Numera

16 Tia amui aˈera ïa Kora+ te tamaiti a Izahara,+ te tamaiti a Kohata,+ te tamaiti a Levi,+ ratou Datana e Abirama na tamaiti a Eliaba,+ e Ono te tamaiti a Pereta, no te mau tamaiti a Reubena.+ 2 Tia aˈera ratou e 250 tane Iseraela no te patoi ia Mose, e raatira no te amuiraa, e feia maitihia o te amuiraa, e feia mana. 3 Amui aˈera ïa ratou no te patoi+ ia Mose raua Aarona e parau maira ia raua: “Ua ravai roa matou ia orua! Te amuiraa taatoa mea moˈa,+ pauroa ratou, e to rotopu Iehova ia ratou.+ Eaha ïa orua e faateitei ai ia orua i nia ˈˈe i te amuiraa a Iehova?”

4 I to Mose faarooraa i te reira, topa ihora oia te mata i raro. 5 Parau atura oia ia Kora e pauroa te taata e turu ra ia ˈna: “Ananahi poipoi e faaite ai Iehova o vai te taata no ˈna+ e o vai te mea moˈa e o vai te tano ia faafatata ia ˈna,+ e te taata ta ˈna e maiti,+ o ˈna ïa te faafatata ia ˈna. 6 A na ô: A rave i te tahi mau farii auahi,+ Kora e te feia atoa e turu ra ia oe,+ 7 e a tuu i te auahi i roto e te mea noˈanoˈa i nia iho i mua ia Iehova ananahi, e te taata ta Iehova e maiti,+ o ˈna ïa te mea moˈa. Ua rahi roa ta outou te tamaiti a Levi!”+

8 Na ô atura Mose ia Kora: “Faaroo mai na, outou te mau tamaiti a Levi. 9 Mea iti anei no outou e ua faataa mai te Atua o Iseraela ia outou no roto mai i te amuiraa o Iseraela,+ a faatia ˈtu ai ia outou ia faafatata mai no te rave i te taviniraa i ta Iehova sekene e no te tia i mua i te amuiraa no te tavini ia ratou,+ 10 e ua aratai mai ia outou i pihai iho ia ˈna e to outou mau taeae atoa, te mau tamaiti a Levi? E titau atoa anei ïa outou i te autahuˈaraa?+ 11 No reira, o oe e te feia atoa e turu ra ia oe, te patoi ra outou pauroa tei amui mai ia Iehova. E o Aarona, o vai o ˈna ia amuamu outou ia ˈna?”+

12 I muri iho, faaue atura Mose ia tiihia Datana raua Abirama+ na tamaiti a Eliaba. Na ô maira râ raua: “Eita mâua e haere atu! 13 Aita anei i navai to oe aratairaa ia matou mai te hoê fenua e tahe noa te û e te meri no te haapohe ia matou i te medebara?+ E hinaaro atoa oe e faariro ia oe ei faatere mana hope i nia ia* matou? 14 Tera iho â, aita oe i aratai ia matou i te hoê fenua e tahe noa te û e te meri,+ aita atoa oe i horoa no matou i te tahi tâpû fenua e faaapu vine. E haamatapo anei oe i tera mau taata? Eita mâua e haere atu!”

15 Riri roa ihora ïa Mose e parau atura ia Iehova: “Eiaha e fariu no te hiˈo i ta ratou tusia huero maa. Aita vau i rave hoê aˈe asini ta ratou, e aita vau i hamani ino hoê aˈe o ratou.”+

16 Parau atura Mose ia Kora: “Ia tia oe e te feia atoa e turu ra ia oe i mua ia Iehova ananahi, o oe e o ratou, e o Aarona. 17 Ia rave outou tataitahi i ta outou farii auahi a tuu atu ai i te mea noˈanoˈa i nia iho, e e pûpû outou tataitahi i ta outou iho farii auahi i mua ia Iehova, e 250 farii auahi, e orua o Aarona, e ta orua tataitahi farii auahi.” 18 Rave maira ïa ratou tataitahi i ta ratou farii auahi, tuu aˈera i te auahi i roto e te mea noˈanoˈa i nia iho, e tia aˈera ratou i te tomoraa o te tiahapa o te amuiraa, ratou Mose e Aarona. 19 I te haaputuputuraa Kora i te feia atoa e turu ra ia ˈna+ i te tomoraa o te tiahapa o te amuiraa no te patoi ia raua, fa maira to Iehova hanahana i te amuiraa taatoa.+

20 Na ô maira Iehova ia Mose raua Aarona: 21 “A faataa ê ia orua i teie pǔpǔ, ia haamou vau ia ratou i teie nei.”+ 22 Topa ihora raua te mata i raro e parau atura: “E te Atua, te Atua o te puai ora* o te mau taata atoa,+ no te hara anei a te hoê noa taata e riri ai oe i te amuiraa taatoa?”+

23 Na ô maira Iehova ia Mose: 24 “A paraparau i te amuiraa e a na ô atu: ‘Eiaha e faaea ati aˈe te mau fare ie o Kora, Datana e Abirama!’”+

25 Tia aˈera Mose e haere atura ia Datana raua Abirama, e na muri atura te mau matahiapo+ o Iseraela ia ˈna. 26 Parau atura oia i te amuiraa: “A faaatea ê mai na i te mau fare ie o teie mau taata ino e eiaha e tapea i te tahi mea na ratou, ia ore outou ia haamouhia no ta ratou mau hara atoa.” 27 I reira iho, faaatea ê aˈera ratou i te mau fare ie o Kora, Datana e Abirama, e ati aˈe, e haere maira Datana e Abirama i rapae, a tia ˈtu ai i mua i te tomoraa o to raua fare ie, e ta raua na vahine faaipoipo, ta raua mau tamaiti e ta raua mau tamarii rii.

28 Na ô atura Mose: “I teie outou e ite ai e na Iehova i tono ia ˈu e rave i taua mau mea atoa, e ere na ˈu iho i opua:* 29 Ia pohe tera mau taata mai ta te huitaata atoa ra e pohe, e ia hoê â utua ta ratou e ta te huitaata atoa, aita ïa Iehova i tono ia ˈu.+ 30 Ia faatupu râ Iehova i te tahi ohipa maere mau ia ratou, ia amaha te fenua* e ia horomii ia ratou e ta ratou mau faufaa atoa a pou ora ˈtu ai i te Apoo,* e ite mau â outou e ua faatura ore teie mau taata ia Iehova.”

31 I te otiraa iho â teie mau parau atoa ta ˈna, afâ+ ihora te fenua i raro aˈe ia ratou. 32 Amaha ihora te fenua* e horomii ihora ia ratou, to ratou mau utuafare, pauroa te taata o Kora+ e ta ratou mau faufaa atoa. 33 Pou ora ihora ïa ratou i roto i te Apoo* e ta ratou mau faufaa atoa, e tapoˈi atura te fenua ia ratou ia mou ratou mai rotopu i te amuiraa.+ 34 Horo pauroa aˈera te ati Iseraela na pihai iho ia ratou ma te tutuô, ua parau hoi ratou: “Te mǎtaˈu nei matou aˈunei te fenua e horomii ai ia matou!” 35 E auahi maira no ǒ mai ia Iehova+ e pau aˈera na 250 tane e pûpû ra i te mea noˈanoˈa.+

36 Na ô maira Iehova ia Mose: 37 “A parau ia Eleazara te tamaiti a Aarona te tahuˈa ia rave i te mau farii auahi+ mai roto mai i te rehu, mea moˈa hoi taua mau farii ra. A parau atoa ia ˈna ia haapurara i te rehu i te atea rii. 38 Ia hamanihia te mau farii auahi ta taua mau tane ra tei hara a pohe atu ai ratou ei api veo rairai no te tapiri atu i nia iho i te fata,+ no te mea ua pûpû ratou i te reira i mua ia Iehova, i moˈa ˈi te reira. Ia riro te reira ei tapao no te ati Iseraela.”+ 39 Rave maira ïa Eleazara te tahuˈa i te mau farii auahi veo tei pûpûhia e te feia i taninahia, e tupai atura i te reira no te tapiri atu i nia iho i te fata, 40 mai ta Iehova iho â i parau ia ˈna na roto ia Mose. E haamanaˈoraa te reira no te ati Iseraela e eiaha te tahi taata aita i faatiahia,* e ere i te huaai o Aarona, ia faafatata mai no te tutui i te mea noˈanoˈa i mua ia Iehova+ mai ia Kora e te feia tei turu ia ˈna.+

41 Ananahi aˈe, haamata ihora te amuiraa taatoa o te ati Iseraela i te amuamu ia Mose raua Aarona,+ a na ô ai: “Na orua e piti i haapohe i te nunaa o Iehova.” 42 I te putuputuraa te amuiraa no te orure hau ia Mose raua Aarona, fariu atura ratou i te tiahapa o te amuiraa, e inaha, tapoˈi ihora te ata i te reira e fa maira to Iehova hanahana.+

43 Haere aˈera Mose raua Aarona i mua i te tiahapa o te amuiraa,+ 44 e na ô maira Iehova ia Mose: 45 “A faaatea ia orua mai rotopu i teie amuiraa, ia nehenehe au e haamou ia ratou i teie nei.”+ Topa ihora raua te mata i raro.+ 46 Na ô atura Mose ia Aarona: “A rave i te farii auahi e a tuu maa auahi o te fata+ i roto, a tuu atu ai i te mea noˈanoˈa i nia iho, e a haaviti i te haere i te amuiraa no te pûpû i te faahauraa no ratou,+ no te mea ua riri roa Iehova. Ua haamata te ati!” 47 Rave ihora Aarona i te reira, mai ta Mose iho â i parau ia ˈna, e horo atura i rotopu i te amuiraa, e inaha, ua haamata te ati i rotopu i te nunaa. Tuu ihora ïa oia i te mea noˈanoˈa i nia iho i te farii auahi e pûpû atura i te faahauraa no te nunaa. 48 Tia noa ihora oia i rotopu i te feia pohe e te feia ora, e ore atura te ati i muri iho. 49 Te feia tei pohe no te ati, 14 700 ïa, hau atu i tei pohe no Kora. 50 I te hoˈiraa Aarona ia Mose ra i te tiahapa o te amuiraa, ua ore te ati.