Te itoito o Iehoiada

E tamahine ta Iezebela. O Atalia to ˈna iˈoa. E vahine ino mau oia mai to ˈna metua vahine. Ua faaipoipo Atalia i te arii no Iuda. I te poheraa o ta ˈna tane, na ta ˈna tamaiti i faatere i te fenua. I te poheraa râ ta ˈna tamaiti, ua faaoti Atalia e na ˈna e faatere ia Iuda. Ua tamata ˈtura oia i te faaore roa i te opu fetii hui arii taatoa. Ua haapohe oia i te feia atoa o te nehenehe e riro ei arii. Oia atoa i ta ˈna mau mootua. Ua riaria roa te taata ia ˈna.

Ua taa ia Iehoiada, te tahuˈa rahi, e i ta ˈna vahine, o Iehoseba, e mea ino roa ta Atalia i rave. Ua ineine raua i te pohe no te faatapuni hoê o ta Atalia mau mootua. O te aiû tamaroa, o Iehoasa ïa. Ua faaamu raua ia ˈna i te hiero.

E hitu matahiti to Iehoasa i teie nei. Ua putuputu Iehoiada i te mau raatira hanere atoa e te ati Levi e ua parau atu oia: ‘A haapao i te mau uputa o te hiero. Eiaha roa ˈtu hoê aˈe taata e tomo mai.’ I muri iho, ua faaarii Iehoiada ia Iehoasa i nia ia Iuda e ua tuu oia i te hei upoo i nia ia Iehoasa. Ua tuô atura te nunaa o Iuda: ‘Ia ora te arii!’

Ua faaroo te arii vahine o Atalia i te tuôraa a te nunaa e ua horo oia i te hiero. I to ˈna iteraa i te arii apî, ua tuô oia: ‘E orure hau, e orure hau!’ Ua haru atura te mau raatira hanere i te arii vahine ino mau. Ua faahaere ratou ia ˈna i rapae a haapohe atu ai ia ˈna. Tera râ, nafea ia faaore i te mau faahopearaa o to ˈna hiˈoraa ino i nia i te nunaa?

Ua tauturu Iehoiada i te nunaa ia haamau i te hoê faufaa aore ra faaauraa e o Iehova e ia euhe i te haamori ia ˈna anaˈe. Ua faaitoito Iehoiada ia ratou ia tuparari i te hiero a Baala e te mau idolo. Ua faatoroa oia i te mau tahuˈa e ati Levi no te ohipa i te hiero ia nehenehe te nunaa e haamori faahou i te Atua i ǒ. Ua maiti oia i te mau tiai no te haapao i te hiero ia ore te tahi noa ˈˈe taata viivii e tomo atu. I muri iho, ua afai Iehoiada e te mau raatira hanere ia Iehoasa i to ˈna aorai e ua tuu ratou ia ˈna i nia i te terono. Ua oaoa roa to Iuda. Ua nehenehe ratou e tavini ia Iehova. Aita faahou teie vahine ino mau o Atalia e te haamoriraa a Baala. Maoti to ˈna itoito, ua tauturu Iehoiada e rave rahi taata, e ere anei?