Paraleipomeno buka matamua
28 Titau maira Davida i te huiarii taatoa o Iseraela i Ierusalema: te huiarii o te mau opu, te mau raatira o te mau pǔpǔ+ o tei tavini i te arii, te mau raatira tausani e raatira hanere,+ te mau raatira o tei haapao i te faufaa e te mau nǎnǎ a te arii+ e a ta ˈna mau tamaiti,+ e te mau tia mana, e te mau tane puai e te itoito atoa.+ 2 Tia aˈera te arii Davida e parau atura:
“A faaroo mai ia ˈu, e to ˈu mau taeae e to ˈu nunaa. Ua hinaaro vau e patu i te hoê fare ei vairaa* no te afata o te faufaa a Iehova e ei taahiraa avae no to tatou Atua,+ e ua faaineine au i te ohipa no tera paturaa.+ 3 Ua parau mai râ te Atua mau ia ˈu: ‘E ere na oe e patu i te fare no to ˈu iˈoa,+ e taata tamaˈi hoi oe e ua haamanii oe i te toto.’+ 4 Tera râ, ua maiti o Iehova te Atua o Iseraela ia ˈu i rotopu i te utuafare taatoa o to ˈu metua tane ia riro vau ei arii no Iseraela e a muri noa ˈtu.+ Ua maiti hoi oia ia Iuda ei aratai.+ E to te opu o Iuda, ua maiti oia i te utuafare o to ˈu metua tane.+ E i rotopu i te mau tamaiti a to ˈu metua tane, o vau ta ˈna i maiti no te riro ei arii no Iseraela taatoa.+ 5 E i rotopu i ta ˈu mau tamaiti atoa (mea rahi hoi te tamaiti+ ta Iehova i horoa mai), ua maiti oia ia Solomona+ no te parahi i nia i te terono o Iehova e no te faatere ia Iseraela.+
6 “Ua parau oia ia ˈu: ‘Na ta oe tamaiti o Solomona e patu i to ˈu fare e to ˈu mau aua, ua maiti hoi au ia ˈna ei tamaiti na ˈu e e riro vau ei metua no ˈna.+ 7 E haamau papu vau i to ˈna mana arii e a muri noa ˈtu,+ ia haapao maite oia i ta ˈu mau faaueraa e ta ˈu mau faaotiraa haavaraa,+ mai ta ˈna e rave ra i teie nei.’ 8 No reira, te parau nei au i mua i te aro o Iseraela taatoa, ta Iehova amuiraa, e i mua i to tatou Atua: A imi e a haapao maite i te mau faaueraa atoa a Iehova to outou Atua, ia faaea noa outou i teie fenua maitai+ e ia tufa ˈtu outou i te reira no ta outou mau tamaiti ei faufaa mure ore.
9 “E oe, Solomona ta ˈu tamaiti, ia ite oe o vai te Atua o to metua tane e ia tavini oe ia ˈna ma te aau taatoa e te aau tae,+ te hiˈopoa maite nei hoi Iehova i te mau aau atoa+ e te ite ra oia i te mau manaˈo e opuaraa atoa.+ Ia imi oe ia ˈna, e vaiiho oia ia itehia mai oia e oe.+ Ia faarue râ oe ia ˈna, e patoi oia ia oe e a muri noa ˈtu.+ 10 Inaha, ua maiti Iehova ia oe no te patu i te hoê fare o te riro ei nao.* A faaitoito e a ohipa.”
11 Horoa ˈtura Davida ia Solomona ra ta ˈna tamaiti te hohoˈa hamaniraa+ o te taupee+ e te mau piha e rave rau, oia hoi te mau piha vairaa taoˈa, te mau piha i nia, te mau piha i roto roa, e te vahi i reira te Atua e faaore ai i te hara.*+ 12 Ua horoa oia ia ˈna te hohoˈa hamaniraa o te mau mea atoa i faaitehia ia ˈna maoti te varua o te Atua, no te mau aua+ o te hiero* o Iehova, no te mau vahi tamaaraa atoa ati aˈe, no te mau piha vairaa taoˈa o te hiero o te Atua mau, e no te mau piha e vaiihohia ˈi te mau taoˈa faataahia no te haamoriraa.*+ 13 Ua faaite atoa ˈtu oia eaha te faanahoraa no te mau pǔpǔ tahuˈa+ e te ati Levi, no te mau tuhaa ohipa atoa no te hiero o Iehova, e no te mau taihaa atoa e faaohipahia no te taviniraa i te hiero o Iehova. 14 Ua faataa atoa oia i te teiaha o te auro, te auro no te mau taihaa atoa no te mau tuhaa taviniraa e rave rau, e te teiaha o te mau taihaa ario atoa no te mau tuhaa taviniraa e rave rau. 15 Ua faataa atoa oia i te teiaha o te mau vairaa mori auro+ e to ratou mau mori auro, te teiaha o te mau vairaa mori e rave rau e to ratou mau mori, e te faito o te mau vairaa mori ario, te vairaa mori tataitahi e to ˈna mau mori, ia au i to ˈna faaohiparaa. 16 Ua faataa atoa oia i te teiaha o te auro no te mau amuraa maa o te pane apǎpǎhia,*+ no te amuraa maa tataitahi, e te teiaha atoa o te ario no te mau amuraa maa ario, 17 te teiaha o te auro no te mau patia, te mau auˈa, te mau pita auro tamâhia, te faito o te mau auˈa auro nainai,+ te auˈa nainai tataitahi, e te faito o te mau auˈa ario nainai, te auˈa nainai tataitahi. 18 Ua faaite atoa oia i te teiaha o te auro tamâhia no te fata mea noˈanoˈa+ e no te hohoˈa o te pereoo,+ oia hoi na kerubi+ auro o tei haamahora i to raua na pererau e o tei tapoˈi i te afata o te faufaa a Iehova i te reira. 19 Parau atura Davida: “Ua aratai Iehova ia ˈu, e ua horoa mai oia i te haroˈaroˈa no te papai+ i te mau tuhaa rii atoa o te hohoˈa hamaniraa.”+
20 Na ô atura Davida ia Solomona ta ˈna tamaiti: “Ia itoito e ia puai oe, e a ohipa. Eiaha e mǎtaˈu e eiaha e riaria, tei pihai iho te Atua ra o Iehova, to ˈu Atua, ia oe.+ Eita oia e taiva ia oe e eita oia e faarue ia oe.+ Ei pihai iho râ oia ia oe e oti noa ˈtu te mau ohipa atoa o te fare o Iehova i te ravehia. 21 E tera te mau pǔpǔ o te mau tahuˈa+ e o te ati Levi+ o te rave i te mau tuhaa ohipa atoa i te fare o te Atua mau. Te vai ra ia oe ra te feia aravihi, mea ite i te mau huru ohipa atoa,+ e ua ineine i te turu ia oe. Te vai atoa ra te huiarii+ e te nunaa taatoa, o te haapao i ta oe mau faaueraa atoa.”