Pahonoraa i ta outou mau uiraa

◼ No te aha e tia ia tatou ia haapao maitai i to tatou faaahuraa e i to tatou huru faaneheneheraa rouru ia haere tatou e mataitai i te mau piha a te Taiete i Brooklyn, i Patterson e i Wallkill (New York), e i roto i te mau amaa atoa na te ao nei?

E tia i te mau Kerisetiano ia tamau maite i te faatura i te mau peu maitatai. I te mau taime atoa, ia faaite to tatou faaahuraa e to tatou huru faaneheneheraa rouru i te tia e te tura ia au i te titauhia ra i te mau tavini a te Atua ra o Iehova, e tia ˈi. E titauhia iho â te reira ia haere anaˈe e mataitai i te mau piha a te Taiete i New York e i roto i te mau amaa atoa na te ao nei.

E tupu te mau tairururaa mataeinaa e te mau tairururaa o te mau nunaa atoa i te matahiti 1998. E mau tausani o to tatou mau taeae no e rave rahi fenua o te haere atu e mataitai i te pu a te Taiete i New York e oia atoa i te mau amaa o te mau fenua ê atu. Ia haere atu tatou e mataitai i teie mau piha, eiaha noa i taua mau taime ra, i te mau taime atoa râ, e tia ia tatou ia ‘faaite hua ia tatou iho e e rave ohipa na te Atua,’ e tae noa ˈtu ma te raveraa mai i te hoê faaahuraa e te hoê faaneheneheraa rouru au maitai.—Kor. 2, 6:3, 4.

Ia faahiti oia no nia i te faufaaraa ia faaahu noa ma te au e ia faanehenehe maitai i te rouru, te haapapu ra ïa te buka ra Organisés pour bien remplir notre ministère i te faufaaraa ia vai mâ e oia atoa ia faaahu maitai e ia faanehenehe maitai i te rouru ia poro anaˈe tatou aore ra ia apiti anaˈe tatou i te mau putuputuraa. I muri iho, i te api 131, i te paratarapha 1, te parau ra oia e: “Hoê â huru ia mataitai anaˈe tatou i te Betela, i Brooklyn aore ra i te tahi fenua ê atu to reira te hoê amaa a te Taiete. Eiaha ia moehia ia outou te auraa o te taˈo ra Betela oia hoi ‘Fare o te Atua.’ Te titauhia ra ïa i te hoê â huru faaneheneheraa rouru, te faaahuraa e te haerea, ia haere anaˈe tatou i te mau putuputuraa no te haamoriraa i te Piha no te Basileia.” E tia ia haapaohia taua noâ mau titauraa teitei ra e te feia poro i te Basileia no taua vahi ra e te feia o tei haere atea mai no te farerei i te mau melo o te fetii o te Betela aore ra no te mataitai i te mau piha a te amaa.

Ia faaite to tatou faaahuraa ia vetahi ê i te hoê manaˈo maitai no nia i te haamoriraa mau a Iehova e tia ˈi. Ua itehia râ i te hoê faaahuraa haapaoraa ore roa i nia i te tahi mau taeae e mau tuahine o te mataitai ra i te mau piha a te Taiete. Aita roa ˈtu ïa teie huru faaahuraa e tano ra no te mataitai i te hoê Betela. I roto i teie huru tupuraa mai i roto i te mau tuhaa atoa o to tatou oraraa kerisetiano, te hinaaro nei tatou e faatura i taua noâ mau titauraa teitei ra, teie mau titauraa o te faataa ê nei i te mau tavini a te Atua i teie nei ao, no te mea te rave nei ratou i te mau mea atoa no te faahanahana i te Atua. (Roma 12:2; Kor. 1, 10:31) E mea maitai atoa ia faahaamanaˈo i te mau taata o te haapii ra i te Bibilia e o tatou aore ra vetahi atu e a tahi ra ratou e haere ai e mataitai i te Betela, i te faufaaraa ia haapao maitai i to ratou faaahuraa e i to ratou faaneheneheraa rouru.

Ia mataitai anaˈe outou i te mau piha a te Taiete, e uiui outou e: ‘E mea maitai anei to ˈu mau aahu e to ˈu faaneheneheraa rouru?’ (A hiˈo i te Mika 6:8.) ‘Te faahohoˈa ra anei te reira i te Atua o ta ˈu e haamori ra? E haapeapea anei aore ra e huru ê anei vetahi ê na roto i to ˈu faaahuraa? Te horoa ra anei au i te hiˈoraa i te feia e a tahi ra e haere ai e mataitai i te Betela?’ Ia vai “nehenehe” noa ïa ‘te haapiiraa a te Atua to tatou Faaora i te mau mea atoa’ na roto i to tatou faaahuraa e to tatou faaneheneheraa rouru!—Tito 2:10.