A tiaturi ia Iehova—Te Atua e vai mau ra
Ua hiˈo anei outou i te raˈi i te hoê po ateatea maitai a ite atu ai i te mau hanere fetia? I to outou manaˈo, nafea te reira i te faraa mai?
I ROTO i te maniania ore o te po, mai te mea ra e ua paraparau mai te mau fetia ia Davida, arii no Iseraela i tahito ra, a turaihia ˈtu ai oia ia papai e: “Te parau hua nei te mau raˈi i te hanahana o te Atua! e te faaite nei te reva i te ohipa a tana rima!” (Salamo 19:1) Oia, o te Atua Poiete eiaha te mau mea poietehia te au ia fanaˈo i ‘te hanahana, te tura, e te mana.’—Apokalupo 4:11; Roma 1:25.
‘O te faatia i te mau mea atoa ra, o te Atua ïa,’ o ta te Bibilia ïa e parau ra. (Hebera 3:4) Oia iho â, o te Atua mau, ‘o Iehova te iˈoa, tei Teitei i te fenua atoa nei.’ (Salamo 83:18) E ere oia i te hoê moemoeâ—te hoê orama. Teie ta Iesu Mesia i parau no nia i to ˈna Metua i te raˈi ra o Iehova: “Area tei tono mai ia ˈu nei, [te vai mau ra ïa].”—Ioane 7:28; MN.
Iehova—Te Atua o te faatupu i ta ˈna mau opuaraa
E itehia te iˈoa otahi o te Atua, o Iehova, fatata e 7 000 taime i roto noa i te mau Papai Hebera. Te faaite ra teie iho iˈoa e te vai mau ra oia. Te auraa o te iˈoa o te Atua, oia ïa “Na ˈna e faariro.” Te faataa ra ïa te Atua ra o Iehova ia ˈna iho mai te Atua o te faatupu i ta ˈna mau opuaraa. I to Mose aniraa i to te Atua iˈoa, ua faataa Iehova i te auraa o to ˈna iˈoa mai teie: “E riro vau mai ia ˈu e riro mai.” (Exodo 3:14, MN) Te na ô maitai ra te huriraa a Rotherham e: “E riro vau mai ta ˈu e hinaaro.” E riro o Iehova, aore ra e maiti oia i te riro ei mau mea atoa e hinaarohia no te faatupu i ta ˈna mau opuaraa e mau parau tǎpǔ parau-tia. No reira oia e rave ai e rave rahi tiaraa iˈoa, mai te Atua Poiete, Metua, Arii e Fatu, Tiai, Iehova sabaota, Tei faaroo i te pure, Haava, Orometua Rahi roa ˈˈe, Tei hoo faahou mai.—Mau tavana 11:27; Salamo 23:1; 65:2; 73:28; 89:26; Isaia 8:13; 30:20; 40:28; 41:14.
O te Atua mau anaˈe te tano e rave i te iˈoa ra Iehova, no te mea eita roa ˈtu e papu i te taata e e tupu anei ta ratou mau opuaraa. (Iakobo 4:13, 14) O Iehova anaˈe te nehenehe e parau e: “Mai te ûa mau e topa nei, e mai te hiona, no nia mai i te raˈi ra, e aore i hoˈi faahou i reira; ua faararirari râ i te fenua ra, e ua faatupu ra, e ua faahotu mai hoi i ta ˈna, i noaa ˈi hoi te huero i te feia e ueue, e te maa i te feia i amu ra: oia atoa te parau no roto i to ˈu nei vaha; e ore e hoˈi faufaa ore noa mai ia ˈu nei, e tupu râ tei opuahia e au ra; e noaa hoi te mea i faaue atu ai au ra.”—Isaia 55:10, 11.
No te mea e e faatupu iho â Iehova i ta ˈna opuaraa, mea papu maitai no ˈna te mau mea e ere paha mai te reira no te taata. Maoro i muri aˈe i te poheraa o Aberahama, o Isaaka, e o Iakoba, teie ta Iesu i parau no nia ia ratou: “E ere hoi oia [Iehova] i te Atua no tei pohe, no tei ora râ, te ora anaˈe ra hoi ratou ia ˈna.” (Luka 20:37, 38) Ua pohe na patereareha haapao maitai e toru, no te Atua râ, te ora mau ra ratou, no te mea e mea papu roa ta ˈna opuaraa e faatia mai ia ratou. E ere roa ˈtu i te mea fifi na Iehova ia faahoˈi mai i teie mau tavini haapao maitai no tahito ra i te ora, mai te hamaniraa i te taata matamua i te repo fenua.—Genese 2:7.
Te horoa ra te aposetolo Paulo i te tahi atu hiˈoraa no te haapapu e e faatupu iho â te Atua i ta ˈna e opua e rave. I roto i te mau Papai, ua parauhia Aberahama “ei metua no te mau fenua atoa e rave rahi.” (Roma 4:16, 17) A vai tamarii ore ai o Aberama, ua taui Iehova i to ˈna iˈoa ei Aberahama, te auraa ra “Metua o te hoê nahoa taata (feia rahi roa).” Ua rave Iehova e ia riro te auraa o to ˈna iˈoa ei tupuraa mau na roto i te faaoraora-semeio-faahou-raa i te puai fanauraa o Aberahama e to ta ˈna vahine o Sara, e ruhiruhia hoi raua.—Hebera 11:11, 12.
No te mea ua horoahia te puai e te mana rahi na ˈna, ua faahiti Iesu Mesia i te mau tupuraa mau ma te hoê manaˈo teitei aˈe i to te taata. Noa ˈtu e ua pohe to ˈna hoa rahi o Lazaro, ua parau Iesu i ta ˈna mau pǐpǐ e: “Ua taoto to tatou hoa o Lazaro, te haere nei râ vau e faaara ia ˈna.” (Ioane 11:11) No te aha Iesu i parau ai no nia i te hoê taata pohe e te taoto noa ra oia?
I to Iesu taeraa ˈtu i Betania, te oire tumu o Lazaro, ua haere oia i te menema e ua faaue oia e ia tatarahia te ofai e opani ra i te uputa. I muri aˈe i to ˈna pureraa ma te reo puai, ua pii atura oia e: “E Lazaro, a haere mai i rapae.” E a tiatonu noa ˈi te feia mataitai i te menema, “ua haere maira taua taata i pohe ra i rapae, ua taamuhia na rima e na avae, i vehîhia hoi te mata i te ahu.” Ua na ô atura Iesu e: “A tatara, e tuu atu ia ˈna ia haere na.” (Ioane 11:43, 44) Ua faatia mai Iesu ia Lazaro—na roto i te horoa-faahou-raa ˈtu i te ora i te hoê taata i pohe a maha ˈtura mahana! Aita te Mesia i taviri i te parau mau i to ˈna parauraa e te taoto ra to ˈna hoa. I to Iehova e to Iesu manaˈo, mai te mea ra e te taoto noa ra te taata pohe ra o Lazaro. Oia, te haapao ra Iesu e to ˈna Metua i te raˈi i te mau tupuraa mau.
E nehenehe ta Iehova e faatupu i ta tatou mau tiairaa
Mea taa ê roa ïa te mau idolo haavare e te Atua e vai mau ra! Ua hape te feia haamori idolo i te parauraa e e mana hau aˈe to ta ratou mau taoˈa haamoriraa i to te taata. Noa ˈtu teie haamoriraa, eita e noaa i teie mau idolo te mau puai semeio. Area te Atua ra o Iehova ra, e tano roa ia parau oia e te ora ra ta ˈna mau tavini tei pohe ahia ˈtura maororaa, no te mea e nehenehe ta ˈna e faahoˈi mai ia ratou i te ora. ‘O Iehova te Atua mau,’ e eita roa ˈtu oia e haavare i to ˈna nunaa.—Ieremia 10:10.
Mea mahanahana mau â ia ite e i te taime faataahia e Iehova, e faatiahia mai—e faahoˈihia mai i te ora—te feia pohe ta ˈna e haamanaˈo! (Ohipa 24:15) Oia, i te tia-faahou-raa, e faahoˈihia mai tera noa huru taata ra. E ere i te mea fifi na te Atua Poiete ia haamanaˈo i te huru oraraa o te feia pohe e ia faatia mai ia ratou, no te mea e paari e e mana hope to ˈna. (Ioba 12:13; Isaia 40:26) I te mea e e here i te rahi to Iehova, e faaohipa ïa oia i to ˈna mehara tia roa no te faahoˈi mai i te feia pohe i te ora i nia i te hoê fenua paradaiso ma tera noa huru to ratou mai na mua ˈˈe i to ratou poheraa.—Ioane 1, 4:8.
A fatata mai ai te hopea o te ao a Satani, mea faahiahia mau â te oraraa no a muri aˈe o te feia e tiaturi i te Atua mau. (Maseli 2:21, 22; Daniela 2:44; Ioane 1, 5:19) Te haapapu maira te papai salamo e: “No parahirahi aˈe te paieti ore, e aita ra; . . . area te feia mǎrû ra, e parahi ïa i te fenua, e oaoa ratou i te rahi o te hau ra.” (Salamo 37:10, 11) E riro e no mutaa iho te ohipa ino e te haavîraa uˈana. E tupu te parau-tia, e e ore te mau fifi i te pae faaravairaa faufaa. (Salamo 37:6; 72:12, 13; Isaia 65:21-23) E mou roa te hiˈo-ino-raa i te mau pae totiare, nunaa, opu fetii, e pǔpǔ taata. (Ohipa 10:34, 35) E ore te mau tamaˈi e te mau mauhaa tamaˈi. (Salamo 46:9) I taua taime ra, ‘e ore roa to reira e parau e ua paruparu vau i te maˈi.’ (Isaia 33:24) E fanaˈo te taatoaraa i te ea maitai roa e te oraora. (Apokalupo 21:3, 4) E fatata te fenua i te riro ei paradaiso. Ua opua Iehova i te reira!
Oia, e fatata te mau tiairaa bibilia atoa i te tupu. No te aha ïa tatou e vare ai i te mea e faaidolohia ra i roto i teie nei ao, e nehenehe hoi tatou e tiaturi roa ia Iehova? E hinaaro oia “i te taata atoa ia ora, e ia noaa te ite i te parau mau.” (Timoteo 1, 2:3, 4) Eiaha tatou e pûpû i to tatou taime e ta tatou faufaa na te mau moemoeâ, aore ra te mau orama, a teie faanahoraa o te mau mea e to ˈna mau atua, ia rahi râ to tatou ite i te Atua e vai mau ra e ia tiaturi tatou ia ˈna ma to tatou aau atoa.—Maseli 3:1-6; Ioane 17:3.
[Hohoˈa i te api 6]
I to Iehova e to Iesu manaˈo, te taoto noa ra Lazaro
[Hohoˈa i te api 7]
E fatata te fenua i te riro ei paradaiso