Hiˈo faahou i te mau manaˈo faufaa roa

Mea fifi anei no oe i te tahi taime ia haamanaˈo i ta oe i haapii mai nei? Pauroa tatou mai tera. Eaha te tauturu mai? Te hiˈo-faahou-raa ïa i te mau manaˈo faufaa roa.

A haapii ai oe, a faafaaea maa taime no te feruri eaha te mau manaˈo faufaa roa. Ta te aposetolo Paulo ïa i faaitoito i to ˈna mau taeae e tuahine ia rave, a parau ai oia: “E teie te manaˈo faufaa roa.” (Heb. 8:1) Te tauturu ra oia ia ratou ia taa i te auraa o ta ˈna tatararaa e te tuatiraa o te manaˈo tataitahi i te manaˈo tumu.

A faataa i te taime, ahuru minuti paha ia oti ta oe haapiiraa, no te feruri i te mau manaˈo faufaa roa ta oe i apo mai. Ia moˈehia ia oe eaha tera mau manaˈo, a hiˈo faahou i te mau upoo parau iti aore ra a taio i te pereota matamua o te paratarafa tataitahi. Ia haapii oe i te tahi manaˈo apî, a tamata i te faataa i te reira na roto i ta oe mau parau. A hiˈo faahou ai oe i te mau manaˈo faufaa roa, mea ohie aˈe ïa ia haamanaˈo i te reira e ia taa maitai e nafea ia faaohipa.