TE PAHONO RA TE BIBILIA
O vai te haere i te raˈi e no te aha?
E rave rahi te tiaturi nei e haere i te raˈi ia pohe ratou. Ua parau atoa Iesu e e ora ta ˈna mau pǐpǐ taiva ore i reira. Hou a pohe ai, i fafau na ïa o ˈna e faaineine i te parahiraa no ratou i pihai iho i to ˈna Metua.—A taio i te Ioane 14:2.
No te aha vetahi taata e faatia-faahou-hia ˈi no te ora i te raˈi? Eaha ta ratou e rave i reira? Ua parau Iesu i ta ˈna mau aposetolo e e riro ratou ei arii. A muri aˈe, na tei faatia-faahou-hia i te raˈi ïa e faatere i to te fenua.—A taio i te Luka 22:28-30; Apokalupo 5:10.
E haere anei te taata maitai atoa i te raˈi?
I te fenua e rave rahi, te tahi noa taata te riro ei melo o te hoê faatereraa. Mea tano ïa ia manaˈo e tau taata noa ta Iesu e faatia faahou no te ora i te raˈi no te faatere i to te fenua e o ˈna. (Luka 12:32) Te faaite ra te Bibilia i te numera o tera pǔpǔ taata.—A taio i te Apokalupo 14:1.
Ua faaineine Iesu i te parahiraa i te raˈi no vetahi o ta ˈna mau pǐpǐ. Ua ite anei oe i ta ratou e rave i reira?
E ere râ o ratou anaˈe te haamaitaihia. Ia haamouhia teie nei ao ino, e ora mai te feia taiva ore. I raro aˈe i te faatereraa a te Basileia o Iesu, e oaoa ratou i te ora e a muri noa ˈtu i te fenua nei o tei riro faahou mai ei paradaiso. (Ioane 3:16) No te tahi atu, e fanaˈo ratou i te reira ia faatia-faahou-hia ratou mai te pohe mai.—A taio i te Salamo 37:29; Ioane 5:28, 29.