Ua ite anei oe?

Eaha te pereoo tei nia iho te taata tiaraa teitei no Etiopia a farerei ai Philipa ia ˈna?

I ROTO i Te Bibilia, Huriraa o te ao apî, ua faaohipahia te taˈo “pereoo” no e rave rahi huru pereoo. (Ohi. 8:28, 29, 38) Tera râ, ia faaauhia i te mau pereoo tamaˈi, e au ra e e pereoo rarahi aˈe to te taata tiaraa teitei no Etiopia. Eaha te haapapu ra i te reira?

E taata mana no Etiopia o te tere atea. “E taata mana oia no Kaneda arii vahine no Etiopia, o te tiaau i ta ˈna mau taoˈa atoa.” (Ohi. 8:27) I Etiopia i tahito ra, e ô atoa mai o Sudana e te pae apatoa roa o Aiphiti. E tauiui atoa paha teie taata Etiopia i te pereoo i te roaraa o to ˈna tere, e titauhia hoi ia tari i ta ˈna taihaa no tera tere atea. I te senekele matamua, e tafare e e maha huira to te mau pereoo utaraa taata. Ia au i te hoê tatararaa no nia i te buka Ohipa, “e nehenehe e utahia e rave rahi atu â taihaa i roto i teie huru pereoo. Mea maitai atoa te tere o te mau horopatete e e tere atea ˈtu â taua pereoo ra.”

Te taio ra te taata Etiopia a farerei ai Philipa ia ˈna. Te na ôhia ra e ua horo “Philipa i pihai iho i te pereoo e faaroo ihora i taua [taata tiaraa teitei] ra e taio haapuai ra i te buka a te peropheta Isaia.” (Ohi. 8:30) Eita e nehenehe e tere vitiviti na nia i tera huru pereoo. No reira, e taime ïa to taua taata ra no te taio e no reira atoa o Philipa, na avae noa ra, i nehenehe ai e tapiri atu ia ˈna.

Ua titau manihini te taata Etiopia “ia Philipa ia pauma mai e ia parahi i pihai iho ia ˈna.” (Ohi. 8:31) No te mau pereoo o te tere vitiviti, e tia noa te taata faahoro. No te mau pereoo râ e tafare, e vahi tei faanahohia no te parahirahi, ua nehenehe ïa te taata tiaraa teitei e Philipa e parahi no te tauaparau.

Ia au i te Ohipa pene 8 e te mau maimiraa i ravehia, e nehenehe e parau e pereoo rahi to te taata tiaraa teitei no Etiopia, e ere râ i te pereoo tamaˈi.