E haafaufaa anaˈe i te Haapiiraa o te Taviniraa Teotaratia 1999
1 O Iesu na te Orometua Rahi. Ua “maere ihora [te mau taata] i te huru o ta ˈna [“haapiiraa,” MN].” (Mar. 1:22) Noa ˈtu e eita te hoê i rotopu ia tatou e nehenehe e paraparau e e haapii mai ia Iesu, e nehenehe tatou e tutava i te pee i to ˈna hiˈoraa. (Ohi. 4:13) No reira, na roto i te apitiraa ˈtu i te Haapiiraa o te Taviniraa Teotaratia, e tamau â tatou i te haamaitai mai ia tatou i roto i te mau tuhaa o te oreroraa parau e o te haapiiraa.
2 I te matahiti 1999, e niuhia te tumu parau n° 1 i nia i te mau tumu parau o Te Pare Tiairaa e A ara mai na! i neneihia i te matahiti 1997. Mai te peu e e taio tatou na mua e i muri aˈe a faaroo atu ai tatou i te haapiiraa, e taa maitai aˈe ïa tatou i te mau tumu parau i te pae varua. E tia i te feia i horoahia ˈtu te mau oreroraa parau faaitoito ia faataa i te mau faaohiparaa ohie e ia vauvau ma te anaanatae e te oraora. E niuhia te mau tumu parau n° 3 e n° 4 i nia i te buka ra Te oaoa i te utuafare, aore ra i nia i te buka iti rairai ra Tumu parau tauaparauraa Bibilia. Hou te reira e horoahia ˈi, e hiˈopoa maitai te tiaau no te haapiiraa i te tumu parau. Ei oraraa utuafare hiˈoraa maitai to te mau taata haapii atoa e vauvau mai i te hoê tuhaa o te buka ra Te oaoa i te utuafare.
3 E faaohipa anaˈe i te mau aˈoraa e e faaineine maitai anaˈe ia tatou: E nehenehe te taata taitahi e aravihia i te pae o te oreroraa parau e te haapiiraa. (Tim. 1, 4:13) No reira, e tia ia tatou ia maimi i te mau aˈoraa e eiaha roa ˈtu e manaˈo e faarue i te reira. (Mas. 12:15; 19:20) No te vauvau ma te aravihi i te parau mau i te mau putuputuraa e i roto i te taviniraa, eita e navai noa te faaiteraa i te mau tupuraa aore ra te taioraa ma te hohonu ore i te mau irava Bibilia. E tia ia tatou ia haaputapû i te mafatu o te feia e faaroo ra ia tatou e ia anaanatae mai ratou. E naeahia ia tatou te reira na roto i te faaiteraa i te parau mau ma te papu e ma to tatou mafatu. (Hiˈo Ohipa 2:37) E tauturu te mau aˈoraa e horoahia ra i te haapiiraa ia tatou.
4 Ia horoahia mai ta tatou tumu parau, e hiˈo anaˈe i te aravihi i te pae o te oreroraa te tia ia ohipa, mai tei faahitihia i roto i te Buka no te Haapiiraa. E feruri anaˈe i nia i te ravea no te faaohipa i te mau aˈoraa i horoahia mai ia tatou na mua ˈtu. E feruri anaˈe i nia i te manaˈo tumu, i nia i te tupuraa, mai te peu e e titauhia hoê, e i nia i te faaohiparaa i te mau irava Bibilia i faahitihia. E imi anaˈe i te ravea maitai aˈe no te faaohipa i te mau upoo parau iti no te haapii e no te turai ia ohipa.—Tim. 1, 4:15, 16.
5 Mai te peu e te mǎtaˈu nei tatou i te tapao ia tatou i te haapiiraa, e faahiti anaˈe i te reira i roto i te pure, i muri iho, e faaite anaˈe i to tatou mau manaˈo hohonu i te tiaau no te haapiiraa. E haere te taata taitahi i mua mai te peu e e haafaufaa rahi oia i te Haapiiraa o te Taviniraa Teotaratia 1999.