E faahanahana anaˈe na i te Atua e noaa ˈi te tiaturiraa
“E teie nei, te na ô ra maira te Atua o Iseraela ra o Iehova; (...) O tei faatura mai ia ˈu ra o ta ˈu ïa e faatura ˈtu, area tei vahavaha mai ia ˈu ra, e vahavahahia ïa ratou iho.” — SAMUELA 1, 2:30.
1. Eaha hoi te tumu tatou e hinaaro ai e faatura aore ra e faahanahana ia Iehova (Timoteo 1, 1:17; Apokalupo 4:11)?
IA HIˈOHIA te mau tiaturiraa ta te Bibilia e pûpû mai nei na tatou, mea tano iho â ïa e mea tia atoa hoi ia faahanahana i “te Atua e noaa ˈi te tiaturiraa”, te “Atua e horoa mai i te tiaturiraa”. (Roma 15:13, Traduction du monde nouveau.) Eaha hoi te tumu? Nafea hoi tatou e nehenehe ai e faatura i te Poiete rahi ra o te ao taatoa nei, tatou te mau taata tia ore e te haihai hoi i mua ia ˈna? E o ˈna e faatura atoa mai anei oia iho ia tatou?
2. Eaha te manaˈo o Iesu no nia i te hanahana aore ra te tura e tia ia horoahia ˈtu no te Atua?
2 E nehenehe tatou e huti mai i te tahi haapiiraa i te hiˈoraa o Iesu. Aita e taata e nehenehe e parau e aita o Iesu i hinaaro e faatura e e faahanahana i to ˈna Metua (Ioane 5:23; 12:28; 15:8). Inaha hoi, ua faautua aˈera oia i te mau Pharisea e te mau papai parau e ‘te ati na ratou i te Atua i to ratou vaha, e te faatura ra hoi ia ˈna i to ratou utu; tei te atea ê râ to ratou aau ia ˈna’? E nehenehe ta tatou e tapao mai i ǒ nei e mai te peu e aita taua mau taata ra i faatura i te Atua, no te mea ïa e mau ohipa e e mau manaˈo iino to ratou (Mataio 15:7-9). No nia i te Mesia râ hoi, e nehenehe anei e parau e ua ati maite to ˈna faatura i te Atua i te tiaturiraa ta ˈna e atuatu ra? Taa ê atu i te reira, nafea hoi to Iehova fariiraa i taua mau tapao faatura ra?
3. Nafea hoi tatou e ite ai e te tiaturi ra Iesu ia Iehova?
3 Mea faufaa mau â hoi na Iesu te mau parau a Davida i papaihia i roto i te Salamo 16:10 e na ô ra e: “E ore hoi oe e vaiiho i tau varua i hade, e ore hoi oe e tuu i te taata moˈa ra ia ite i te tahuti.” Ma te atuatu i te tiaturiraa e e faatia-faahou-hia mai oia, ua parau aˈera o Iesu Mesia i te mau parau i muri nei, mau parau faufaa mau hoi, i te hoê taata rave parau ino rîhia i nia i te hoê pou haamauiuiraa i pihai iho ia ˈna i te na ôraa ˈtu e: “Ei paradaiso ïa oe e o vau atoa i teie nei â mahana.” (Luka 23:39-43). Ua pohe taua taata rave parau ino nei i muri iho e aita ˈtura hoi oia i nehenehe, e toru mahana i muri aˈe, e ite roa ˈtu i te haapapuraa o te parau no nia i te tiaturiraa o Iesu oia hoi e faatiahia mai oia mai roto mai i te feia pohe. Teie râ ta te hoê taata i ite mata roa i parau: “O taua Iesu nei â ta te Atua i faatia aˈenei i nia, o matou atoa nei hoi te ite.” (Ohipa 2:31, 32). Oia mau, ua riro mau â te tia-faahou-raa o Iesu ei ohipa tei tupu mau â.
4. Eaha te hanahana i tia ia faahanahanahia ˈtu ia Iesu (Apokalupo 5:12)?
4 E rave rahi i roto i te nunaa o ta Iesu i poro atu tei ite e e tia mau â oia ia faaturahia (Luka 4:15; 19:36-38; Petero 2, 1:17, 18). E i muri iho, ua haapohehia aˈera oia mai te hoê taata taparahi taata ra te huru. Ua taui anei ïa taua pohe ra i te tiaraa o Iesu? Aita, inaha, te farii noa mairâ te Atua o ta ˈna e tiaturi ra, ia ˈna, e ua faaora faahou maira Iehova ia ˈna. Mai te peu e ua faatia mai te “Atua e noaa ˈi te tiaturiraa” i ta ˈna Tamaiti e ua horoa mai hoi no ˈna i te huru pohe ore i roto i te mau reva i te raˈi ra, no te mea ïa te faatura noa râ Oia ia ˈna. Teie hoi ta Paulo i papai: “Te ite nei râ tatou ia Iesu (...), ia pohe oia ei ono i te taata atoa no te aroha mau o te Atua ra, i te faakoronaraahia i te teitei e te tura, oia i faaoromai i taua pohe ra.” — Hebera 2:7, 9; Philipi 2:9-11.
5. Ua faaturahia Iesu ma tei hea huru taa ê, e ua faahanahana rahi atu â te reira ia Iehova i roto i tei hea auraa?
5 Ua faaite atoa mai o Iesu tei faatura ia Iehova mea nafea to te Metua faatura-taa-ê-raa mai ia ˈna. A fa atu ai oia i ta ˈna mau pǐpǐ ra, i muri aˈe i to ˈna faatiaraahia mai, teie ta ˈna i parau atu ia ratou: “O te mana atoa i te raˈi e te ao atoa nei ua pûpûhia mai tei ia ˈu anaˈe. E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te [varua moˈa] (...): e inaha, tei pihai atoa iho ïa vau ia outou, e tae noa ˈtu i te hopea o teie nei ao.” (Mataio 28:18-20). Ua faatura atura ïa te Metua i ta ˈna Tamaiti ma te tahi atu â huru: ua horoa mai oia i te hoê mana aita e faaauraa. E tia hoi taua mana nei ia faaohipahia no te huitaata e faatura ia Iehova, mai ta Iesu e faaitoito ra i te na reira; e e faatura taua mau taata nei i to ratou Poiete ia rave ratou i te hoê ohipa. No reira, e tia anei ïa ia tatou ia faaoti e e nehenehe te mau taata hara mai ia tatou nei e faatura i te Metua e e faatura-atoa-hia mai ratou na ˈna?
Te mau taata e faatura ra i te Atua
6. Mea tano anei ia hinaaro tatou ia faaturahia tatou, eaha râ hoi te fifi ta te reira e pûpû mai nei (Luka 14:10)?
6 E ere roa ˈtu te tapitapiraa matamua a te rahiraa o te taata te faaturaraa i te Atua: mea tapitapi rahi aˈe hoi na ratou no to ratou iho hanahana. E tae roa hoi te vetahi pae i te parau e mea tia iho â ia hinaaro tatou e ia faaturahia mai tatou. E ere roa ˈtu te reira i te mea hape roa, inaha, mea tano iho â hoi ia hinaaro tatou i te hoê roo maitai (Timoteo 1, 3:2, 13; 5:17; Ohipa 28:10). Teie râ, e nehenehe hoi te hinaaroraa e ia faahanahanahia mai tatou e te taata e ohie roa i te rahi. E itehia taua huru nei i roto i te mau taata e rave rahi teie e haa nei e ia tui mau iho â to ratou roo aore ra ia rave i te mau huru ohipa atoa no te faaite e ua tano mau â ratou.
7. No te aha e faufaa taotiahia to te hanahana ta tatou e tiaturi e e noaa mai i te taata?
7 Ia manaˈo tatou i te reira, e riro te mau faahanahanaraa rarahi roa aˈe e nehenehe e noaa mai i te taata i te ohie roa i te rahi, no te mea e oioi roa hoi te reira i te ore. Parau mau, e nehenehe vetahi mau taata tuiroo e faaturahia i te hoê taime, e tia râ hoi ia tatou ia ite e ia pohe ratou, e aramoina roa te mau taata. Inaha, e hia rahiraa taata tei ite i te iˈoa o to ratou mau tupuna aore ra tei ite e o vai te taata i faatere i to ratou fenua a tahi atura senekele? I te parau mau, ua ora mai tera aore ra tera taata, eita roa ˈtu te reira e taui i te tereraa o te ao nei: ua riro noa hoi oia ei maa huˈa repo i nia i te faito o te tau, ei maa topata pape iti i roto i te moana o te oraraa. E noa ˈtu â ïa e faahanahanahia taua taata nei i muri aˈe i to ˈna poheraa, eita hoi oia e ite i te reira (Ioba 14:21; Paraleipomeno 2, 32:33; Koheleta 9:5; Salamo 49:12, 20). Te mea faufaa roa ˈˈe, ia noaa ïa ia tatou i te tiaturiraa ta te Atua e horoa mai nei, te faaturaraa i te Poiete e te faaturaraahia mai hoi tatou na ˈna. E te vai ra ia tatou nei te haapapuraa no nia i te ohipa i roohia i nia i na taata o te Iseraela tahito tei ora na hoê â anotau.
8. Eaha te hape ta Eli i rave no nia i te hanahana te tia ia horoahia ˈtu no Iehova?
8 Te hoê o taua na taata e piti nei o Eli ïa. E 40 matahiti te maororaa to ˈna amoraa i te tiaraa teitei ra tahuˈa rahi no te Atua e ua noaa hoi ia ˈna i te haamaitairaa no te haava ia Iseraela (Samuela 1, 1:3, 9; 4:18). Tera râ i roto i te roaraa o te tau, ua haaparuparu mai oia i mua i ta ˈna na tamarii toopiti o Hophini raua o Phinehasa. Ua faaohipa hoi taua na taata nei i to raua tiaraa tahuˈa no te eiâ i te hoê tuhaa o te mau tusia e no te rave i te ohipa taiata. Aita hoi o Eli i aˈo papu atu ia ratou, e ua aratai aˈera te reira i te Atua ia parau mai ia ˈna e ‘te tamau noa ra oia i te faatura i ta ˈna na tamarii hau aˈe Ia ˈna’. Ua tǎpǔ maira o Iehova e e faaherehere oia i te autahuˈaraa o Aarona, e e tae râ hoi i te taime i reira te utuafare o Eli e faaatea-ê-hia ˈi i te tiaraa autahuˈa rahi. No te aha hoi? Teie ta Iehova e faataa maira: “O tei faatura mai ia ˈu ra o ta ˈu ïa e faatura ˈtu, area tei vahavaha mai ia ˈu ra, e vahavahahia ïa ratou iho.” — Samuela 1, 2:12-17, 29-36; 3:12-14.
9. Ua nehenehe o Samuela e faahanahana ia Iehova i tei hea taime?
9 Te piti o te taata, oia hoi o Samuela, te horoa maira ïa oia i te hoê huru taa ê mau. Eita e ore outou i te ite e, mai to ˈna mai â apîraa ra, ua aratai to ˈna mau metua ia ˈna i te sekene, i Silo. I te hoê po, ua parau maira o Iehova i taua tamaiti iti nei. E hinaaro paha ïa outou e taio i te aamu faahiahia mau no nia i te ohipa i tupu; e itehia te reira i roto i te Samuela 1, 3:1-14. A taio noa ˈi outou, a manaˈo na e ua faaarahia taua tamaiti nei eiaha na te hoê haruru patiri, na te hoê râ reo ta ˈna i manaˈo e te reo o te taata paari ra o Eli. A feruri na râ i muri iho te huru ê o te tamaiti ra o Samuela ia haere atu oia e faaite i taua taata paari nei e ua opua o te Atua e faautua mai i to ˈna utuafare. E inaha, ua na reira mau â o Samuela, ma te faatura i te Atua na roto i te auraroraa ˈtu ia ˈna. — Samuela 1, 3:18, 19.
10. Mea nafea to te Atua faaturaraa mai ia Samuela?
10 E rave rahi matahiti to Samuela faahanahanaraa i te Atua i roto i to ˈna tiaraa peropheta e, mai ta te Samuela 1, 7:7-13 e faaite ra, ua faatura mai te Atua ia Samuela. Oia mau, ua faaroo mai te Atua e ua pahono mai hoi i te pure a Samuela o tei ani atu i ta ˈna tauturu no te aro atu i te mau Philiseti. Eita anei outou e oaoa ia tâuˈa mai te Atua ia outou? Noa ˈtu â ïa e aita ta ˈna na tamarii i pee i to ˈna mau taahiraa avae, aita o te Atua i faarue mai ia Samuela, mai ta ˈna i faarue ia Eli. E nehenehe tatou e manaˈo e te faaitoito ra oia no te faatura i te Atua; ei hiˈoraa, te faaite maira o Iehova e aita oia e farii ra i te nunaa i te aniraa ˈtu oia i te tahi arii taata no ˈna (Samuela 1, 8:6, 7). Ua faaohipa aˈera te Atua ia Samuela no te faatavai ia Saula, e i muri iho ia Davida. A pohe ai o Samuela, ua hanahana roa o Iseraela i to ˈna poheraa. Ua faatura rahi mai â te Atua ia ˈna i te horoaraa mai i te hoê parahiraa faufaa roa ˈtu â i roto i te Bibilia i rotopu i te mau taata faaroo e apiti atu i roto i te tia-faahou-raa e i te mau mea maitatai ta ˈna e faaherehere maira no ratou (Salamo 99:6; Ieremia 15:1; Hebera 11:6, 16, 32, 39, 40). Te mea ta tatou i parau iho nei, aita anei ïa e haapapu maira e te taata e faatura i te “Atua e noaa ˈi te tiaturiraa”, e riro ïa oia i te oaoa i te mau haamaitairaa e rave rahi?
E faatura anei outou i te “Atua e noaa ˈi te tiaturiraa”?
11, 12. Eaha te manaˈo e nehenehe e horoahia no nia i te hanahana ta tatou e faahoˈi atu no te Atua, e nafea hoi tatou e nehenehe ai e faahanahana i te Poiete?
11 Te faaite maira te hiˈoraa o Iesu raua o Samuela, ei faahiti-noa-raa i na taata toopiti nei ta te Bibilia e parau ra, e e nehenehe ta te taata e haamau ei tapao matamua na ratou te faahanahanaraa i te “Atua e noaa ˈi te tiaturiraa”. Te faaite atoa maira e, ia na reira tatou iho, mea tia iho â ïa ia tiaturi tatou e e faaturahia mai tatou e te Atua. Teie râ, eaha te tia ia tatou ia rave, ia nehenehe mau te Atua ia farii mai ia tatou, ia faahanahana mai ia tatou e ia fanaˈo roa ˈtu i te tiaturiraa ta te Bibilia e horoa maira?
12 Ei hiˈoraa, e nehenehe ta tatou e faaite i te hoê mǎtaˈu mau e te tura atoa hoi ia ore tatou ia fariihia mai e te Atua (Malaki 1:6). E riro paha e e farii maite tatou i teie faaueraa tumu, teie râ ia haamanaˈo na tatou i te mau tamarii a Eli. Ahiri raua i uihia ˈtu i teie nei uiraa: ‘E hinaaro anei orua e faatura i te Atua na roto i te pûpûraa ˈtu no ˈna i te hoê mǎtaˈu tura mau?’ eita e ore e e pahono mai iho â ïa raua e e. Te vahi fifi roa râ te faaiteraa ïa te reira na roto i te ohipa i roto i te oraraa i te mau mahana atoa, i to tatou hinaaro e faatura i te Atua ma te mǎtaˈu ia ˈna.
13. A faataa mai na te manaˈo e faaite mai e nafea to tatou hinaaro e faahanahana i te Atua ma te mǎtaˈu ia ˈna e nehenehe ai e tauturu mai ia tatou.
13 Mai te peu e e hinaaro paha tatou e eiâ aore ra taiata, ma te papu maitai hoi e eita te reira e itehia mai, e tapea mai anei ïa to tatou hinaaro e faatura i te Atua, ia na reira tatou? E tia ia tatou ia atuatu i te huru feruriraa oia hoi: ‘Noa ˈtu â ïa e e vai moe noa taua ohipa nei, ia faaohipa vau i te reira, e hara ïa vau e e ore atoa hoi vau e faatura i te “Atua e noaa ˈi te tiaturiraa” ta ˈu hoi e amo nei te iˈoa.’ E, oia hoi, eita taua ohipa iino ra e vai moe noa, mai te mau ohipa iino i ravehia e na tamarii a Eli i ore i vai noa mai; o ta te mau parau ïa a te aposetolo Paulo no nia i te “faahapa tia a te Atua” e faaite ra: “O te faautua mai i te taata atoa, ia au i ta ˈna ra mau ohipa: i te feia i imi i te hinuhinu, e te tura, e te pohe ore, i te tamau-maite-raa i te parau maitai, o te ora mure ore ïa: i te feia râ i mârô, e aore i haapao i te parau mau, i haapao râ i te parau-tia ore ra, o te riri ïa, e te pohe rahi.” — Roma 2:5-8.
14. Nafea ˈtu â tatou e nehenehe ai e faahanahana i te Atua, e eaha te uiraa ta tatou e nehenehe e uiui ia tatou iho?
14 Taa ê atu i te reira, te faaitoito maira o Paulo ia tatou ia apiti atu i roto i te hoê “ohipa maitatai” ra e faatura i te Atua e o te horoa i ta ˈna tuhaa ‘hanahana e te tura’. Te ohipa matamua ta tatou e nehenehe e rave i teie mahana o te ohipa ïa ta Iesu i faahiti i roto i te Mataio 28:19, 20 e na ô ra e: ‘E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te [varua moˈa]; ma te haapii atu ia ratou i te haapao i te mau mea atoa ta ˈu i parau atu ia outou na.’ I nia i te fenua taatoa nei, te haa nei e rave rahi milioni mau Ite no Iehova i roto i taua ohipa pororaa e haapiiraa e faahanahana ra i te Atua. Mai te reira atoa hoi no te feia e horoa nei i to ratou taime i roto i te taviniraa ma te taime taatoa e e pionie hoi ratou i te matahiti taatoa, aore ra i roto i ta ratou tau faafaaearaa ohipa aore ra haapiiraa. E, e nehenehe atura ïa tatou tataitahi e aniani ma te faufaa hoi e tei hea au i roto i taua ohipa nei. Ei hiˈoraa, e nehenehe ta tatou e uiui i teie nei uiraa: ‘Te faahanahana ra anei au i te “Atua e noaa ˈi te tiaturiraa” na roto i te apiti-rahi-raa ˈtu i roto i te ohipa pororaa?’
15. Eaha tei roohia i nia vetahi mau kerisetiano i te pae no te hanahana ta ratou e horoa nei no Iehova na roto i te arai o te ohipa pororaa?
15 Ua haaparuparu mai vetahi mau kerisetiano, tei riro hoi ei feia poro itoito e hia rahiraa matahiti, i ta ratou mau tutavaraa, e inaha, i teie mahana te apiti maira ratou i te tahi noa taime i roto i te ohipa faufaa roa oia hoi te haereraa e faariro i te mau taata ei pǐpǐ. Eita matou e hinaaro e parau no te mau taata tei roohia i te tahi fifi i te pae tino aore ra no te feia matahiti paari o te riro hoi i te faaiti mai i ta ratou ohipa pororaa, te hinaaro ra râ matou e parau no te mau Ite o te mau huru matahiti atoa. Inaha, aita o Paulo i faahiti i te parau no te hoê matahiti taa ê ia ˈna i aˈo atu i te mau kerisetiano ia ore e ‘rohirohi’. Oia mau, taa ê atu i te matahiti, te fifi inaha; e titau te apiti-tamau-raa ˈtu tatou i roto i te ohipa pororaa ia rave tatou i te tahi mau tutavaraa. Mai tei tupu paha i mutaa ihora, i te tau o Paulo, te parau nei vetahi i teie mahana e: ‘Ua rave vau i ta ˈu tuhaa a hia ˈtura matahiti i teie nei, na te feia apî atura ïa teie nei.’ — Galatia 6:9; Hebera 12:3.
16. Ia hiˈo tatou i roto i te tuhaa o ta tatou taviniraa, eaha te haamaitairaa ta tatou e nehenehe e huti mai?
16 Varavara roa te taata i na reira, tera râ e riro paha ïa outou i te parau e: ‘Inaha hoi, mai te reira anei to ˈu huru? Te apitiraa ˈtu vau i roto i te ohipa pororaa, mai mutaa ihora atoa anei?’ Ua faaiti mai tatou aore ra aita i ta tatou taviniraa, eiaha roa ˈtu ia moehia ia tatou e te tǎpǔ maira te “Atua e noaa ˈi te tiaturiraa” i te “hinuhinu, e te tura, e te hau, i te taata atoa i rave i te maitai ra”. (Roma 2:10.) Te auraa o te parau heleni ra ta Paulo e faaohipa ra i ǒ nei “rave ïa i te tahi mea, faahotu, faatupu”. Mea faufaa roa ia ore tatou ia roohia i te pohe o te mau Pharisea e te mau papai parau, e faahanahana noa na hoi i te Atua i to ratou vaha (Mareko 7:6; Apokalupo 2:10). Ia faaitoito to tatou mafatu ia tatou i te apiti atu i roto i te ohipa pororaa, te haapapu ra ïa tatou ia tatou iho e ia vetahi ê e te vai mau ra to tatou tiaturiraa. Te faatura ra tatou i to tatou Poiete, Te tumu o to tatou ora, e tei mua hoi ia tatou i te ravea e faaturahia mai ai tatou na ˈna, i teie nei e a muri noa ˈtu. — Luka 10:1, 2, 17-20.
E ta tatou mau taoˈa rarahi
17, 18. Nafea ˈtu â tatou e nehenehe ai e faahanahana i te Atua, e no te aha hoi e ore ai e tia ia na reira?
17 Te faaite maira te Maseli 3:9 e nafea ˈtu â ia faatura i te “Atua e noaa ˈi te tiaturiraa”: “E faatura ˈtu ia Iehova i ta oe ra mau taoˈa rarahi, e te oho matamua o ta oe atoa ra taoˈa ia tupu.” Mai teie te huru ta Spurell huriraa i teie nei irava: “A faahanahana ia Iehova e to mau taoˈa na e ma te taoˈa maitai roa ˈˈe e noaa mai ia oe.” — Tatararaa a te Faufaa Tahito ia au i te reo hebera iho (beretane).
18 I te mea hoi e i roto i te ao nei, ua matauhia vetahi mau ekalesiatiko no to ratou huru nounou taoˈa e no to ratou huru oraraa taoˈa rarahi, e rave rahi mau taata teie e tapea nei ia ratou no te horoa i te mau taoˈa na te mau Ekalesia. Oia mau, te tumu hoê roa ta vetahi mau faanahonahoraa faaroo e titau ra, mai te huru ra ïa e ia noaa rahi mai te faufaa (Apokalupo 18:4-8). Teie râ, aita roa ˈtu te titauraa taua mau taata faaroo nei i te moni e faaore ra i te parau mau a Maseli 3:9. Inaha hoi, nafea tatou e nehenehe ai e pee i taua aˈoraa nei i horoahia ma te faauruahia mai e te Atua a faaohipa ˈtu ai i ta tatou mau “taoˈa” no te ‘faatura ia Iehova’, te “Atua e noaa ˈi te tiaturiraa”?
19. A faaite mai e nafea râ vetahi i te faaohiparaa i te Maseli 3:9.
19 Te manaˈo nei te mau Ite no Iehova e ia hiˈohia te numera o te mau taata e rahi noa ˈtura, teie e farii nei i te parau no nia i te Basileia, mea faufaa roa ˈtura ïa ia faarahihia ta ratou mau piha putuputuraa aore ra ia hamani faahou te tahi mau piha apî. Tera ˈtura ïa te hoê ravea no te ‘faahanahana ia Iehova e ta ratou mau taoˈa rarahi’ ta te feia apî e te feia paari i maiti. Oia mau, ua opua roa ratou e turu i te haamauˈaraa i te pae no te paturaa i te fare; e no te tapea i taua opuaraa na ratou ra, e tia iho â ïa ia ratou ia haapae ia ratou i roto i te tahi mau tuhaa, mai te peu iho â râ e e maoro atu â te taime paturaa (Korinetia 2, 9:6, 7). Inaha, ia faaohipa tatou i ta tatou taoˈa mai te reira te huru, te faahanahana mau ra ïa tatou ia Iehova, no te mea te mau Piha o te Basileia o te mau vahi ïa i reira te mau kerisetiano e haamori ai ia ˈna e i reira hoi, i pihai iho i te mau taata e anaanatae ra i te parau mau, e noaa ˈi ia ratou i te ite no nia i te Atua. Te horoa maira te mau parau a Iesu i papaihia i roto i te Mataio 6:3, 4 i te haapapuraa e e faatura te Atua i te feia e na reira i te faatura ˈtu ia ˈna.
20. No te aha hoi e riro ai ei mea maitai ia hiˈopoa ia tatou iho mai te peu e e hinaaro tatou e faaohipa i te Maseli 3:9? b) Eaha te mau uiraa ta tatou e nehenehe e uiui ia tatou iho?
20 Haapao maitai râ! Ua parau mai Iesu e te tapitapiraa matamua a te mau Pharisea e te mau papai parau e ere roa ˈtu hoi te faaturaraa i te Atua: e rave na hoi ratou e ia riro ratou ei mau taata matamua o te fanaˈo roa i ta ratou mau taoˈa rarahi. No reira te aˈoraa e vai ra i roto i te Mataio 15:4-8 e faaitoito mai ai ia tatou ia hiˈopoa ia tatou iho ia ite tatou e nafea tatou ‘ia faatura i te Atua e ta tatou taoˈa rarahi’. (Ieremia 17:9, 10.) Ei hiˈoraa, mai te peu e te tere maitai ra te ohipa a te hoê kerisetiano a nehenehe atu ai oia e ora maitai, e nehenehe paha ïa oia e parau e e tia ia ˈna ia tamau â i te rave i te ohipa ma te taime taatoa ia noaa rahi mai ia ˈna te moni. E riro paha oia i te parau ia ˈna iho e: ‘Te rave nei hoi vetahi i te taviniraa pionie aore ra te haere ra i tera aore ra i tera vahi no te tavini ia Iehova i te vahi e hinaaro-rahi-hia ra te feia poro, ta ˈu râ huru taviniraa i te Atua, ia noaa rahi mai ïa te moni, ia nehenehe vau ia horoa i te tahi mau tino moni rarahi aˈe.’ E riro paha e mea faufaa roa te mau ǒ a taua kerisetiano nei, mea maitai râ ia aniani oia e: ‘Te faaite ra anei to ˈu huru oraraa e, ia hinaaro vau e ia noaa rahi mai te moni, na mua roa ˈˈe, no te faaohipa ïa i ta ˈu moni no te faahanahana i te Atua?’ (Luka 12:16-19; hiˈo Mareko 12:41-44). Aore ra: ‘E nehenehe anei ta ˈu e faanaho i ta ˈu mau ohipa no te horoa rahi atu â i to ˈu taime i roto i te ohipa faufaa roa ˈˈe e ravehia nei i to tatou nei tau oia hoi: te pororaa i te parau apî maitai?’ I te parau mau, noa ˈtu eaha te huru oraraa ta tatou e ora nei, e nehenehe ta tatou e hiˈopoa i ta tatou mau ohipa e rave ra e to tatou mau manaˈo e a aniani atu ai e: ‘Nafea hoi au e nehenehe ai e faarahi atu â i te faahanahana i Tei horoa mai no ˈu i te ora, te “Atua e noaa ˈi te tiaturiraa”?’
21. Eaha ïa te oaoaraa e tiai maira ia tatou ia faahanahana tatou ia Iehova mai teie atu nei?
21 E riro mau â Iehova i te haamauruuru mai ia tatou. Auê râ hoi oaoaraa e mai te peu e i teie nei e i roto i te mau tau i mua nei, e nehenehe ta ˈna e parau mai ia tatou i ta ˈna i parau atu i te Iseraela haapao maitai ra i te na ôraa ˈtu e: “No te mea here oe i mua ia ˈu, e ua faaturahia oe, e ua hinaaro vau ia oe”! (Isaia 43:4.) Te tǎpǔ maira Iehova i “te ora mure ore” ‘i te feia e imi nei i te hanahana e te tura’, i te feia e faaoromai mai nei “i roto i te hoê ohipa maitatai”. Oia mau, o ˈna te “Atua e noaa ˈi te tiaturiraa”!
Nafea ïa outou ia pahono mai?
◻ No nia i te hanahana ta te taata e tia ia horoa ˈtu no Iehova, eaha ta tatou e nehenehe e haapii mai no nia i te hiˈoraa o Iesu?
◻ Eaha te taa-ê-raa e itehia i roto i taua tuhaa nei i roto i te haerea o Eli e o Samuela?
◻ Nafea hoi outou e nehenehe ai e faarahi atu â i te faahanahana i te Atua, e eaha te nehenehe e noaa mai ia outou?
◻ Eaha te oraraa no a muri atu e tiai maira i te mau taata tei riro hoi te tapitapiraa matamua, te faahanahanaraa ïa i te “Atua e noaa ˈi te tiaturiraa”?