Te rata i to Ephesia

4 O vau, tei mau i te fare tapearaa+ nei no te Fatu, te taparu nei ia outou e ia au to outou haerea+ i to te feia i titau-manihini-hia 2 ma te haehaa+ e te mǎrû e te faaoromai,+ e na roto i te here,+ ia faaoromai ïa i ta te tahi e te tahi ra hapa, 3 i te tutava-maite-raa ia vai â te autahoê ta te varua moˈa e faatupu, e te hau e tahoê ra ia outou.+ 4 Hoê anaˈe tino e vai ra,+ e hoê anaˈe varua moˈa,+ mai ia outou atoa hoi i titau-manihini-hia no te hoê tiaturiraa.+ 5 Hoê anaˈe Fatu,+ hoê anaˈe faaroo, e hoê anaˈe bapetizoraa. 6 Hoê anaˈe Atua e Metua no te taata atoa, tei nia ê oia i te taata atoa e te ohipa ra oia na roto e i roto i te taata atoa.

7 E teie nei, ua horoahia mai te hamani maitai rahi ia tatou tataitahi ia au i te tufaraa a te Mesia i taua ô ra ia tatou.+ 8 Te parauhia ra hoi: “Ua rave oia i te taata e rave rahi ei tîtî i to ˈna haereraa i nia. Ua horoa mai oia i te taata ei ô.”+ 9 E teie nei, eaha te auraa o te parau “i to ˈna haereraa i nia”? Te auraa, ua pou atoa mai oia i raro nei, i te fenua. 10 O tei pou mai i raro nei, oia atoa ïa tei haere i nia+ ê roa i te mau raˈi atoa,+ ia hope roa ia ˈna te mau mea atoa i te faatupu.

11 I te mau ô atoa ta ˈna i horoa i te amuiraa, e aposetolo vetahi,+ e peropheta vetahi,+ e feia poro evanelia* vetahi,+ e tiai e e taata haapii vetahi,+ 12 no te faatitiaifaro* i te feia moˈa, no te ohipa i roto i te taviniraa, no te patu i te tino o te Mesia,+ 13 e ia noaa roa ia tatou paatoa te hoê â faaroo e te hoê â ite papu* i te Tamaiti a te Atua, a riro mai ai tatou ei taata paari*+ ia au i te faito paari o te Mesia. 14 No reira, eiaha tatou ia riro faahou mai te tamarii ra, i te opaopa-noa-raa i te are miti e te painu-haere-raa i te mataˈi o te haapiiraa haavare+ a te taata, na roto i ta ratou mau ravea haavarevare. 15 Tera râ, ia faaite noa tatou i te parau mau, e ma te here, ia haere noa ïa tatou i te paariraa i te mau mea atoa mai te upoo, oia hoi te Mesia.+ 16 No ˈna hoi i tuatiatihia ˈi te mau tuhaa atoa o te tino+ ma te au maite, e maoti te mau puoiraa ivi, te ohipa amui nei te mau tuhaa atoa no te horoa i te tino i ta ˈna e hinaaro mau ra. Ua ohipa maitai anaˈe te mero tataitahi atoa, e tupu maitai ïa te tino a patu noa ˈi ia ˈna iho i roto i te here.+

17 Teie ïa ta ˈu e parau e e haapapu atu i te aro o te Fatu, eiaha to outou haerea ia au faahou i to te mau nunaa ěê,+ i te faufaa ore o to ratou feruriraa.*+ 18 Ua poirihia to ratou feruriraa e ua atea ê i te ora no ǒ mai i te Atua ra, no to ratou ite ore ia ˈna e no te etaeta o to ratou aau.* 19 Aita faahou ratou i ite i te haama e ua rave noa ˈtura i te peu faufau*+ e te peu viivii atoa ma te mâha ore.

20 Tera râ, e ere teie tei haapiihia ia outou no nia i te huru o te Mesia, 21 mai te peu e ua faaroo mau outou ia ˈna e ua haapiihia e ana ia au i te parau mau e vai atoa ra ia Iesu. 22 Ua haapiihia outou ia haapae i te huru taata tahito+ tei au i to outou haerea na mua ˈˈe ra e o te viivii noa ˈtu ra i te hinaaro haavarevare.+ 23 E ia tamau noa outou i te faaapî i to outou huru feruriraa,*+ 24 e ia ahu mai i te huru taata apî+ tei poietehia ia au i te hinaaro o te Atua i te parau-tia e te haapao maitai mau ra.

25 I teie nei hoi ua haapae outou i te haavare, ia parau noa ïa te taata tataitahi i te parau mau i to ˈna taata tupu,+ no te mea e mero anaˈe tatou no te hoê â tino.+ 26 Ia riri noa ˈtu outou, eiaha roa e hara.+ Eiaha te mahana ia topa e te riri noa ra outou.+ 27 Eiaha roa e tuu i te Diabolo i te tahi ravea no te faahema ia outou.*+ 28 Eiaha te taata e eiâ ra ia eiâ faahou, ia rohi râ i te raveraa i te ohipa maitai i to ˈna iho rima,+ a opere atu ai i te noaa ia ˈna i te feia e ere ra.+ 29 Eiaha ei parau hairiiri no roto mai i to outou vaha,+ ei parau maitai noa râ no te patu i te taime e au, a faufaahia ˈtu ai te feia e faaroo ra.+ 30 Eiaha atoa e faainoino* i te varua moˈa o te Atua,+ ua tapaohia hoi outou i taua varua ra+ no te mahana e tiamâ mai ai outou maoti te hoo.+

31 A haapae roa i te inoino+ e rave rau i rotopu ia outou, e te riri, te iria, te tutuôraa, te parau ino+ e te mau mea iino atoa.+ 32 Ia hamani maitai râ outou te tahi i te tahi, ma te aumihi î i te here,+ i te faaoreraa ˈtu i te hapa mai te Atua atoa i faaore noa mai i ta outou iho na roto i te Mesia.+