E tauturu anaˈe i te mau taata atoa o te faaite ra i te anaanatae
1 I te roaraa o te avaˈe mati, e turai to tatou faaroo e to tatou aroha ia tauturu i te mau taata o te faaite ra i te anaanatae no te poroi o te Basileia e ia titau manihini atu ia ratou i te oroa Haamanaˈoraa. Oia mau, te hinaaro nei ratou e ite i te mau faanahoraa i ravehia e Iehova no te faaora, te mau faanahoraa o te tapiri ra i pihai iho i te tusia taraehara o te Mesia. — Heb. 9:28.
2 Te hoê manaˈo maitai roa oia hoi te raveraa i te tabula o te mau taata o ta tatou e hinaaro ra e titau manihini i te oroa Haamanaˈoraa. E manaˈo tatou i te mau taata o te apiti mai i te tahi taime i te mau putuputuraa, o tei haapii na aore ra o tei faaite i te tahi huru anaanatae i mutaa ihora. Eiaha ia moehia te mau hoa faaipoipo aita i roto i te parau mau e te mau melo o to tatou utuafare. E rave anaˈe i te hoê tutavaraa taa ê no te farerei te taata i tapaohia i nia i ta tatou tabula. No te tahi mau hoˈi-faahou-raa, e mea hau aˈe ia ani i te tauturu o te hoê matahiapo.
3 Eaha te parau i te taime o te hoˈi-faahou-raa?
I muri aˈe i te aroharaa ma te auhoa i te taata ta tatou e haere ra e farerei, e nehenehe tatou e parau mai teie te huru:
◼ “I mutaa ihora, ua faaite oe i te anaanatae no te mau ohipa pae varua. Ua manaˈo ïa vau e oaoa roa oe i te farii i teie titauraa manihini i te hoê putuputuraa taa ê. [Horoa i te api parau titauraa manihini i te oroa Haamanaˈoraa.] Te oroa Haamanaˈoraa o te hoê oroa otahi roa ta te Fatu ra o Iesu Mesia i faaue i ta ˈna mau pǐpǐ ia faatupu. E oaoa tatou i te haamanaˈo ia tatou iho i ta te Mesia i faatupu ma te horoa i to ˈna ora e, maoti to ˈna tusia, e roaa ia tatou te ora mure ore. I te matahiti mairi aˈenei, ua apiti mai e 11 mirioni taata i te oroa Haamanaˈoraa. E oaoa roa vau e ia apiti mai oe e o vau atoa i teie matahiti.” Eiaha ia moehia ia tatou ia faaite i te vahi e te hora o te oroa Haamanaˈoraa i nia i te api parau titauraa manihini. E tamata atoa i te ani e haere mai outou e tii ia ˈna ma te peu e e titauhia.
4 Ia faaite tatou i te feia i haere mai i te oroa Haamanaˈoraa e te farii-popou-hia ra ratou. E tauturu tatou ia ratou ia haamatau i te mau taata poro o te amuiraa e e faaite anaˈe ia ratou i te mau taata farii maitai o to ratou vahi faaearaa. E tamǎrû hoi te reira ia ratou ia ite e te anaanatae ra vetahi o ta ratou mau taata tapiri i te parau mau. Mai te peu e nehenehe, e titau ia ratou ia parahi i pihai iho i to tatou utuafare i te taime o te oroa o te Haamanaˈoraa.
5 Oia mau, e ere noa ma te apitiraa i te oroa Haamanaˈoraa e roaa ˈi i te hoê taata te ora. Tera râ, no te mau taata o ta tatou e titau manihini ra, te reira paha te hoê taahiraa matamua o te aratai ia ratou ia faatupu i te faaroo i roto i te toto haamaniihia e Iesu. Ma te faahoˈi ia ratou i te fare, e ani atu ia ratou aita anei ratou e hinaaro ra e apiti mai i te putuputuraa huiraatira e i te haapiiraa o Te Pare Tiairaa o te tupu i te mahana sabati i muri noa mai i te oroa Haamanaˈoraa. Ei huru auhoa to tatou e te hamani maitai. E faaite i ta tatou mau manihini e te hinaaro nei tatou e tauturu ia ratou ia au i te maraa ia tatou. Ia oioi te hoê taata i te haamata i te amuimui tamau noa i te amuiraa, e oioi atoa ïa ta ˈna mau haereraa i mua. Auê ïa oaoa e auê ïa mauruuru ia ora ˈtu i “te ati rahi” e te mau taata atoa ta tatou i tauturu! — Apo. 7:9, 14.