Aramagedo

Auraa: No roto mai te parau Heleni Har Ma·ge·donʹ i te reo Hebera. Ua iritihia oia e te parau “Aramagedo” i roto i te tahi mau huriraa e teie hoi to ˈna auraa “Mouˈa no Megido” aore ra “mouˈa o te haaputuputuraa i te mau nuu.” I roto i te Bibilia, te auraa o teie parau, e ere ïa te hoê ati atomi, o te haereraa mai râ o “te tamaˈi [o te ao taatoa] i taua mahana rahi o te Atua Puai hope ra.” (Apo. 16:14, 16) Te faataa papu nei oia i “te vahi [Heleni, toʹpon; oia hoi, huru aore ra huru tupuraa]” i reira e haaputuputuhia ˈi te mau tia politita o te fenua o te patoi nei ia Iehova e i to ˈna Basileia arataihia e Iesu Mesia. E faaite teie mau taata i to ratou enemiraa ia Iehova na roto i te tahoêraa no te aro atu i ta ˈna mau tavini i nia i te fenua, te mau tia ite-mata-hia o to ˈna Basileia.

E vaiiho anei te Atua i te taata ia haamou i te fenua na roto i tei parauhia e vetahi e “Aramagedo atomi”?

Sal. 96:10: “O Iehova te arii; e haamauhia te fenua [Hebera, te·velʹ; te fenua ei vahi hotu e tei taatahia, te palaneta e faaeahia e te taata] e ore roa e aueue.”

Sal. 37:29: “E parahi te feia parau-tia i nia i te fenua, e parahi tamau â ratou i reira.”

Apo. 11:18: “I riri na te mau fenua, e ua itea mai to oe [Iehova] riri, e te taime . . . [“e haamou ai oe i te feia e haamou nei i te fenua,” MN].”

Eaha o Aramagedo, ia au i te Bibilia?

Apo. 16:14, 16; MN: “E [mau parau faauruahia e te mau] demoni ratou, o tei haere i te hui arii o te fenua nei e o te ao atoa nei, ma te rave i te tapao ra, e haaputu ia ratou i te tamaˈi i taua mahana rahi o te Atua Puai hope ra. Ua haaputuputu ihora ratou i te hoê vahi, o Aramagedo te iˈoa i te parau Hebera ra.”

E tupu anei te tamaˈi Aramagedo i te pae Hitia o te râ no Ropu anaˈe?

E haaputuputuhia te mau tia e te mau nuu o te mau nunaa atoa no te aro atu i te Atua

Apo. 16:14: “O tei haere i te hui arii o te fenua . . . atoa nei . . . e haaputu ia ratou i te tamaˈi i taua mahana rahi o te Atua Puai hope ra.”

Apo. 19:19: “E ua hiˈo atura vau i taua puaa ra [te taatoaraa o te mau faatereraa taata nei], e te mau arii o te ao nei, e ta ratou mau nuu ua putuputu, e aro ia ˈna i te parahi i nia i te puaahorofenua ra e tana ra nuu.”

Ier. 25:33: “E o tei pohe ia Iehova ra ia tae i te reira ra anotau, e riro ïa mai te hopea mai o te fenua, e tae noa ˈtu i te tahi hopea o te fenua ra.”

Aita te iˈoa ra Aramagedo e faaite ra e e tupu teie tamaˈi i Megido, i nia i te hoê mouˈa mau

Aita hoi te mouˈa no Megido e vai ra; hoê noa haapueraa repo e 21 metera te teitei e tapao ra i te vahi o te mau toetoea o Megido tahito.

Eita te mau arii e te mau nuu puai o ‘te fenua atoa nei’ e nehenehe e haaputuputu i te mahora no Esdrelon, i raro mai ia Megido. E mahora e toru poro teie, e 32 kilometera i te roa i nia e 29 kilometera i te aano i to ˈna poro i te pae hitia o te râ.—The Geography of the Bible (New York, 1957) a Denis Baly, api 148.

E tano roa teie nei iˈoa ia hiˈohia te tiaraa o Megido i roto i te Tuatapaparaa; ua riro te mahora i raro mai ia Megido ei tahua no te mau aroraa rahi

I reira to Iehova faatupuraa i te pau o Sisera, raatira o te nuu no Kanaana, i mua i te tavana ra o Baraka.—Tav. 5:19, 20; 4:12-24.

Ua parau o Thoutmosis III, Pharao no Aiphiti, e: “Te haruraa ia Megido, mai te haruraa ïa hoê tausani oire!”—Ancient Near Eastern Texts Relating to the Old Testament (Princeton, 1969), neneihia e James Pritchard, api 237.

E tano maitai te iˈoa Megido (oia hoi te auraa “haaputuputuraa i te mau nuu”), no te mea te faataa ra o Aramagedo i te hoê huru tupuraa na te fenua nei o te faaô mai i te mau nuu e vetahi atu feia turu i te mau faatere o te ao nei.

Eaha te mou i Aramagedo?

Dan. 2:44: “E faatupu ai te Atua o te raˈi ra i te hoê basileia . . . e hope roa hoi taua mau basileia ra i te parari e e pau, e vai tera e a muri noa ˈtu.”

Apo. 19:17, 18; MN: “Ua hiˈo atura vau i te hoê melahi i te tiaraa i roto i te mahana ra, ua pii hua maira tana reo i te mau manu atoa e maue i roto i te reva nei, na ô maira, A maue mai, e haaputuputu outou i te amuraa rui a te Atua rahi ra; ia amu outou i te tino o te mau arii ra, e te tino o te mau [tomana] ra, e te tino o te feia mana ra, e te puaahorofenua ra, e to tei parahi i nia ihora, e te tino o te mau taata atoa ra, to te tiamâ, e to te tavini, to te taata rii, e to te feia rarahi ra.”

Ioa. 1, 2:16, 17: “O te mau mea atoa o teie nei ao, o te hinaaro tia ore o te tino nei, e te hinaaro tia ore o te mata nei, e te ahaaha o te oraraa nei, e ere ïa i to ǒ mai i te Metua ra, no teie nei ao anaˈe ïa. E te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu.”

Apo. 21:8: “Area tei mǎtaˈu noa ra, e te faaroo ore ra, e te feia faufau ra, e te taparahi taata ra, e te faaturi ra, e te tahutahu ra, e te haamori idolo ra, e te feia haavare e hope roa ˈˈe, e tufaa ta ratou tei te roto auahi e te gopheri e ama ra: oia te piti o te pohe ra.”

E mou anei ratou e a muri noa ˈtu?

Mat. 25:46: “O te haere ê ïa [te feia i patoi i te hamani maitai i te mau “taeae” o te Mesia] e rave i te pohe mure ore.”

Tes. 2, 1:8, 9: “Te feia aore i ite i te Atua, e tei ore i faaroo i te evanelia o to tatou Fatu o Iesu Mesia ra: o te utuahia mai ïa i te pohe mure ore.”

E ora mai anei vetahi?

Zeph. 2:3: “E imi ia Iehova, e te feia i haehaa i nia i te fenua nei, o tei faatupu i te parau au na ˈna ra; e imi i te parau-tia, e imi i te haehaa: peneiaˈe outou o te faatapunihia ia tae i te mahana e riri ai Iehova ra.”

Roma 10:13: “O te tiaoro atoa hoi i te iˈoa o Iehova ra, e hope roa ïa i te ora.”

Sal. 37:34: “E tiai atu ia Iehova, e haapao maite ai i to ˈna eˈa, e na ˈna oe e faateitei ia noaa ia oe te fenua; e ite oe i te pohe o te feia paieti ore ra.”

Ioa. 3:16: “Ua tae roa [te Atua] i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.”

Apo. 7:9, 10, 14: “Hiˈo atura vau, e inaha e feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa, i te tia-noa-raa i mua i te terono, e i mua i te Arenio, ma te ahu teatea i te ahuraa e ma te amaa tamara i to ratou rima; e ma te pii hua hoi to ratou reo, i te na ôraa e, Tei to tatou Atua te ora, tei parahi i nia iho i te terono ra, e tei te Arenio. . . . O te feia i haere mai mai roto mai i te ati rahi ra.”

Eaha te roohia i te mau tamarii apî i Aramagedo?

Aita te Bibilia e pahono roa ra i teie uiraa, e e ere na tatou e faaoti. Teie râ, ia au i te Bibilia, e mea “moˈa” te mau tamarii apî a te mau Kerisetiano mau i mua i te aro o te Atua. (Kor. 1, 7:14) Te ite atoa ra tatou e i to ˈna haamouraa i te feia iino i mutaa ihora, aita o Iehova i haapae i ta ratou mau tamarii apî. (Num. 16:27, 32; Ezek. 9:6) Aita te Atua e hinaaro ra ia pohe te tahi, no reira oia e faaoto ai i te hoê faaararaa no te maitai o te mau metua e tae noa ˈtu o te mau tamarii. Eita anei e tano ia pee te mau metua i te hoê haerea, a hiˈo maitai mai ai te Atua i ta ratou mau tamarii i teie nei e i Aramagedo?

Ua tuea anei te haamouraa o te feia iino e te here o te Atua?

Pet. 2, 3:9: “E faaoromai rahi râ to [Iehova] ia tatou, aita roa i hinaaro e ia pohe atu te hoê, ia noaa paatoa râ te tatarahapa.”

Luka 18:7, 8: “E ore anei te Atua e faatia mai i to ˈna ra taata maitihia, o tei tiaoro atu ia ˈna i te rui e te ao? E faaite atu vau ia outou, e faatia mai ïa oia ia ratou e ore roa e mahia.”

Tes. 2, 1:6: “E mea tia hoi i te Atua ia faautua i te feia i pohe ai outou na [te mau tavini a te Atua] i te pohe.”

E nehenehe anei e rave i te hoê tiaraa amui ore?

Tes. 2, 1:8: “I te tuuraa mai i te [“tahooraa,” MN] i te feia aore i ite i te Atua [ma te opua maite], e tei ore i faaroo i te evanelia o to tatou Fatu o Iesu Mesia ra.”

Mat. 24:37-39: “Mai tei te anotau ra ia Noa ra . . . aore roa i ite, e roohia noa ihora ratou e te diluvi . . . pau roa ˈtura ratou; oia atoa te haerea mai o te Tamaiti a te taata nei.”

Mat. 12:30: “E ere oia i to ǒ nei ia ˈu nei, no ǒ mai ïa: e o tei ore i haaputu atoa mai, ua haapurara ïa.”

Hiˈo Deuteronomi 30:19, 20.

Na vai e turai ra i te mau nunaa i roto i te huru tupuraa o te ao nei e tamaˈi atu ai ratou e te Atua?

Apo. 16:13, 14: “Ua hiˈo atura hoi au i e tootoru [“parau faauruahia,” MN] faufau mai te rana ra i te purororaa mai, mai roto mai i te vaha o te teni [te Diabolo ra o Satani; Apo. 12:9], e mai roto mai i te vaha o te puaa, e mai roto i te vaha o te peropheta haavare ra. E [“parau faauruahia a te mau,” MN] demoni ratou, o tei haere i te hui arii o te fenua nei e o te ao atoa nei, ma te rave i te tapao ra, e haaputu ia ratou i te tamaˈi i taua mahana rahi o te Atua Puai hope ra.”

Hiˈo Luka 4:5, 6; Ioane 1, 5:19; e Ohipa 5:38, 39; Paraleipomeno 2, 32:1, 16, 17.