Haapiiraa 15

A tauturu ia vetahi ê ia rave i te hinaaro o te Atua

No te aha e faaite ai ia vetahi ê i te mau mea ta oe e haapii ra? (1)

E faaite oe i te parau apî maitai ia vai? (2)

Eaha te faahopearaa o to oe haerea i nia ia vetahi ê? (2)

Afea oe e nehenehe ai e poro e te amuiraa? (3)

1. I teie nei, ua haapii mai oe e rave rahi mea maitatai no roto mai i te Bibilia. E tia hoi i teie ite ia aratai ia oe ia faatupu i te huru taata kerisetiano. (Ephesia 4:22-24) Mea faufaa roa teie ite ia noaa ia oe te ora mure ore. (Ioane 17:3) Teie râ, te hiaai atoa nei vetahi i te faaroo i te parau apî maitai ia nehenehe atoa ratou e faaorahia. E tia i te mau kerisetiano mau atoa ia poro atu ia vetahi ê. E faaueraa teie na te Atua.—Roma 10:10; Korinetia 1, 9:16; Timoteo 1, 4:16.

2. E nehenehe oe e haamata na roto i te paraparauraa ˈtu i te feia ta oe i matau no nia i te mau mea maitatai o ta oe e haapii ra. A faaite atu i to oe mau fetii, to oe mau hoa, to oe mau hoa haapiiraa, e to oe mau hoa ohipa. A faaite râ i te mǎrû e te faaoromai. (Timoteo 2, 2:24, 25) A haamanaˈo e mea pinepine, e hiˈo te taata i te haerea, hau atu i te faaroo i te mau parau a te hoê taata. No reira, e nehenehe to oe haerea maitai e turai ia vetahi ê ia faaroo i te poroi o ta oe e faaite ra.—Mataio 5:16; Petero 1, 3:1, 2, 16.

3. I muri iho, e naeahia ia oe te faito no te haamata i te poro e te amuiraa a te mau Ite no Iehova no to oe vahi. E taahiraa avae faufaa roa teie i roto i ta oe mau haereraa i mua. (Mataio 24:14) Auê te oaoa e ahiri e e manuïa oe i te tauturu i te hoê taata ia riro mai ei tavini no Iehova e ia noaa i te ora mure ore!—Tesalonia 1, 2:19, 20.