E arue anaˈe na i te Atua ma te oaoa i roto i te mau tairururaa

I te omuaraa o te mau matahiti 1880, i taa ˈi te feia Haapii Bibilia i te faufaaraa ia farerei atu ratou i te mau taeae no te tahi atu mau vahi taa ê hau atu i te amuiraa ˈtu i te mau taeae no ta ratou iho mau amuiraa. Ua faanaho ihora ratou i te mau tairururaa tamatahiti no te Feia Haapii Bibilia anaˈe no te fenua Marite (Hau amui) e no te fenua Kanada i muri aˈe. Ua riro te reira mau taime ei faaitoitoraa no ratou i te pae varua, i reira ïa e roaa ai ia ratou te hoê haapiiraa bibilia tamau tau mahana te maororaa e e faaitoito ai ratou ratou iho. Ua riro ïa te bapetizoraa i te feia o tei fariu apî mai i roto i te faaroo mau ei ohipa faahiahia mau i roto i taua mau tairururaa ra. Ua riro atoa te reira ei ravea no te horoa ˈtu i te hoê faaiteraa rahi aˈe i te taata atoa. — Roma 1:11, 12.

I teie nei mahana, te tamau nei te mau Ite o Iehova i te faatupu i te mau tairururaa. Mai tei matauhia, e faatupuhia 18 aore ra 25 amuiraa i te hoê haaatiraa o tei haapaohia e te hoê tiaau haaati. Hoê taime i te matahiti, e faatupuhia te mau tairururaa haaati i te mahana maa e te sabati; e tahoê mai oia te mau amuiraa o te hoê haaatiraa aore ra o te hoê noa tuhaa o taua haaatiraa ra.

Hoê taime i te matahiti e faanahohia i roto i te mau fenua tataitahi te mau tairururaa rarahi no te hoê roaraa e 3 aore ra e 4 mahana e o tei piihia te mau tairururaa mataeinaa. E amui mai oia tau tausani taata i te vahi hoê. Ua riro te reira mau tairururaa ei faaitoitoraa i te mau Ite o Iehova iho â i te pae varua e vetahi atu mau taata e anaanatae maira i ta ratou mau ohipa e e riro atoa hoi te reira ei faaiteraa i te taata atoa.

E pahono te porotarama o taua mau tairururaa ra i faaineinehia e te Tino Aratai a te mau Ite o Iehova, i te mau hinaaro o taua mau ite kerisetiano ra no te ao taatoa nei. Te vai ra te mau oreroraa parau, te mau tauaparauraa, te mau faahiˈoraa, e vauvauhia mai taua mau tuhaa taa ê ra na te mau tiaau haaati e na te mau ite aravihi tei maitihia no roto mai i te mau amuiraa. E faaite atoa vetahi mau Ite e mea nafea to ratou faarururaa i te fifi no te ora mai te hoê kerisetiano i roto i te hoê ao ino aore ra e faataa mai ratou i te mau maitai i noaa mai ia ratou i roto i ta ratou taviniraa. E ite-atoa-hia i roto i taua mau tairururaa ra te hoê hiˈoraa taa ê atu: e faaitehia mai te tahi mau hautiraa bibilia, no te tau tahito aore ra no te tau apî. E faataa atoa mai ratou e mea nafea te mau kerisetiano i te faarururaa i te mau fifi o to tatou nei tau.

I roto i taua mau tairururaa ra, e pûpûhia mai ïa te tahi mau maa iti e te tahi mau faahaumǎrûraa no te hoê moni iti noa. E tauturu te reira i te feia i amui mai ia faafaaea te hoê taime ma te au i muri aˈe i te mau oreroraa parau. Te ravehia ra te mau ohipa tei au no te faanahoraa o taua mau tairururaa ra na te mau taata horoa noa i to ratou taime, e mau Ite o Iehova. Na te mau ô horoa-noa-hia mai e amo ra i te mau haamâuˈaraa no te tarahuraa i te fare e vetahi atu â. E nehenehe noa e tomo atu e aore roa e anihia te moni.

E haamaramarama mai te amuiraa a te mau Ite o Iehova o to outou vahi faaearaa, te taio mahana e te vahi e tupu ai taua mau tairururaa ra. E horoa-atoa-hia mai te tahi mau haamaramaramaraa no te faurao e te vahi nohoraa.

E tauturu taua mau tairururaa ra i te mau Ite o Iehova e te feia e amui ra e o ratou ia haamahora atu â i to ratou here i te fetii taatoa o te mau taeae o te ao nei. — Petero 1, 2:17.

● Eaha te mau haamaitairaa i roaa mai i te Feia Haapii Bibilia matamua i roto i ta ratou mau tairururaa?

● A faataa mai na te faanahoraa e te porotarama o te mau tairururaa haaati e mataeinaa.

[Hohoˈa i te api 18]

Te hoê hautiraa bibilia i te hoê tairururaa mataeinaa i Marite.

Tairururaa e haaputuputu i te mau fenua atoa i Polonia.

Hoê tairururaa e haaputuputu i te mau fenua atoa i Ra-Parata.

Tairururaa haaati i te fenua Tapone.

Te tahi mau tia e rave ra i te mau buka bibilia i te fenua Helevetia.

Mau bapetizoraa i te hoê tairururaa e haaputuputu i te mau fenua atoa i Afirika Apatoa.

Faaiteraa i te hoê buka apî i te fenua Kanada.

Te tahi mau tia e himene ra, i te fenua Paniora.