Nafea ia faaohipa i te “Haaferuriraa i nia i te mau Papai”
E tia i te taata o te haapii atu i te Bibilia ia vetahi ê ia pee i te hiˈoraa o Iesu Mesia e ta ˈna mau aposetolo. Ia uiuihia mai oia, e pahono na o Iesu ma te faahiti i te mau papai; e faaohipa na oia i te tahi mau taime i te mau faahohoˈaraa maiti-maitai-hia no te tauturu i te feia aau haavare ore ia farii i ta te Bibilia e parau ra. (Mat. 12:1-12) I to ˈna pae, e peu matauhia e te aposetolo Paulo ia ‘haaferuri ia au i te mau Papai, ma te faataa ˈtu e ma te haapapu atu i ta ˈna mau parau na roto i te mau faahororaa.’ (Ohi. 17:2, 3, MN) E nehenehe te mau api o teie buka e tauturu ia oe ia pee i to raua hiˈoraa.
Maoti i te tuatapapa taatoa i te tumu parau taitahi, te hiˈopoa hohonu nei te buka Haaferuriraa i nia i te mau Papai i te mau uiraa ta te mau taata e ui pinepine nei.
Aita teie buka e faataa ra i te mau manaˈo turu no te pahono atu i te feia o te ore roa e faatura nei i te parau mau. Area râ, te horoa maira oia i te mau faataaraa faufaa roa no te tauturu ia oe, i te mau taime atoa e nehenehe ai, ia haaferuri i te mau taata. Te vai ra te feia o te ui nei i te mau uiraa ta ratou e hinaaro mau nei e ite i te hoê pahonoraa papu. Te faaite noa nei vetahi, ma te tiaturi rii, i ta ratou iho mau tiaturiraa i roto i te tauaparauraa. E feia feruriraa mahora anei râ ratou? Ua ineine anei ratou i te faaroo i te hoê manaˈo ê atu i to ratou iho? Mai te peu e e, e nehenehe oe e vauvau atu i te haapiiraa o te Bibilia; a rave i te reira ma te tiaturi e e haaputapû te reira i te mafatu o te feia e au ra i te parau mau.
Nafea e itea mai ai i roto i teie buka te mau haamaramaramaraa e hinaarohia ra? Mea pinepine, te ravea vitiviti roa ˈˈe, o te iritiraa ïa i te buka i te tumu parau e tuea ra i te aparauraa. I roto i te mau tumu parau taitahi, e ite ohie noa mai oe i te mau uiraa matamua e faahitihia ra; ua papaihia e te leta meumeu ma te tapiri roa i te hiti aui o te api. Mai te peu e eita e ite-oioi-hia mai ia oe te mea ta oe e maimi ra, a hiˈo i te tabula faahororaa i te hopea o te buka.
E mea faufaa roa ia faaineine na mua ˈˈe i te hoê aparauraa. Noa ˈtu râ e aita oe i matau maitai i te tahi mau tuhaa o te buka, e nehenehe oe e faaohipa maitai i te reira. Nafea? Ia itea mai ia oe te uiraa e tano maitai aˈe i te tumu parau e aparauhia, a hiˈopoa i te upoo parau o te mau tuhaa iti taitahi i muri iho. Ua papaihia e te leta opa meumeu e ma te faanuu rii mai i raro aˈe i te uiraa. Mai te peu e ua ite rii oe i te tumu parau, e navai noa paha ia taio i te mau upoo parau taa ê e ia hiˈo oioi atu i te mau manaˈo ta ratou e faaô maira, no te mea te pee ra ratou i te hoê haaferuriraa ta oe e nehenehe e faaohipa. Eiaha e haamarirau i te faaite i to oe mau manaˈo na roto i ta oe iho mau parau.
E hinaaro paha oe e ite hau atu â: te mau irava Bibilia tei taaihia i te tumu parau, te mau manaˈo turu e nehenehe e apitihia mai aore ra te hoê faahohoˈaraa ta oe e faaohipa no te haamatara i te papuraa o te mau parau mau o te Bibilia. I reira, e nehenehe oe e faaite i te buka i te taata e faaroo maira e e taio atu i te tuhaa e pahono ra i ta ˈna uiraa. Noa ˈtu e aita oe i hiˈopoa i te uiraa na mua ˈtu, e nehenehe te buka e tauturu ia oe ia horoa i te hoê pahonoraa papu. E ite oe i te mau mea atoa ta oe e hinaaro ra i roto i teie buka, tei papaihia ma te mau parau ohie e te haapoto noa.
A haamanaˈo râ, e buka tauturu noa teie. O te Bibilia to ˈna aratai. O ˈna te Parau a te Atua. No reira, ia faahiti teie buka i te hoê irava Bibilia, a faaite roa ˈtu i te taata ta oe e paraparau ra. A ani ia ˈna, i te mau taime atoa e nehenehe ai, ia haere e tii i ta ˈna iho Bibilia e a taio atu i teie irava ia taa maitai ia ˈna e tei roto atoa te mea ta oe e faaite ra i ta ˈna Bibilia. Ia iriti-taa-ê-hia te hoê vahi faufaa o te irava ia au i te hoê huriraa matauhia o te Bibilia, e haapapu te buka i te reira ma te horoa ei faaauraa i te huru iritiraa i roto i te tahi atu mau tatararaa.
Ia au i te hiˈoraa o te aposetolo Paulo o tei faahiti, i roto i te hoê oreroraa parau i mua i te feia no Ateno, i te hoê fata pûpûhia “na te Atua itea ore” e o tei rave i te mau buka no teie nei ao tei fariihia e te taatoaraa (Ohi. 17:22-28), te faahiti nei te buka Haaferuriraa i nia i te mau Papai i te tahi mau taime i te mau buka aamu, te mau buka ite rahi, te mau buka faaroo e te mau titionare Bibilia. No reira, ia tuatapapa oia nohea mai vetahi mau peu aore ra mau haapiiraa faaroo a te mau haapaoraa hape, aore ra i te auraa o te tahi mau parau Hebera aore ra Heleni, eita oia e parau noa i te mau mea, tera râ, e horoa roa mai oia i te mau tumu e turu ra i ta ˈna mau parau. Teie râ, te huti ra oia i te ara-maite-raa i nia i te Bibilia, te pu matamua o te parau mau.
Hau atu â, e faaineine te mau tumu parau matamua o teie buka ia oe ia faaite i te mau haapiiraa o te Bibilia i te feia ta oe e paraparau atu. Oia mau, te vai ra te hoê tabula o te “Omuaraa parau no te pororaa” e te tahi mau manaˈo tauturu oia hoi “Nafea ia pahono i te mau patoiraa.” E rave rahi mau patoiraa te tia ia oe ia pahono, no nia ïa i te tahi mau tiaturiraa papu maitai; e te faataahia ra te reira i te hopea o te tumu parau e tuatapapa ra i te tiaturiraa taitahi. Aita e titauhia ra ia tamau aau oe i teie mau pahonoraa, e mea papu râ e e faufaahia oe i te tuatapapa-maite-raa no te aha vetahi feia poro i manaˈo ai e mea aravihi roa; e a faaite i te mau manaˈo na roto i ta oe iho mau parau.
Inaha, ia faaohipa oe i teie buka, e nehenehe ïa oe e haamaitai atu â i to oe aravihi no te haaferuri ia au i te mau Papai e no te faaohipa ma te manuïa aˈe i te Buka Moˈa no te tauturu i to oe taata-tupu ia ite i te ‘mau mea faahiahia a te Atua ra.’—Ohi. 2:11, MN.