Te fatata nei te opuaraa a te Atua i te tupu
Te opuaraa a te Atua i to ˈna poieteraa i te fenua nei, ia faaeahia oia e te mau taata oaoa te ora noa i roto i te parau-tia. Ia ora noa ratou e tia ïa i te huitaata nei ia auraro i te mau ture a te Atua. No te faaroo ore hoi, ua riro maira te tane matamua e te vahine matamua ei mau taata hara faautuahia e te pohe. Mea na reira to raua huaai te taearaahia i te hara e te pohe. — Genese 1:27, 28; 2:16, 17; 3:1-19; Roma 5:12.
Ua opua ihora te Atua, tei piihia Iehova, e haamou roa i nia i te fenua nei te mau hopearaa o te faaroo ore e te hara. I te hoê mahana ua hiˈo maira oia i te huitaata nei e ua ite maira ia Aberama, te hoê taata haapao maitai o ta ˈna i taui te iˈoa ia Aberahama. Ua tǎpǔ atu te Atua ia ˈna e e riro to ˈna huaai ei nunaa rahi, e na roto i teie nunaa e faatupu ai oia i te hoê huaai e maitai ai te mau fenua atoa o te fenua nei. — Genese 12:1-3; 18:18, 19; 22:18; Salamo 83:18; Hebera 11:8-16.
I te hopea o te XVIraa o te senekele hou to tatou nei tau, ua faatupu te mau huaai a te mootua a Aberahama, o Iakobo aore ra o Iseraela, ahuru ma piti opu tei tapea-tîtî-hia i Aiphiti. Ua faaora mai Iehova i taua mau Iseraela ra e ua faariro ia ratou ei nunaa. I te mouˈa o Sinaï, na roto i te arai o Mose, ua horoa ˈtu oia i te Ture ei pǎpǎ ture no to ratou nunaa. O Iehova to ratou Arii, to ratou Haava e to ratou Iriti ture. Ua riro maira te nunaa Iseraela ei nunaa maitihia e te Atua e e mau ite faanahohia no te turu i ta ˈna opuaraa. No roto mai ia ratou te Mesia tei ia ˈna hoi te hopoia no te haamauraa i te hoê Basileia mure ore ei haamaitairaa no te mau taata o te mau nunaa atoa. — Exodo 19:5, 6; Paraleipomeno 1, 17:7-14; Te mau arii 1, 4:20, 25; Isaia 33:22; 43:10-12; Roma 9:4, 5.
A piti tausani matahiti i teie nei, oia hoi ahuru ma pae senekele i muri iho, ua tono maira te Atua mai te raˈi mai i ta ˈna Tamaiti fanau tahi i te fenua nei, fanauhia e te hoê paretenia ati iuda tei piihia o Maria. Ua mairihia to ˈna iˈoa o Iesu e e Fatu ïa oia i te Basileia i tǎpǔhia mai e te Atua i to ˈna ra tupuna ia Davida. I te 30raa o to ˈna matahiti, ua bapetizohia Iesu e Ioane Bapetizo e ua poro haere atura oia i te Basileia o te Atua. Na roto i ta ˈna mau faaoraraa, ua faaite oia e mea nafea te Basileia ia haamaitai i te huitaata nei. Na roto i te ravea o te mau faahohoˈaraa, ua faataa maira oia i te mea e titauhia ra i te taatoaraa o te feia e hinaaro ra i te ora mure ore. I muri iho ua haapohehia Iesu i nia i te pou, riro maira to ˈna ora taata tia ei hoo no te huitaata nei. — Mataio 1:18-24; 3:13-16; 4:17-23; 6:9, 10; Pene 13; 20:28; Luka 1:26-37; 2:14; 4:43, 44; 8:1; Ioane 3:16; Ohipa 10:37-39.
I parau na hoi Iesu e e haamauhia te Basileia o te Mesia i roto i te hoê tau roa i muri mai, i te hopea no te amuiraa o te mau mea nei. I taua taime ra, e parahi varua oia i roto i te mau raˈi i nia i to ˈna tiaraa Arii faatere, e e faaite mai oia e tei reira oia na roto i to ˈna hiˈo aroharaa mai i to te fenua nei. Te faaite nei te mau huru tupuraa i roto i te ao nei e tei roto tatou i taua anotau ra mai te matahiti 1914 maira. Mai ta Iesu i tohu, te parau-haere-hia nei te parau apî maitai o te Basileia na te ao nei ia ite te mau fenua atoa. Maoti hoi te reira i te ao atoa nei, te haaputuhia nei te mau taata i te paeau o te Basileia o te Atua. E ora mai ratou ia tae i te hopea o te amuiraa o te mau mea nei e e noaa hoi ia ratou te ora mure ore i nia i te fenua nei i raro aˈe i te Basileia o te Mesia. — Mataio pene 24 e te 25; Apokalupo 7:9-17.
I teie mahana, e rave rahi mau Ekalesia te faahua parau nei e te faaohipa nei ratou i te hinaaro o te Atua. Nafea râ e itehia ˈi te amuiraa kerisetiano mau? Na roto ïa i te hiˈopoa-maite-raa i te mau Papai e faataa ra i te amuiraa kerisetiano no te senekele matamua a hiˈo ai e o vai, i to tatou nei mahana, te pee ra i teie hiˈoraa.
● Eaha te tiaraa o Aberahama e o Iseraela i roto i te tupuraa o te opuaraa a te Atua?
● Eaha ta Iesu i faatupu na roto i ta ˈna taviniraa e to ˈna poheraa?
● Ia au i te mau parau tohu, eaha te mau huru tupuraa tei tapao i to tatou nei tau?