E maiti anaˈe i te mau tumu parau ma te faatano i nia i te anaanatae o te taata
1 Mai te feia teˈa o te faatano maitai i ta ratou mau tapao na mua ˈˈe a teˈa ˈi i te mau ohe, te fanaˈo atoa nei e rave rahi feia poro e pionie i te mau faahopearaa maitatai maoti te mau tumu parau o Te Pare Tiairaa e te A ara mai na! o ta ratou e maiti ma te faatano i nia i te anaanatae o te mau taata i roto i te tuhaa fenua. E hiˈo ratou o vai te hinaaro e taio i te reira. E hiˈo mai ïa tatou nafea ratou ia rave anaˈe.
2 Na mua roa, e taio ratou i te mau vea atoa mai te haamataraa e tae atu i te hopea. E ia oti anaˈe, e uiui ratou eaha te huru taata e tano i te tumu parau taitahi. I muri iho, e tutava ratou i te haere e farerei i te feia o te hinaaro e taio i taua tumu parau ra. Mai te peu e te manaˈo ra ratou e farii-rahi-hia te hoê vea taa ê i roto i te tuhaa fenua, e poroi ïa ratou i te mau vea hau.
3 Ua itehia te faufaaraa o ta tatou mau vea: E rave ohipa hoê o te feia o ta matou i tamatahiti na te hoê vea no te ao atoa nei taio-rahi-hia i Nigeria. Teie ta ˈna i parau no nia i te A ara mai na!: “Te haapopou nei au ia outou no te vea maitai roa ˈˈe no te maitai o te ao nei.” Te horoa ra te hoê o te feia e taio tamau nei i ta tatou mau vea i teie manaˈo: “Auê ïa paari faufaa roa! E mea varavara roa te mau tumu parau o ta ˈu e anaanatae aita i tuatapapahia i roto i te hoê aore ra i te tahi o taua mau vea ra.”
4 E mea aano roa te mau tumu parau e tuatapapahia ra i roto i teie mau vea: te Bibilia, te mau tupuraa na te ao nei, te utuafare, te mau fifi totiale, te aamu, te ite aivanaa, te oraraa animala e te mau raau tanu, e te vai faahou atu â. E hinaaro mau iho â ïa te hoê taata e taio i te hoê mea o te faataa ra i to ˈna mau hinaaro, to ˈna huru tupuraa aore ra i ta ˈna ohipa. No te mea hoi mea taa ê te feia ta tatou e tauaparau nei, e taata to ˈna iho mau hinaaro e to ˈna iho mau fifi, ia maiti anaˈe tatou i te mau tumu parau ma te faatano i nia i to ratou mau hiaai, e faatupu mai iho â te reira i te mau faahopearaa maitatai.
5 E hiˈo anaˈe i te ohipa i tupu i nia i na Ite no Iehova e piti o tei pûpû atu i te A ara mai na! o te 8 no Setepa 1996 (Farani) na te hoê taata papai aamu no te hoê vea. Ua papai oia e: “Na mua ˈˈe au e parau ai e aita roa ˈtu vau e anaanatae ra, ua parau maira te hoê o raua e: ‘Te vai ra te hoê tumu parau no nia i te mau Inidia no Marite. Ua ite mâua e e rave rahi o ta oe i papai no nia ia ratou.’” Ua farii oia i te vea e ua taio i te tumu parau no nia i te mau Inidia i to ˈna tamaaraa i te poipoi. Ua ite oia e “e tumu parau faahiahia roa” e “te pae tahi ore.”
6 Eaha te tumu parau e anaanataehia e te feia i roto i ta tatou tuhaa fenua? Eaha ta tatou i taio na i roto i te mau avaˈe i mairi i roto i ta tatou mau vea o te nehenehe e faaanaanatae i te feia hoo taoˈa e i te feia toroa tiamâ i roto i ta tatou tuhaa fenua, aore ra i to tatou feia tapiri, i to tatou mau hoa rave ohipa e i to tatou mau hoa haapiiraa? Eaha mau na o te nehenehe e faaanaanatae i te mau paruru, te mau orometua haapii, te feia tauturu i te mau orometua haapii e te utuafare, te feia haapii tamarii, te feia rave ohipa totiale e te mau taote? Mai te peu e e tuatapapa tatou i te mau vea atoa ma te manaˈonaˈo i te mau taata, e fanaˈo ïa tatou i te mau ravea faahiahia roa no te tufa i te parau mau.
7 Ia anaanatae maitai anaˈe te hoê taata i te hoê tumu parau o Te Pare Tiairaa aore ra o te A ara mai na! e ia farii oia i te vea, e nehenehe tatou e parau atu ia ˈna e: “Ia taio faahou anaˈe au i te hoê tumu parau e nehenehe oe e anaanataehia, e oaoa roa ïa vau i te afai mai hoê na oe.” Peneiaˈe e nehenehe tatou e tapao ia ˈna i roto i ta tatou eˈa opereraa vea ma te hoˈi pinepine atu e pûpû i te mau vea apî. Hoê â huru mai ta tatou e rave nei ia fariihia mai tatou ia hoˈi e farerei i te feia atoa e anaanatae nei i te tahi huru tumu parau.
8 E haamau anaˈe i te hoê tapao pae varua: E tau matahiti i teie nei, ua farii te hoê taata, o te nounou noa na i to ˈna toroa, i te hoê numera o te A ara mai na! ta ˈna e anaanatae ra. Ua taio atoa râ teie taata faaroo i Te Pare Tiairaa o ta ˈna i fanaˈo i te hoê â taime. Ua turai te hoê tumu parau ia ˈna ia tuatapapa hau atu â i te Toru Tahi, te hoê haapiiraa o ta ˈna i tiaturi noa na. E ono avaˈe i muri iho, ua bapetizohia oia! No reira eaha roa ˈtu tatou e haamarirau i te haamata i te mau tauaparauraa Bibilia e te feia e taio ra i ta tatou mau vea. E nehenehe tatou e pûpû atu i te vea iti ra Eaha ta te Atua e titau ra ia tatou? e e ani atu ia ratou no te tuatapapa, i roto tau minuti noa, i te hoê haapiiraa i te mau taime atoa e afai mai ai tatou i ta ratou mau vea.
9 E feruri maite anaˈe o vai, i roto i ta tatou mau hoˈi-faahou-raa e i rotopu i to tatou mau hoa ohipa, te hinaaro i te mau numera apî o Te Pare Tiairaa e te A ara mai na! I muri iho e tutava anaˈe i te farerei atu ia ratou. E haere anaˈe e farerei i te feia atoa ta tatou e nehenehe e ta tatou mau vea faufaa roa. E eiaha roa ˈtu ia moehia ia tatou e ia tutava anaˈe tatou ia taio te mau taata i te mau vea, te “ueue [ra ïa tatou] i ta [tatou] sitona i nia i te pape.” I roto i te roaraa o te tau, e nehenehe â tatou e ite mai i te mau pǐpǐ apî.—Koh. 11:1, 6.