma te auraro i ta ˈna mau faaueraa, ta ˈna mau faatureraa e ta ˈna mau faaotiraa haavaraa, e ora oe,+ e rahi to huaai, e e haamaitai Iehova to Atua ia oe i te fenua ta oe e fatata i te fatu.+

17 “Ia fariu ê râ to aau+ e ia ore oe e faaroo, ia hema oe e ia piˈo oe i raro i mua i te tahi atu mau atua, a tavini atu ai ia ratou,+ 18 te parau atu nei au ia outou i teie mahana e e pohe mau â outou.+ Eita outou e ora maoro i te fenua ta outou e fatu i te tahi atu pae o Ioridana. 19 Te rave nei au i teie mahana i te raˈi e te fenua ei ite no ta oe e rave e ua tuu vau i te ora e te pohe i mua ia oe, te haamaitairaa e te ati.+ E e maiti oe i te ora ia ora oe,+ oe e to huaai,+ 20 ma te here ia Iehova to Atua,+ ma te faaroo i to ˈna reo, e ma te ati maite ia ˈna,+ o ˈna hoi to oe ora e maoti o ˈna e vai maoro ai oe i te fenua ta Iehova i horeo e horoa no to mau tupuna, Aberahama, Isaaka e Iakoba.”+