Deuteronomi

6 “Teie hoi te mau faaueraa, te mau ture, e te mau faaotiraa haavaraa ta Iehova to outou Atua i horoa mai no te haapii ia outou, ia nehenehe outou e haapao i te reira ia haere outou i te tahi atu pae i te fenua ta outou e fatu. 2 E mǎtaˈu ïa outou ia Iehova to outou Atua e e auraro outou i ta ˈna mau faatureraa e faaueraa atoa ta ˈu e faaue nei ia outou, outou e ta outou tamaiti e ta outou mootua,+ pauroa te mahana o to outou oraraa, a ora maoro atu ai outou.+ 3 E ia faaroo mai outou, e Iseraela, e ia haapao maitai i te reira, e rahi ïa ta outou mau faufaa e e rahi roa outou i te fenua e tahe noa ˈi te û e te meri, mai ta Iehova iho â, te Atua o to outou mau tupuna, i fafau ia outou.

4 “A faaroo mai, e Iseraela: Iehova to tatou Atua, hoê anaˈe ïa Iehova.+ 5 Ia here oe ia Iehova to oe Atua ma to oe aau atoa e to oe ora*+ atoa e to oe puai+ atoa. 6 Ia vai teie mau parau ta ˈu e faaue nei ia oe i teie mahana i nia i to aau, 7 ia haapii tamau* oe i te reira* i ta oe mau tamarii,+ ia paraparau oe no nia i te reira ia parahi oe i roto i to fare, ia haere oe na nia i te purumu, ia tarava oe e ia tia mai oe i nia.+ 8 A taamu i te reira i nia i to rima ei haamanaˈoraa, e ia riro te reira mai te hoê taamu upoo i nia i to rae.*+ 9 A papai i te reira i nia i na pou opani o to fare e i nia i to mau uputa.*

10 “Ia aratai Iehova to Atua ia oe i te fenua ta ˈna i horeo i to mau tupuna o Aberahama, Isaaka e Iakoba e horoa no oe:+ te mau oire rarahi e te au mau ta oe i ore i patu,+ 11 te mau fare î i te mau mea maitatai ua rau te huru ta oe i ore i rohi, te mau apoo pape ta oe i ore i ô, te mau vine e te mau tumu olive ta oe i ore i tanu, e ta oe i amu a paia ˈtu ai,+ 12 a ara eiaha e haamoˈe ia Iehova,+ tei aratai ia oe i rapae i Aiphiti, te fenua* o te faatîtîraa. 13 O Iehova to oe Atua ta oe e mǎtaˈu,+ e o ˈna ta oe e tavini,+ e i to ˈna ora e horeo ai oe e tia ˈi.+ 14 Eiaha outou e pee i te tahi atu mau atua, te mau atua o te mau nunaa e haaati ra ia outou,+ 15 e Atua hoi Iehova to outou Atua i rotopu ia outou, o te titau ra ia haamorihia o ˈna anaˈe.+ O te ura hoi te riri o Iehova to outou Atua ia outou,+ a haamou atu ai oia ia outou mai nia i te fenua.+

16 “Eiaha outou e aa ia Iehova to outou Atua+ mai ta outou i aa ia ˈna i Mâsa.+ 17 E haapao maitai outou i te mau faaueraa a Iehova to outou Atua e ta ˈna mau haamanaˈoraa e ta ˈna mau ture ta ˈna i faaue ia outou ia haapao. 18 E rave outou i te mea afaro e te mea maitai i te aro o Iehova, ia rahi ta outou mau faufaa, ia tomo e ia fatu outou i te fenua maitai ta Iehova i horeo i to outou mau tupuna,+ 19 ma te tiahi i to outou mau enemi atoa mai mua ia outou, mai ta Iehova iho â i fafau.+

20 “Ia ui mai to tamaiti ia oe a muri aˈe: ‘Eaha te auraa o te mau haamanaˈoraa, ture e faaotiraa haavaraa ta Iehova to tatou Atua i faaue mai?’ 21 e na ô ïa oe i to tamaiti: ‘E tîtî tatou na mua ˈˈe no Pharao i Aiphiti, ua aratai râ Iehova ia tatou i rapae i Aiphiti ma te rima puai. 22 No reira, i mua i to tatou mata, ua tamau noa Iehova i te faatae mai i te tapao e te semeio rahi e te ino mau i nia i to Aiphiti,+ ia Pharao e to ˈna utuafare taatoa.+ 23 Ua aratai oia ia tatou mai reira mai e ua afai mai ia tatou i ǒ nei no te horoa no tatou i te fenua ta ˈna i horeo i to tatou mau tupuna.+ 24 E ua faaue mai Iehova ia haapao i tera mau ture atoa e ia mǎtaˈu ia Iehova to tatou Atua no to tatou maitai mure ore,+ ia ora noa tatou,+ mai i teie mahana. 25 Ei parau-tia te reira no tatou ia haapao maitai tatou i tera mau faaueraa atoa ma te faaroo ia* Iehova to tatou Atua mai ta ˈna iho â i faaue ia tatou.’+