Haapiiraa 1

Nafea oe e ite ai eaha ta te Atua e titau ra

Eaha te mau parau faufaa roa e vai ra i roto i te Bibilia? (1)

O vai te tumu o te Bibilia? (2)

No te aha e tia ˈi ia oe ia haapii i te Bibilia? (3)

1. E ô faufaa mau te Bibilia no ǒ mai i te Atua ra. E au oia i te hoê rata ta te hoê metua tane here e faatae atu i ta ˈna mau tamarii. Te faaite maira oia i te parau mau no nia i te Atua—o vai mau na oia e eaha to ˈna tiaraa. Te faataa ra oia nafea ia faaruru i te mau fifi e nafea ia ite i te oaoa mau. O te Bibilia anaˈe te faaite maira eaha te tia ia tatou ia rave no te faaoaoa i te Atua.—Salamo 1:1-3; Isaia 48:17, 18.

2. Tau 40 taata taa ê o tei papai i te Bibilia i roto i te area e 1 600 matahiti, o tei haamata mai te matahiti 1513 hou to tatou tau. E 66 buka iti to roto. Ua faauruahia te feia o tei papai i te Bibilia e te Atua. Ua papai ratou i to ˈna mau manaˈo, eiaha râ to ratou iho. No reira ˈtura, te Tumu o te Bibilia, o te Atua ïa i te raˈi ra, eiaha râ te tahi taata i nia i te fenua nei.—Timoteo 2, 3:16, 17; Petero 2, 1:20, 21.

3. Ua haapao maitai te Atua e ia papai-faahou-hia te Bibilia ma te tia e ia faahereherehia oia. Ua hau atu te mau Bibilia i neneihia i te tahi atu buka. Eita pauroa te taata e oaoa i te iteraa ia oe ia haapii i te Bibilia, eiaha râ e vaiiho i te reira ia tapea ia oe. Ua taaihia to oe oraraa mure ore no a muri aˈe, i nia i to oe iteraa i te Atua e to oe raveraa i to ˈna hinaaro noa ˈtu te mau patoiraa atoa.—Mataio 5:10-12; Ioane 17:3.