Ta tatou taviniraa: te hoê faaiteraa o te here mau
1 Na roto i ta tatou taviniraa, te faaite ra tatou i to tatou auraro i na faaueraa toopiti faufaa roa ˈˈe. (Mat. 22:37-39) No to tatou here ia Iehova, te faahanahana nei tatou ia ˈna. No to tatou here i to tatou taata-tupu, te faaitoito nei tatou ia ratou ia imi e eaha te hinaaro e te mau opuaraa a te Atua ia nehenehe ratou, mai ia tatou, e here ia Iehova e ia noaa iho â râ ia ratou te re: te ora mure ore. No reira, na roto i ta tatou taviniraa, te faahanahana ra tatou i te iˈoa o Iehova e te tufa ra tatou i te tiaturiraa faahiahia roa o te Basileia i to tatou taata-tupu. Papu maitai, e faaiteraa o te here mau ta tatou taviniraa no te Atua e no te mau taata.
2 E turai te here ia tatou ia paraparau i te mau huru taata atoa i roto i te mau huru tupuraa atoa. (Kor. 1, 9:21-23) Teie te hoê hiˈoraa: i roto i te hoê manureva, ua parahi te hoê matahiapo i pihai iho i te hoê perepitero. Ua haamata o ˈna i te tauaparauraa na roto i te uiuiraa ˈtu ia ˈna ma te aravihi i te tahi mau uiraa, e ua aratai atura i te tauaparauraa i nia i te Basileia. I to te perepitero pouraa mai na nia i te manureva, ua farii oia e piti o ta tatou nei mau buka. Auê ïa manuïaraa maitatai i fanaˈohia maoti te here mau o teie matahiapo no to ˈna taata-tupu!
3 E turai te here mau ia tatou ia poro: Eita e ore te faaite ra te feia o te rave ra i te taviniraa pionie tauturu aore ra ma te taime taatoa i te hoê here mau no te Atua e no to ratou taata-tupu. Te horoa nei te mau pionie i to ratou taime atoa e to ratou puai atoa no te tauturu ia vetahi ê i te pae varua. Na te aha e turai ra ia ratou? Ua parau te hoê tuahine pionie e: “Ua ite au e e hotu o te varua o te Atua te here. Ahiri e aita e here, aita ïa vau i roto i te parau mau e eita atoa hoi e riro mai ei pionie. Ma te here, te tâuˈa ra vau i te taata, te taa ra ia ˈu i to ratou mau hiaai e te ite ra vau e te farii nei ratou i te here.” Ua faaite o Iesu i taua huru here ra i nia i te mau taata. I te hoê mahana a haere ai oia e ta ˈna mau pǐpǐ tei rohirohi i te hoê vahi no te “faaea iti noa ˈˈe,” ua na mua ˈtu te tiaa taata i te haere ia ratou. Eaha ta ˈna ohipa i rave? “Ua aroha ˈtura [oia] ia ratou,” ua tuu oia i to ˈna iho mau hinaaro i te hiti no te ‘haapii ia ratou i te parau e rave rahi.’—Mar. 6:30-34.
4 Noa ˈtu e e patoi mai te mau taata i te parau apî maitai o ta tatou e faaite atu, te oaoa nei tatou i roto ia tatou iho, no te mea, ma te turaihia e te here, ua rave tatou i tei maraa ia tatou no te tauturu ia ratou ia fanaˈo i te ora. Ia hope roa anaˈe tatou i te haavahia e te Mesia, e oaoa roa ïa tatou i te faaiteraa i te hoê here mau ma te ‘rave faahope roa i ta tatou [“taviniraa,” MN].’—Tim. 2, 4:5.