E nafea Iehova e haapapu ai e e tupu ta ˈna parau fafau no te paradaiso?

1. Eaha te poroi a te peropheta Isaia no to ˈna mau taeae ati Iseraela?

UA PARAU te peropheta Isaia e o Iehova “te Atua parau mau.” Te taˈo “parau mau” na roto i te reo tumu, e “amene” ïa. (Isa. 65:16, nota) Te auraa o te taˈo “amene,” e “na reira ïa,” aore ra “papu maitai.” I roto i te Bibilia, ia faahitihia te parau “amene” no Iehova aore ra no Iesu, e haapapuraa ïa e e mea mau ta raua mau parau. No reira, mea papu maitai te poroi a Isaia no to ˈna mau taeae ati Iseraela: E nehenehe iho â e tiaturi i te mau parau atoa ta Iehova e fafau ra. Ua haapapu Iehova i te reira na roto i te faatupuraa i ta ˈna mau parau fafau atoa.

2. No te aha tatou e nehenehe ai e tiaturi i te mau parau fafau a Iehova no nia i te oraraa no a muri aˈe, e eaha te mau uiraa ta tatou e pahono?

² E nehenehe anei tatou e tiaturi atoa i te mau parau fafau a Iehova no nia i te oraraa no a muri aˈe? Fatata e 800 matahiti i muri mai ia Isaia, ua faataa te aposetolo Paulo no te aha e nehenehe ai e tiaturi i te mau parau fafau a te Atua. Ua parau hoi o ˈna: “E ore atoa e tia i te Atua ia haavare.” (Heb. 6:18) Eita te pape maaro e te pape avaava e na roto mai i te hoê â apoo. Oia atoa no Iehova, te Tumu o te parau mau, e ore roa e tia ia ˈna ia haavare. No reira, e nehenehe iho â e tiaturi i te mau parau atoa no ǒ mai ia Iehova ra, oia atoa ta ˈna mau parau fafau no a muri aˈe. I roto i teie tumu parau haapiiraa, e pahono tatou i teie na uiraa: Eaha ta Iehova i fafau ia tatou no a muri aˈe? E mea nafea o ˈna i te haapapuraa e e tupu ta ˈna parau fafau?

EAHA TA IEHOVA I FAFAU?

3. (1) Eaha te parau fafau e mea au roa na te mau tavini a te Atua? (Apokalupo 21:3, 4) (2) Eaha te manaˈo o vetahi ia faaitehia ˈtu taua parau fafau ra?

³ Mea au roa na te mau tavini a te Atua i te parau fafau o te Apokalupo 21:3, 4. (A taio.) Ua fafau Iehova e ia tae i te hoê mahana, “e ore roa te pohe, e ore atoa te oto e te auê e te mauiui.” I roto i te taviniraa, mea rahi o tatou o te faaohipa nei i teie mau irava Bibilia tamahanahana no nia i te oraraa i roto i te paradaiso. Eaha râ te manaˈo o vetahi ia faaitehia ˈtu te reira? E na ô mai paha ratou: “E moemoeâ noa tera, e ere i te mea mau.”

4. (1) Eaha ta Iehova i ite ê na? (2) Taa ê atu i te fafauraa i te hoê parau, ua nafea ˈtu â Iehova?

⁴ Papu, i to te Atua aratairaa i te aposetolo Ioane ia papai no nia i te parau fafau o te paradaiso, ua ite Iehova e i te hoê mahana, e faaite tatou i teie tiaturiraa ia vetahi ê ia poro tatou i te poroi o ta ˈna Faatereraa arii. Ua ite ê na atoa Iehova e e tiaturi atâ vetahi i teie parau tohu no nia i “te mea apî.” (Isa. 42:9; 60:2; Kor. 2, 4:3, 4) E nafea ïa tatou e haapapu ai ia vetahi ê, e ia tatou iho, e e tupu te mau haamaitairaa faahitihia i roto i te Apokalupo 21:3, 4? Aita Iehova i fafau noa mai i teie parau tamahanahana, ua horoa atoa râ o ˈna i te tahi mau tumu e nehenehe ai tatou e tiaturi i te reira. Eaha ïa taua mau tumu ra?

TE HAAPAPU RA IEHOVA E TUPU TA ˈNA PARAU FAFAU

5. Eaha te tahi mau tumu e tiaturi ai tatou i te parau fafau a te Atua no te paradaiso e ihea e itehia mai ai te reira?

⁵ I roto i te mau irava i muri nei, e ite mai tatou i te hoê tumu e tiaturi ai tatou i te parau fafau a Iehova no te paradaiso. Te taiohia ra: “Parau atura te Atua o te parahi ra i nia i te terono: ‘Inaha, te hamani nei au i te mau mea apî atoa.’ Na ô atoa maira oia: ‘A papai, e parau papu hoi teie e te parau mau.’ Na ô maira oia ia ˈu: ‘Ua tupu te reira! O vau te Alepha e te Omega, te haamataraa e te hopea.’ ”—Apo. 21:5, 6a.

6. E nafea te Apokalupo 21:5, 6 e haapuai ai i to tatou tiaturi i te parau fafau a te Atua?

⁶ E nafea teie mau irava e haapuai ai i to tatou tiaturi i te parau fafau a te Atua? Te na ô ra te buka Apokalupo—Tatararaa hopea no nia i teie mau irava: “E au ra e na Iehova iho e tarima ra i te parau haamana no te feia haapao maitai, parau faatia ia noaa ia ratou teie mau haamaitairaa no a muri atu.”b I roto i te Apokalupo 21:3, 4 e itehia mai ai te parau fafau a te Atua. I muri mai râ, i roto i te irava 5 e te 6, e ite mai tatou i te haapapuraa a Iehova e mea mau teie parau fafau, mai te huru ra e ua tuurima roa o ˈna i tera parau. E hiˈopoa anaˈe mea nafea Iehova i faahiti ai i tera haapapuraa ta ˈna.

7. No te aha e mea taa ê ai te huru i omua ˈi te Atua i ta ˈna haapapuraa, e no te aha e mea faufaa ia tapao i te reira?

⁷ E omua te Atua i ta ˈna haapapuraa na roto i teie parau: “Parau atura te Atua o te parahi ra i nia i te terono.” (Apo. 21:5a) Mea taa ê teie huru parau, inaha teie hoê o na toru taime e paraparau roa ˈi Iehova i roto i te buka Apokalupo. Te auraa, e ere na te hoê melahi puai e horoa i teie haapapuraa, e ere atoa na Iesu tei faatiahia mai, na Iehova iho râ! E tapao haapapuraa ïa e mea mau te parau e faahitihia i muri mai. No te aha? No te mea eita roa Iehova “e nehenehe e haavare.” (Tito 1:2) Maoti teie irava, e puai roa ˈtu â to tatou tiaturi i te mau parau i roto i te Apokalupo 21:5, 6.

“INAHA, TE HAMANI NEI AU I TE MAU MEA APÎ ATOA”

8. E nafea Iehova e haapapu ai e mea mau ta ˈna parau fafau? (Isaia 46:10)

⁸ E hiˈopoa anaˈe i teie nei i te taˈo “Inaha!” (Apo. 21:5) E ite-pinepine-hia te taˈo Heleni tei hurihia “inaha!” i roto i te buka Apokalupo. Te na ô ra te hoê buka aivanaa e e taˈo teie no te “titauraa i te taata ia horoa mai i te tariˈa faaroo i te parau e taiohia ˈtu nei.” Eaha to muri mai i taua taˈo ra? Te parau ïa a te Atua o te na ô ra: “Te hamani nei au i te mau mea atoa.” Papu, te faahiti ra Iehova i te mau tauiraa e tupu a muri aˈe. No te mea râ no ˈna, e tupu mau iho â ta ˈna parau fafau, e faahiti ïa o ˈna i te reira mai te mea ra e ua tupu ê na.—A taio i te Isaia 46:10.

9. (1) Ia au i te parau “te hamani nei au i te mau mea apî atoa,” eaha na ohipa e piti ta Iehova e rave? (2) Eaha te tupu no “te raˈi” e “te fenua” e vai nei?

⁹ I teie nei, e hiˈo anaˈe i te hoê parau itehia i roto i te Apokalupo 21:5: “Te hamani nei au i te mau mea apî atoa.” I roto i teie pene Bibilia, e piti ohipa ta Iehova e rave ra, oia hoi te monoraa e te faaapîraa. Na mua roa, eaha ta Iehova e mono? I roto i te Apokalupo 21:1, te na ôhia ra: “Ua mou hoi te raˈi tahito e te fenua tahito.” “Te raˈi tahito,” o te mau faatereraa poritita ïa arataihia e Satani e ta ˈna mau demoni. (Mat. 4:8, 9; Ioa. 1, 5:19) E “te fenua” i roto i te Bibilia, o te mau taata ïa e parahi ra i nia iho. (Gen. 11:1; Sal. 96:1) No reira, “te fenua tahito,” o te mau taata ino ïa e ora ra i teie mahana. Te auraa, eita Iehova e tataî noa i “te raˈi” e “te fenua” e vai nei i teie mahana, e faaore roa râ oia i te reira a mono atu ai i te mea apî. E mono o ˈna i te raˈi e te fenua e vai nei i “te hoê raˈi apî e te hoê fenua apî,” oia hoi te hoê faatereraa apî e te hoê nunaa apî.

10. Eaha ta Iehova e faaapî?

¹⁰ E nafea ˈtu â Iehova e faaapî ai i te mau mea atoa? (Apo. 21:5) E rapaau Iehova i te fenua e te taata ia riro faahou mai te reira ei mea tia roa. Mai ta Isaia i tohu, o te fenua taatoa te riro mai ei ô nehenehe mau mai ia Edene ra te huru. E faaapî-atoa-hia te huitaata, inaha e ora mai te piriˈoˈi, te matapo e te tariˈa turi e e faahoˈihia mai te feia pohe i te ora.—Isa. 25:8; 35:1-7.

“E PARAU PAPU HOI TEIE E TE PARAU MAU. . . . UA TUPU TE REIRA!”

11. Eaha ta Iehova i faaue ia Ioane e eaha te tumu?

¹¹ Eaha ˈtu â ta te Atua i parau no te haapapu mai e e nehenehe tatou e tiaturi ia ˈna? Ua parau Iehova ia Ioane: “A papai, e parau papu hoi teie e te parau mau.” (Apo. 21:5) Aita Iehova i faaue noa ia Ioane ia “papai,” ua faaite atoa oia i te tumu a na ô ai: “E parau papu hoi teie e te parau mau,” oia hoi e parau mau ta te Atua e e nehenehe te reira e tiaturihia. E mauruuru tatou ia Ioane i te faarooraa i te faaueraa ia “papai,” e nehenehe ïa tatou e taio i te parau fafau a te Atua no nia i te paradaiso e e feruriruri i nia i te mau haamaitairaa ta tatou e fatata roa i te fanaˈo.

12. No te aha mea tano Iehova i te parauraa: “Ua tupu te reira!”

¹² Eaha ta te Atua i parau i muri mai? “Ua tupu te reira!” (Apo. 21:6) I teie nei, te paraparau ra Iehova mai te huru ra e ua tupu ê na te mau parau atoa ta ˈna i fafau no te paradaiso. E mea tano, no te mea aita hoê aˈe e nehenehe e tapea ia ˈna ia faatupu i te reira. Aita â râ i oti atura, e horoa faahou mai Iehova i te tahi atu haapapuraa i muri mai. Eaha râ?

“O VAU TE ALEPHA E TE OMEGA”

13. No te aha Iehova i parau ai: “O vau te Alepha e te Omega”?

¹³ Mai ta tatou i faahiti i nia ˈtu, e toru taime to Iehova paraparauraa i roto i te orama a Ioane. (Apo. 1:8; 21:5, 6; 22:13) E toru atoa ïa taime to Iehova parauraa: “O vau te Alepha e te Omega.” I roto i te piapa Heleni, o alepha te reta matamua e o omega te reta hopea. Ia ˈna i faahiti i te parau o “te Alepha e te Omega,” te haapapu ra ïa Iehova e ia haamata oia i te tahi ohipa, e rave faahope roa oia i te reira.

14. (1) Afea Iehova i te parauraa, ei auraa parau, “Alepha” e afea o ˈna e parau ai “Omega”? (2) Eaha ta te Genese 2:1-3 e haapapu ra?

¹⁴ I to Iehova poieteraa ia Adamu raua Eva, ua faaite oia i ta ˈna opuaraa no te huitaata e te fenua. Te na ô ra te Bibilia: “Haamaitai ihora te Atua ia raua, e na ô atura te Atua: ‘Ia tamariihia orua e ia rahi, a faaî i te fenua e a haapao atu.’ ” (Gen. 1:28) I tera taime, mai te huru ra e ua parau Iehova i reira “Alepha.” Ua haapapu maitai oia i ta ˈna opuaraa: E tae mai te mahana e î ai te fenua i te huaai tia roa o Adamu raua Eva, e na ratou e faariro i te fenua ei paradaiso. Ia tae i taua mahana ra, mai te huru ra ïa e parau Iehova “Omega.” I te poieteraahia “te raˈi e te fenua e pauroa to reira,” ua horoa Iehova i te tahi haapapuraa. Tei roto ïa i te Genese 2:1-3. (A taio.) Ua faataa Iehova i te hitu o te mahana ei mahana moˈa na ˈna. Eaha te auraa? Te haapapu mai ra Iehova e e faatupu iho â oia i ta ˈna opuaraa no te huitaata e te fenua. Ia hope te hitu o te mahana, ua faatupu hope roa ïa oia i te reira.

15. Ia hiˈohia ˈtu, e au ra e ua noaa ia Satani i te haafifi i te opuaraa a te Atua no te huitaata. No te aha?

¹⁵ I te orure-hau-raa Adamu raua Eva, ua riro raua ei taata hara e ua tutuu raua i te hara e te pohe i to raua huaai. (Roma 5:12) Ia hiˈohia ˈtu, e au ra e ua noaa ia Satani i te haafifi i te opuaraa a te Atua ia î te fenua i te taata tia roa e te auraro. Mai te huru ra ïa ua tapea Satani i te vaha o Iehova ia ore ia parau “Omega.” I tera taime, ua manaˈo paha Satani e aita rea e ravea ta te Atua. Peneiaˈe hoê ravea, o te haapoheraa ïa ia Adamu raua Eva e te poieteraa i te tahi atu na taata tia roa. Tera râ, ahani te Atua i na reira, e pari te Diabolo ia ˈna i te haavare. No te aha? No te mea, mai ta te Genese 1:28 e faaite ra, ua parau Iehova ia Adamu raua Eva e e î te fenua i to raua huaai.

16. No te aha paha Satani i manaˈo ai e e nehenehe o ˈna e parau e aita to Iehova e mana no te faatitiaifaro i teie fifi?

¹⁶ I te manaˈo o Satani, eaha ˈtu â te tahi ravea ta te Atua? Ua manaˈo paha oia e vaiiho noa Iehova ia Adamu raua Eva ia huaai-noa-hia ˈtu e taata hara ratou e eita roa e raea ia ratou te tia-roa-raa. (Koh. 7:20; Roma 3:23) Mai te peu tera iho â, papu maitai e parau te Diabolo e aita e mana to Iehova no te faatitiaifaro i te reira. No te aha? No te mea eita teie ravea e faatupu i ta ˈna opuaraa, oia hoi ia î te fenua paradaiso i te huaai tia roa o Adamu raua Eva.

17. Eaha ta Iehova ravea no te faatitiaifaro i te orureraa hau a Satani e na taata matamua, e eaha te maitai e noaa mai? (A hiˈo atoa i te hohoˈa.)

¹⁷ Eita e ore ua vai mamû noa Satani i mua i ta Iehova ravea no te faatitiaifaro i te orureraa hau a Satani e ta Adamu raua Eva. (Sal. 92:5) Ua haapapu maitai Iehova e eita roa e tia ia ˈna ia haavare, e Atua parau mau hoi oia, inaha ua vaiiho oia ia Adamu raua Eva ia fanau i te tamarii. E mana atoa to ˈna i nia i te mau mea atoa, inaha ia haamata Iehova i te tahi ohipa, e rave faahope roa oia i te reira. Ua tapea noa oia i ta ˈna parau ma te pûpû mai i te hoê “huaai” o te faaora roa i te huaai o Adamu raua Eva. (Gen. 3:15; 22:18) Eaha râ paha Satani i te hitimahuta i te faanahoraa Iehova i te parau o te hoo! No te aha? No te mea e faanahoraa teie o te faaite ra i te here mau o Iehova. (Mat. 20:28; Ioa. 3:16) Aita hoi tera huru maitai i roto ia Satani, inaha e haapao noa o ˈna ia ˈna iho. Eaha ïa te maitai e noaa mai maoti te hoo? Ia hope na 1 000 matahiti faatereraa a te Mesia, e î te fenua paradaiso i te huaai tia roa o Adamu raua Eva, mai ta Iehova iho â i opua i te haamataraa. Ia tae i taua mahana ra, mai te huru ra e e parau Iehova “Omega.”

E NAFEA IA TIATURI ATU Â I TE PARAU FAFAU A IEHOVA NO TE PARADAISO?

18. Eaha na haapapuraa e toru ta te Atua e horoa mai ra? (A hiˈo atoa i te tumu parau tarenihia “E toru tumu e tiaturi ai i ta Iehova parau fafau no te paradaiso.”)

¹⁸ Ia au i ta tatou i hiˈo mai nei, e nafea tatou e haapapu ai i te feia aita e tiaturi ra i te parau fafau a te Atua no te paradaiso e e tupu mau â te reira? A tahi, na Iehova iho i fafau i teie parau. Te na ô ra te buka Apokalupo: “Parau atura te Atua o te parahi ra i nia i te terono: ‘Inaha, te hamani nei au i te mau mea apî atoa.’ ” Tei ia ˈna ra te paari, te puai e te hinaaro e faatupu i ta ˈna parau. A piti, no te mea ua papu ia Iehova e e tupu mau iho â te reira, e paraparau o ˈna mai te huru ra e ua tupu ê na. Inaha, te parau ra oia: “E parau papu hoi teie e te parau mau. . . . Ua tupu te reira!” A toru, ia haamata Iehova i te tahi ohipa, e faatupu hope roa oia i te reira, mai ta ˈna i faahiti i roto i te parau: “O vau te Alepha e te Omega.” E haapapu Iehova e e haavare o Satani e aita ta ˈna e ohipa maitai.

19. Ia manaˈo te taata e moemoeâ noa te parau fafau a te Atua no te paradaiso, e nafea outou?

¹⁹ A haamanaˈo, i te mau taime atoa e faaite ai outou i te haapapuraa a te Atua e e tupu mau iho â ta ˈna parau fafau, e haapuai outou i to outou tiaturi i taua mau parau ra. No reira, ia taio faahou outou i te irava mahanahana mau no nia i te paradaiso i roto i te Apokalupo 21:4 e ia parauhia mai outou, “E moemoeâ noa tera, e ere i te parau mau,” e nafea outou? A tamata na i te taio i te irava  5 e te 6 a tatara roa ˈtu ai i te auraa. Ma te na reira, te faaite ra ïa outou e na Iehova iho i haapapu i tera parau, mai te huru ra e ua tuurima roa oia i te reira.—Isa. 65:16.